Noatu Rai te Au Timataanga, e Mou i Toou Akarongo!

“E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa.”​—IAKOBO 1:2.

1. Noatu rai eaa te tu te tavini ra te au tangata o Iehova iaia i te akarongo e ma te “rekareka o te ngakau ra”?

TE TAVINI ra te au tangata o Iehova ei Au Kite nona ma te akarongo iaia e te “rekareka o te ngakau ra.” (Deuteronomi 28:47; Isaia 43:10) Te rave ra ratou i te reira noatu te rokoia ra ratou e te au timataanga e manganui. Noatu rai to ratou au tu ngata, te rauka maira ia ratou te pumaana i te au tuatua: “E aku au taeake ra, kia rokoia kotou e te au timataanga e manganui te tu ra, ka tuatua e, e mea rekareka anake ïa; Kua kite oki kotou e, na taua timata anga i to kotou akarongo ra e akatupu i te akakoromaki.”​—Iakobo 1:2, 3.

2. Eaa tei kiteia ra no tei tata i te reta a Iakobo ra?

² Kua tataia taua tuatua ra e vaitata i te 62 T.N. e te pipi ko Iakobo, koia tetai teina no Iesu Karaiti. (Mareko 6:3) Ko Iakobo tetai o te aronga pakari o te putuputuanga i Ierusalema ra. Ko te tika, koia, ko Kepha (Petero), e Ioane “ko tei manakoia ra e, e au pou,”​—e maroiroi, e aronga turu ketaketa no te putuputuanga ra. (Galatia 2:9) I te tupuanga te maro anga no te peritome anga ki mua i “te au aposetolo e te aronga orometua ra,” i vaitata i te 49 T.N., kua akono a Iakobo i tetai tukuanga tika tau i te au Tuatua Tapu ra tei arikiia ra e te pupu akaaere o taua anere mataiti mua ra.​—Angaanga 15:6-29.

3. Eaa etai au manamanata tei aro atura i te au Kerititiano o te anere mataiti mua ra, e akapeea e raukaʼi ia tatou te puapinga maata i taua reta a Iakobo ra?

³ Ei tetai tiaki mamoe i te pae vaerua e manako meitaki ra, ‘kua kite a Iakobo i te tu o te anana ra.’ (Maseli 27:23) Kua kite aia e te aro atura te au Kerititiano i reira i te au timataanga pakari. Kua umuumuia te manakoanga o tetai papaki ra kia akatikatikaia, no te mea te akaari ra ratou i te tu akaperepere i te aronga apinganui ra. No tetai papaki, e tu akatutu ua te akamori anga. Te akatupu ra tetai papaki i te kino ma to ratou arero rave tau kore ra. Te akatupu ra tetai vaerua o teianei ao i te au tupu anga kikino, e e manganui kare e akakoromaki kare katoa oki e pure ana. Ko te tika, kua rokoia tetai papaki o te au Kerititiano ra e te maki i te pae vaerua. Kua taiku te reta a Iakobo i taua au tumu ra na roto i tetai tu akamaroiroi, e ko tana akoanga te tau ra i teia tuatau nei mei to te reira tu tau katoa oki i te anere mataiti mua T.N. ra. Ka puapinga maataia tatou me ka akamanako tikai tatou i teia reta nei mei te mea rai e i tataia mai kia tatou uaorai.a

