“Kia Mou Piri Tikai ta Kotou Rave Anga Memeitaki i Rotopu i te au Pa Enua”
“E akangateitei atu i te tangata ravarai. E aroa atu i te au taeake.”—1 PETERO 2:17.
1, 2. (a) Eaa ta te tangata tata nutipepa i tuatua no te Au Kite o Iehova? (e) Eaa ra te Au Kite o Iehova i tauta ei kia mou piri tikai i te au turanga teitei no te tu akono?
I ETAI mataiti i topa, kua aere atu tetai tangata tata nutipepa i Amarillo, i Texas, Marike, ki etai au are pure tuketuke i taua ngai ra e kua ripoti mai i tana au mea i kite. Okotai pupu tei tu meitaki mai i tona manako. Kua tuatua aia: “No nga mataiti e toru, kua aere atu au ki te au uruoaanga i te mataiti a te Au Kite o Iehova i te Amarillo Civic Center. Iaku e taokotai ra kia ratou, kare rava au i kite ana i tetai tangata i te tutungi anga i te avaava, te vai anga i te punu kava, me kare te tuatua viivii anga. Ko ratou te aronga ma roa atu, tei akono meitaki, tei kakau mako tikai, e te tu akono meitaki ei urupu tangata taku i aravei ana.” Te au tuatua aiteite katoa no runga i te Au Kite o Iehova kua tata putuputuia. Eaa ra te Au Kite i akapaapaa putuputuia ei e te au tangata kare ra no to ratou akarongo?
2 Tei matauia, te akapaapaaia ra te au tangata o te Atua no to ratou tu rave anga akono memeitaki. Koi kino maata ei te au turanga tei matauia, te manako ra te Au Kite o Iehova i te turanga teitei o te rave anga akono ei apainga, e tuanga ia no ta ratou akamori anga. Te kite ra ratou e te akaata ra ta ratou au angaanga ki runga ia Iehova e to ratou au taeake Kerititiano e te akakite ra to ratou rave anga akono meitaki i te tuatua mou ta ratou e tutu aere ra. (Ioane 15:8; Tito 2:7, 8) Ka akara ana tatou, i reira, e akapeea tatou me mou piri tikai i ta tatou rave anga akono memeitaki e kia rave tamou i te tu akono tau o Iehova e tana Au Kite e akapeea tatou uaorai i te puapinga anga no te raveanga i te reira.
Te Pamiri Kerititiano
3. Mei teaa te anoanoia ra te au pamiri Kerititiano kia paruruia?
3 E akamanako ana i to tatou rave anga akono i roto i te pamiri. Te puka Die Neuen Inquisitoren: Religionsfreiheit und Glaubensneid (Te Aronga Uiui Ou: Rangatira o te Akonoanga e te Vareae i te Akonoanga), na Gerhard Besier raua ko Erwin K. Scheuch, te akakite ra: “No te [Au Kite o Iehova] ko te pamiri tetai apinga kia paruruia.” E tika taua tuatua ra, e i teia tuatau e maata te tau ra kia paruruia te pamiri. Te vaira te au tamariki “akarongo kore ki te metua” e te aronga mamaata oki “ei aroa kore” me kare “ei mako kore.” (2 Timoteo 3:2, 3) Te au pamiri e au ngai no te ta anga a te nga tokorua akaipoipo, te takinga kino ra te au metua me kare kua akaruke i ta ratou tamariki, e kua meameaau te tamariki, kua o atu ki roto i te kai anga i te au apinga akakona e te ainga tau kore, me kare te oro ke atura mei te kainga. Pouroa teia e tupuanga no te mana akapou o ‘te vaerua o te ao.’ (Ephesia 2:1, 2) Ka tau tatou kia paruru i to tatou au pamiri i taua vaerua ra. Akapeea? Na te akonoanga i ta Iehova akoanga e te aratakianga no te au mema o te pamiri.
