E Tamou i te Ora ei Tuanga no te Akaaerenga a te Atua

“Te ingoa o Iehova ra, e punanga ketaketa ïa: te oro nei te aronga tuatua-tika ki reira, e kua ora iora.”​—MASELI 18:10.

1. Kia tau ki ta Iesu pure, eaa te turanga ngata te vai nei te au Kerititiano ki roto?

I MUA poto ake i tona mateanga, kua pure a Iesu ki tona Metua i te rangi ra no tana au pipi. Ma te manakoanga aroa, kua tuatua aia: “Kua tuku atu au i taau tuatua kia ratou; e te riri nei to te ao nei ia ratou, no te mea kare ratou no teianei ao, mei iaku nei rai oki kare i to teianei ao. Kare au i pure ia koe e, ka apai ke atu koe ia ratou i teianei ao, kia tiaki maira koe ia ratou, auraka ei kino.” (Ioane 17:14, 15) Kua kite a Iesu e e ngai kino teianei ao no te au Kerititiano. Ka akaari ia i tona makitakita no ratou na te pikikaa anga ia ratou e te takinga kinoanga ia ratou. (Mataio 5:11, 12; 10:16, 17) Ka riro katoa ia ei tetai tumu no te viivii anga.​—2 Timoteo 4:10; 1 Ioane 2:15, 16.

2. Teiea te ngai e kiteai e te au Kerititiano te ora anga i te pae vaerua?

² Kua tuatua te apotetoro ko Ioane e ko te ao te ka makitakita i te au Kerititiano ko te aronga tei takake mai mei te Atua e tei raro ake i ta Satani akatere anga. (1 Ioane 5:19) E maata roa atu teianei ao i te putuputuanga Kerititiano, e ko Satani uaorai e ririnui maata roa atu i tetai ua atu tangata. No reira, ko tetai akakoko anga tikai te makitakita anga o teianei ao. Teiea te ngai i kiteaʼi e te au pipi a Iesu te ora anga i te pae vaerua? Na tetai tuatua i roto i te itiu o The Watchtower ia Titema 1, 1922 e akakite mai te pauanga: “Tei roto tatou i teianei i te ra kino ra. Te raveia nei te tamaki anga i rotopu i ta Satani akaaerenga e ta te Atua ra akaaerenga. E tamaki anga ketaketa ia.” I roto i teia maroanga, ko te akaaerenga a te Atua ra te ngai no te ora anga i te pae vaerua. Kare te tuatua “akaaerenga” i mama mai i roto i te Pipiria, e i te au mataiti o te 1920 ra, e tuatua ouia te “akaaerenga a te Atua” ra. Eaa i reira, teianei akaaerenga? E akapeea e kiteai e tatou te paruru anga i roto i te reira?

Te Akaaerenga a Iehova

3, 4. (a) Kia tau ki ta tetai tikitinari e The Watchtower, eaa tetai akaaerenga? (e) I roto i teea tu i raukai kia tapaia te pirianga taeake o te Au Kite o Iehova i te ao katoa nei ei tetai akaaerenga?

³ Tetai akaaerenga “e pupu akapapaia ia,” kia tau ki ta te Concise Oxford Dictionary akataka anga. Ma te reira i roto i te manako, ka kite tatou e no te mea kua akapapaia e te au apotetoro i te au Kerititiano o te anere mataiti mua ra ki roto i etai putuputuanga i reira i raro ake i te akaaere anga a tetai pupu akaaere i Ierusalema ra, e mea tika kia tuatua i taua “au taeake” ei tetai akaaerenga. (1 Petero 2:17) E akapapa anga aiteite to te Au Kite o Iehova i teia tuatau nei. Kua akamaroiroiia te taokotai anga o te pupu o te anere mataiti mua ra na te “meitaki i te tangata nei,” mei te “tiaki, e ei orometua.” Kua tutaka aere tetai papaki o ratou mei tetai putuputuanga ki tetai putuputuanga, e ko etai atu o te aronga pakari ra i roto ratou i te au putuputuanga. (Ephesia 4:8, 11, 12; Angaanga 20:28) Te akamaroiroi aiteite ra te aronga “meitaki” i te taokotai anga o te Au Kite o Iehova i teia tuatau nei.