Me Tupu kia Tatou te Au Timataanga

4. Akapeea te manako tau na tatou i te au timataanga?

⁴ Te akakite maira Iakobo kia tatou e akapeea kia manako atu i te au timataanga. (Iakobo 1:1-4) Kare aia i taiku mai i tona pirianga ngutuare tangata ma te Tamaiti a te Atua ra, kua kapiki akaaka ua iaia uaorai “e tavini no te Atua, e no te Atu ra no Iesu Mesia.” Kua tata a Iakobo ki “te au kopu tino ngauru ma rua” o te Iseraela vaerua, “i pueurikiriki ke ra,” no te takinga kinoanga ra. (Angaanga 8:1; 11:19; Galatia 6:16; 1 Petero 1:1) Ei au Kerititiano, te takinga kino katoa ia nei tatou, e ‘te rokoia nei tatou e te au timataanga e manganui te tu.’ Inara me ka maara tatou e ko te au timataanga tei akakoromakiia ra ka akamaroiroi i to tatou akarongo, ka tuatua tatou e, “e mea rekareka anake ïa” me ka tupu mai te reira kia tatou. Me ka tamou marie tatou i to tatou tiratiratu ki te Atua i te au tuatau timataanga, ka apai mai teia i te rekarekaanga mutu kore kia tatou.

5. Penei eaa te ka kapitiia mai ki to tatou au timataanga, e eaa te ka tupu me ka autu tatou i te akakoromaki anga ia ratou ra?

⁵ Te kapiti ra to tatou au timataanga i te au tu mamae anga te matauia ra e te au tangata. Ei akatauanga, penei ka rokoia tatou e te tu maki te kopapa. Kare te Atua e akono i te au rapakau anga temeio i teianei, inara te pau maira aia i ta tatou au pure no te pakari e te manako maroiroi te anoanoia ra kia akono atu i te maki. (Salamo 41:1-3) Ka mamae katoa tatou no te tuatua tika ei Au Kite takinga kinoia no Iehova ra. (2 Timoteo 3:12; 1 Petero 3:14) Me ka autu tatou i te akakoromaki anga i taua au timataanga ra, kua akapapuia to tatou akarongo, i te riroanga “na taua timata anga” e akatupu. E me ka autu to tatou akarongo, ka riro teia ei “akatupu i te akakoromaki.” Na te akarongo tei akamaroiroiia ra na roto i te au timataanga e ka tauturu ia tatou kia akakoromaki i te au timataanga i te tuatau ki mua ra.

6. Akapeea “ta te akakoromaki ra angaanga kia tika rava,” e eaa te au takainga tau te ka rauka kia raveia ia tatou i raro ake i te timataanga ra?

⁶ Kua tuatua katoa Iakobo “e tuku atu i ta te akakoromaki ra angaanga kia tika rava.” Me ka tuku tatou i tetai timataanga kia tupu tae roa ki tona openga ma te kore e tautaanga kia akaope vivikiia te reira na tetai tu tau kore i te Tuatua Tapu ra, ka riro na te akakoromaki anga e rave i te “angaanga” akariroanga ia tatou kia tika rava ei au Kerititiano, ma te kore e ngere i te akarongo. Inara, me ka akakite mai tetai timataanga i tetai tu paruparu, ka tau tatou kia kimi i ta Iehova ra tauturu kia rauka te autu atu i te reira. Ka peea me ko te timata anga e, kia rave i tetai ainga tau kore? E pure tatou no taua manamanata ra e ka akono ei kia rotai ma ta tatou pure anga. Penei ka tau tatou kia taui i to tatou ngai angaanga me kare kia rave i etai atu takainga kia tamou marie i te tiratiratu ki te Atua ra.​—Genese 39:7-9; 1 Korinetia 10:13.

Te Kimi Anga no te Pakari

7. Penei akapeea tatou me tauturuia kia akono i te au timataanga?

⁷ Kua akakite mai a Iakobo kia tatou e eaa te ka tau kia rave me kare tatou e kite akapeea me akono i tetai timata anga. (Iakobo 1:5-8) Kare a Iehova e akaapa mai ia tatou no te ngereanga i te pakari e no te pureanga no te reira na roto i te akarongo. Ka tauturu aia ia tatou kia manako tika i tetai timataanga e kia akakoromaki oki i te reira. Penei na te au taeake akarongo e me kare i te tuatau apii Pipiria ka akakiteia mai kia tatou te au Tuatua Tapu. Penei na te au tupu anga tu-Atua na roto i ta te Atua ra arataki anga e akakite mai kia tatou eaa ta tatou ka tau kia rave. Penei na te vaerua o te Atua ra e arataki ia tatou. (Luka 11:13) E rekarekaʼi i taua au puapinga ra, e mea tika kia piri mou tikai tatou ki te Atua e tona au tangata katoa oki.​—Maseli 18:1.