4. Eaa te au apainga a te au mema pamiri Kerititiano ki tetai e tetai ra?
4 Te kite ra te au tokorua Kerititiano e e au apainga ta ratou tetai ki tetai i te pae o te manako ngakau, te pae vaerua, e te pae kopapa. (1 Korinetia 7:3-5; Ephesia 5:21-23; 1 Petero 3:7) E au apainga teiaa ta te au metua Kerititiano no ta ratou anaunga. (Maseli 22:6; 2 Korinetia 12:14; Ephesia 6:4) E i te pakarikari anga mai te au tamariki i roto i te au ngutuare Kerititiano, ka kite ratou e e au apainga katoa oki ta ratou. (Maseli 1:8, 9; 23:22; Ephesia 6:1; 1 Timoteo 5:3, 4, 8) Te akatupuanga i te au apainga pamiri te umuumuia ra te tautaanga, te aruaruanga, e te tu aroa e te tuku atinga uaorai. Inara, te maata ta te katoatoa o te au mema pamiri i te akono anga i ta ratou apainga mei ko mai i te Atua ra, te maata i reira e akameitakianga ratou tetai ki tetai e ki te putuputuanga oki. Tei puapinga maata, te akangateitei ra ratou i Tei Akamata ra i te pamiri, ko te Atua ko Iehova.—Genese 1:27, 28; Ephesia 3:15.
Te Akataeake Anga Kerititiano
5. Eaa te au akameitakianga ka kokoti tatou mei te taokotai anga ma te au taeake Kerititiano?
5 Ei au Kerititiano, e apainga katoa ta tatou ki to tatou au taeake akarongo i roto i te putuputuanga e, i te openga, ki te “au taeake katoa i te ao nei.” (1 Petero 5:9) E puapinga maata to tatou pirianga ma te putuputuanga no to tatou ora anga pae vaerua. Me taokotai atu tatou ma te au taeake Kerititiano, ka rekareka tatou i to ratou piri anga akamaroiroianga e pera katoa i te kaikaianga i te kai pae vaerua mei “te tavini akono meitaki e te pakari.” (Matatio 24:45-47) Me e au manamanata to tatou, ka rauka ia tatou kia aere atu ki to tatou au taeake no te akoanga tau tei akatumuia ki runga i te au kaveinga Tuatua Tapu ra. (Maseli 17:17; Koheleta 4:9; Iakobo 5:13-18) Me e umuumuanga to tatou, kare to tatou au taeake e akaruke ia tatou. Mei teaa ra te akameitakianga kia riro ei tuanga no ta te Atua ra akaaerenga!
6. Akapeea ta Paulo akaari anga e e au apainga ta tatou ki etai atu au Kerititiano?
6 Inara, kare tatou i roto i te putuputuanga kia rauka ua mai; tei reira katoa tatou kia oronga atu. E tika, kua tuatua a Iesu: “E mea meitaki i te oronga atu i te rave mai.” (Angaanga 20:35) Kua tuatua maata te apotetoro ko Paulo i te vaerua oronga ua i tana tata anga: “Kia piri tikai to tatou mou ranga i ta tatou tuatua ma te ngaueue kore; (e tuatua-mou oki tana ta tei tuatua maira;) E akono marie rai tatou tetai ki tetai, ka akamaroiroi atu ei kia maata te aroa, e i te angaanga memeitaki ra: Auraka e akaruke i to tatou akaputuputu anga mei ta tetai aronga, ka akamaroiroi ra, e kia maata atu rai te maroiroi, no te mea te akara na kotou i taua rā ra i te vaitata anga mai.”—Ebera 10:23-25.
7, 8. Akapeea tatou i te akaari anga i te tu oronga ua i roto i ta tatou putuputuanga e ki te au Kerititiano i etai enua ke?
7 I roto i te putuputuanga, te oronga ra tatou i te “mou ranga i ta tatou tuatua” ia tatou e oronga ra i te au pauanga i te tuatau o te uipaanga me kare i te kapiti anga i roto i etai atu au tu o te porokaramu ra. Te akamaroiroi ra tikai taua au oronga anga ra i to tatou au taeake. Te akamaroiroi katoa ra tatou ia ratou i ta tatou tuatua anga i mua ake e i muri ake i te uipaanga ra. E tuatau te reira e raukai ia tatou i te akamatutu atu i tei apikepike ra, te akamaroiroi atu i tei maromaroa ra, e te akapumaana atu i tei maki ra. (1 Tesalonia 5:14) Te au Kerititiano ngakau tae e maoraora ua i taua tu oronga anga ra, ko te tumu te reira o te aronga e manganui te aere maira ki ta tatou au uipaanga no te taime mua te akakeuia ra e te aroa ta ratou i kite i roto ia tatou nei.—Salamo 37:21; Ioane 15:12; 1 Korinetia 14:25.
