Ko Iehova te Tiaki Maira ia Kotou
“E uri i to kotou tumatetenga katoa ki runga [i te Atua]; koia oki te tiaki mai ia kotou.”—1 PETERO 5:7.
1. I roto i teea tu puapinga maata to Iehova raua ko Satani tuke takiri anga?
A IEHOVA e Satani e tuke takiri. Tetai ua atu tangata tei manako ngakau akavaitata atu kia Iehova ka rauka ua kia akaatea keia atu e te Tiaporo ra. Kua akakiteia mai teia tuke anga i roto i tetai angaanga kimikimi anga. No runga i ta Satani au angaanga tei akapapaia i roto i te puka Pipiria a Iobu, te akakite ra te Encyclopædia Britannica (1970) e: ‘Ko ta Satani angaanga koia oki kia ori aere ua i te enua katoa i te kimianga i te au angaanga me kare te au peretana kia ripoti akakinoia; no reira ko tana angaanga e tua patoiia i ‘nga mata o te Atu’ ra, tei ori aere ua i te enua katoa i te akamaroiroi anga i te aronga i tika te ngakau iaia (II Chron. xvi, 9). Kare e rauka kia irinakiia a Satani no te meitaki o te tangata noinoi kore ra e kia akatikaia kia timata i te reira i raro i te mana o te Atua ra e te akatereanga e i roto oki i te au kotinga ta te Atua i akanoo ra.’ Ae, mei teaa ra te tuke anga!—Iobu 1:6-12; 2:1-7.
2, 3. (a) Akapeea te aite anga o te tuatua “Tiaporo” i te akatutu meitaki angaia i tei tupu kia Iobu? (e) Akapeea ta te Pipiria akaari anga e te rave tamou ra a Satani i te akaapa anga i te au tavini o Iehova i te enua nei?
2 Te aiteanga o te tuatua Ereni no te “Tiaporo” e “akaapa pikikaa,” e “akakino anga.” Te akakite maira te puka a Iobu e kua akaapa a Satani ia Iobu te tavini tiratiratu o Iehova ra i te tavinianga Iaia no te manako anga iaia uaorai, i te na koanga: “E mataku oko kore ua ainei a Iobu i te Atua?” (Iobu 1:9) Te akaari maira te puka a Iobu e noatu tona au timataanga e te au tauta anga ra, kua akapiri vaitata atura a Iobu kia Iehova. (Iobu 10:9, 12; 12:9, 10; 19:25; 27:5; 28:28) I muri ake i teia atianga nona, kua tuatua aia ki te Atua ra: “I kite akenei au ia koe i te kite taringa nei; i teianei ra, te akara nei taku mata ia koe.”—Iobu 42:5.
3 Kua akamutu ainei a Satani i te akaapaanga i te tavini tiratiratu o te Atua ra mei te taime mairai o Iobu ra? Kare. Te akaari maira te puka o Apokalupo e i teia tuatau o te openga nei, te rave ua atura a Satani i te akaapaanga i te au taeake akatainuia o Karaiti e pera katoa oki to ratou au oa tiratiratu ra. (2 Timoteo 3:12; Apokalupo 12:10, 17) No reira, te umuumu anga no tatou katoatoa ei au Kerititiano mou kia kauraro atu ia tatou uaorai ki to tatou Atua tiaki, kia Iehova, ma te tavinianga iaia no te aroa oonu e te akapapuanga i ta Satani akaapaanga pikikaa. Na te raveanga tatou i te reira, ka akariro tatou i te ngakau o Iehova ra kia rekareka.—Maseli 27:11.
Te Kimi ra a Iehova i te Au Aerenga kia Tauturu ia Tatou
4, 5. (a) Ei tukeanga kia Satani, eaa ta Iehova e kimi ra i runga i te enua? (e) E kite ei tatou i to Iehova tu mareka anga, eaa te umuumuia ra no ta tatou tuanga?
