Te Apainga te ka Aru i te Kiteanga i te Akonoanga Tika

“Ko tei akarongo i te tuatua a te Atua e kua akono atura, ko ratou tei meitaki roa.”​—LUKA 11:28.

1. Me akataka ratou i te akonoanga tika, eaa te au tu tangata te ka patu i to ratou au oraanga takapini i te reira?

KARE e rava ua ma te ngoie i te akataka i te akonoanga tika. Me e aronga inangaro tatou i te mea tika e te mou, me kiteaia e tatou te reira, ka patu tatou i to tatou oraanga takapini i te reira. Kare te akonoanga mou i te apiianga manako ua; e tu oraanga te reira.​—Salamo 119:105; Isaia 2:3; akaaite ia Angaanga 9:2.

2, 3. (a) Akapeea a Iesu i te tuatua tikai anga i te puapinga o te rave anga i to te Atua anoano? (e) Eaa te apainga te vaira ki rungao i te katoatoa tei kite ra i te akonoanga tika?

² Kua tuatua tikai a Iesu Karaiti i te puapinga o te raveanga i ta te Atua i akari ra e ko Tona anoano. I te taopenga anga i tei kiteaia mai e ko te Tuatua i te Maunga, kua akakite a Iesu e kare te katoa anga tei tuatua iaia e ko te Atu (te akatutuanga ra ei au Kerititiano) e tomo ki roto i te Patireia; ko te aronga anake ua te rave ra i te anoano o tona Metua. Ko tetai pae atu, i karangaʼi aia, ka kopaeia ei “aronga rave tuatua kino.” Eaa ra i riro ei e ko te rave kino? No te mea mei ta te Puka Tapu e akakite ra, te autu kore anga i te rave i to te Atua anoano e ara ia, e te au ara ravarai e rave kino ia. (Mataio 7:21-23; 1 Ioane 3:4; akaaite ia Roma 10:2, 3.) Penei kua kite tetai tangata i te akonoanga tika, penei ka akameitaki aia i te aronga e apii ra i te reira, e penei ka akapaapaa aia i te aronga te rave ra i te reira, inara tei iaia katoa te apainga o te taangaanga anga i te reira i roto i tona uaorai oraanga. (Iakobo 4:17) Me ariki aia i te reira apainga, ka kite aia e ka akapuapinga maataia tona oraanga, e ka kite aia i te rekareka te ka rauka mai.

³ I roto i te atikara i mua ake, kua uriuri tatou e ono o te au akairo akatakaanga no te akonoanga mou. Kare anake te reira au mea takitai e tauturu ia tatou i te akataka i te akonoanga tika mari katoa ra te oronga maira kia tatou uaorai i te au akaaoanga e te au tuatau te ka rauka. Na teea tu?

Akapeea Koe i te Ariu Anga ki te Tuatua na te Atua?

4. (a) I te aronga ou e akamata maira i te piri atu ki te Au Kite o Iehova, eaa ta ratou ka kite vave no runga i ta te Au Kite taangaanga anga i te Puka Tapu? (e) Akapeea ta te angai meitaki angaia i te pae vaerua i te akatuki anga i te au tavini o Iehova?

⁴ I te Au Kite o Iehova e apii ra i te Puka Tapu ki te aronga ou tei inangaro ra, e manganui o teia aronga ou te kite viviki ra e ko tei apiiia ra no roto mai ia i te Puka Tapu. Ei pau i ta ratou au uianga, kare ratou e takiia ki te au apiianga ekaretia, ki te au peu tangata, me kore ki te au manako o te au tangata rongonui. Ko ta te Atua uaorai Tuatua te mana tuatua. Me aere ratou ki te Are Uipaanga Patireia, te kite ra ratou e i reira ko te Puka Tapu rai te puka puapinga tikai. Kare e roa te aronga ngakau tae tei kimi ra i te tuatua mou i te kite e ko tetai tika maata i roto i te rekareka ta ratou e kite ra i rotopu i te Au Kite o Iehova koia oki ko te tika e te angai meitakiia ra ratou i te pae vaerua mei te Tuatua na te Atua.​—Isaia 65:13, 14.

5. (a) Eaa te akaaoanga tei orongaia ki te aronga te kite ra i te Au Kite o Iehova? (e) Akapeea ratou i te piri anga ki roto i te rekareka o te Au Kite?