8 Inara, kare to tatou aroa i kotinga uaia ki ta tatou uaorai putuputuanga. Te ariki ra ia i te katoaanga o to tatou au taeake i te ao. No reira oki, ei akatauanga, i vai ei tetai pia moni tauturu no te Tutaki Anga Are Uipaanga Patireia i roto i te Are Uipaanga Patireia tataki tai. Penei te meitaki ra te turanga o to tatou uaorai Are Uipaanga Patireia, inara te kite ra tatou e e au tauatini ua atu te au oa Kerititiano i etai atu au enua te ngere ra i tetai ngai tau no te uipa anga. Me oronga tatou i te moni tauturu no te Tutaki Anga Are Uipaanga Patireia, te akaari ra tatou i to tatou aroa no taua aronga tataki tai ra noatu rai e kare tatou i kite ia ratou uaorai.
9. Eaa te tumu i aroa ei te Au Kite o Iehova i tetai e tetai?
9 Eaa ra te Au Kite o Iehova i aroa ei i tetai e tetai? No te mea, kua akaue a Iesu ia ratou kia pera. (Ioane 15:17) E ko te aroa ia ratou no tetai e tetai e akakite anga i te angaanga a te vaerua o te Atua ki rungao ia ratou ei aronga tataki tai e ei pupu ra. Ko te aroa tetai tuanga o ‘ta te vaerua e akatupu.’ (Galatia 5:22, 23) I te Au Kite o Iehova e apii ra i te Pipiria, te aere ra ki te au uipaanga Kerititiano, e te pure tamou ra ki te Atua, ka riro te aroa ei mea natura kia ratou noatu e te noo ra i roto i tetai ao te ‘riro ra te rai o te tangata i te mea ngiti te anoano.’—Mataio 24:12.
Akonoanga ma te Taiate o te Ao Takapini ia Tatou
10. Eaa ta tatou apainga ki te aronga mana o teianei ao?
10 Ta Paulo ra taiku anga e ko “ta tatou tuatua,” te akamaara maira kia tatou i tetai atu apainga. Ko teia tuatua te kapiti ra i te angaanga tutu aereanga i te evangeria ki te aronga kare ra i riro ake ei au taeake Kerititiano no tatou. (Mataio 24:14; 28:19, 20; Roma 10:9, 10, 13-15) Ko taua tutu aereanga ra ko tetai atu angaanga ia no te orongaanga. Kia rave i te reira ka akapou i te taime, te maroiroi, te teateamamao anga, te terenianga, e te taangaanga anga oki i taau uaorai au apinga. Inara, kua tata katoa a Paulo: “E kai ou oki au na te Eleni, e na te tangata ke ke; na te aronga pakari, e na te kite kore. E teianei, kua tika roa iaku i te akakite atu i te evangelia ia kotou katoa i Roma na.” (Roma 1:14, 15) Mei ia Paulo rai, auraka tatou e kai penu ia tatou e tutaki ra i teia “kai ou.”
11. Eaa nga kaveinga Tuatua Tapu e rua te akaaere ra i to tatou pirianga ma to te ao, inara eaa ta tatou e kite ra?
11 Tei ia tatou ainei etai atu au apainga ki te aronga kare ra i riro ake ei au oa akarongo? E tika tikai ia. E mea papu, te kite nei tatou, e “te vai ua nei rai to te ao ravarai i raro ake i taua vaerua kino ra.” (1 Ioane 5:19) Kua kite tatou e kua tuatua a Iesu no tana au pipi: “Kare ratou i to teianei ao, mei iaku nei rai oki, kare i to teianei ao.” Inara, te noo nei tatou i te ao nei, e te rauka maira te ora anga i reira, e te rauka maira te au tauturu mei reira. (Ioane 17:11, 15, 16) No reira e au apainga ta tatou i teianei ao. Eaa te reira? Kua pau mai te apotetoro ko Petero i taua uianga ra. E tuatau poto ua i mua ake i te akapou anga o Ierusalema, kua tata aia i tetai reta ki te au Kerititiano i Asia Minora, e na tetai takiota tuatua i taua reta ra e tauturu ia tatou kia rauka tetai pirianga tau ma te ao nei.
