“E Akavaitata Atu ki te Atua”

“E akavaitata atu ki te Atua, e nana e akavaitata mai kia kotou na.”​—IAKOBO 4:8.

1, 2. (a) Eaa ta te au tangata e tuatua putuputu ana? (e) Eaa ta Iakobo akamaroiroi anga i oronga, e eaa te reira i umuumuiai?

“TEI ia tatou te Atua.” Kua akamanea taua au tuatua i te au akatutu anga pa enua e pera katoa oki i te au kakau o te au vaeau. “Ko te Atua to matou irinaki anga” kua taraiia ki runga i te au moni toka e manganui e te au moni pepa i teia tuatau nei. E mea matauia no te au tangata kia karanga e e pirianga vaitata to ratou ki te Atua. Inara, kare ainei koe e akatika, e ko te raukaanga o taua pirianga ra te umuumuia ra kia maata rava atu i te tuatua ua anga no te reira me kare te akaariarianga i te au tuatua?

² Te akaari maira te Pipiria e ka rauka tetai pirianga ma te Atua. Inara te umuumuia ra te tauta anga. Noatu rai ko tetai papaki katoa o te au Kerititiano akatainuia i te anere mataiti mua ra kua umuumuia kia akamaroiroi atu i to ratou pirianga ma te Atua ko Iehova. Kua akamatakite atu te akaaere Kerititiano ko Iakobo i tetai papaki no to ratou pae kopapa e te ngere anga i te tu ma i te pae vaerua. I roto i te reira akoanga, kua oronga atu aia i teia akamaroiroi anga ririnui: “E akavaitata atu ki te Atua, e nana e akavaitata mai kia kotou na.” (Iakobo 4:1-12) Eaa te aiteanga o ta Iakobo tuatua “e akavaitata”?

3, 4. (a) Eaa tei akamaaraia atu ki etai o te aronga tatau i ta Iakobo ra tataanga i te anere mataiti mua ra na te tuatua anga kia “akavaitata atu ki te Atua”? (e) Eaa ra tatou i papu ei e ka rauka te akavaitata atu ki te Atua?

³ Kua taiku a Iakobo i tetai tuatua tei matauia ra e te aronga e manganui tei tatau ra i tana reta. Kua oronga atu te Ture a Mose ki te kau taunga i te au apiianga taka meitaki e akapeea te “akavaitata mai kia,” Iehova ra no tona au tangata. (Exodo 19:22) Penei kua akamaaraia atu te aronga tatau i te reta a Iakobo ra e te akavaitata atu anga kia Iehova kare i tetai apinga meangiti ua. Ko Iehova te peretana turanga teitei rava i te ao katoa e pini ua ake.

⁴ I tetai pae, mei ta tetai tangata apiiia i te Pipiria i akakite mai, “teia akamaroiroi anga [ia Iakobo 4:8] te akakite maira i tetai irinaki anga ririnui.” Kua kite a Iakobo e i pati aroa mai ana a Iehova i te au tangata apa ua nei kia akavaitata atu Kiaia. (2 Paraleipomeno 15:2) Na te atinga o Iesu i akatuera i te aerenga no te akavaitata atu kia Iehova na roto i te tu maata atu. (Ephesia 3:11, 12) I teia tuatau, te aerenga no te akavaitata anga ki te Atua kua akatueraia ki te aronga e au mirioni ua atu! Inara, akapeea tatou i te rave anga i teia atianga meitaki? Ka akamanako poto ua tatou e toru nga ravenga e raukai ia tatou i te akavaitata atu ki te Atua ko Iehova.

Kia Rave Ua Atu i te “Tamouanga i te Kite” i te Atua

5, 6. Akapeea ta te akatauanga a Samuela ou ra i te akatutu anga e eaa te o atura ki te “tamouanga i te kite” i te Atua?

⁵ Kia tau ki ta Ioane 17:3, kua tuatua a Iesu: “Teia te aite anga o te ora mutu kore, to ratou tamouanga i te kite ia koe, i te Atua mou anake ra, e taau i tono maira, ko Iesu Karaiti.” (NW) E manganui te au uri anga o teia irava e manga tuke mei te New World Translation. Kare i tuatua “tamouanga i te kite” i te Atua, kua uri ua ratou i te verepa “kia kite” i te Atua me kare te “kiteanga” i te Atua. Inara, kua kite etai aronga apii e ko te tu o te tuatua tei taikuia i roto i te reo Ereni mua te kapiti ra i tetai apinga maata atu​—e raveanga tamouia, ko tetai te ka taki atu ki te piri anga vaitata ma etai.

⁶ Te riroanga i te kite meitaki i te Atua kare i te manako ou i to Iesu tuatau. Ei akatauanga, i roto i te au Tuatua Tapu Epera, ka tatau tatou e ia Samuela e tamaiti ra rai, “kare oki [aia] i kite ia Iehova i reira.” (1 Samuela 3:7) Te riro ra ainei te aiteanga o teia e e meangiti ua te kite o Samuela i tona Atua? Kare. E mea tika kua maata ta tona nga metua e te kau taunga ra i apii iaia. Inara, kia tau ki ta tetai tangata apiiia, ko te tuatua Epera tei taikuia i taua irava ra, ka tika “kia taikuia no te kite piri vaitata rava.” Kare a Samuela i kite piri vaitata ake ia Iehova, mei tana i kite i muri akera i tona tavinianga ei vaa tuatua no Iehova. I to Samuela tupu ake anga, kua riro tika maira aia kia kite ia Iehova, i te raukaanga tetai pirianga vaitata uaorai kiaia.​—1 Samuela 3:19, 20.

7, 8. (a) Eaa tatou i kore ei e tau kia mataku i te au apii anga oonu o te Pipiria? (e) Eaa etai au tuatua mou oonu o te Tuatua a te Atua ra te ka meitaki tatou kia apii?