⁵ Me te kite ra koe i teia, akapeea koe i te ariu anga atu ki te reira? Me te marama ra koe i te reira, kare e rauka ngoie ua ia koe kia riro mai ei tangata akarakara ua ma te puapinga kore, e kare katoa koe e inangaro kia pera. Te akari maira te Puka Tapu e ko te “aronga akarongo ua” inara kare i te ‘aronga rave oki i te tuatua’ te ‘pikikaa ua ra ia ratou uaorai.’ (Iakobo 1:22) Te pikikaa ra ratou ia ratou uaorai no te mea te autu kore ra ratou i te kite e noatu e eaa ta ratou ka tuatua, na ta ratou autu kore anga i te akarongo i te Atua e akari mai e kare ratou e inangaro tikai ana iaia. Ko tetai akatutu anga akarongo tei kore ra i turuia e te au angaanga e akarongo mate ia. (Iakobo 2:18-26; 1 Ioane 5:3) Ei akatuke anga, ko tei akakeuia e te inangaro ia Iehova kia riro mai ei ‘tangata rave i te angaanga’ ka ‘akameitakiia aia i te rave anga.’ Ae, mei ta Iesu Karaiti i akamarama ra, “ko tei akarongo i te tuatua a te Atua e kua akono atura, ko ratou tei meitaki roa.”​—Iakobo 1:25; Luka 11:28; Ioane 13:17.

6. Me ariki tikai tatou i te Tuatua na te Atua, eaa te au tuatau ta tatou uaorai ka titau i te mou mai?

⁶ Ka oonu te reira rekareka ia koe e tupu ra i roto i te kite anga i to te Atua anoano e te taangaanga i te au mea e manganui taau e apii ra. Mei teaa ra te maata o taau tauta anga i te apii i te Tuatua na te Atua? E ngauru ua atu e te tauatini ua atu au tangata tei kite kore ana kua angaanga pakari ra i te apii i te tatau, te rave tikai anga i teia e raukaʼi ia ratou i te tatau i te au Tuatua Tapu e te apii i te reira ki tetai atu au tangata. Ka tu mai tetai pae i te au popongi maiata ravarai e raukaʼi ia ratou i te akapou i etai au taime i te au ra takitai te tatauanga i te Puka Tapu e te au tauturu apii Puka Tapu, mei Te Punanga Tiaki. Ia koe uaorai e rave putuputu ra i te tatau i te Puka Tapu me kore te akara i te au irava tei taikuia i roto i tetai atu au akapapa anga apii, e akara meitaki ana i te au ture e te au akauenga a Iehova, e e kimi i te kite i te au kaveinga e manganui te vaira ei arataki ia tatou. Ka akamanako ana e eaa ta te au tuanga takitai e akakite maira no runga i te Atua, tana akakoroanga, e tana raveraveanga ma te au tangata nei. E tuku i te tuatau no teia kia roromi i toou ngakau. E tamanako ana e me e au mataara ainei tetai te vaira e raukaʼi ia koe i te taangaanga maata atu i te ako a te Puka Tapu i roto i toou uaorai oraanga.​—Salamo 1:1, 2; 19:7-11; 1 Tesalonia 4:1.

Te Oti ra Ainei Taau Akono Anga Kia Iehova?

7. (a) Akapeea te apiianga Toru Tai i te akatuke anga i te au tauta anga a te au tangata no te akamori i te Atua? (e) Penei eaa te ka tupu mai me apii tetai tangata i te tuatua mou no runga ia Iehova?