8. Eaa ra ka kore ei e rauka i tetai tangata ekoko ra te apinga mei ko mai ia Iehova ra?

⁸ Te oronga maira Iehova i te pakari kia tatou ei akono i te au timataanga me “e pati ra [tatou] ma te akarongo, e te ekoko kore.” Ko tei ekoko ra, “e tau ïa i te ngaru tai e puia e te matangi, e tikitiki akera” ma te tu tau kore. Me ko to tatou tu ngaueue ua ia i te pae vaerua, ‘auraka oki tatou e manako e, ka rauka ta tatou ia Iehova ei ngai mea ngiti ake.’ Auraka tatou e “ekoko” e te “tinamou kore” i te pure me kare i etai atu au tu. Kareka ra, kia akarongo tatou ia Iehova, koia te Tumu o te pakari ra.​—Maseli 3:5, 6.

Ka Rauka kia Rekareka Maata Tei Apinganui e Tei Apinga Kore Oki

9. Eaa ra i raukaʼi ia tatou e tumu no te akateitei anga ei aronga akamori ia Iehova ra?

⁹ Noatu rai e me ko te putaua tetai o ta tatou timata anga, kia mou i to tatou manako e ka rauka kia rekareka te au Kerititiano apinganui e te apinga kore oki. (Iakobo 1:9-11) I mua ake i te riroanga ei au pipi na Iesu, e meangiti ua te apinga a te maata anga o te aronga akatainuia ra e kua akara akavaavaa uaia e to te ao nei. (1 Korinetia 1:26) Inara kua rauka ia ratou te rekareka anga i to ratou “akateitei anga” ki te turanga ei au tuanga no te Patireia ra. (Roma 8:16, 17) Ei tuke anga, ko te aronga apinganui tei akangateiteiia i mua ana kua kite i te “taakaakaia” ei au pipi na Karaiti no te akavaavaaia e to teianei ao. (Ioane 7:47-52; 12:42, 43) Inara ei au tavini no Iehova, ka rauka ia tatou katoatoa kia rekareka no te mea kare te apinganui o teianei ao e te turanga teitei i te mea maata me akaariteia atu ki te au apinga vaerua ta tatou e rekareka nei. E mei teaa ra to tatou akameitaki anga e i roto ia tatou nei kare e ngai no te akaparau i te turanga pae kopapa!​—Maseli 10:22; Angaanga 10:34, 35.

10. Eaa te manako tau no tetai Kerititiano i te au apinganui kopapa nei?

¹⁰ Te tauturu maira Iakobo ia tatou kia kite e kare to tatou oraanga i runga i te apinganui e te au ravenga o teianei ao. Mei te manea o tetai tiare kare e rauka kia akakore i te reira kia mate atu ei i te “rā ma te veravera maata,” mei te reira katoa kare e rauka i te apinganui a te tangata apinga ra i te akaroa atu i tona ora anga. (Salamo 49:6-9; Mataio 6:27) Penei ka mate ua aia i te aruaruanga i tona “aerenga,” penei i tana pitiniti. No reira, te apinga puapinga maata kia riro kia ‘maata te apinga i te Atua ra’ e kia rave oki i te ka rauka ia tatou kia akatere atu i te apinga no te Patireia ra.​—Luka 12:13-21; Mataio 6:33; 1 Timoteo 6:17-19.