⁷ Te rave ra ainei koe i te tamouanga i te kite ia Iehova kia riro ei kite piri vaitata anga kiaia? Kia akono i te reira, ka tau koe “kia kaki tikai” no te kai vaerua ta te Atua e oronga maira. (1 Petero 2:2) Eiaa e merengo ua i te apiianga mua o te Pipiria. E kimi kia apii i etai o te au apiianga oonu atu o te Pipiria. (Ebera 5:12-14) Te taitaia ra ainei koe i taua au apiianga ra, i te manakoanga e e ngata roa ia? Me koia ia, kia maara e ko Iehova te “Pu Ikuiku Maata Rava Atu.” (Isaia 30:20, NW) Kua kite aia e akapeea i te akakite anga i te au tuatua mou oonu ki te au manako o te au tangata apa ua. E ka rauka iaia i te akameitaki i taau au tauta anga ngakau tae kia kite eaa tana e apii maira ia koe.​—Salamo 25:4.

⁸ Eaa ka kore ei e akara matatio ia koe uaorai no runga i etai o “te au mea oonu rai o te Atua ra”? (1 Korinetia 2:10) Kare teia i te au tumu maromaroa ua mei tei taumaroia ra e te aronga apiipii akonoanga e te au orometua. E au apiianga ora to ratou tei oronga i te kite oonu mareka ki roto i te manako e te ngakau o to tatou Metua aroa ra. Ei akatauanga, te oko, te “tuatua ngaro,” e te au koreromotu tuketuke ta Iehova i taangaanga kia akameitaki i tona au tangata e kia akatupu i tana au akakoroanga​—ko teia au tumu tuatua e etai atu e manganui mei ia ratou rai e te au tumu mareka e te au puapinga no te kimikimi anga e te apii anga uaorai.​—1 Korinetia 2:7.

9, 10. (a) Eaa ra i kino ei te ngakau parau, e eaa te ka tauturu ia tatou kia kopae ke i te reira? (e) Me no runga i te kite ia Iehova, eaa tatou i tau ei kia taakaaka?

⁹ I toou tupu anga i te kite i te au tuatua mou oonu i te pae vaerua, kia matakite i te tu kino te ka aere mai ma te kite​—te akaparau. (1 Korinetia 8:1) E mea kino te akaparau, no te mea ka akatakake i te au tangata mei te Atua. (Maseli 16:5; Iakobo 4:6) Kia maara, e kare e tumu no tetai tangata kia akaparau i tona kite. Ei akatutuanga, e akamanako i teia au tuatua mei te akamataanga mai ki tetai puka tei akarakara ra i te au tupuanga ki mua o te au tangata taineti i teia tuatau: “Ko te maata atu o to tatou kite, te maata atu ia to tatou kiteanga i te meangiti ua to tatou kite. . . . Te au mea ravarai ta tatou i apii e meangiti ua me akaaiteia atu ki ta tatou te vaira kia apii.” Taua tu akaaka ra e akapumaana anga ia. I teianei, no runga i te kopapa maata no te kite​—te kite no te Atua ko Iehova​—e maata atu ta tatou tumu no te vai taakaaka anga. No teaa ra?

¹⁰ E akara i etai au tuatua Pipiria no Iehova. “Te oonu maata o toou ra manako.” (Salamo 92:5) “[To Iehova] kite, e mea kitea koreia kia kimi.” (Salamo 147:5) “Kare oki [to Iehova] kite e kitea me kimi.” (Isaia 40:28) “Aue te oonu o te apinga nui o te pakari e te kite i te Atua e!” (Roma 11:33) Te taka meitaki ra, kare rava tatou e kite i te katoa anga o te kite te vaira no Iehova. (Koheleta 3:11) Kua apii aia ia tatou i te au mea umere e manganui, inara ka vai mairai ki mua ia tatou tetai kite e manganui te ka rauka kia maata atu te apiianga. Kare ainei tatou e kite i te reira manakonako anga ei marekaanga e ei taakaakaanga? I reira, ia tatou e apii ra, e taangaanga ua rai tatou i to tatou kite ei tumuanga no te akavaitata anga atu kia Iehova e no te tauturuanga i etai atu kia rave i te reira​—auraka ei tumu no te akateitei ia tatou uaorai ki runga ake i etai ke.​—Mataio 23:12; Luka 9:48.

E Akakite i Toou Inangaro no Iehova

11, 12. (a) Akapeea ta tatou e apii nei no Iehova i te akatupu anga ia tatou? (e) Eaa te akataka maira me e tika tikai te inangaro o tetai tangata no Iehova?

¹¹ E mea tau ra, kua akakite mai a Paulo i te pirianga i rotopu i te kite e te aroa. Kua tata aia: “Te pure nei au, kia tupu marie rai to kotou inangaro e kia maata atu rai i te kite, e te utoa o te ngakau.” (Philipi 1:9) Kare ra e kia akariro ia tatou kia akaparau, te au tuatua mou okomaata ravarai ta tatou ka apii no Iehova e tana au akakoro anga ka tau kia akamaata atu i to tatou inangaro no to tatou Metua i te rangi.

¹² Ae, e manganui te aronga e karanga ra e te inangaro ra ratou i te Atua kare tikai ratou e pera ana. Penei e ngakau tae to ratou no te au manako ngakau maroiroi te pupu akera i roto i to ratou au ngakau. E meitaki taua au manako ngakau ra, e mea tau kia akapaapaaia, me te rotai ra ma te kite tikai. Inara kare ratou uaorai e riro ei inangaro tikai no te Atua. Eaa i kore ei? E akara e i akapeea te akataka anga a te Tuatua a te Atua i taua inangaro ra: “Teia oki te inangaro i te Atua, ko te akono i tana au akauenga.” (1 Ioane 5:3) I reira, ko te inangaro no Iehova, e tika tikai anake ia me ka akakiteia i te au angaanga akarongo.

