Auraka e Akangaropoina i Toou Tokorua!

TE AKARUKE ra tetai nga tokorua i te Are Uipaanga Patireia. Te mata katakata o te tane e te vaine te akaata ra ki runga i te mataora ta raua e rekareka ra ei “kopapa okotai,” ma te taokotaiia i ta raua akamori i te Atua ko Iehova. (Mataio 19:6) Inara, kare rava raua i mataora ua ana i to raua tu taokotai me kore te noo kapiti anga i te irinaki okotai. Te vaira tetai au taime te aere anga te vaine ko Atsuko ki te au uipaanga koia anake ua. E oti akera ka oki atu ki te kainga ki te tane riririri tei avaava kiaia. Tana tane, ko Kazutaka, i tetai taime kua riri tikai aia e kua mou i te kaingakai kaikai e no tona ririnui kua uriia te kai ki runga i te taua.

Mei ta Iesu i akakite, kua apai mai te Kerititiano mou i te keanga ki roto i etai au ngutuare tangata. (Mataio 10:34, 35) Tera ra, mei ia Kazutaka e Atsuko, te rekareka ra etai i teianei i te tu taokotai i te akonoanga e te rekareka i to ratou kainga. Kare teia tu taokotai i te mea tupu ua. Eaa ta te aronga irinaki i rave no te aro atu i te patoi anga e te apai i te tu akaau mou ki roto i te ngutuare tangata? I mua ake ka akara ei tatou i te reira, ka akara ana tatou e no teaa etai au tokorua i patoi ei.

Eaa Ratou i Patoi Ei?

“Me akara au ki muri,” i to Atsuko akakite anga, “kua kite au e kua aere ua au ki te au uipaanga ma te kore e akamaramaanga i te au mea ki taku tane.” Kua riri a Kazutaka no tei vao uaia aia koia anake ua ma te kore i akakiteia.

Ka tupu rai te au patoianga kino no te vareae. Tetai tane, ko Shigeo, kua akatupu i tetai au tarotokaka anga i te au taeake ou o tana vaine. “I taku vaine e akamanea ra iaia e kua aere atu ki tana au uipaanga, kua manako au e e tangata akaou atu tetai.” “Kare tikai o maua taime i te tuatua ko maua ua,” i tuatuaʼi tana vaine ko Masako. “Kare tikai au i akaari ana i toku manako ngakau e te anoano e kia apii aia i te tuatua mou Kerititiano.”

Ko Toshiko, e vaine no te ngutuare, tona manako mei to Shigeo rai. “I te akamata anga taku tane i te apii ki te au Kite o Iehova, kua patoi au no te mea te pou maata ua atu ra tona taime ki te putuputuanga. Kua anga au ki te moina no te akakore atu i toku manako ngakau iaia e ngaro atu ra.”

Kua akaari mai rai a Toshiko i tetai akaou atu tumu ke​—ko te maromaroa. Akapera tetai aronga tei patoi i mua ana i te manako anga me aere putuputu to ratou au tokorua ki ta ratou au uipaanga. “Ko au anake ua i roto i te are, kua manako tikai au e kua akarukeia au,” i maaraʼi i tetai tane. “Kua manako tikai au mei te mea e te akaruke ra taku vaine e taku tamariki iaku,” i tuatuaʼi tetai. Mei te mea e e aka angaanga i te maata anga o te au tane i te tuatua e, “e maromaroa au e noo mai ana ki te kainga ine,” kua uri etai pae ki te patoianga i te angaanga a te akonoanga a tona tokorua.

Penei ka arataki te taomianga mei te au taeake e te au kopu tangata ki tetai patoi anga a tetai tokorua kua marama meitaki. Kua tuatuaia i Asia no te vaine e “ka riro mai aia ei tuanga o te kopu tangata kare kia taokotaiia ki tana tane.” Ka rauka mai te taomianga mei te au kopu tangata i te akatupu i te ke anga. Kua patoi ta Takashi vaine Kerititiano i te piri atu ki te akamori i te atarau akonoanga Buda a te kopu tangata. “No te ngata i te au mea,” i akamaramaʼi a Takashi, “kua noo maua ki te pae i toku nga metua. Kua tupu te taomianga kiaku mei toku metua vaine, no reira kua tamataku au i taku vaine e kua ta atu iaia.

Ka tupu te ta ua mei te au mea marama koreia, tei kino rava atu na roto i te piri anga manako kino, te vareae, te maromaroa, me kore te taomianga mei te au kopu tangata. Kua akakite tetai tangata tei ta ana i tana vaine e: “Kare au i inangaro kia peke toku ngutuare tangata ki tetai akonoanga.” Tuatua akaou tetai e: “E riri ana au i te oki ki te kainga ki tetai are kare e tangata i reira.” Penei i ta ratou tamanako anga e, ‘me kare e rauka i te au tuatua i te tapu i teia tu akonoanga, ka rauka i tetai au moto.’