E Ao to te Aronga Akakoromaki i te Timataanga

11. Eaa te au manakonakoanga no te aronga tei mou ra ki to ratou akarongo i te aro atu anga i te au timataanga?

¹¹ E apinganui me kare e putaua, ka mataora anake tatou me ka akakoromaki tatou i te au timataanga. (Iakobo 1:12-15) Me ka akakoromaki tatou i te au timataanga ra ma to tatou akarongo mou, ka rauka kia karangaia tatou e aronga ao, no te mea e rekareka to te raveanga i te tika i te aroaro o te Atua ra. Na te mouanga ki to ratou akarongo tae roa ki te matenga, ka rauka i te au Kerititiano anauia i te vaerua “te korona ora,” mate kore ki te au rangi ra. (Apokalupo 2:10; 1 Korinetia 15:50) Me e manakonakoanga to tatou no te enua nei e tamou marie i to tatou akarongo i te Atua, ka rauka ia tatou kia akara atu ki te ora mutu kore ki runga i tetai enua parataito. (Luka 23:43; Roma 6:23) Mei teaa ra to Iehova meitaki ki te aronga ravarai tei akono ra i te akarongo kiaia!

12. Me ka tupuia e te pekapeka, eaa tatou i kore ei e tau kia tuatua e: “Kua pikikaaia au e te Atua”?

¹² Ka rauka ainei e kia timata a Iehova uaorai ia tatou ma tetai tu patoianga? Kare, kare tatou e tau kia tuatua e: “Kua pikikaaia au e te Atua.” Kare a Iehova e tauta ana kia akavare ia tatou kia rave i te ara mari ra te papu ra ka tauturu ia tatou e ka oronga mai i te maroiroi te umuumuia ra kia akakoromaki i te au timataanga me ka vai ngaueue kore tatou i te akarongo. (Philipi 4:13) E tapu te Atua, no reira kare aia e tuku ia tatou ki roto i te au turanga te ka akaparuparu i to tatou tu arai anga i te rave tarevake ra. Me ka tomo atu tatou uaorai ki roto i tetai turanga tapu kore e ka rave oki i tetai ara, kare tatou e tau kia akaapa iaia, “kare rava te Atua e vavare i te kino, kare rava oki aia e pikikaa i te tangata.” Noatu rai e penei ka tuku a Iehova i tetai timataanga kia ako ia tatou ei puapinga no tatou, kare aia e timata ia tatou ma te akakoro anga kino. (Ebera 12:7-11) Penei ka timata a Satani ia tatou kia rave tarevake, inara ka rauka i te Atua te akaora ia tatou i taua vaerua kino ra.​—Mataio 6:13.

13. Penei eaa te ka tupu me ka kore tatou e kopae ke atu i tetai anoano tarevake ra?

¹³ Ka tau tatou kia pure no te mea penei ka akatu mai tetai turanga i tetai anoano tarevake ra te ka rauka kia akavare ia tatou kia ara. Kua tuatua a Iakobo: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore.” Kare e rauka ia tatou kia akaapa i te Atua no ta tatou ara me ka tuku tatou i to tatou ngakau kia manako ki runga i te anoano rave ara. Me ka kore tatou e takore atu i te anoano tarevake, ‘e kua to’ kua akatupuia ki roto i te ngakau, e kua “anau maira tana ko te ara.” Me kia rave akaopeia te ara, “anau maira tana ko te mate.” Te kiteia ra, ka tau tatou kia paruru i to tatou ngakau e kia arai i te au inangaro no te ara. (Maseli 4:23) Kua akamatakiteia a Kaina e te vaitata ra te ara i te mou mai iaia, inara kare aia i patoi atu. (Genese 4:4-8) E no reira, ka peea me te akamata ra tatou i te aru anga i tetai aerenga tau kore i te tuatua tapu? E mea tika ka tau tatou kia akameitaki me ka tauta mai etai aronga pakari Kerititiano i te akatikatika ia tatou kia kore tatou e rave i te ara ki te Atua.​—Galatia 6:1.