13. Akapeea te mataku tau i te Atua i te tauturu anga ia tatou kia akakite i to tatou inangaro no Iehova?

¹³ Ka tauturu te mataku i te Atua ia tatou kia akarongo kia Iehova. Ko teia mataku taka ke e te akangateitei oonu no Iehova te aere maira mei te tamouanga i te kite iaia, te apiianga i tona tu tapu tikai ma te ope kore, te kaka, te mana, te tuatua tau, te pakari, e te aroa. E puapinga maata taua mataku ra i te akavaitataanga atu kiaia. Ko te tika, e akara ana i ta Salamo 25:14 e akakite ra: “Te tuatua-muna a Iehova ra, tei te aronga ïa i mataku iaia ra.” No reira me e mataku oraora to tatou no te akamareka kore i to tatou Metua akaperepere i te rangi ra, ka rauka ia tatou i te akavaitata atu kiaia. Ka tauturu te mataku i te Atua ia tatou kia akarongo i te akoanga pakari tei tataia ia Maseli 3:6: “Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” Eaa te aiteanga o te reira?

14, 15. (a) Eaa etai ikianga ta tatou e aro atu ana i te oraanga i te au ra ravarai? (e) Akapeea e raukai ia tatou kia tuku i te au ikianga na roto i te tu te ka akaata i to tatou mataku tau i te Atua ra?

¹⁴ Kia rave koe i te au ikianga i te au ra ravarai, te mea maata e te mea rikiriki. Ei akatauanga, eaa te au tu tuatua anga taau ka akono ma toou au oa angaanga, te au oa apii, te au tangata tupu ra? (Luka 6:45) Ka angaanga pakari ainei koe no te au angaanga tei akanooia ki mua ia koe, me kare ka kimi ainei koe i etai au ravenga kia rauka kia rave meangiti ua i te tauta anga? (Kolosa 3:23) Ka akavaitata atu ainei koe ki te aronga tei akaari meangiti me kore kare e inangaro ia Iehova, me kare ka kimi ainei koe kia akamaroiroi i toou au pirianga ma te au tangata manako pae vaerua? (Maseli 13:20) Eaa taau ka rave, noatu i roto i te au tu rikiriki, kia akamaata i te au manako no te Patireia o te Atua? (Mataio 6:33) Me te arataki ra taua au kaveinga Tuatua Tapu mei tei tataia i konei i taau au ikianga i te au ra ravarai, te akamanako tikai ra koe ia Iehova “i toou katoa ra au aerenga.”

¹⁵ Ko te tika, ma te au ikianga takitai ta tatou ka rave, ka tau tatou kia aratakiia e teia manako: ‘Eaa ta Iehova e anoano maira iaku kia rave? Ko teea te aerenga te ka akamareka maata iaia?’ (Maseli 27:11) Te akaarianga i te mataku i te Atua i roto i teia tu e aerenga meitaki ia no te akakite i te inangaro no Iehova. Ka akakeu katoa te mataku i te Atua ia tatou kia vai ma​—i te pae vaerua, te tu akono, e te pae kopapa oki. Kia maara, i roto i taua irava rai i raurau mai a Iakobo i te au Kerititiano kia “akavaitata atu ki te Atua,” kua akamaroiroi katoa mai aia: “E orei na i to kotou rima, e te aronga rave ara ra; e tamā na i to kotou ngakau, e te aronga ngakau rua na.”​—Iakobo 4:8.

16. Na te orongaanga kia Iehova, eaa ta tatou kare e rauka kia akatupu, inara eaa ta tatou ka rauka i te autu i te rave?

¹⁶ Ae, te akakiteanga i to tatou inangaro no Iehova te kapiti ra e maata atu i te akakoreanga i tei kino. Te akakeu katoa ra te inangaro ia tatou kia rave i te mea tika. Ei akatauanga, akapeea ta tatou akono ki to Iehova orongaanga maata ua? Kua tata a Iakobo: “Te au mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra.” (Iakobo 1:17) E tika, me oronga tatou kia Iehova i ta tatou au apinga, kare tatou e apinganui ana iaia. Nana te au mea katoatoa e te au apinga oki te vaira. (Salamo 50:12) E me ka oronga tatou kia Iehova i to tatou taime e te maroiroi, kare tatou e akaki ana i tetai umuumuanga kare ra e rauka ua iaia. Noatu e kare tatou e rave i te tutu anga i te tuatua meitaki o te Patireia o te Atua, ka rauka ua iaia i te akariro kia kapiki mai te au toka! Eaa, i reira, i oronga ei kia Iehova i ta tatou au apinga, te taime, e te maroiroi? I runga ravao, no te mea na te reira e akakite i to tatou inangaro nona ma to tatou ngakau katoa, te vaerua, te manako, e te ririnui.​—Mareko 12:29, 30.

17. Na teaa e akakeu ia tatou kia oronga rekareka ua kia Iehova?

¹⁷ Me oronga tatou kia Iehova, ka tau tatou kia rave i te reira ma te mataora, “ko te tangata oronga ma te rekareka ta te Atua e inangaro.” (2 Korinetia 9:7) Ka rauka i te kaveinga tataia ra ia Deuteronomi 16:17 te tauturu ia tatou kia oronga rekareka ua: “E oronga ra te tangata ravarai i tei tika iaia ra, i te tau i te meitaki ta to Atua ra ta Iehova i oronga atu kia koe ra.” Me akamanako tatou i akapeea ta Iehova ra oronga mai anga kia tatou, ka manako ngakau tatou i te inangaro kia oronga ua kiaia. Ka akariro taua orongaanga ra kia rekareka tona ngakau, mei tetai apinga rikiriki orongaia ra e tetai tamaiti akaperepere kia akamareka i te metua ra. Na te akakiteanga i to tatou inangaro i roto i teia tu ka tauturu ia tatou kia akavaitata atu kia Iehova.

