Ka Rauka ia Tatou Kia Vai Tiamā

1. Eaa ta te manganui o te tangata e manako ra e te meitaki ua ra?

TE NOO nei tatou i roto i tetai ao kī i te ainga tau kore. Ei akaraanga, maata te tangata e manako ra e te meitaki ua ra no te au tane kia piri ki te tane e te vaine ki te vaine, me kore kia piri ki tetai kare i te tokorua akaipoipo nona. Kua kī katoa te au teata, au puka, au imene e te au akakitekiteanga i te ainga tau kore. (Salamo 12:8) Inara ka rauka ia Iehova i te tauturu ia tatou kia akono i tetai oraanga te akamareka ra iaia. Ae, ka rauka ia tatou tetai oraanga tiamā e te viivii kore i roto i teia ao tau kore.​—E tatau ia 1 Tesalonia 4:3-5.

2, 3. (a) Eaa ra tatou ka patoi ei i te au anoano tika kore? (e) Eaa ta tatou ka uriuri i roto i teia atikara?

² Ei akamareka ia Iehova, e kopae tatou i te au mea ravarai tana e rikarika ra. Inara no to tatou tu apa, penei ka akavareia tatou e te tu ainga tau kore mei tetai ika rai ka akavareia e tetai maunu. Me akamata tatou i te manako no runga i te ainga tau kore, kia viviki tatou i te kopae i te reira. Me kare tatou e rave i teia, ka pakari atu te inangaro no te ainga tau kore, e me timataia tatou kia rave i te ara, ka rave tatou i te reira. Mei ta te Pipiria tikai e akakite ra: “E kua to ta te anoano tika kore ra, anau maira tana ko te ara.”​—E tatau ia Iakobo 1:14, 15

³ Ka tupu mai te anoano tika kore i roto i to tatou ngakau. No reira rai kia matakite tatou i ta tatou e inangaro ra. Me patoi tatou i te au anoano tika kore, kare tatou e rave i te ainga tau kore e te kino ta te reira ka akatupu mai. (Galatia 5:16) I roto i teia atikara, ka uriuri tatou e toru ravenga te ka tauturu ia tatou kia patoi i te au anoano tika kore: to tatou pirianga kia Iehova, te akoanga i roto i tana Tuatua, e te tauturu mei te au Kerititiano pakari.

“E AKAVAITATA ATU KI TE ATUA”

4. Eaa ra i puapinga ai no tatou kia akavaitata atu kia Iehova?

⁴ Te akakite maira te Pipiria ki te aronga e inangaro ra i te “akavaitata atu ki te Atua” kia “orei [i to ratou] rima” e kia “tamā [i to ratou] ngakau.” (Iakobo 4:8) Me riro mai a Iehova ei oa piri vaitata no tatou, ka inangaro tatou i te akamareka iaia na roto i ta tatou e rave ra e ta tatou e manako ra. Me tiamā to tatou au manako e te viivii kore, ka mā katoa to tatou ngakau. (Salamo 24:3, 4; 51:6; Philipi 4:8) Te mārama maira a Iehova e e tu apa to tatou e ka manako rai tatou no runga i te au mea tau kore. Inara kare tatou e inangaro i te akamaromaroa ia Iehova, no reira ka rave tatou i ta tatou ka rauka i te patoi atu i te au manako tarevake. (Genese 6:5, 6) Ka rave tatou i te au mea ravarai kia vai tiamā ua to tatou au manako.

5, 6. Akapeea te pure te tauturu anga ia tatou kia patoi pakari atu i te au anoano tika kore?

⁵ Me pure ua rai tatou no ta Iehova tauturu, ka tauturu mai aia ia tatou kia patoi pakari atu i te au manako tau kore. Te oronga maira aia i tona vaerua tapu kia akaketaketa ia tatou kia vai tiamā ua. Me pure tatou, ka rauka ia tatou i te akakite kia Iehova e te inangaro ra tatou kia mareka mai aia i ta tatou e manako ra. (Salamo 19:14) Ka pati akaaka tatou kiaia kia akara mai me e au anoano tika kore to roto i to tatou ngakau te ka akakeu ia tatou kia ara. (Salamo 139:23, 24) E pati ua rai kia Iehova kia tauturu mai ia koe kia patoi i te ainga tau kore e kia rave i te mea tika noatu e e ngatā te reira.​—Mataio 6:13.