Te Atua​—Te Tumu no te Au Mea Memeitaki

14. I roto i teea tu ka raukaʼi kia tuatuaia e e “tika” anake ta te Atua au apinga oronga mai?

¹⁴ Ka tau tatou kia maara e ko Iehova te Tumu, kare no te au timataanga, mari ra no te au mea memeitaki ra. (Iakobo 1:16-18) Kua kapiki a Iakobo i tona au oa akarongo ra ei “au taeake akaperepere” e te akaari maira ko te Atua Tei Oronga mai ‘i te au mea memeitaki e te au mea tika ravarai.’ E “tika” anake, ta Iehova au apinga oronga mai i te pae vaerua e te pae kopapa kua oti meitaki, kare e apinga i ngere ia. Kua o maiia “no runga ïa,” no ko mai i to te Atua ra ngai nooanga i te au rangi ra. (1 Ariki 8:39) Ko Iehova “te Metua o te au mārama ra”​—te ra, te marama, e te au etu oki. Te oronga katoa maira aia kia tatou i te marama e te tuatua mou i te pae vaerua. (Salamo 43:3; Ieremia 31:35; 2 Korinetia 4:6) Kare mei te ra te akariro ra kia tauiia te au ata i tona neke aereanga e ka tae ki tona teitei anga i te avatea tikai anake ra, ko te Atua ra te vai tamou ra i tona tu teitei i te oronga anga i te mea meitaki. Ka akapapa tikai aia ia tatou no te aro atu i te au timata anga me ka ariki tikai tatou i tana au apinga vaerua orongaia maira na roto i tana Tuatua e “te tavini akono meitaki e te pakari ra.”​—Mataio 24:45.

15. Eaa tetai o ta Iehova ra au apinga meitaki rava i oronga maira?

¹⁵ Eaa tetai o ta te Atua ra au apinga meitaki rava i oronga maira? Te apai maianga i te au tamariki vaerua na roto i te vaerua tapu, i te raveanga angaanga ma te tuatua meitaki, me kare “te tuatua-mou ra.” Te aronga tei tupu ra kia ratou te anau anga i te vaerua kua riro ei “popo mua,” tei ikiia no roto mai i te au tangata kia riro ei “ui ariki e ei kau taunga” i te rangi ra. (Apokalupo 5:10; Ephesia 1:13, 14) Penei te manako ra Iakobo i te au kerite popo mua tei orongaia ra ia Nisana 16, ko te ra ia i akatuakaouiaʼi a Iesu, e te orongaanga oki i nga areto e rua i te ra o te Penetekote ra, i te riringi angaia mai te vaerua tapu ra. (Levitiku 23:4-11, 15-17) I te reira tu, kua riro ko Iesu te momua e ko tona aronga tuangaia “te popo mua.” Ka peea oki e me e manakonakoanga to tatou no te enua nei? Na te tamouanga i te reira ki roto i te manako ka tauturu ia tatou kia mou ki to tatou akarongo i Tei Oronga maira i te “au mea memeitaki” ravarai, nana ra i akariro kia rauka te ora mutu kore i raro ake i te tutara a te Patireia.

Ei Tetai ‘Kia Rave i te Tuatua’

16. Eaa tatou i tau ei kia ‘rapurapu i te akarongo, e kia tavarevare i te tuatua, e te riri oki’?

¹⁶ Noatu ra me te tupu nei kia tatou te au timataanga no to tatou akarongo i teianei e me kare ua ainei, ka tika kia riro “ei aronga rave [tatou] i te tuatua.” (Iakobo 1:19-25) Ka tau “kia rapurapu ua [tatou] ravarai i te akarongo” i te tuatua a te Atua ra, e ei aronga akarongo kia rave i te reira. (Ioane 8:47) I tetai pae, kia “tavarevare [tatou] i te tuatua,” ma te paunu matakite anga i ta tatou au tuatua. (Maseli 15:28; 16:23) Penei te raurau ra a Iakobo ia tatou auraka e rapurapu i te tuatua e i akamata mai i te Atua ra to tatou au timataanga. Te ako katoaia maira tatou “kia tavarevare oki i te riri: Kare oki te riri o te tangata e akatupu i te tuatua-tika a te Atua.” Me kua akaririia mai e te tuatua anga a tetai ke ra, e ‘akono marie tatou’ kia kopae ke i tetai pauanga aviri ra. (Ephesia 4:26, 27) Tetai vaerua riri penei ka akariro ia tatou kia akatupu pekapeka e kia riro ei timataanga no te mea kare e rauka ia etai ke ra kia akatupu i te akarongo te umuumuia maira e to tatou Atua tuatua tika ia tatou nei. Pera katoa oki, me e “kite maata” to tatou ka kore tatou “e riri vave,” e ka piri vaitata mai to tatou au taeake e te au tuaine kia tatou.​—Maseli 14:29.