E Patu i te Pirianga Vaitata na Roto i te Pure

18. Eaa ra i tau ei kia akamanako e akapeea te akameitaki mai anga i te tu o ta tatou au pure?

¹⁸ To tatou au atianga no te pure anga ko koe anake ka oronga mai kia tatou i tetai tuatau puapinga​—te au atianga no te pirianga vaitata, te tuatua muna ki to tatou Metua i te rangi ra. (Philipi 4:6) I te mea ko te pure tetai mea puapinga maata no te akavaitata atu ki te Atua, e tau ia kia tapu e kia akamanako i te tu o ta tatou au pure. Kare mei te mea e ka tika kia riro ei au akaraanga meitaki e te akaaerenga, mari ra ka tau ia ei au akakite anga ngakau tae tei aere maira no te ngakau. Akapeea e raukai ia tatou kia akameitaki mai i te tu o ta tatou au pure?

19, 20. Eaa ra i tau ei kia tamanako i mua ake ka pure ei tatou, e eaa etai au tumu tau no taua tamanako anga ra?

¹⁹ Penei e tauta tatou i te tamanakoanga i mua ake i ta tatou pure. Me ka tamanako tatou i mua ake, ka rauka ia tatou te akariro i ta tatou au pure kia taka meitaki e kia tau oki, na te reira e kopae ke atu i te ravenga no te taokioki anga i te au takiota tuatua tei matauia ra e ka aere ua mai ki te manako. (Maseli 15:28, 29) Penei te akamanako anga i etai o te au tumu ta Iesu i taiku i roto i tana pure akaraanga ra e ei reira ka akamanako ei akapeea te pirianga o teia ki to tatou uaorai turanga penei ka tauturu ia. (Mataio 6:9-13) Ei akatauanga, penei ka ui tatou kia tatou uaorai eaa te tuanga meangiti ta tatou e manakonako ra kia rave i te akonoanga i to Iehova anoano ki runga i te enua nei. Penei ka akakite tatou kia Iehova i to tatou inangaro kia riro ei puapinga maata kiaia e kia pati atu i tana tauturu i te raveanga i tana angaanga i oronga mai na tatou? Te teiaa ra ainei tatou i te au manako anga no te au mea umuumuia no te pae kopapa? No teea au ara ta tatou e umuumu kia akakoreia, e kiaai ta tatou e tau ra kia maata atu te akakore anga i te ara? Eaa te au timataanga te akapekapeka maira ia tatou, e te kite ra ainei tatou e akapeea te rapurapu o to tatou umuumu anga i ta Iehova ra paruru anga i te reira tu?

²⁰ Kapiti katoa, penei ka manako tatou i te au tangata ta tatou i kite te umuumu ra i ta Iehova tauturu. (2 Korinetia 1:11) Inara, auraka e ngaropoina, i te oronga akameitakianga. Me ka tapu tatou e ka tamanako i te reira, ka rauka tikai ia tatou kia maara i te au tumu kia akameitaki ia Iehova e kia akapaapaa iaia i te au ra tataki tai no tona meitaki maata. (Deuteronomi 8:10; Luka 10:21) I te raveanga i te reira e puapinga kapitiia mai tetai​—ka rauka i te reira kia tauturu ia tatou kia rauka tetai ariki anga papu atu, i te akaraanga ki runga i te oraanga.

21. Penei na te apiianga i teea au akatauanga Tuatua Tapu ka tauturu ia tatou me akavaitata atu tatou kia Iehova i roto i te pure?

²¹ Ka tauturu katoa te apii i ta tatou au pure. Te vaira te au pure a te au tane e te au vaine tiratiratu tei tataia i roto i te Tuatua a te Atua. Ei akatauanga, me te tupu maira tetai manamanata akaaoanga ki mua ia tatou, te akatupu ra i te apiapi kia tatou e te mataku no to tatou oraanga me kare no ta tatou aronga akaperepere ra, penei ka tatau tatou i te pure a Iakoba no tona araveianga i tona taeake kino, ko Esau. (Genese 32: 9-12) Me kare penei ka apii tatou i te pure a te Ariki ko Asa i te akakoko anga tetai nuku Etiopia e vaitata i te tai mirioni i te au tangata o te Atua ra. (2 Paraleipomeno 14:11, 12) Me te taitaia ra tatou e tetai manamanata te akakoko ra kia apai mai i te kino ki runga i te ingoa meitaki o Iehova, i reira te pure ra a Elia ki mua i te aronga akamori ia Baala i te Maunga i Karamela ra e tau kia akamanakoia, mei ta Nehemia pureanga katoa no runga i te tu kino maata o Ierusalema ra. (1 Ariki 18:36, 37; Nehemia 1:4-11) Te tatauanga e te tamanakoanga i taua au pure ra ka rauka i te akamaroiroi i to tatou akarongo e ka oronga mai i te manako kia tatou e ka akapeea te akavaitata anga atu kia Iehova ma te au manako te akateiaa ra ia tatou.

22. Eaa te irava mataiti no te 2003, e penei eaa ta tatou ka ui uaorai mei tetai taime ki tetai i te mataiti katoa?

²² Te taka meitaki ra, kare e ngateitei maata atu, e kare e akakoroanga teitei atu, i to te akonoanga i ta Iakobo akoanga kia “akavaitata atu ki te Atua.” (Iakobo 4:8) Kia rave tatou i te reira na te tereanga ki mua i to tatou kite i te Atua, na te kimianga kia akakite i to tatou inangaro nona kia maata atu e kia maata atu, e na te akatupuanga i te piri vaitata anga kiaia i roto i ta tatou au pure. I roto katoa i te mataiti 2003, ia tatou e akamanako ra ia Iakobo 4:8 ei irava mataiti, kia tamou ua atu tatou i te akara matatio anga ia tatou uaorai me te akavaitata tikai atura tatou kia Iehova. Ka akapeea, i reira, te tuanga i muri ake i taua tuatua ra? Na roto i teea tu ta Iehova ‘akavaitata anga kia koe,’ i te apaianga mai i teea au akameitakianga? Na te atikara e aru mai nei e akakite mai i teia tumu manako.

“Nana e Akavaitata Mai kia Kotou Na”

“Kare ra [te Atua] i atea ke atu ia tatou katoa nei.”​—ANGAANGA 17:27.