4 Te aaere ra te Tiaporo i te enua nei, i te kimi anga kia akaapa e kia apuku i te tangata. (Iobu 1:7, 9; 1 Petero 5:8) Ei tuke anga, te kimi ra a Iehova kia tauturu i te aronga te umuumu ra i tona maroiroi. Kua akakite te peroveta ko Hanani ki te Ariki ko Asa: “Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.” (2 Paraleipomeno 16:9) Mei teaa ra te tukeanga i rotopu i ta Satani akara anga akaapa e ta Iehova ra tiakianga aroa!
5 Kare a Iehova e akara ana ki runga ia tatou kia mou i to tatou au tarevake ravarai e te au topaanga. Kua tata te tata taramo: “Naringa koe, e Iehova, e akairo ana i te au ara nei, e te Atu, koai te ka mou?” (Salamo 130:3) Te pauanga tika: kare tetai e mou. (Koheleta 7:20) Me ka akavaitata atu tatou kia Iehova ma te ngakau katoa, ka akara maira tona nga mata kia tatou, kare kia akaapa ia tatou, mari ra kia akara i ta tatou au tautaanga e kia pau mai i ta tatou au pure no te tauturu e te akakoreanga ara. Kua tata te apotetoro ko Petero: “Tei te aronga tuatua-tika ra to Iehova mata, e tei ta ratou kapiki tona taringa; e mata ke ra to Iehova i te aronga i rave i te kino ra.”—1 Petero 3:12.
6. Akapeea to Davida tu i riro ei ei akapumaana anga e ei akamatakiteanga no tatou?
6 E apa ua a Davida e kua rave i te ara kino roa. (2 Samuela 12:7-9) Mari ra kua riringi atu aia i tona ngakau kia Iehova e kua akavaitata atu kiaia na roto i te pure akatenga. (Salamo 51:1-12) Kua akarongo atura Iehova i tana pure e kua akakore atu i tana ara, noatu rai e kua kite a Davida i te au tupuanga mareka kore no tana ara. (2 Samuela 12:10-14) Ka tau teia no tatou ei akapumaana anga e te akamatakiteanga. E mea akapumaanaanga ia kia kite e te puareinga ra a Iehova kia akakore atu i ta tatou au ara me te tataraara tika ra tatou, inara e mea akapumaana anga kia kite e e putuputu te au ara i te apai mai i te au tupuanga kikino ra. (Galatia 6:7-9) Me te anoano ra tatou kia akavaitata atu kia Iehova, kia vai mamao atu tatou mei tetai ua atu apinga te ka akamareka kore iaia.—Salamo 97:10.
Te Akavaitata ra Iehova i Tona Au Tangata Kiaia
7. Eaa te tu tangata ta Iehova e akara ra, e akapeea tana akavaitata anga ia ratou kiaia uaorai?
7 Kua tata a Davida i tetai o tana taramo: “Teitei ua rai a Iehova, ka akono mairai aia i tei akaaka; kareka te nengonengo ra, ei te mamao ke aia e akara mai ei. (Salamo 138:6) I roto i tetai tu aiteite, kua tuatua tetai atu taramo: “Koai tei tau ki to tatou Atua kia Iehova? ko tei noo i te ngai teitei. Te tuku akaaka nei ra aia iaia uaorai i te akara anga mai ki raro, ki runga i te au rangi, e ki runga i te enua. Te akateitei nei aia i te akaaka ra no raro mai i te one ra.” (Salamo 113:5-7) Ae, ko Tei Anga mana katoatoa i te ao katoa e pini ua ake te tuku akaaka nei ra aia iaia uaorai i te akara anga mai ki raro ki runga i te enua nei, e ka kite tona mata “i tei akaaka,” “i te akaaka ra,” te au tangata “i aue ua, e kua kapiki ua, i te au mea viivii katoa i raveia i roto ra.” (Ezekiela 9:4) Kua akavaitata mai aia i taua aronga ra kiaia uaorai na roto i tana Tamaiti. Iaia i te enua nei, kua tuatua a Iesu: “Kare te tangata e tae mai kiaku nei, mari ra kia akatae mai te Metua ko tei tono mai iaku nei iaia . . . kare rava te tangata e tae mai kiaku nei, kia kore e orongaia mai te tae e taku Metua ra.”—Ioane 6:44, 65.