⁷ Ki te mirioni ua atu au tangata, kua riro ana ei mea maru i te kite e kare te Atua mou ra i tetai Toru Tai. Kare rava te akamarama anga “e mea muna te reira” i akamerengo ana ia ratou. Akapeea ratou i te akapiri vaitata anga ki tetai Atua tei marama koreia ra? Tei tupu ra mei te reira apiianga, kua rave ratou i te kopae i te Metua (ko tona ingoa kare rava ratou i rongo ana i roto i te are pure) e kua akamori ia Iesu ei Atua me kore kua tuku i ta ratou akamori anga kia Maria (tei apiiia kia ratou e ko te “Metua Vaine o te Atua”). Inara kua ariu mai to ratou ngakau ma te mareka ra i te akatuera anga tetai o te Au Kite o Iehova i te Puka Tapu e te akari anga atu kia ratou i te ingoa tikai o te Atua, ko Iehova. (Salamo 83:18) Kua rekareka tikai tetai vaine Venetuera i te akari angaia te ingoa tu-Atua e kua takave tikai atu aia i te Kite mapu tei oronga ra i te reira tuatua mou akaperepereia kiaia e kua akatika i tetai apii Puka Tapu i te kainga. Me apii teia au tu tangata e kua tuatua a Iesu i tona Metua e ko ‘toku Atua e to kotou Atua’ e kua tuatua a Iesu i tona Metua e ko “te Atua mou ra,” ka kite i reira ratou e ko ta te Puka Tapu e apii ra no runga i te Atua kare ia i te mea marama koreia. (Ioane 17:3; 20:17) Ia ratou e kite maira i to Iehova au tu, kua piri vaitata ratou kiaia, te akamata anga i te pure kiaia, e te inangaro i te akamareka iaia. Eaa tei tupu?

8. (a) No to ratou aroa ia Iehova e to ratou anoano i te akamareka iaia, eaa ta te mirioni ua atu au tangata i rave? (e) Eaa ra te papetito anga Kerititiano i puapinga tikai ei?

⁸ I te tuatau o te tai ngauru mataiti i topa, e 2,528,524 au tangata i runga i te au enua e ono e ki runga i te au airani e manganui tei akatapu i to ratou au oraanga kia Iehova e i reira te akatutu anga i teia akatapu anga na roto i te papetito anga ki te vai. Ko koe ainei tetai ia ratou, me kore ra te akapapa ra ainei koe i teianei kia papetitoia? I roto i te oraanga o te au Kerititiano mou ravarai e rave anga puapinga te papetito anga. Kua tono a Iesu i tana au pipi kia akariro i te au tangata o te au pa enua ravarai ei au pipi e kia papetito ia ratou. (Mataio 28:19, 20) E mea puapinga katoa i te kite e i muri viviki ua ake i to Iesu uaorai papetito anga to Iehova uaorai tuatua anga mei te au rangi ra, te na ko anga e: “Ko taku tamaiti akaperepere koe; kua mareka rava au ia koe.”​—Luka 3:21, 22.

9. Te tamou anga i tetai pirianga akatikaia ma Iehova ra, eaa te umuumuia ra ia tatou?

⁹ E mea akaperepereia tetai pirianga marekaia ma Iehova ra. Me kua tomo koe ki roto i teia tu pirianga na te akatapu anga e te papetito anga, e kopae i tetai ua atu mea te ka takino i te reira. Auraka e tuku i te au apiapi anga o te oraanga e te manata anga i te au mea materia kia opara i te reira ki te ngai rua. (1 Timoteo 6:8-12) E noo tikai kia rotai ki te ako a Maseli 3:6: “Auraka e akangaropoina [ia Iehova] i toou katoa ra au aerenga; e nana e akakite kia koe i toou ra au arataa.”

Mei Teaa ra te Oonu o to Karaiti Aroa i te Akatuki Anga ia Koe?

10. Eaa ra ta tatou akamorianga ia Iehova e kore ei e akatupu ia tatou kia kopae ia Iesu?

¹⁰ E tikai na te tu ariki anga tau no Iehova ei Atua mou anake, kare ia e akatupu i tetai tangata kia kopae ia Iesu Karaiti. I tetai tua, te karanga ra a Apokalupo 19:10 e: “Ko te akakite oki ia Iesu ra, ko te vaerua ïa o te totou.” Mei ia Genese kia Apokalupo, te oronga maira te au totou akauruia i te au akakite anga no runga i te tuanga angaanga a Iesu Karaiti i roto i ta Iehova akakoro anga. I tetai tangata e kite maira i taua au akakite anga ra, ka tu mai tetai tutu umere tei matara ra mei te au pikikaa e te au manako tarevake tei tupu maira mei te au apiianga pikikaa a Kerititome.

11. Akapeea te apiianga i ta te Puka Tapu e apii tikai ra no runga i te Tamaiti a te Atua i te akatuki anga i tetai vaine i Porani?