⁴ Kua tuatua The Watchtower o te itiu o Noema 1, 1922 no te tuatua “akaaerenga”: “Ko tetai akaaerenga e taokotai anga au tangata no te akakoro anga kia rave i tetai akapapa anga akanooia ra.” Kua rave ua atu The Watchtower ra i te akataka anga e ko te tapa anga i te Au Kite o Iehova ra ei tetai akaaerenga kare i akariro ia ratou ei “tetai sect i te tu manako te taikuia ra taua tuatua ra, mari ra ko tona aite anga e te tauta ra te Aronga Apiipii Pipiria [te Au Kite o Iehova] kia rave i ta te Atua ra au akakoro anga e kia rave i te reira mei ta te Atu e rave ra i te au apinga ravarai, na roto i tetai tu papa meitaki.” (1 Korinetia 14:33) Kua akakite te apotetoro ko Paulo e ko te au Kerititiano i tona tuatau ra kua rave aiteite na roto i tetai tu papa meitaki. Kua akaaite atu aia i te pirianga Kerititiano akatainuia ra ki te kopapa tangata nei, e manganui ra tona au tuanga, te rave tataki tai ra i tana tuanga akapapaia kia raukai i te kopapa te rave kia tika tana angaanga. (1 Korinetia 12:12-26) Ko tetai akatutu anga meitaki te reira no tetai akaaerenga! Eaa ra te au Kerititiano i akapapaiai? Kia rave i ta “te Atua ra au akakoro anga,” kia rave i to te Atua ra anoano.

5. Eaa ta te Atua ra akaaerenga akara mataia?

⁵ Kua totouia mai i te Pipiria e ka taokotaiia te au Kerititiano mou i teia tuatau nei, ka apai kapitiia mai ki roto i tetai “enua” okotai ei tetai iti tangata okotai, “kia kakā [ratou] i rotopu ia ratou mei te rama i teianei ao.” (Isaia 66:8; Philipi 2:15) Kua tae te numero i teianei o teia iti tangata akaaereia kia tere atu i te rima e te apa mirioni. (Isaia 60:8-10, 22) Inara, kare te reira i te katoa anga o ta te Atua ra akaaerenga. Te kapiti katoaia maira te au angera.

6. I tona tu atea rava, koai ma to te akaaerenga a te Atua ra?

⁶ E manganui te au atianga i angaanga kapiti ei te au angera ma te au tavini tangata o te Atua ra. (Genese 28:12; Daniela 10:12-14; 12:1; Ebera 1:13, 14; Apokalupo 14:14-16) E tau tikai, i reira, The Watchtower te itiu o Me 15, 1925, i tuatua: “Te au angera tapu katoatoa e tuanga no te akaaerenga a te Atua.” Kapiti katoa oki, kua tuatua ia: “Ei te upoko o te akaaerenga a te Atua ra, tei iaia te mana katoa e te tika ko te Atu ko Iesu Karaiti [ia].” (Mataio 28:18) No reira, i tona tu atea katoa ra, ko te akaaerenga a te Atua ko to te rangi katoatoa ia e to te enua te angaanga kapiti ra i te rave anga i te anoano o te Atua. (Akara i te pia.) Mei teaa ra tetai angaanga meitaki kia riro ei tuanga no teia! E mei teaa oki tetai rekareka anga kia akara atu ki te tuatau ki mua e akapapaiai te au mea ora katoatoa, to te rangi e to te enua, kia akapaapaa i te Atua ko Iehova na roto i te taokotai anga! (Apokalupo 5:13, 14) Inara, eaa te paruru anga ta te akaaerenga a te Atua ra te oronga mai nei i teia tuatau?