⁶ I mua ake ka apii ei tatou no runga ia Iehova, penei e reka ana tatou i te rave i te au mea kare aia e mareka ana, e te tauta nei rai tatou i te patoi atu i teia au anoano tika kore. Inara ka tauturu mai a Iehova ia tatou kia taui, e kia rave i te au mea tana e mareka maira. Ei akaraanga, muri ake te akaturi anga te Ariki ko Davida kia Bate-seba, kua tataraara aia e kua pati akatenga kia Iehova kia oronga mai kiaia “te ngakau mā” e kia tauturu iaia kia akarongo ki te Atua. (Salamo 51:10, 12) No reira me e au anoano tau kore to tatou i mua ana e te patoi pakari nei rai tatou i te reira, ka tauturu mai a Iehova ia tatou kia pakari atu to tatou inangaro i te akarongo kiaia e kia rave i te mea tika. Ka tauturu mai aia ia tatou kia akatere i to tatou au manako tarevake.​—Salamo 119:133.

“EI ARONGA RAVE OKI KOTOU I TE TUATUA NEI”

7. Akapeea te Tuatua a te Atua te tauturu anga ia tatou kia patoi atu i te au manako tau kore?

⁷ Ka rauka ia Iehova i te pau mai i ta tatou pure no tetai tauturu na roto i tana Tuatua, te Pipiria. I roto i reira, ka kite mai tatou e e viivii kore te tu pakari o te Atua. (Iakobo 3:17) Me tatau tatou i te Pipiria i te au rā ravarai, ka akakī tatou i to tatou manako ki te au manako viivii kore. (Salamo 19:7, 11; 119:9, 11) Tei roto katoa i te Pipiria te au akaraanga e te au akamatakiteanga te ka tauturu ia tatou kia patoi atu i te au manako e te au anoano tika kore.

8, 9. (a) Eaa ra tetai tangata mapu i piri ainga ai ki tetai vaine akaturi? (e) Ka tauturu te akaraanga i roto ia Maseli pene 7 ia tatou kia kopae i teea au turanga?

⁸ I roto ia Maseli 5:8, te akamatakite maira te Tuatua a te Atua ia tatou kia atea ke mai mei te ainga tau kore. I roto ia Maseli pene 7, ka tatau tatou i tetai tua no tetai tangata mapu tei oriori aere i te po vaitata atu ki te are o tetai vaine akaturi. Te tu ua ra teia vaine i te pae mataara e aao ra i te “kakau o te akaturi.” Kua aravei atu teia vaine iaia, kua takave e kua ongi iaia, e kua tuatua i te au mea tei akatupu i te au anoano tau kore i roto iaia. Kare te tangata mapu i patoi ana i te reira au anoano e tei tupu mai, kua piri ainga atu aia ki tera vaine. Noatu e kare aia i akakoro ana i te rave i te ara, kua rave aia i te reira. Tei tupu mai, kua kino tona akava ngakau e tona oraanga. Naringa aia i mārama i te kino ka tupu mai, ka akaatea ke mai aia mei tera vaine!​—Maseli 7:6-27.

⁹ Penei ka aite tatou mei tera tangata mapu rai e ka rave tatou i te au ikianga tarevake no te mea kare tatou i kite i te kino ka tupu mai. Ei akaraanga, i te po, ka akaari mai tetai au ngai i runga i te tivi te au porokaramu tau kore, no reira e mea kino i te tauiui i te porokaramu tivi kia kite e eaa to runga i te tivi. E mea kino katoa i te akara ki runga i te au ngai o te Initaneti me kare koe i kite eaa to runga i reira, pera katoa te pukapukaanga i runga i te Initaneti, me kore te akara anga i te au Web site te akaari maira i te au tutu tau kore te ka taki atu ki te au ravenga ainga viivii. I roto i teia au turanga, ka riro ta tatou e akara ra i te akakeu i te au anoano tika kore i roto ia tatou, e ka taki atu teia ia tatou kia akarongo kore ia Iehova.