Ma te rekareka, pouroa te au tokorua i taikuia atu, kua taokotaiia i ta ratou akamori. Pouroa to ratou au manamanata tei muri te reira ia ratou. Inara, ia ratou i na roto ei i teia, tei roto i te turanga meitaki no te oronga i te au manako te ka angaangaia e te ka tauturu i te au turanga kino maata penei ka tupu e penei te akatupu atu i te akamori taokotai i roto i te ngutuare tangata te tupu ra rai te ke anga.

E Piri ki te Tuatua Mou

Me oake koe i toou rima ki tetai peretana e maremoia ra, kia rauka ia koe uaorai tetai takainga ngaueue kore. Me kare ia, penei ka topa koe ki roto i te vai. E tau rai, te taviri no te tauturu anga i toou tokorua, kia rauka tetai mou piri anga ngaueue kore noou uaorai ki runga i te akaoraanga a te tuatua mou. “I te kino pakari anga toku tu patoi,” i tuatuaʼi tetai tei patoi ana i te taime mua, “kua apai rai taku vaine i ta maua tamariki ki te au uipaanga. Naringa aia i paruparu i te reira, penei ka ekoko au i te tika tikai o tona tu akarongo.”

Kua akaari mai a Kazutaka, tei akauri i te kaingakai ki raro, e eaa i taui ei tona tu iaia e akakite ra i te katoa anga o tana tua: “I te openga, kare au i oake i tetai moni kia Atsuko no te apinga akaoro. Noatu rai, kua aere aia ki te au uipaanga pouroa e kua apai rai i te tamariki. No te rave i te reira, kua oko rikiriki aia i tona au apinga. Kua manako auouo tikai au e kua ngaro toku inangaro i te patoi iaia. Tera ua, kua akamata au i te tatau i te au makatini tana i akaruke ki vao kia akara au.”

E Tuatua ki Toou Tokorua

“I te pati rai au i taku tane kia piri mai ki aku e te akakite kiaia e te inangaro ra au ia maua kia apii kapipiti i te Puka Tapu,” i tuatuaʼi te vaine a Kazutaka, ko Atsuko. “E taitaia ua ana rai aia iaku e te ngutuare tangata. Penei na te pirianga manako te tuatua kapiti anga e akamaru i teia manako taitaia naringa au i rave i te reira.” Ae, ko te pirianga manako te taviri ki te marama anga tikai. Te ako maira te Puka Tapu: “Te vaira te marikonga kore o te au angaanga me kare e tuatua anga mako meitaki.” (Maseli 15:22, NW) I roto i teia aerenga tuatua, te “tuatua anga mako meitaki” ma toou tokorua no runga i te au angaanga akonoanga, kia manako meitakiia te reira e te raveia ma te tau tikai. “Na te ngakau o te tangata pakari e akakite ki te vaa i te akono, e na te reira e akakite ki te ngutu i te kite.” (Maseli 16:23) E puapinga katoa rai kia akono meitaki i te ikianga i te tuatau tau no te tuatua.​—Koheleta 3:7.

Aiteite te puapinga e akapeea koe me tuatua i taau tuatua. Te akamaroiroi ra te apotetoro ko Paulo e: “Ei tuatua aroa ua anake ta kotou, kia rapakauia i te tai, i te kite anga i te mea tika kia tuatua atu ki te tangata katoa ra.” (Kolosa 4:6) Me tuatua koe ma te tau, na roto i te tu meitaki, kare i reira toou tokorua e topiri rava i tona taringa ki taau ka tuatua.

Te kite nei te maata anga o te au tane i te ngata e ka apiiia ratou e ta ratou au vaine. No reira ka anoanoia te au vaine kia oronga ua i te tauturu. Kua taangaanga meitaki a Kikuyo i te au puka a te Watch Tower Society (Totaiete Punanga Tiaki Anga). Kua tuatua aia: “Me tae mai taku Awake! na roto i te mere, ka tatau au no tetai au mea penei ka reka mai taku tane. I reira kua pure au no tetai tuatau i te oronga atu i te reira kiaia.” Ka akaruke aia i te makatini ki roto i te are pai e kua oki akaou au i te akara i te au kapi i te au ra katoatoa me kua tatau rai aia i tetai atikara. I te akaraanga e kare aia i tatau ua atu, ana ka taui aia i te makatini. I teianei e tavini orometua te tane a Kikuyo e e painia.