Te Paruru Anga i Roto i ta te Atua Akaaerenga​—Ka Akapeea?

7. Na teea tu te paruru anga a te akaaerenga a te Atua ra ia tatou?

⁷ Ka rauka i te akaaerenga a te Atua te tauturu kia paruru ia tatou mei ia Satani e tana au timataanga kikite. (Ephesia 6:11) Te taomi ra Satani, te takinga kino ra, e te timata ra i te aronga akamori ia Iehova ma te akakoro anga okotai i tona manako: kia akaanga ke ia ratou i ‘te arataa e tau ei kia aere ratou ra.’ (Isaia 48:17; akaaite ia Mataio 4:1-11.) Kare ra e rauka ia tatou kia kopae takiri atu i te au rave kino anga i teianei akatereanga o te au mea nei. Inara, na to tatou pirianga vaitata ma te Atua e tana akaaerenga e akamaroiroi e te paruru ia tatou e ka tauturu ia tatou kia vai ki roto i “te arataa.” Ei tetai tupuanga, kare tatou e ngere i to tatou manakonako anga.

8. Akapeea ta te akaaerenga akara koreia a Iehova ra turu anga i tona au tavini i te enua nei?

⁸ Akapeea te oronga maianga a te akaaerenga a te Atua i teia paruru anga? Te mea mua, tei ia tatou te turu anga puapinga a te au tavini vaerua a Iehova ra. I to Iesu tuatau i raro ake i te taomi anga kino ra, kua taviniia mai aia e tetai angera. (Luka 22:43) I tona akakoko anga no te mate, kua akaora temeioia a Petero e tetai angera ra. (Angaanga 12:6-11) I te mea kare taua au tu temeio ra i teia tuatau nei, te taputouia mai nei ki te au tangata o Iehova te turu anga a te angera i ta ratou angaanga tutuanga. (Apokalupo 14:6, 7) E putuputu ratou kua rauka i te mana maata meitaki i te aro atuanga i te au tu ngata. (2 Korinetia 4:7) Pera katoa oki, te kite ra ratou e “te patia nei te Angela a Iehova i te puakapa, e pini ua ake te aronga i mataku iaia, e kua akaora ia ratou.”​—Salamo 34:7.

9, 10. Akapeea e raukai kia tuatuaia e ko “te ingoa o Iehova ra, e punanga ketaketa ïa,” e akapeea te akapiri anga i teia kaveinga ki te katoa anga o te akaaerenga a te Atua ra?

⁹ E paruru anga katoa oki ta Iehova ra akaaerenga akara mataia. Naea ra? Ia Maseli 18:10, ka tatau tatou: “Te ingoa o Iehova ra, e punanga ketaketa ïa: te oro nei te aronga tuatua-tika ki reira, e kua ora iora.” Kare te aite anga o teia e na te taikuanga ua i te ingoa o te Atua ra e oronga mai te paruru anga. Mari ra, ko ta tatou raveanga akapuanga i roto i te ingoa o te Atua te akataka maira e te irinaki ra tatou ia Iehova uaorai. (Salamo 20:1; 122:4) Te aite anga o te reira kia turu i tona tu ngateitei, te mouanga i tana au ture e te au kaveinga, e te akarongoanga i tana au taputou. (Salamo 8:1-9; Isaia 50:10; Ebera 11:6) Te kapiti ra ia i te orongaanga i te akamori anga kia Iehova anake ua. Ko te aronga anake tei akamori ia Iehova na roto i teia tu ka rauka kia tuatua ma te tata taramo ra: “E rekareka oki to tatou ngakau [ia Iehova]; te irinaki nei oki tatou i tona ingoa tapu.”​—Salamo 33:21; 124:8.