1, 2. (a) I te akaraanga ki te au rangi ki i te au etu, penei eaa te uianga ka ui tatou no Tei Anga maira? (e) Akapeea ta te Pipiria i te akapapu anga ia tatou e mamao ke mai te au tangata i te meangiti ua i nga mata o Iehova?

KUA akara ainei koe i te au rangi ki i te etu i tetai po manea e kua ki i te manako anga umere? Te numero maata o te au etu e te atea maata i te reva ka akatupu mai i te manako umere. I roto i teianei ao katoa e pini ua ake, e topata ua te enua nei. Te aiteanga ainei o teia e ko Tei Anga mai, “Tei Teitei i te enua katoa nei,” e teitei roa kia akamanako mai i te au tangata me kare te mamao roa e kare e rauka i te kimiia kia kitea e ratou?​—Salamo 83:18.

² Te akapapu maira te Pipiria ia tatou e e mamao ke mai te au tangata e te meangiti ua i nga mata o Iehova ra. Ko te tika, te akamaroiroi maira te Tuatua a te Atua kia kimi tatou iaia, i te na koanga: “Kare ra aia i atea ke atu ia tatou katoa nei.” (Angaanga 17:27; 1 Paraleipomeno 28:9) E tika, me akono tatou i te au takainga kia akavaitata atu ki te Atua, ka pau mai aia i ta tatou au tauta anga. Na teea tu? Te oronga maira te au tuatua o ta tatou irava mataiti no te 2003 i teia pauanga ngakau maana: “Nana e akavaitata mai kia kotou na.” (Iakobo 4:8) E uriuri manako ana tatou i etai o te au akameitakianga umere ta Iehova e oronga maoraora maira ki te aronga tei akavaitata atu kiaia.

E Apinga Mei ko Mai ia Iehova

3. Eaa te apinga ta Iehova ka oronga ki te aronga akavaitata atu kiaia?

³ Te mea mua, e apinga okomaata ta te au tavini a Iehova nana i akataka ke no tona au tangata. Te au mana katoatoa, te apinganui, e te kite apiianga ta teianei akatereanga o te au mea nei ka oronga mai kare e rauka mai teianei apinga. E apinga teia, ta Iehova e oronga ki te aronga anake tei vaitata kiaia. Eaa te reira? Te pau maira te Tuatua a te Atua: “Kia . . . akateitei i to reo kia rauka te kite ra; Kia kimi pu tikai koe iaia mei te ario ra, e kia makitoro marie koe iaia mei te apinga uunaia ra: Ei reira koe e kite ei i te mataku ia Iehova, e e rauka ia koe te kite i te Atua. Ko Iehova oki tei oronga mai i te pakari.” (Maseli 2:3-6) E tamanako ana i te rauka anga kia kitea e te au tangata apa ua nei “te kite i te Atua”! Taua apinga ra​—te kite tei kitea i roto i te Tuatua a te Atua​—te akaaiteia ra mei “te apinga uunaia.” No teaa ra?

4, 5. Eaa i raukai “te kite i te Atua” kia akaaiteia ki te “apinga uunaia”? Akatutu mai.

⁴ Ko tetai apinga, te kite i te Atua e puapinga maata ia. Tetai o tana au akameitakianga okomaata ko te manakonako anga no te ora mutu kore. (Ioane 17:3) Inara te akapuapinga maira taua kite ra i to tatou oraanga i teianei. Ei akatauanga, ei tetai tupuanga no to tatou apiianga matakite i te Tuatua a te Atua, kua kite tatou i te au pauanga ki te au uianga puapinga maata mei: Eaa te ingoa o te Atua? (Salamo 83:18) Eaa te tu tikai o tei mate ra? (Koheleta 9:5,10) Eaa to te Atua akakoro anga no te enua e te au tangata nei? (Isaia 45:18) Kua kite katoa tatou i te tu meitaki no te ora angakoia oki ko te akonoanga i te akoanga pakari a te Pipiria. (Isaia 30:20, 21; 48:17, 18) No reira, e aratakianga tau ta tatou te tauturu ra ia tatou kia akakoromaki i te au apiapi o te oraanga e kia aruaru i te aerenga te akatupu ra i te mataora anga e te merengoanga tika tikai. I runga ravao, i ta tatou apiianga i te Tuatua a te Atua kua rauka ia tatou kia kite i to Iehova ra au tu umere e kia akavaitata atu kiaia. Eaa te ka maata atu te puapinga i tetai pirianga vaitata ma Iehova tei akanooia ki runga i “te kite i te Atua”?

⁵ Te vaira tetai atu tumu i raukai kia akaaiteia atu te kite i te Atua ki te “apinga uunaia.” Mei te au apinga e manganui, kare e maata ana i teianei ao. I te ono pirioni au tangata o te enua nei, ko etai ono mirioni aronga akamori ia Iehova, me kare vaitata e 1 i te 1,000, kua kite i “te kite i te Atua.” Kia akatutu i te tokoiti ua o te akameitaki kia kite i te tuatua mou no te Tuatua a te Atua, e akamanako ana e okotai ua uianga no te Pipiria: Eaa te tupu ra ki te tangata i te matenga? Te kite ra tatou mei te au Tuatua Tapu mai e te mate ra te meta e kare a tei mate ra i kite. (Ezekiela 18:4) Inara, ko te irinaki anga pikikaa e ko tetai mea i roto i te tangata ka ora ua atu i muri ake i te matenga te arikiia ra e te maataanga o te au akonoanga o teianei ao. Ko tetai ia o te tuanga tumuanga o te au akonoanga a Kerititome. Te vai katoa ra ia i roto i te akonoanga Buddha, Hindu, Islam, Jain, akonoanga ngati Iuda, Shinto, Sikh, e te akonoanga Tao. E manako ana​—e au pirioni ua atu au tangata te akavareia ra e teia apiianga pikikaa okotai!