17. Eaa te ka tupu na te takore anga i te kino o te ngakau e te manako ra?

¹⁷ Ka tau tikai tatou kia tuku ke atu i te “au mea viivii” ravarai​—te au apinga katoatoa te ka akarikarika i te Atua ra e ka akatupu oki i te riri. Pera katoa oki, ka tika tatou kia ‘tuku ke atu i te au mea kino maata.’ Ka tau tatou ravarai kia tama takiri atu i to tatou oraanga i tetai ua atu tu viivii o te kopapa me kare te vaerua ra. (2 Korinetia 7:1; 1 Petero 1:14-16; 1 Ioane 1:9) Na te takoreanga i te kino o te ngakau e te manako ka tauturu ia tatou kia “āriki marie ei ma te maru i te tuatua tanumia mai ki roto ra,” koia te tuatua mou. (Angaanga 17:11, 12) Noatu rai eaa to tatou roa ei au Kerititiano, ka tika tatou kia tuku tamou marie kia maata atu te tuatua mou no te Tuatua Tapu kia tanumia ki roto ia tatou. No teaa ra? No te mea na te vaerua o te Atua, e akatupu i te tuatua tanumia ra “kia akatangata ou” e raukaʼi te ora.​—Ephesia 4:20-24.

18. Eaa te tuke o tetai tei akarongo ua i te tuatua mei tetai tei rave katoa ra oki i te reira?

¹⁸ Akapeea tatou i te akaari anga e ko te tuatua to tatou arataki? Na te akarongo ka riro ei ‘aronga rave oki tatou i te tuatua nei, auraka ei aronga akarongo ua.’ (Luka 11:28) E akarongo to te “aronga rave” te ka akatupu i te au angaanga mei te rave maroiroi ra i te angaanga orometua Kerititiano e te tuatua anga putuputu i te au uipaanga o te au tangata o te Atua ra. (Roma 10:14, 15; Ebera 10:24, 25) Ko tetai tangata akarongo ua i te tuatua “e tau aia i te tangata e akara ua i tona uaorai mata ki roto i te io ra.” Ka akara aia, iaia uaorai e ka aere ke atu i reira e ngaropoina ua iora iaia eaa te anoanoia ra kia akatikatikaia i tona tu akaraanga. Ei ‘aronga rave oki i te tuatua,’ te apii matakite ra tatou e te akarongo oki i te “ture tika rava” te kapiti ra i te au mea ravarai tana e umuumu maira ia tatou. Ko te tu rangatira ta tatou e rekareka nei e tuke roa ia i to te tuikaa anga ki te ara e te mate oki, no te mea ka taki atu ia ki te ora. No reira e ‘rave tamou tatou i te ture tika rava’ ma te akara anga matatio marie e te akarongoanga i te reira. E tamanako ua! Ei ‘aronga rave i te angaanga, kare ei aronga akarongo ngaropoina ua,’ tei ia tatou te rekareka anga tei tupu mai no ta te Atua ra akaperepere anga.​—Salamo 19:7-11.

E Maata Rava Atu i te Peu Akamori Ua

19, 20. (a) Kia tau ki ta Iakobo 1:26, 27, ra eaa ta te akamori ma te umuumu maira ia tatou? (e) Eaa etai akatauanga no te akamori anga viivii kore ra?