Te Mana o te Tu Meitaki

Inara akapeea me kare toou tokorua e inangaro ana i te uriuri i te akonoanga kia koe? Penei na roto i te piri anga atu ki tetai pae au Kerititiano penei ka tapu te reira i te patoi anga veravera e te akakeu i toou tokorua kia apii i te Puka Tapu. I tetai taime i topa, kare a Masao e akatika i te au Kite o Iehova kia aere mai ki tona kainga i teianei e tangata pakari aia. Kua akamaara aia: “I te openga kua akatika au i tetai apii Puka Tapu ki te au Kite i te pati akatenga anga mai taku vaine iaku kia aere e tauturu i te akatuanga i te Are Uipaanga Patireia. Kua pakiaia tikai au i te kite i te katoatoa i te angaanga kapipiti anga ma te rekareka​—ma te kore e tutaki.”

Inara eaa taau ka rauka i te rave me kare toou tokorua e inangaro i te uriuri i te akonoanga ki tetai ua atu? Kua akamaroiroi te apotetoro ko Petero e, me “kare tetai pae e akarongo i te tuatua ra, kia rauka mai ratou i te akono meitaki o ta ratou au [tokorua], auraka atu rai te tuatua.” Ei akaraanga, eaa te tu akaraanga o te vaine e rauka mai ei tana tane? Na te “aerenga viivii kore i kapiti katoaia i te mataku” te akaari maira i “te tangata ngaro ra ko te ngakau te akamanea, i te manea piro kore ra, ko te ngakau maru e te muteki ua,” i tuatuaʼi a Petero.​—1 Petero 3:1-4.

Kua rave tetai vaine Kerititiano i teia kaveinga i te o anga tana tane patoitoi ki roto i tetai angaanga tarevake. Noatu e kua apai mai teia i te taakama anga a te katoatoa kiaia pera katoa kare ana moni, kare rava aia i rongo ana i tetai ua atu kopekope anga mei tana vaine e te tamariki. Kua akakite te tane, “kua kite au e no ta ratou apii Puka Tapu i puapinga meitaki ei to ratou tu.” I muri ake i te au mataiti patoitoi, kua akamata aia i te tatau i te Puka Tapu. Kua akara tetai pae au tane tei riro mai ei au Kite i muri mai e: “E tane kopekopeia tikai au inara kare i roa ana kua akangateitei mai taku vaine iaku ei upoko no te ngutuare.” “I te aere anga mai toku au taeake angaanga ki to matou are, kua ariki maata tikai taku vaine ia ratou. Kua reka tikai au i te reira.”

Ka rauka katoa i te tu meitaki o te tamariki i te akamaru i te ngakau o te aronga patoitoi. I te uiia anga e eaa i taui ei tona tu, kua tuatua tetai metua tane tei patoi ana i tana vaine e: “I te kite anga taku tamaiti e rua e te apa mataiti e te vaitata ra au i te riri, ka aue maata aia ma te kapiki e: ‘E akakoromaki anga roa to te aroa, e te takinga meitaki. . . . ’” (1 Korinetia 13:​4-7) Kua akakeu teia tamaiti tei apii meitakiia i tona metua tane kia akara i te Puka Tapu. E manganui te au metua tane tei manako no te akara matatio i te Puka Tapu no te mea kua pati akatenga ta ratou tamariki ia ratou kia apii.

I te taopenga, kua aere mai tetai tuatua anga katakata e te manako no te tuatua kangakanga penei ka tupu te mea umere ki te tu o toou tokorua. Kua akakite tetai tane ki tana vaine irinaki e kia apai i tana ua i inangaro e e aere ki vao, auraka rava e oki akaou mai. “Kare au i inangaro i taku tama, kare te moni, kare te apinganui,” i pau atu ei tana vaine. I reira kua oora aia i tetai furoshiki (potonga kakau e taangaangaia ana i Tiapani no te tapoki me kore apai apinga) e kua tuatua: “Kare e mea puapinga rava atu ki aku mari ra ko koe. E tomo koe ki roto i te furoshiki! Ka inangaro au i te apai ia koe.” Kua akamutu te tane i te patoi, e kua akamata i te apii i te Puka Tapu, e i teianei te tavini ra ei tangata pakari.

Me piri koe ki te tuatua mou, e tamou i te pirianga manako, e oronga i te pirianga taeake meitaki, e e rave i te tu akono meitaki, penei ka rauka ia koe i te tauturu i toou tokorua kia riro mai ei tangata irinaki. “Noatu e te akaraanga e kare toou tokorua e riro mai ei tangata irinaki,” i tuatuaʼi tetai tei riro ana ei tangata patoitoi, “penei te taui ra aia i tona ngakau.” No reira auraka e tuku i te au. E apai ki toou ngakau i te akamaroiroi anga a te apotetoro ko Paulo ki te aronga pouroa e au tokorua irinaki kore to ratou: “Eaa oki koe e kite ei, e maine e, kare taau tane e ora ia koe? e eaa oki koe e kite ei, e tama e, kare taau vaine e ora ia koe?”​—1 Korinetia 7:16.