6, 7. (a) Koai anake te ka kite i “te kite i te Atua”? (e) Eaa te akatauanga te akaari maira e kua akameitaki maira Iehova ia tatou ma te kite oonu te aere ke ra “i te aronga pakari e te kite”?

⁶ Eaa ra i kore ei e maata atu te au tangata i kite ana i “te kite i te Atua”? No te mea kare e mou ki katoa ana i tetai te aiteanga o te Tuatua a te Atua me kore Tana tauturu. Kia maara, ko teia kite e mea orongaia mai. Te oronga anake ra a Iehova i te reira ki te aronga te puareinga ra kia kimi i tana Tuatua ma te tiratiratu e te taakaaka. Penei kare taua aronga ra i “pakari i te akonoanga i te kopapa nei.” (1 Korinetia 1:26) Penei e manganui i roto ia ratou ra kua manakoia e, ‘apii koreia e te kite kore’ i te turanga o te ao nei. (Angaanga 4:13) Inara, kare te reira i te mea puapinga maata. Te tutaki ra a Iehova ia tatou ma “te kite i te Atua” no te mea kua kite aia i te au tu i roto i to tatou ngakau.

⁷ E akamanako i tetai akatauanga. E manganui te aronga apiiia i roto ia Kerititome kua akakite mai i etai au akataka anga no runga i te Pipiria. Taua au angaanga kimikimi anga ra penei ka akataka mai i te tuatua enua, te aiteanga o te au tuatua Epera e te Ereni, e tere atu. Ma to ratou apiianga katoa, kua kitea ainei e taua aronga apiiia ra “te kite i te Atua”? Te kite tika ra ainei ratou i te tumu tuatua o te Pipiria​—te akatika anga i to Iehova ngateitei na tona Patireia i te rangi? Te kite ra ainei ratou e kare te Atua ko Iehova i te tuanga no tetai Toru Tai? Tei ia tatou te kiteanga tika i taua au tumu ra. No teaa ra? Kua akameitaki mai a Iehova ia tatou ma te kite oonu ki roto i te au tuatua mou pae vaerua te aere ke atura “i te aronga pakari e te kite.” (Mataio 11:25) Mei teaa ra ta Iehova akameitakianga i te aronga tei akavaitata atu kiaia!

“Te Tiaki nei a Iehova i te Aronga Katoa i Inangaro Iaia”

8, 9. (a) Akapeea ta Davida akatakaanga i tetai atu akameitaki anga no te aronga tei akavaitata atu kia Iehova? (e) Eaa ra te au Kerititiano mou i umuumu ei i te paruru anga tu-Atua?

⁸ Te aronga tei akavaitata atu kia Iehova te rekareka ra i tetai atu akameitakianga​—i Tana paruru anga tu-Atua. Te tata taramo ko Davida, kare ra i te tangata ke ki te au tu ngata e te au manamanata, kua tata: “Te vaitata mairā Iehova i te aronga i kapiki atu iaia, i te aronga i kapiki atu iaia ma te pikikaa kore. E akatika aia i te anoano o te aronga i mataku iaia; ka akarongo mai aia i ta ratou kapiki, e ka akaora oki aia ia ratou. Te tiaki nei a Iehova i te aronga katoa i inangaro iaia.” (Salamo 145:18-20) Ae, te vaitata ra a Iehova ki te aronga tei inangaro ra iaia e no reira ka viviki ua i te akono i ta ratou aueanga no te tauturu.

⁹ Eaa ra tatou i umuumu ei i te paruru anga tu-Atua? Kapiti atu ki te manakoanga ngakau i te au tupuanga o te nooanga i roto i teia ‘tuatau kikino tei ngata roa no te akono atu,’ e takete taka ke te au Kerititiano mou no to Iehova Enemi maata, ko Satani te Tiaporo. (2 Timoteo 3:1, NW) Te tamanako ra taua enemi kikite ra e “e pou iaia” tatou. (1 Petero 5:8) Te takinga kino ra a Satani, te taomi ra, e te timata ra ia tatou. Te kimi katoa ra aia i te tu akono o te manako e te ngakau tana ka akaanga ke. E akakoro anga tana e manako ra: kia akaparuparu i to tatou akarongo e kia akapou i to tatou tu pae vaerua. (Apokalupo 12:12, 17) I te mea e enemi ririnui to tatou kia akono atu, kare ainei i te mea akapapu akaouanga kia kite e “te tiaki nei a Iehova i te aronga katoa i inangaro iaia”?

10. (a) Akapeea ta Iehova paruru anga i tona au tangata? (e) Eaa te tu paruru puapinga rava atu, e no teaa ra?

¹⁰ Inara, akapeea ta Iehova tiaki anga i tona au tangata? Kare tana taputou i te paruruanga e akapapu ia tatou i te oraanga manamanata kore ua i teia akatereanga; kare katoa oki te aiteanga e e apainga nana kia rave i te au temeio no tatou. Tera ra, te oronga maira Iehova i te paruru anga pae kopapa no tona au tangata ei pupu. No te mea, kare rava aia e akatika i te Tiaporo kia takore atu i te aronga akamori mou mei te enua nei! (2 Petero 2:9) I runga rava, te paruru ra a Iehova ia tatou i te pae vaerua. Te akapapa ra aia ia tatou ko ta tatou ka umuumu kia akakoromaki i te au timata anga e kia paruru i to tatou pirianga ma ia katoa ra. I te tuatau roa katoa, ko te paruru anga i te pae vaerua ko te paruru anga puapinga maata rava atu ia. No teaa ra? Me te vaira to tatou pirianga ma Iehova, kare e apinga​—noatu ko te mate​—te ka rave mai i te kino mutu kore kia tatou.​—Mataio 10:28.

