E Roa Atu i te Auro Ma
TE KIMIIA ra te auro no tona tu manea e te roa atu. Te vaira to te reira inangaro angaia i roto i tona tu kaka tikai e te akaraanga roa atu ma te kore e akaviiviiia. Teia oki te tumu te patoi ra te auro i te takinga kino anga a te vai, te okitene, te sulfur, vaitata rai i te au mea ravarai. E manganui te au apinga auro tei kiteaia mai i roto i te au pai tomo e tetai atu ngai te akono ra rai i to reira tu kanapa no etai au anere mataiti i topa.
Inara, ma te umere, te akakite ra te Pipiria e te vaira tetai apinga tei roa atu e “tei maata rava i te meitaki i to te auro ngaro ua nei, timata uaʼi i te ai.” (1 Petero 1:7) Te auro tei “timata” uaia, me kare tei tamaia, e te ai e tetai atu ravenga ka rauka i te akono e 99.9 patene i to te reira tu ma. Noatu rai, te ngaro ke ra te au auro apinganui tei tamaia, me kare tei akataeia, e te aqua regia (te vai roera), e kairo anga e toru tuanga atiti hydrochloric e te okotai tuanga e atiti nitric. No reira, te tika ra te Pipiria i te pae taineti i te taikuanga e ka ‘ngaro ua te auro.’
Ei akatuke anga, ka ‘akaora atu [te akarongo Kerititiano mou] i te vaerua.’ (Ebera 10:39) Ka rauka i te au tangata i te tamate i tetai tangata e akarongo ketaketa tona, mei ta ratou i rave kia Iesu Karaiti. Inara te orongaia ra ki te aronga e akarongo tikai to ratou teia taputou: “Kia mou marie ra koe e tae ua atu ki te matenga, e naku e oronga atu i te korona ora noou.” (Apokalupo 2:10) Ko te aronga tei mate no te akarongo ra te vaira i roto i to te Atua manako, e ka akatu akaou aia ia ratou. (Ioane 5:28, 29) Kare e rauka i te auro i te akatupu i te reira. I roto i teia tu, e puapinga maata atu te akarongo i te auro. Inara, e raukai i taua akarongo te puapinga maata, ka tika katoa e kia akapapuia, me kare kia timataia. E tikai, kia riro ‘te timata anga o te akarongo’ ta Petero i tuatua e ko te mea puapinga maata atu i te auro. Ka mataora te Au Kite o Iehova i te tauturu atu ia koe kia apii i te Pipiria e raukai ia koe i te akatupu e te akono tamou i te akarongo ketaketa i roto i te Atua mou, ko Iehova, e i roto i tana Tamaiti, ko Iesu Karaiti. Ko teia, i na Iesu ei, “te ora mutu kore.”—Ioane 17:3.