8, 9. (a) Eaa tatou katoatoa i umuumuiai kia aere mai kia Iesu? (e) Eaa te mea umere katoa no te akanoonoo anga oko ra?
8 Ka tau te au tangata katoatoa kia aere mai kia Iesu e kia tuku i te akarongo i te atinga oko no te mea kua anauia mai ratou e aronga ara, tei takake atu mei te Atua ra. (Ioane 3:36) Ka tau ratou kia akaongiia ki te Atua. (2 Korinetia 5:20) Kare te Atua i tatari i te aronga ara kia pati kiaia kia oronga i tetai akanoonooanga penei e kitea ei e ratou te au ma ia katoa ra. Kua tata te apotetoro ko Paulo: “Kua akamaata ua maira te Atua i tona aroa ia tatou nei, i te mea te vai tangata ara ua nei rai tatou, i mate ei te Mesia no tatou nei . . . I akaongiia oki tatou i te Atua, i to tatou vai enemi anga, i te mate o tana Tamaiti; e maata ua atu ïa to tatou ora i te au anga nei i tona ra ora anga.”—Roma 5:8, 10.
9 Kua akapapu mai te apotetoro ko Ioane i te tuatua mou meitaki e te akaongi maira te Atua i te au tangata kiaia uaorai, i te tataanga: “Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia. Ko te aroa mou teia, kare ïa na tatou i aroa atu i te Atua, koia ra tei aroa mai ia tatou nei, e kua tono mai i tana Tamaiti ei tarangaara i ta tatou nei ara.” (1 Ioane 4:9, 10) Kua akono te Atua i te takainga mua, kare ko te tangata. Te manako ngakau akavaitata atura ainei koe ki tetai Atua tei akaari mai i te aroa maata no te “tangata ara ua,” te “enemi” ra?—Ioane 3:16.
Umuumuia kia Kimi ia Iehova
10, 11. (a) Eaa ta tatou ka tika kia rave i te kimi anga ia Iehova? (e) Akapeea tatou i te manako atu i te akatereanga o te au mea nei a Satani?
10 Inara, kare a Iehova e maro ana ia tatou kia aere mai kiaia. Ka tika tatou kia kimi iaia, ‘peneiake ko te aa atu tatou iaia, e kitea atu, kare ra aia i atea ke atu ia tatou katoa nei.’ (Angaanga 17:27) Ka tika tatou kia kite i to Iehova ra tika kia pati i ta tatou kauraroanga. Kua tata te pipi ko Iakobo: “E tenana e kauraro atu kotou i te Atua. E patoi atu i te diabolo, e nana e rere ke atu. E akavaitata atu ki te Atua, e nana e akavaitata mai kia kotou na. E orei na i to kotou rima, e te aronga rave ara ra; e tamā na i to kotou ngakau, e te aronga ngakau rua na.” (Iakobo 4:7, 8) Kare tatou e tau kia ekoko i te patoi atu i te Tiaporo e kia mou kia Iehova.
11 Te aiteanga o teia kia akamamao ke atu ia tatou uaorai mei to Satani ra akatereanga kino o te au mea nei. Kua tata katoa a Iakobo: “Kare kotou i kite e ko te anoano i teianei ao, e enemi ïa i te Atua ra? E teianei ko te anoano e ei oa aia no teianei ao, e enemi ïa tangata no te Atua.” (Iakobo 4:4) I tetai tua, me te anoano ra tatou ei au oa no Iehova, ka tika tatou kia manako e ka makitakita mai te ao o Satani ia tatou nei.—Ioane 15:19; 1 Ioane 3:13.
12. (a) Eaa te au tuatua akapumaana ta Davida i tata? (e) Eaa te akamatakiteanga ta Iehova i oronga mai na roto i te peroveta ko Azaria?