¹⁰ I teianei te katoatoa i roto i ta te Atua ra akaaerenga akara mataia te tuatua ra ma ta Mika katoa: “Ka aaere ra tatou i te ingoa o Iehova o to tatou Atua e tuatau ua atu.” (Mika 4:5) Te koropini nei te akaaerenga o teia tuatau i “te Iseraela o te Atua ra” tei tapaia ra i te Pipiria ko ‘tetai papaki tangata no tona ingoa.’ (Galatia 6:16; Angaanga 15:14; Isaia 43:6, 7; 1 Petero 2:17) No reira, e riro ei ei tuanga no te akaaerenga a Iehova tona aite anga kia riro ei tuanga no tetai papaki tangata tei kimi ra, e tei rauka ra, te paruru anga i roto i te ingoa o te Atua ra.

11. Na roto i teea au tu taka meitaki ta te akaaerenga a Iehova ra oronga anga te paruru anga no te aronga e tuanga ra no te reira?

¹¹ Kapiti katoa oki, ko te akaaerenga akara mataia a te Atua ra e pupu akarongo ia, e taokotai anga no te au taeake akarongo tei akamatutu ra e te akamaroiroi ra tetai i tetai. (Maseli 13:20; Roma 1:12) Ko tetai ngai ia te akono ra te au tiaki Kerititiano i te au mamoe, te akamaroiroi ra i te aronga maki e te maromaroa, e te kimi ra kia akaora i te aronga tei topa ra. (Isaia 32:1, 2; 1 Petero 5:2-4) Te oronga ra “te tavini akono meitaki e te pakari” i ‘te kai i te ora mou ra’ na roto i te akaaerenga. (Mataio 24:45) Kua oronga taua “tavini” ra, e au Kerititiano akatainuia i te au mea memeitaki katoa i te pae vaerua​—te kite tika tei akatumuia ki runga i te Pipiria te ka taki atu ki te ora mutu kore. (Ioane 17:3) E akameitaki i te arataki anga mei ko mai i te “tavini” ra, kua tauturuia te au Kerititiano kia tamou marie i te au turanga akono tau e “kia pakari [ratou] mei te ovi, e te apa kore mei te kukupa ra” i roto i te reva kino te koropini ra ia ratou. (Mataio 10:16) E te tauturu tamouia ra ratou “kia maata nei te rave anga i te angaanga a te Atu,” ko te reira uaorai oki tetai paruru anga ririnui.​—1 Korinetia 15:58.

Koai ma e Tuanga no te Akaaerenga a te Atua?

12. Koai te akatakaia ra ei tuanga no te akaaerenga a te Atua i te rangi ra?

¹² I te mea te papa mai nei teianei paruru anga ki te aronga e tuanga no te akaaerenga a te Atua, koai ma te kapitiia ra i teia? No runga i te akaaerenga i te rangi ra, kare e ekoko anga i te pau anga ki teianei uianga. Ko Satani ratou ko tana au angera kare ratou i te rangi i teianei. I tetai pae, te vaira te au angera tiratiratu i reira “ki te uipa anga maata ra.” Kua kite te apotetoro ko Ioane e i te tuatau openga ra, ko “tetai Punua-mamoe,” te au kerupi (“nga mea ora e a”), e te “pupu angela katoa kare e ope kia tatau ra” tei vaitata ua ra ki te terono o te Atua. Ma ratou katoa ra ko te aronga pakari e 24​—te akatutu maira i te au Kerititiano akatainuia tei tomo takere ki roto i to ratou tuanga kaka i te rangi ra. (Ebera 12:22, 23; Apokalupo 5:6, 11; 12:7-12) Pouroa ratou e tuanga no te akaaerenga a te Atua ra. Inara, i roto i te au tangata nei, kare i marama tikai te akataka anga.