10. Eaa ra te akameamea anga i riro ei ei mea kino? (Akara i te tutu mua o teia atikara.)

¹⁰ Te akakite katoa maira te Pipiria e akapeea te au tane e te au vaine me akono i tetai e tetai. (E tatau ia 1 Timoteo 5:2.) Ka akaari ua te au Kerititiano i te inangaro ki to ratou tokorua akaipoipo me kore ki tetai ta ratou ka inangaro i te akaipoipo. Kare ratou e akameamea atu i tetai ke. Penei ka manako tetai pae e me akameamea ratou i tetai tangata na te rave anga i te au peu akameamea, kare te reira i te mea kino no te mea kare ratou e amiri ra i tera tangata. Inara me akameamea tetai nga tangata i tetai e tetai, ka akatupu raua i te manako tau kore te ka taki ia raua kia rave i te ainga tau kore. Kua tupu ana teia i mua ana, e ka tupu akaou te reira.

11. Eaa te apiianga ta tatou ka kite mai mei te akaraanga o Iosepha?

¹¹ E akaraanga meitaki to Iosepha no tatou. Kua tauta te vaine a Potiphara i te timata ia Iosepha kia piri ainga atu kiaia. Kua patoi a Iosepha iaia, inara kare tera vaine i akamutu ana i te timata iaia. I te au rā ravarai, kua pati aia kia Iosepha kia “piri atu” kiaia. (Genese 39:7, 8, 10) Kua akamārama mai tetai tangata kite no runga i te Pipiria e te irinaki ra te vaine a Potiphara e me ko raua anake ua, ka inangaro mai a Iosepha iaia. Inara kua papu to Iosepha manako e kare rava aia e ariu atu ki te akameamea a teia vaine, e kare aia i akameamea atu ana iaia. Kare aia i akatika ana i tetai anoano tarevake kia tupu mai i roto i tona ngakau. I te opu mai anga taua vaine ra i te kakau o Iosepha e kua marō iaia kia piri ainga raua, “kua akaruke atura [a Iosepha] i tona kakau i tona rima, e oro maira, e tae maira ki vao.”​—Genese 39:12.

12. Eaa tatou i kite ei e ka riro ta tatou e akara ra i te akakeu i to tatou ngakau?

¹² Kua akamatakite mai a Iesu e ka riro ta tatou e akara ra i te akakeu i to tatou ngakau e te akatupu i te au anoano tarevake no te ainga. Akakite aia e: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mataio 5:28) Ko teia tei tupu ki te Ariki ko Davida. “I runga i taua tapoki are ra tona kite anga atu i tetai vaine, te paî ra iaia uaorai,” inara kua akara ua atu aia i tera vaine e te akamanako anga iaia. (2 Samuela 11:2) Noatu e e vaine aia na tetai tangata ke, kua inangaro a Davida i tera vaine e kua akaturi atu kiaia.

13. Eaa ra tatou ka anoanoia ai kia papau i tetai “koreromotu” ki to tatou nga mata, e akapeea tatou me rave i te reira?

¹³ Me inangaro tatou i te patoi i te au manako tau kore, ka anoanoia tatou kia aru i te akaraanga o Iobu. Kua tuatua aia e: “Kua papau au i te koreromotu i oku nei mata.” (Iobu 31:1, 7, 9) Ka aru tatou i te tu o Iobu na te iki anga kia kore rava tatou e manako atu i te au manako tau kore no runga i tetai tane me kore vaine ta tatou ka akara atu. E me kite tatou i te au tutu ainga i runga i te komupiuta, te tutu akakitekiteanga, tetai makatini, me kore i tetai ngai ke atu, kia viviki tatou i te akara ke atu.

14. Eaa ta tatou ka rave kia vai tiamā?

¹⁴ Me akamanako koe i ta tatou i uriuri ana, ka kite mai koe e ka anoanoia kia maata atu taau patoi pakari anga i te au anoano tika kore. Me anoanoia koe kia rave i te au tauianga, e rave viviki i te reira! Me akarongo koe ki ta Iehova e tuatua maira, ka rauka ia koe i te patoi atu i te ainga tau kore e kia vai tiamā.​—E tatau ia Iakobo 1:21-25.