¹¹ Na te maramaanga i te tuatua mou no runga i ta te Atua Tamaiti ka riro ia ei tuki anga ngateitei ki runga i tetai tangata. Ko te reira te tu ia Danuta, e vaine i Porani. Kua aravei tamou ana aia i te Au Kite o Iehova no te varu mataiti, kua rekareka i ta ratou i apii, inara kare i akariro ana i te akamori anga mou ei tu oraanga nona. I reira kua rauka iaia tetai kopi o te puka Te Tangata Maata Rava Atu Tei Ora Ana, tei oronga maira i te oraanga o Karaiti na roto i tetai tu ngoie ua i te marama.a I te roa anga aiai, kua akatuera aia i te puka, te manakoanga i te tatau okotai ua pene. Inara kua taea te maiata tona akaoti anga i te puka, i reira kua tuku i te reira ki raro. Kua aue aia. Te kapiki anga: “E Iehova, e akakore mai i taku i rave.” Tei tupu mai mei tana i tatau ra, kua kite maata atu aia i te tu aroa tei akariia e Iehova e tana Tamaiti. Kua kite mai aia e no te varu mataiti kua uri ke ana aia ma te ariki kore mei te tauturu ta te Atua i oronga ana kiaia ma te akakoromaki. I te 1993 kua papetitoia aia i te akatutu anga i tona akatapu anga kia Iehova tei akatumuia ki runga i te akarongo ia Iesu Karaiti.

12. Akapeea te kite tika tikai ia Iesu Karaiti i te akatuki anga i to tatou au oraanga?

¹² “Te kite [“tika tikai,” NW] i to tatou Atu ia Iesu Mesia” te piri atura ia ki te maroiroi anga e te uua anga ei Kerititiano. (2 Petero 1:8) Mei teaa te maata o taau tuanga i roto i teia angaanga, te tua anga i te tuatua Patireia ki tetai pae atu? Ko te maata o ta te au tangata tataki tai ka rauka i te rave tei runga ua ia i te au turanga e manganui. (Mataio 13:18-23) I etai au turanga kare e rauka ia tatou i te taui; i tetai pae ka rauka ia tatou. Eaa te ka akakeu ia tatou kia akataka e te rave i te au taui anga te ka rauka i te raveia? Kua tata te apotetoro Paulo e: “Te riro nei oki matou i te aroa o te Mesia ra”; mei tera te tu, ko te aroa tana i akari ra i te oronga anga i tona oraanga no tatou e puapinga maata tikai ia e i to tatou tu ariki no te reira e tupu maira, ka akakeu oonuia rai to tatou uaorai au ngakau. Te ka tupu mai, ka kite tatou e e mea tau kore maata no tatou i te tamou i te aruaru i te au akakoro anga noinoi e te noo maata anga i te akamerengo ia tatou uaorai. Mari ra, ka akatanotano tatou i ta tatou au angaanga no te oronga i te ngai mua ki te angaanga ta Karaiti i apii i tana au pipi kia rave.​—2 Korinetia 5:14, 15.

Takake Mei Teianei Ao​—Mei Teaa te Maata?

13. Eaa ra tatou ka kore ei e inangaro kia riro mai ei tuanga no tetai akonoanga tei akariro ra iaia uaorai ei tuanga no teianei ao?

¹³ Kare i te mea ngata i te kite i te papaanga tei raveia e Kerititome e tetai atu au akonoanga no te mea te inangaro ra ratou kia riro mai ei tuanga no teianei ao. Kua taangaangaia te au moni no te turu i te au angaanga orureau. Kua riro mai te au epitekopo ei aronga tamaki ua. I te au ra ravarai, te akakite ra te au nutipepa i te au ripoti no runga i te au pupu akonoanga patoitoi i roto i te au tuanga ke ke o te enua nei te tamaki ra i tetai e tetai. Te ki ra to ratou rima i te toto. (Isaia 1:15) I te ao katoa te rave ua atura te au orometua akonoanga i te tauta i te taui i te turanga poritiki. Kare a te aronga akamori mou tuanga i roto i teia.​—Iakobo 4:1-4.