13. Akapeea ta Iesu ra akataka anga i te aronga ei tuanga no ta te Atua akaaerenga e te aronga kare ra?

¹³ Kua tuatua a Iesu no tetai papaki te karanga ra e te aru ra iaia: “E manganui te ka tuatua mai kiaku i taua rā ra, E te Atu, e te Atu, kare aina kua apii matou ma toou ingoa; e kua tuaru i te au demoni i toou ingoa; e kua rave i te au akairo e manganui ma toou ingoa? Ko taku ïa e karanga atu, Kare takiri au i kite ia kotou: ka aere ke atu kotou, te aronga rave tuatua kino.” (Mataio 7:22, 23) Me e tangata rave tuatua kino tetai, kare takiri aia i te tuanga no ta te Atua ra akaaerenga, noatu eaa tana ka karanga, e noatu teiea tana ngai e aere ra i te akamori anga. Kua akakite katoa a Iesu e akapeea te akataka anga i tetai e tuanga ia no te akaaerenga a te Atua ra. Kua tuatua aia: “Kare te aronga e tuatua mai iaku e, E te Atu, e te Atu, e ope katoatoa i te tae ki te basileia ra ki te ao; ko tei akono ra i te anoano o taku Metua i te ao ra.”​—Mataio 7:21.

14. Eaa nga tuanga o te anoano o te Atua ra te akatakaia ra ei apainga ki runga i te aronga e tuanga ra ratou no te akaaerenga a te Atua?

¹⁴ No reira, e riro ei ei tuanga no te akaaerenga a te Atua ra​—ko “te basileia ra ki te ao” te tuanga maata ia​—ka tau tetai kia rave i te anoano o te Atua ra. Eaa tona anoano? Kua akataka a Paulo i tetai tu puapinga maata o te reira i tana tuatua anga: “Ko [te Atua] tei inangaro i te tangata katoatoa kia ora, e kia rauka te kite i te tuatua-mou.” (1 Timoteo 2:4) Me ka kimi tikai tetai tangata kia rauka te kite tika no te Pipiria mai, kia akono i te reira i tona oraanga, e kia akakite atu i te reira ki “te tangata katoatoa,” te rave ra aia i te anoano o te Atua ra. (Mataio 28:19, 20; Roma 10:13-15) Ko te anoano katoa ia o te Atua e kia angaiia te au mamoe a Iehova ra e kia akonoia oki. (Ioane 21:15-17) E tuanga puapinga maata ta te au uipaanga Kerititiano i roto i teia. Ko tetai tangata te rauka ua ra iaia kia aere atu ki taua au uipaanga ra inara te kore ua ra e aere atu te ngere ra i te ariki anga i tona ngai i roto i te akaaerenga a te Atua ra.​—Ebera 10:23-25.

Akaoa Anga ma Teianei Ao

15. Eaa te akamatakiteanga ta Iakobo i oronga ki te au putuputuanga o tona tuatau ra?

¹⁵ I etai 30 mataiti i muri io i to Iesu ra mate anga, kua akataka mai tona apa teina ko Iakobo i etai atu au tumu te ka akakore i te ngai no tetai i roto i te akaaerenga a te Atua ra. Kua tata aia: “E te au akaturi tane, e te au akaturi vaine, kare kotou i kite e ko te anoano i teianei ao, e enemi ia i te Atua ra? E teianei ko te anoano e ei oa aia no teianei ao, e enemi ïa tangata no te Atua.” (Iakobo 4:4) Ko tetai enemi no te Atua ra kare takiri aia i te tuanga no tana akaaerenga. Eaa, i reira, te akaoa anga ma teianei ao? Kua akatakaia mai ia ei raveanga i te au tu tuke tuke, mei te tatanuanga me kare te piri anga ki roto i te au taokotai anga kikino ra. Kapiti katoa, kua akara tikai a Iakobo no tetai apinga taka meitaki​—koia te au tu manako tarevake ra te ka taki atu ki te tu akono tau kore.

16. Eaa te tumu maata tei koropini i te akamatakiteanga a Iakobo e ko tei riro ei oa no teianei ao e enemi aia no te Atua?