“E TIKI AIA I TE ARONGA PAKARI”

15. Me te ngata ra ia tatou i te patoi pakari atu i te au anoano tarevake, eaa ra i puapinga ai kia pati no tetai tauturu?

¹⁵ Me te ngata ra ia koe i te patoi pakari i te au anoano tika kore, e tuatua ki tetai taeake i roto i te putuputuanga kua roa i te tavini anga ia Iehova te ka rauka i te oronga mai i te tauturu mei roto i te Tuatua a te Atua. Penei ka ngata ia koe i te tuatua atu ki tetai ke no runga i toou au manamanata, inara e mea puapinga kia pati no tetai tauturu. (Maseli 18:1; Ebera 3:12, 13) Ka rauka i te au Kerititiano pakari i te tauturu ia koe kia kite mai e ka anoanoia koe kia rave i te au tauianga. Me koia ïa, e rave i taua au tauianga ra kia riro rai koe ei oa no Iehova.

16, 17 (a) Akapeea te aronga pakari i te tauturu anga i te aronga e ngata ra i te patoi pakari i te au anoano tau kore? Oronga mai i tetai akaraanga. (e) Eaa ra i puapinga ai no te aronga e akarakara ra i te au ravenga ainga viivii kia pati viviki no tetai tauturu?

¹⁶ Kua tau meitaki te aronga pakari i roto i ta tatou putuputuanga i te tauturu mai ia tatou. (E tatau ia Iakobo 5:13-15.) No te au mataiti e manganui, kua kite mai tetai tangata mapu i Brazil e e ngata tikai i te patoi pakari i te au anoano tarevake. Karanga aia e: “Kua kite au e kare toku au manako e akamareka ra ia Iehova, inara e akamā tikai toku i te akakite ki tetai ke i taku e manako ra.” Kua kite mai tetai tangata pakari e te anoano ra teia mapu i tetai tauturu e kua akamaroiroi atu iaia kia pati ki te aronga pakari kia tauturu iaia. Akakite mai teia mapu e: “Kua poitirere au i te tu aroa o te aronga pakari, e tu aroa tikai to ratou e te mārama e kare au i manako e kua tau au i te reira. Kua akarongo meitaki mai ratou i toku au manamanata. Kua taangaanga ratou i te Pipiria i te akapapu mai i to Iehova aroa noku e kua pure ratou noku. Kua māmā ua i reira iaku i te āriki i te akoanga Pipiria ta ratou i oronga mai.” I muri ake te akaketaketa anga aia i tona pirianga kia Iehova, akakite mai aia e: “Kua kite mai au i te puapinga i te kimi tauturu, eiaa kia tauta i te apai i taku uaorai apainga.”

¹⁷ Me te akarakara ra koe i te au ravenga ainga viivii, kia viviki koe i te pati i tetai tauturu. Me kare koe e pati viviki i tetai tauturu, aere ua rai ka rave koe i te ainga tau kore. E oti ka tamamae koe i tetai ke e ka akakino mai te au tangata ia Iehova. E maata tei pati i te aronga pakari no tetai tauturu e kua āriki i ta ratou akoanga kia akamareka ia Iehova e kia noo ua ki roto i te putuputuanga Kerititiano.​—Salamo 141:5; Ebera 12:5, 6; Iakobo 1:15.

TAUTA KIA VAI TIAMĀ UA!

18. Eaa taau ka tauta i te rave?

¹⁸ Te maata atura te au tu tau kore i roto i to Satani ao. Inara te tauta pakari nei te au tavini o Iehova kia tamou i te au manako viivii kore e te tiamā. Te rekareka maata nei a Iehova i teia au Kerititiano. Kia akavaitata ua rai tatou kia Iehova e kia aru i te akoanga mei roto i tana Tuatua e te putuputuanga Kerititiano. Me rave tatou i teia, ka mataora tatou e ka mā to tatou akava ngakau. (Salamo 119:5, 6) A te tuatau ki mua me akaateaia a Satani, ka ora tatou e tuatau ua atu i roto i te ao ou mā o te Atua.