12 Me ka patoi mai te ao o Satani ia tatou na roto i tetai tu, ka tau katoa tatou kia akavaitata atu kia Iehova na roto i te pure, ma te patianga i tana tauturu. Ko Davida, tei manako ngakau ra i to Iehova ra rima akaora no etai taime e manganui, kua tata no to tatou akapumaana anga: “Te vaitata mairā Iehova i te aronga i kapiki atu iaia, i te aronga i kapiki atu iaia ma te pikikaa kore. E akatika aia i te anoano o te aronga i mataku iaia; ka akarongo mai aia i ta ratou kapiki, e ka akaora oki aia ia ratou. Te tiaki nei a Iehova i te aronga katoa i inangaro iaia; kareka te aronga kino katoa ra, ka akapouia ïa e ia.” (Salamo 145:18-20) Te akakite maira teia taramo e ka rauka ia Iehova i te akaora ia tatou me ka timataia tatou tataki tai e ka akaora aia ia tatou katoatoa i te tuatau o “te mate maata.” (Apokalupo 7:14) Ka noo vaitata mai a Iehova kia tatou me ka noo vaitata atu tatou kiaia ra. Aratakiia e “te vaerua o te Atua ra,” kua tuatua te peroveta ko Azaria eaa ta tatou ka akamanako ei tetai tuatua mou katoa: “Tei ia kotou a Iehova, ko kotou i piri mai kiaia ra; kia kimi kotou iaia, ka kitea aia e kotou; kia akaruke ra kotou iaia, ka akaruke aia ia kotou.”—2 Paraleipomeno 15:1, 2.
Kia Tika Tikai a Iehova kia Tatou
13. Akapeea e raukai ia tatou te akaari e e tika tikai a Iehova kia tatou?
13 Kua tata te apotetoro ko Paulo no Mose e “i maroiroi rava atura aia i te akara anga atu iaia, i tei kore e kitea kia akara ra.” (Ebera 11:27) Inara, kare a Mose i akara tikai ia Iehova. (Exodo 33:20) Mari ra kua akara anga tika tikai a Iehova kiaia e mei te mea rai e i akara tika atu aia Kiaia. Aiteite katoa, i muri ake i tona au timataanga, kua akara meitaki atu to Iobu nga mata akarongo ia Iehova ra, mei tetai Atua tei tuku ra i tona au tavini tiratiratu kia timataia mari ra kare rava e akaruke ia ratou. (Iobu 42:5) Kua tuatuaia no Enoka raua ko Noa e ‘kua aaere [raua] ma te Atua.’ Kua rave raua i teia na te kimianga kia akamareka i te Atua e kia akarongo iaia. (Genese 5:22-24; 6:9, 22; Ebera 11:5, 7) Me e tika tikai a Iehova kia tatou mei iaia kia Enoka, Noa, Iobu, e Mose, kare tatou “e akangaropoina iaia” i to tatou au aerenga, e nana oki e ‘akakite i [to tatou] ra au arataa.’—Maseli 3:5, 6.
14. Eaa te aiteanga e kia “topiri tika atu” kia Iehova?
14 I mua ua ake i te tomo anga to Iseraela ki te Enua Taputouia ra, kua ako atura Mose ia ratou: “Ko to kotou Atua ra ko Iehova ta kotou e aru, e koia ta kotou e mataku, e tana ra au akauenga te akono, e akarongo oki i tona reo, e araara oki iaia, e koia ta kotou e topiri tika atu.” (Deuteronomi 13:4) Kia aru ratou ia Iehova, kia mataku iaia, kia akarongo iaia, e kia topiri tika atu kiaia. No te tuatua tei uriia i konei e “topiri tika atu,” te tuatua ra tetai tangata apii i te Pipiria e “te akakite maira te reo i tetai topiri anga tika atu e te pirianga vaitata oki.” Kua tuatua te tata taramo: “Te pirianga vaitata ma Iehova no te aronga te mataku ra iaia.” (Salamo 25:14, NW) Ko teia pirianga okomaata ma Iehova, no tatou ia me e tika tikai aia kia tatou e me te inangaro maata ra tatou iaia e te mataku ra tatou kia akamareka kore iaia i tetai ua atu tu ra.—Salamo 19:9-14.