14. (a) Eaa ta tatou uaorai ka tau kia kopae me ka tamou ua atu tatou i te takake mei teianei ao? (e) Eaa te ka tauturu ia tatou kia kopae mei te ereere angaia e te au tu e te au rave anga o teianei ao?

¹⁴ Inara e maata atu te ka o mai ki roto i te takake anga mei teianei ao. Te akatutuia ra teianei ao e te noinoi moni e te ka rauka i te moni i te oko, te anoano no te tu rongonui uaorai, te aruaru tamou anga i te au ravenga navenave, pera katoa te au mea mei te ngere anga i te tu manako ngakau tae no tetai pae atu, te pikikaa e te au tuatua akakino, te meameaau anga i te aronga mana akatere, e te autu kore anga i te taangaanga i te tu akatere-uaorai. (2 Timoteo 3:2-5; 1 Ioane 2:15, 16) No to tatou uaorai tu tiama kore, penei i tetai au taime ka akaata tatou i tetai o taua au tu ra. Eaa te ka tauturu ia tatou i roto i ta tatou putoto anga no te kopae i te reira au ereere ra? Te anoanoia ra tatou kia akamaara ia tatou uaorai e koai to muri ake i te reira au mea ravarai. “Te vai ua nei rai to te ao ravarai i raro ake i taua vaerua kino ra.” (1 Ioane 5:19) Noatu e mei teaa te manea i te akara anga o tetai arataa, noatu e eia ua atu au tangata te noo ra na te reira tu, me kite tatou i to Iehova enemi maata, ko Satani te Tiaporo ra, i muri ake i te reira, ka kite tatou e mei teaa tikai te viivii i te reira.​—Salamo 97:10.

Mei Teaa te Mamao ta Toou Aroa e Itae Ra?

15. Akapeea te aroa oronga ua taau i kite ra i te tauturu anga ia koe i te akataka i te akonoanga tika?

¹⁵ I toou akamata mua anga i te piri atu ki te Au Kite o Iehova, kare e ekoko anga e kua reka koe i te tu aroa tei akariia i rotopu ia ratou no te mea no tona tuke ki te vaerua o teianei ao. Na te aroa tei akatumuia ki runga i te aroa oronga ua e akatuke ana i te akamori anga mou o Iehova mei tetai atu au tu akamori anga katoatoa. Penei e na teia i akakeu ia koe e te rave tikai ra te Au Kite o Iehova i te akonoanga tika. Kua karanga a Iesu Karaiti uaorai e: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—Ioane 13:35.

16. Eaa te au tuatau penei te vaira no tatou tataki tai i te akamaora atu i to tatou aroa?

¹⁶ Te akataka katoa ra ainei te reira tu ia koe e ko tetai o ta Karaiti au pipi? Te vaira ainei tetai au mataara e raukaʼi ia koe i te akamaora atu i taau akarianga i te tu aroa? Kare e ekoko anga e ka rauka ia tatou pouroa. E maata atu te vaira i te tu oaoa ra ki tetai pae atu i ko i te Are Uipaanga Patireia. E me ka akatotoa atu tatou i te tu aroa ki te aronga anake tei aroa maira ia tatou, eaa i reira te tuke i rotopu ia tatou e to teianei ao? Te raurau ra te Puka Tapu e “ko te aroa rai, kia maata tikaia ïa ia kotou uaorai.” (1 Petero 4:8) Penei e kiaai ma ta tatou akari maata anga atu i te aroa? Ki tetai tungane me kore tuaine Kerititiano ainei tei tuke ra tona ngai i aere mai ei ki to tatou e tei riro ra tona tu i te rave anga i tetai au mea ei akariri ra ia tatou? Ki tetai tangata ainei, no te maki ra me kore te ruaine, kare i rauka ana i te aere putuputu ki te au uipaanga? Ki to tatou tokorua akaipoipo ainei? Me kore ra penei, ki to tatou nga metua ruaine ainei? Kua manako etai pae te meitaki ra i te akari i te au ua o te vaerua, kapiti mai te aroa, e mei te mea atura e te apii akaou ra ratou i te reira me aravei atu ratou i te au turanga ngata tikai te ka tupu mai i roto i te vaitata rai i te akono takiri anga atu i tetai mema o te pamiri tei akangoru pakariia ra. Noatu e me aroia atu teia au turanga nei, e tau katoa tikai to tatou aroa kia itae atu ki vao ake i to tatou uaorai ngutuare tangata.