11. Eaa te au mea orongaia mai e Iehova no te paruruanga pae vaerua i tona au tangata?

¹¹ Kua oronga maira Iehova i te au apinga maata no te paruru anga i te pae vaerua no te aronga tei akavaitata atu kiaia. Na roto i tana Tuatua, te Pipiria, te oronga maira aia i te pakari kia tatou kia autu atu i te au timataanga tuketuke. (Iakobo 1:2-5) Na te akonoanga i te akoanga tau te kitea ra i roto i te au Tuatua Tapu te riro ra ei paruru anga. Kapiti katoa oki, te oronga maira Iehova i ‘te vaerua tapu i te aronga e pati atu aia ra.’ (Luka 11:13) Ko taua vaerua ra te mana ririnui katoa i te ao katoa e pini ua ake, no reira ka rauka i te reira kia akapapaia tatou kia aro autu atu i tetai ua atu timataanga te ka aere mai kia tatou. Na roto ia Karaiti, ka oronga mai a Iehova i “te au tangata oronga uaia mai.” (Ephesia 4:8, NW) Ko teia aronga tau i te pae vaerua ka tauta kia akaata i to Iehova uaorai aroa oonu i te tauturuanga i te au oa akamori.​—Iakobo 5:14, 15.

12, 13. (a) Na roto i teaa ta Iehova oronga anga mai kia tatou i te kai vaerua i te tuatau tau? (e) Akapeea toou manako ngakau no ta Iehova au oronga anga mai no to tatou meitaki pae vaerua?

¹² Te oronga katoa maira Iehova i tetai atu apinga ei paruru ia tatou: te kai vaerua i te tuatau tau. (Mataio 24:45) Na te au puka neneiia, kapiti katoa te au tianara Te Punanga Tiaki e te Awake!, e pera katoa te au uipaanga, te au putuputu anga, e te au uruoaanga, te oronga maira Iehova kia tatou i ta tatou e umuumu ra e i te tuatau te umuumuia ra e tatou te reira. Te maara ra ainei ia koe tetai atianga i akarongo atu ei koe i tetai apinga i te uipaanga Kerititiano, i tetai akaputu anga, me kare e uruoaanga tei akatuki atura i to ngakau e kua akamaroiroi atu me kare kua akapumaana ia koe? Kua tatau ana ainei koe i tetai atikara i roto i tetai o te au tianara taikuia i runga ake nei e kua manako ngakau e kua tataia te reira noou?

¹³ Ko tetai o ta Satani au apinga maata ko te akamaroiroi kore anga, e kare tatou e matara mei te au tupu anga o te reira. Kua kite meitaki aia e ko te manako anga puapinga kore roa ka akangere i to tatou maroiroi, i te akariro anga ia tatou kia roko uaia e te kino. (Maseli 24:10) No te mea te taangaanga maata ra a Satani i te manako ngakau tau kore, te umuumu ra tatou i te tauturu. Kua oronga mai te nga makatini Punanga Tiaki e te Awake! i etai atianga i te au atikara te ka tauturu ia tatou kia kopae atu i te akamaroiroi kore. No tetai atikara mei tera, kua tata tetai tuaine Kerititiano: “Kua tatau au i te atikara vaitata rai i te au ra ravarai, e kua tae mai te au roimata. Kua vaio au i te reira i te pae i toku roi kia rauka iaku me tupu mai te akamaroiroi kore kiaku. Na roto i te au atikara mei teia, ka manako ngakau au te takave maira nga rima paruru o Iehova iaku.”a Kare ainei tatou e akameitaki ana kia Iehova no te orongaanga mai kia tatou i te kai vaerua i te tuatau tau? Kia maara, i tana oronga anga mai i te meitaki no tatou i te pae vaerua e akakite maira e te vaitata ra aia kia tatou e kua tuku ia tatou ki raro ake i tana paruru anga.

Te Aerenga ki “Tei Akarongo i te Pure Ra”

14, 15. (a) Eaa te akameitakianga ta Iehova i tuku ki runga i te aronga tei akavaitata atu kiaia? (e) Eaa ra i riro ei ei aerenga atea kia Iehova na roto i te pure ei tu meitaki?

¹⁴ Kua kite ainei koe e me rauka i te au tangata te mana e te taoonga, e putuputu ratou te riro kia ngata mai no te tuatua anga ki te aronga i raro ake ia ratou? Akapeea ra, te Atua ko Iehova? E mamao roa ainei aia kia manako mai i te au tuatua kiaia na te au tangata ua nei? E tuke anga ra! Te apinga orongaia mai no te pure ko tetai atu akameitaki anga ta Iehova i oronga mai ki runga i te aronga tei akavaitata atu kiaia. Ko te oronga anga mai i te aerenga atea ua ki “Tei akarongo i te pure” ko tetai apinga meitaki tikai te reira. (Salamo 65:2) No teaa ra?

¹⁵ Ei akatutu anga: Te tangata maata o tetai angaanga taokotai anga maata e manganui tana apainga. Nana e iki ko teea tana au tumu nana uaorai e akono e ko teea tana e oronga ki etai atu. Mei te reira katoa, te Tutara Ngateitei o te ao katoa e pini ua ake tei iaia te tika kia akataka ko teea te au tumu nana uaorai e akono e ko teea tana ka oronga atu ki tetai ke. E akamanako ana i te katoa o ta Iehova ra i oronga ki tana Tamaiti akaperepere, kia Iesu. Kua orongaia oki ki te Tamaiti te “mana kiaia kia akava.” (Ioane 5:27) Kua tukuia te au angela “ki raro ake iaia.” (1 Petero 3:22) Kua tukuia te vaerua tapu ririnui o Iehova ki raro ake i ta Iesu akaaerenga kia tauturu iaia i te arataki anga i tana au pipi i runga i te enua nei. (Ioane 15:26; 16:7) No reira kua rauka ia Iesu kia tuatua; “Ko te mana katoa o to te rangi e te ao katoa nei, kua tukuia mai, tei iaku anake.” (Mataio 28:18) Inara, no runga i ta tatou au pure, kua iki a Iehova kia o atu aia uaorai. No reira te Pipiria i arataki mai ei ia tatou kia oronga atu i ta tatou au pure kia Iehova anake, ma te raveanga i te reira i roto i te ingoa o Iesu.​—Salamo 69:13; Ioane 14:6, 13.