Te Matakite ra Ainei Koe i ta Iehova Tiaki Anga?
15, 16. (a) Akapeea ta Salamo 34 akaari mai anga e te tiaki maira Iehova ia tatou? (e) Eaa ta tatou ka tau kia rave me te taitaia ra tatou i te maaraanga i te au angaanga a Iehova no te meitaki kia tatou?
15 Tetai o te au angaanga kikite a Satani ko te tauta anga kia akangaroia tatou i te tika e to tatou Atua, ko Iehova, te tamou marie ra i te tiaki anga i tona au tavini tiratiratu ra. Kua matakite meitaki a Davida te Ariki o Iseraela ra i to Iehova ra rima paruru noatu rai i tona aro atu anga i tetai atianga kino maata. I te maro anga iaia kia akameamea ua e te neneva ra aia ki mua i te Ariki ko Akisa o Gata, kua akapapa aia i tetai imene, e taramo manea tikai, tei kapiti ra i teia au tuatuaanga akarongo: “E akamaata tatou ia Iehova; tatou katoa e akateitei i tona ingoa. Kua kimi au ia Iehova, e kua tuatua maira aia kiaku, e kua akaora iaku i te au mea katoa taku i mataku ra. Te patia nei te Angela a Iehova i te puakapa, e pini ua ake te aronga i mataku iaia, e kua akaora ia ratou. Ka tongi ana kia kite i te meitaki o Iehova! e ao to te tangata i irinaki iaia ra. Te vaitata nei a Iehova i te aronga ngakau paruparu ra; e te akaora nei aia i te aronga ngakau taitaia. Manganui to te tangata tuatua-tika ra mate; e akaoraia ra aia e Iehova i taua au mea katoa ra.”—Salamo 34:3, 4, 7, 8, 18, 19; 1 Samuela 21:10-15.
16 Te irinaki ra ainei koe i to Iehova ra mana akaora? Te matakite ra ainei koe i tana angera i te paruru anga? Kua tongi tikai ainei koe e kua kite e e meitaki a Iehova? I naea te tuatau openga i kite tikai koe e e meitaki a Iehova kia koe? E tauta kia akamaara. I taua are openga ainei i aere atura koe i te angaanga orometua, ia koe i manako ngakau ra e kare e rauka ia koe kia rave ua atu? Penei i reira e meitaki taau tuatua anga ma te tangata o te ngutuare ra. I maara ainei ia koe kia akameitaki atu ia Iehova no te oronga anga i te maroiroi maata taau i umuumu ra e no te akameitakianga ia koe? (2 Korinetia 4:7) I tetai tua, penei e taitaia toou i te maaraanga i tetai angaanga meitaki ta Iehova i akono kia koe. Penei ka tamanako koe ki muri i te epetoma, te marama, te mataiti, me kare kua tere atu. Me koia te tu, eaa koe ka kore ei e tauta kia akavaitata atu kia Iehova e ka tauta kia kite e akapeea tana arataki anga ia koe? Kua akamaroiroi mai te apotetoro ko Petero i te au Kerititiano: “Ka akamoraro ia kotou uaorai i raro ake i te rima mana o te Atua . . . E uri i to kotou tumatetenga katoa ki runga iaia; koia oki te tiaki mai ia kotou.” (1 Petero 5:6, 7) E tika, ka umere koe i te maata o tana tiaki anga mai ia koe na!—Salamo 73:28.