Akakitekiteanga Patireia​—Mei Teaa ra te Puapinga Kia Koe?

17. Me kua puapingaia tatou uaorai mei te au atoro anga a te Au Kite o Iehova, eaa te tau ra ia tatou i teianei i te manako ma te akakeuia i te rave?

¹⁷ Ko tetai mataara puapinga e raukaʼi ia tatou i te akari i te aroa no to tatou au tangata koia oki na te akakitekiteanga i te Patireia o te Atua kia ratou. Okotai anake pupu tangata te rave ra i teia angaanga ta Iesu i akakite ra. (Mareko 13:10) Ko te Au Kite o Iehova teia. Kua puapingaia tatou uaorai mei te reira. E akameitakianga na tatou i teianei no te tauturu atu i tetai pae. Me akono tatou i to Iehova manako no runga i teia, ka riro teia angaanga ei mea rongonui i to tatou oraanga.

18. Akapeea ta tatou tatauanga i te puka Jehovah’s Witnesses​—Proclaimers of God’s Kingdom i te akatuke anga i ta tatou uaorai piri anga ki roto i te akakitekiteanga i te Patireia?

¹⁸ Ko te papaanga reka e i akapeea te tuatua Patireia i te apaina angaia ki te au tuanga ngai mamao tikai o te enua nei o teia au ra openga, te akakiteia ra i roto i te puka Jehovah’s Witnesses​—Proclaimers of God’s Kingdom. Me ka kite koe i te reo Engarani, e tatau i te reira. E ia koe e pera ra, e akara tikai i te au mataara pouroa ta te aronga tataki tai i rave ra i te oronga anga i tetai akakite anga no runga i te Patireia. Te vaira ainei etai akaraanga ka rauka ia koe i te aru? E manganui te au tuatau te tuera ra kia tatou katoatoa. Kia riro to tatou aroa no Iehova ei akakeu ia tatou kia taangaanga meitaki i te reira.

19. Akapeea tatou i te puapinga angaia me ariki tatou i te apainga te ka aru i te kiteanga i te akonoanga tika?

¹⁹ Me taangaanga i reira tatou ia tatou uaorai i te rave anga i to Iehova anoano, ka kite tatou i te pau anga ki te uianga, Eaa te aiteanga o te oraanga? (Apokalupo 4:11) Kare tatou e kimi puapinga kore akaou atu, te noo anga ma tetai manako anga ki kore. Kare atu e ngai angaanga e raukaʼi ia koe i te oronga kia koe uaorai te ka apai mai i te merengo tei maata atu i te taangaanga anga ia koe uaorai ma te ngakau tae i te tavini i te Atua ko Iehova. E mei teaa atura te tuatau mekameka te vai maira i mua! Ko tetai oraanga merengo i roto i tana ao ou, te ngai e raukaʼi ia tatou i te taangaanga i to tatou au mero ki tona ki katoa te rotai anga atu ki te akakoro anga aroa i angaʼi te Atua i te au tangata nei.

[Au Tataanga Rikiriki i Raro]

Akapeea Koe me Pau?

◻ Eaa ra i puapingaʼi no tetai akonoanga kia ariki i te Puka Tapu ei Tuatua na te Atua e te akangateitei ia Iehova e ko te Atua mou?

◻ Eaa ta te akonoanga mou e apii ra no runga i ta Iesu tuanga angaanga ei Oko?

◻ Eaa ra te au Kerititiano ka takake tamou mai ei mei teianei ao e e rave ei i te aroa oronga ua?

◻ Eaa ta te akakitekiteanga Patireia tuanga angaanga i roto i te akonoanga tika?

[Au Tutu i te kapi 16]

E takainga puapinga te papetito anga i roto i te arikianga i te au apainga o te akamori anga mou. I te marama takitai, e 25,000 i te ao katoa te rave ra i te reira takainga

Rutia

Tenekara

Papua Nu Kini

U.T.M.

[Au Tutu i te kapi 17]

Na te oronga anga i te tuatua mou Puka Tapu ki tetai pae e tuanga ia no te akamori anga mou

U.T.M.

Paratiri

U.T.M.

Ongo Konga