16. Eaa tatou ka irinaki ei e te akarongo tika maira a Iehova i ta tatou au pure?

¹⁶ Te akarongo tika maira ainei a Iehova i ta tatou au pure? Naringa me e papakitai aia me kare manako kore, kare rava aia e raurau mai ia tatou kia “tamou marie tikai i te pure” me kare kia tuku i ta tatou apainga e te au apiapi anga ki runga iaia. (Roma 12:12; Salamo 55:22; 1 Petero 5:7) Kua irinaki tikai te au tavini tiratiratu i te au tuatau Pipiria e te akarongo maira a Iehova i te pure. (1 Ioane 5:14) No reira, kua akakite te tata taramo ko Davida: “Ka akarongo mai [a Iehova] i toku reo.” (Salamo 55:17) Tei ia tatou katoa te au tumu kia irinaki e te vaitata maira Iehova, e te papa ra i te akarongo mai i to tatou manako e tei apiapi ia ra.

Te Tutaki ra a Iehova i Tona Au Tavini

17, 18. (a) Akapeea to Iehova manako ngakau no te tavini anga tiratiratu o tana au mea ora kite ra? (e) E akataka e akapeea ta Maseli 19:17 akaari anga e kare ta tatou au angaanga aroa e kite koreia mai ana e Iehova?

¹⁷ To Iehova ra turanga ei Ngateitei i te Ao Katoa e Pini Ua Ake kare e akakinoia e ta te au tangata ua nei e rave me kore kare e rave. Noatu rai, e Atua ariki ua a Iehova. Te manako meitaki ra aia​—ko te tika, te akaperepere ra​—i te tavini anga tiratiratu a tana au mea ora kite. (Salamo 147:11) Ko teianei, i reira, tetai atu puapinga te rekarekaia ra e te aronga tei akavaitata atu kia Iehova: Te tutaki ra Aia i tona au tavini.​—Ebera 11:6.

¹⁸ Te akaari taka meitaki maira te Pipiria e te manako puapinga maira a Iehova i ta te aronga akamori iaia e rave ra. Ei akatauanga, ka tatau tatou: “Ko tei akakite i te aroa ki te tangata rikiriki ra te oronga apinga ra aia na Iehova, e ko tana akono anga Nana e tutaki iaia.” (Maseli 19:17, NW) Ta Iehova akamanako anga aroa no te tangata rikiriki kua akaataia mai i roto i te Ture a Mose. (Levitiku 14:21; 19:15) Akapeea to Iehova manako ngakau me ka aru tatou i tona aroa i ta tatou au akono anga ma te aronga rikiriki ra? Me oronga tatou ki te tangata rikiriki, ma te kore e manako atu kia tutakiia mai, te manako ra a Iehova i teia ei kaiou tei orongaia ra ki Aia. Te taputou ra a Iehova kia tutaki atu i taua kaiou ra ma te akaperepere e te au akameitakianga. (Maseli 10:22; Mataio 6:3, 4; Luka 14:12-14) Ae, me akaari tatou i te aroa ki tetai oa akamori te ngere ra, ka akatuki atu te reira i te ngakau o Iehova. Mei teaa ra to tatou akameitaki anga kia kite e ta tatou au angaanga aroa kare e aere manako koreia atu e to tatou Metua i te rangi!​—Mataio 5:7.

19. (a) Eaa ka papu ei ia tatou e te ariki maira Iehova i ta tatou tutuanga e i te angaanga akariro anga tangata ei pipi? (e) Akapeea ta Iehova tutaki anga i te au angaanga tavini anga tei raveia i te turu anga i tona Patireia?

¹⁹ Te ariki meitaki ra a Iehova i ta tatou e rave ra no tona Patireia. Me akavaitata atu tatou kia Iehova, e mea tau e ka anoano tatou kia taangaanga i to tatou taime, te maroiroi, e te au apinga kia rave i te ka rauka i te tutuanga i te Patireia e te angaanga akariro anga i te tangata ei pipi. (Mataio 28:19, 20) I etai taime, penei te manako ngakau ra tatou e e meangiti ua ta tatou e rave ra. Penei ka akakeu to tatou ngakau apa ua kia manako tatou me te mareka maira a Iehova i ta tatou au tauta anga. (1 Ioane 3:19, 20) Inara te akaperepere ra a Iehova i te au mea ravarai i orongaia​—noatu mei teaa te meangiti​—te aere maira mei te ngakau akakeuia e te aroa. (Mareko 12:41-44) Te akapapu maira te Pipiria kia tatou: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na.” (Ebera 6:10) E tika, te maara ra ia Iehova e te tutaki ra noatu i te angaanga meangiti i te tavini anga ei turu i tona Patireia. Kapiti atu ki te au akameitakianga apinganui i te pae vaerua i teianei, ka rauka ia tatou kia akara atu i te au rekareka anga o te oraanga i te ao ou te aere maira, te ngai e akatuera maoraora ei a Iehova i tona rima e ka akamerengo ei te au inangaro tuatua-tika o te aronga katoa tei vaitata atu kiaia!​—Salamo 145:16; 2 Petero 3:13.

20. I roto katoa i te mataiti 2003, akapeea tatou i te akamanako anga i te au tuatua o ta tatou irava mataiti, e eaa te tupu anga?

²⁰ I roto i te mataiti 2003, e ui tatou ia tatou uaorai me te rave ra tatou i te tauta anga tamou marie kia akavaitata atu ki to tatou Metua i te rangi. Me te pera ra tatou, ka papu ia tatou e ka akono mai aia mei tana i taputou maira. No te mea, ta “te Atua . . . kore e tika kia pikikaa.” (Tito 1:2) Me akavaitata atu koe kiaia, ka akavaitata mai aia kia koe. (Iakobo 4:8) E eaa te tupu anga? Ko te au akameitakianga apinganui i teianei e te manakonakoanga no te akavaitata atu anga kia Iehova e mutu kore ua atu!

[Tataanga Rikiriki i Raro]