¹⁶ Ia Iakobo 4:1-3 ka tatau tatou: “Noea te tamaki e te tauetono maata i roto ia kotou na? kare aina no ko na no to kotou anoano tika kore ra, ko tei tamaki ua ki roto i to kotou au melo na? Te maata ua ra te anoano, e kare rai i rauka: te ta ua na kotou, e te umuumu ua na, e kare rai i rauka: te tamaki na, te karo ua na, e kare akerai, no te mea kare kotou i pati. Te pati ra oki kotou, e kare a kotou i rauka, no te mea te apa na ta kotou pati anga, kia pou i te kaimoumouia e kotou i to kotou anoano tika kore ra.” No muri ake i te tataanga i teia au tuatua i akamatakite ei a Iakobo i te akaoa anga ma teianei ao.

17. Na roto i teea tu te au “tamaki” e te au “māro” i roto i te putuputuanga Kerititiano o te anere mataiti mua ra?

¹⁷ I etai anere mataiti i muri ake i te mateanga a Iakobo, i tamaki ei te au Kerititiano pikikaa ra e i ta uai tetai i tetai na te tu kopapa tikai. Inara, i tata atu a Iakobo ki te au mema o te anere mataiti mua ra o “te Iseraela o te Atua ra,” ko ratou te ‘kau taunga e te ui ariki’ manakoia maira. (Apokalupo 20:6) Kare ratou i ta ua tetai i tetai me kare i tamate tetai i tetai i te au tamaki anga tikai. No reira eaa ra a Iakobo i tuatuai no taua au apinga ra i roto i te au Kerititiano? E tika, kua tapa te apotetoro ko Ioane i tetai ua atu tei makitakita i tona taeake e ta tangata ia. E kua tuatua a Paulo no etai tu maro anga e te au pekapeka i roto i te au putuputuanga ei “tamaki” e te “māro.” (Tito 3:9; 2 Timoteo 2:14; 1 Ioane 3:15-17) Na teia tu, i te akara anga kua manako a Iakobo te kore anga e aroa i te au taeake Kerititiano. I roto ia ratou uaorai, te akono ra te au Kerititiano na roto i tetai tu te aiteite ra ki te tu o te aronga i te ao me akono i tetai e tetai.

18. Eaa te ka rauka kia taki atu ki te au angaanga e te au manako aroa kore i roto i te au Kerititiano ra?

¹⁸ Eaa ra taua au apinga ra i tupu ei ki roto i te au putuputuanga Kerititiano? No te au tu manako tarevake, mei te morimori apinga rai e “te anoano tika kore ra.” Ka rauka katoa i te ngakau parau, te vareae, e te noinoi kia taputa i te aroaanga taeake Kerititiano i roto i tetai putuputuanga ra. (Iakobo 3:6, 14) Na taua au tu manako ra e akariro i tetai ei oa no teianei ao e, no reira, ei enemi ia no te Atua ra. Kare tetai tei akamou ra i te au tu manako ra mei teia ra e tau kia manakonako atu kia akamanakoia mai ei tuanga no ta te Atua ra akaaerenga.

19. (a) Koai tikai ka tau kia akaapaia me ka kite tetai Kerititiano e te akaia ra te manakoanga tarevake ki roto i tona ngakau? (e) Akapeea e raukai i tetai Kerititiano te akakore i te manako tarevake?