¹⁹ Me kia rekareka tatou i te akaperepere anga tu-Atua, ka tau tatou kia maara e ko te akamori mou kare ia i te peu akamori ua. (Iakobo 1:26, 27) Penei ka manako tatou e e aronga ‘akono i te Atua’ arikiia tatou no Iehova, inara ko tana akara matatio mai ia tatou tataki tai ko te tika ia. (1 Korinetia 4:4) Ko tetai tarevake kino penei ko te ‘kore e tapeka i te arero.’ Te akavare ra tatou ia tatou uaorai me te manako ra tatou e te mareka ra te Atua ma ta tatou akamori anga me ka tuatua akakino tatou ia etai ke ra, ka tuatua pikikaa, me kare ka taangaanga tarevake i te arero na etai atu tu. (Levitiku 19:16; Ephesia 4:25) E mea tika e kare tatou e anoano i ta tatou ‘akono i te Atua’ kia riro ei “pikikaa” ma te ariki koreia e te Atua ra no tetai ua atu tumu.

²⁰ Noatu ra e kare a Iakobo i akakite mai i te au tu akamori ma ravarai, kua tuatua aia e te kapiti ra ‘i te takinga-meitaki i te matiroeroe e te au vaine takaua i to ratou mate anga.’ (Galatia 2:10; 6:10; 1 Ioane 3:18) Te akakite maira te putuputuanga Kerititiano i te manako takake i te orongaanga na te au vaine takaua ra. (Angaanga 6:1-6; 1 Timoteo 5:8-10) I te mea ko te Atua Tei Paruru i te vaine takaua e te matiroeroe, e taokotai atu tatou ma Ia katoa i te raveanga i te ka rauka ia tatou kia tauturu atu ia ratou i te pae vaerua e te pae apinga oki. (Deuteronomi 10:17, 18) Ko te aite anga katoa oki o te akamori ma kia “tiaki iaia uaorai auraka ei viivii i teianei ao,” o te taiate tangata tuatua tika kore te vai ua nei i raro ake i te mana o Satani. (Ioane 17:16; 1 Ioane 5:19) No reira kia vai tu rangatira ua tatou i te tu Atua kore o teianei ao kia akakakaʼi tatou ia Iehova e kia puapingaia i te tavini anga iaia.​—2 Timoteo 2:20-22.

21. No runga i te reta a Iakobo ra, eaa etai atu au uianga te tau ra no ta tatou akamanako anga?

²¹ Te ako anga a Iakobo ta tatou i akamanako ake nei ka tau kia tauturu ia tatou kia akakoromaki i te au timataanga e kia mou oki ki to tatou akarongo. Ka tika ia kia akateitei i to tatou ariki anga no Tei Oronga aroa mai i te au apinga meitaki ra. E ka tauturu ta Iakobo au tuatua ia tatou kia akono i te akamori anga ma. Eaa atu tana i apai mai ki to tatou manako anga? Eaa etai atu takainga te ka rauka ia tatou kia rave ei akapapu e e akarongo mou to tatou ia Iehova ra?

[Tataanga Rikiriki i Raro]

Akapeea Koe me Pau?

◻ Eaa te ka tauturu ia tatou kia akakoromaki i te au timataanga ra?

◻ Noatu ra te au timataanga, eaa ra ka raukaʼi i te au Kerititiano kia rekareka?

◻ Akapeea e raukaʼi kia riro tatou ei aronga rave i te tuatua ra?

◻ Eaa te kapitiia ra ki te akamori anga ma?

[Tutu i te kapi 9]

Me tei raro ake i te timataanga, e akono i te akarongo i to Iehova ra mana kia pau i te au pure

[Au Tutu i te kapi 10]

Te akakitekite ra te ‘aronga rave oki i te tuatua’ i te Patireia o te Atua i teianei ao