E Kimi Ua Atu ia Iehova
17. Eaa te umuumuia maira me ka kimi ua atu tatou ia Iehova?
17 Te tamou marieanga i to tatou pirianga ma Iehova ka tika ei mea rave ua atuia. Kua tuatua a Iesu ki tona Metua na roto i te pure: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Te akonoanga i te kite ia Iehova e tana Tamaiti te umuumuia ra te tauta anga tamou i ta tatou tuanga. Ka umuumuia e tatou te tauturu a te pure e te vaerua tapu kia kite ei i ‘te au mea oonu a te Atua ra.’ (1 Korinetia 2:10; Luka 11:13) Ka umuumu katoa oki tatou i te arataki anga a “te tavini akono meitaki e te pakari” kia angai i to tatou manako ma te kai vaerua tei orongaia mai “i te tuatau tau.” (Mataio 24:45) Na roto mai i taua aerenga ra, kua ako mai a Iehova ia tatou kia tatau i tana Tuatua i te au ra tataki tai katoa, e aere putuputu atu ki ta tatou au uipaanga, e kia rave i te tuanga tau i te tutu aereanga i “te evangelia o te basileia” (Mataio 24:14) Na te raveanga i te reira, ka kimi ua atu tatou i te tiaki anga a te Atua, ko Iehova.
18, 19. (a) Eaa ta tatou ka tau kia tamanako i te rave? (e) Me ka mou ngaueue kore tatou i te turanga patoi atu i te Tiaporo e ka kimi ua atu ia Iehova, akapeea tatou i te akameitaki angaia mai?
18 Te rave nei a Satani i to roto katoa i tona mana kia apai mai i te takinga kinoanga, te patoi anga, e te taomi anga mei te au ngai ravarai ki runga i te au tangata o Iehova. Te tauta ra aia kia akakore i to tatou au e kia akapou i to tatou turanga meitaki ma to tatou Atua. Kare aia e anoano ana kia rave ua atu tatou i ta tatou angaanga no te kimianga i te aronga ngakau tiratiratu e te tauturu anga ia ratou kia aere mai ki te tua o Iehova o te maroanga no te akangateitei anga i te ao katoa e pini ua ake. Inara ka tika tatou kia tamanako kia vai tiratiratu kia Iehova, i te irinakianga iaia kia akaora ia tatou mei tei rave kino ra. Na te tukuanga i te Tuatua a te Atua ra kia arataki ia tatou e na te vai rave angaanga anga ma tana akaaerenga kitea uaia, ka rauka ia tatou kia papu e ka vai mairai aia ki reira kia turu ia tatou.—Isaia 41:8-13.
19 No reira, kia mou tatou, i to tatou turanga ngaueue kore i te patoi anga i te Tiaporo e tana au angaanga kikite, i te tuatau katoa e kimi ei i to tatou Atua akaperepere, ia Iehova, kare ra e akakore i ‘te akangaueue kore ia tatou e te akamaroiroi mai oki.’ (1 Petero 5:8-11) I reira, ka ‘tamou marie tatou ia tatou uaorai i roto i to te Atua aroa, ia tatou e tatari nei no te aroa o to tatou Atu o Iesu Karaiti ma te ora mutu kore i roto i te manako.’—Iuda 21.
Akapeea Koe me Pau?
• Eaa te aiteanga o te tuatua “Tiaporo,” e akapeea to te Tiaporo ra akonoanga kia tau ki taua turanga ra?
• Akapeea to Iehova ra tuke anga mei te Tiaporo i te tu o Tana akara anga i te au tangata o te enua nei?
• Eaa ra tetai peretana kia ariki ei i te oko i te akavaitataanga kia Iehova?
• Eaa te aiteanga e kia “topiri tika atu” kia Iehova, e akapeea e raukai ia tatou kia kimi ua atu iaia?
[Tutu i te kapi 15]
Noatu tona au timataanga, kua ariki a Iobu e te tiaki ra a Iehova iaia
[Au Tutu i te kapi 16, 17]
Te tatauanga i te Pipiria i te au ra, te aere putuputu ki te au uipaanga Kerititiano, e te rave maroiroi i te angaanga tutu aere te akamaara maira kia tatou e te tiaki ra a Iehova ia tatou