¹⁹ Koai ta tatou ka akaapa me ka kitea e tatou te reira manakoanga tarevake ra i te akaangaia ki roto i to tatou ngakau? Ko Satani? No tetai tuanga, ae. Koia oki “te ariki mana o te reva” o teianei ao, te totoa atea ra taua tu manako ra i roto i reira. (Ephesia 2:1, 2; Tito 2:12) Inara, te mea matauia te vaira te au aka o te manakoanga tarevake i roto i to tatou uaorai kopapa apa ua nei. I muri ake i te akamatakiteanga i te akaoa anga ma teianei ao, kua tata a Iakobo: “Te manako na kotou e, e pikikaa ta te tuatua i tataia ra, e akatupu aina te Vaerua i noo ki roto ia tatou nei i te vareae?” (Iakobo 4:5) E manako anga to tatou pouroa kia rave i te tarevake mei te anau mai anga rai. (Genese 8:21; Roma 7:18-20) Inara, ka rauka ia tatou kia maro atu i taua manako anga ra me ka akatika i to tatou au tu paruparu e ka irinaki atu ei i ta Iehova ra tauturu kia autu i te reira. Kua tuatua a Iakobo: “E oronga maira [te Atua] i te aroa ua e kia maata mairai [i to tatou manako anga vareae mei te anau mai anga ra].” (Iakobo 4:6) E akameitaki i te tauturu a te vaerua tapu o te Atua ra e te turu anga a te au taeake Kerititiano tiratiratu ra, e na roto i te puapinga o te atinga oko o Iesu, kare te au Kerititiano tiratiratu e topa no te au tu paruparu o to ratou kopapa. (Roma 7:24, 25) Te ora nei ratou i roto i ta te Atua ra akaaerenga, ei au oa no te Atua, kare no teianei ao.

20. Eaa te au akameitaki anga apinganui te rekarekaia ra e te aronga e tuanga ratou no ta te Atua akaaerenga

²⁰ Te taputou maira te Pipiria: “Ka oronga mai a Iehova i te maroiroi no tona ra au tangata; e akameitaki mai a Iehova i tona au tangata i te au.” (Salamo 29:11) Me e tuanga tikai tatou no to Iehova ra iti tangata no tana akaaerenga akara mataia, ka o atu tatou ki te maroiroi tana e oronga maira e ka rekareka oki i te au tana e akameitaki maira i tona au tangata. E tika, e maata rava atu te ao o Satani i te akaaerenga akara mataia a Iehova, e e maata atu to Satani ririnui i to tatou nei. Inara ko Iehova te Mana Katoatoa. Kare e rauka kia akaviia tona mana rave angaanga. Kua taokotai katoaia mai tana au angera mana ma tatou katoa nei i te tavinianga i te Atua ra. No reira, noatu te au tu makitakita ta tatou e aro atu nei, ka rauka ia tatou kia tu mou ngaueue kore. Mei ia Iesu rai, ka rauka ia tatou kia re i teianei ao.​—Ioane 16:33; 1 Ioane 4:4.

Ka Rauka Ainei ia Koe te Akataka?

◻ Eaa te akaaerenga akara mataia a te Atua ra?

◻ Na roto i teea au tu te oronga maira te akaaerenga a te Atua ra i te paruru anga?

◻ Koai ma ei tuanga no ta te Atua ra akaaerenga?

◻ Akapeea e raukai ia tatou kia kopae ke i te riroanga ei au oa no teianei ao?

[Pia i te kapi 9]

Eaa te Akaaerenga a te Atua?

I roto i te au puka a te Au Kite o Iehova, te taikuia ra te tuatua “akaaerenga a te Atua” i roto i nga tu e toru.

1 Te akaaerenga akara koreia a Iehova i te rangi ra no te au mea ora vaerua tiratiratu ra. Te tapaia ra teia ko “Ierusalema i runga ra” i roto i te Pipiria.​—Galatia 4:26.

2 Ta Iehova ra akaaerenga tangata akara mataia ra. I teia tuatau, ko te toenga o tei akatainuia te kapitiia atura e te urupu maata.

3 Ta Iehova ra akaaerenga i te ao katoa e pini ua ake. I teia tuatau, ko te akaaerenga a Iehova i te rangi ra ia kapiti katoa ma tana aronga akatainuia, tana au tamariki akatuangaia i runga i te enua nei, e manakonako anga vaerua ra to ratou. I te tuatau ki mua, ka kapiti katoa te reira i te au tangata akaapa koreia ra ki runga i te enua nei.

[Tutu i te kapi 10]

Te orongaia maira te kai vaerua meitaki na roto i te akaaerenga a Iehova ra