12. I roto i teea tu i riro ei te au Kerititiano ei “tangata ke, e te tuitarere,” e no tera, mei teaa ta ratou ka kopae?
12 I te akamata anga, kua tuatua a Petero: “E aku au akaperepere e, te ako atu nei au ia kotou, i te tangata ke, e te tuitarere, auraka e akatika i to te kopapa nei au anoano, ko tei tamaki mai ïa i te [“meta,” NW].” (1 Petero 2:11) Te au Kerititiano mou, i te tu pae vaerua, e “tangata ke, e te tuitarere” i te mea ta ratou akara tika anga o to ratou au ora anga ko te manakonako anga o te ora mutu kore—ei aronga akatainuia i te vaerua ki te rangi e ei “mamoe ke atu” i te enua parataito ki mua. (Ioane 10:16; Philipi 3:20, 21; Ebera 11:13; Apokalupo 7:9, 14-17) Inara, eaa te au anoano o te kopapa? Te kapiti ra teia i te au mea mei te anoano kia apinganui ia, te anoano kia akamaataia, te au anoano i te ainga tau kore, e te au anoano tei akatakaia maira e “vareae” e te “morimori” anga.—Kolosa 3:5; 1 Timoteo 6:4, 9; 1 Ioane 2:15, 16.
13. Akapeea te au anoano o te kopapa i te “tamaki mai ïa i [to tatou] meta”?
13 Ko taua au anoano ra “tei tamaki mai ïa i [to tatou] meta.” Ka akape ratou i to tatou pirianga ma te Atua e ka tuku i to tatou manakonakoanga Kerititiano (to tatou “meta,” me kare oraanga) ki roto i te tu kino. Ei akatauanga, me ka tatanu tatou i te anoano i te au mea tau kore, akapeea e raukai ia tatou kia oronga ia tatou uaorai “ei atinga ora, e te tapu, e tau oki i te Atua”? Me ka topa atu tatou ki roto i te ereere no te noinoi apinga, akapeea tatou i “te kimianga i te patireia na mua”? (Roma 12:1, 2; Mataio 6:33, NW; 1 Timoteo 6:17-19) Te aerenga meitaki ko te aru i te akatauanga o Mose ra, kia kopae i te au mea akavare o teianei ao, e ka tuku ei i te tavini anga ia Iehova na mua i to tatou au oraanga. (Mataio 6:19, 20; Ebera 11:24-26) Ko te reira tetai taviri puapinga maata kia raukai tetai pirianga tau ma teianei ao.
‘Kia Mou Piri Tikai te Rave Anga Memeitaki’
14. Eaa tatou ei au Kerititiano i tauta ei kia mou piri tikai?
14 Tetai atu aratakianga puapinga maata te kitea ra i ta Petero au tuatua te aru mai nei: ‘Kia mou piri tikai ta kotou rave anga memeitaki i rotopu i te au pa enua, e, i te mea ta ratou e tuatua akakino maira ia kotou, penei ei tupuanga no taau au angaanga memeitaki tei akara mataia ra e ratou ka akakaka i te Atua i te ra no tana akara matatio anga ra.’ (1 Petero 2:12, NW) Ei au Kerititiano, ka tauta tatou kia riro ei akatauanga. I te apii ka angaanga pakari tatou. Ki ta tatou ngai angaanga, e angaanga pakari tatou e te tika—noatu me te akaraanga tau kore ra to tatou pu. I roto i te ngutuare tataka ke ra, te tane akarongo me kare te vaine te tauta taka ke ra kia aru i te au kaveinga Kerititiano. Kare ia i te mea ngoie ua, mari ra te kite ra tatou e ko to tatou rave anga akono meitaki te akamareka ra ia Iehova e te putuputu ra te tupu anga meitaki ki runga i te aronga kare i te Au Kite ra.—1 Petero 2:18-20; 3:1.
15. Akapeea tatou i te kite anga e ko te turanga teitei o te tu akono o te Au Kite o Iehova te kiteia ra?
15 Te autu anga o te maataanga o te Au Kite o Iehova i te mou piri tikai i te au turanga akatauanga te kitea ra i te au tuatua anga no ratou tei neneiia i te au mataiti. Ei akatauanga, kua ripoti te nutipepa II Tempo o Itaria: “Te au tangata tei angaanga kapiti ma te Au Kite o Iehova ra kua akataka ia ratou ei au oa angaanga tika, te papu o to ratou irinaki anga i to ratou akarongo e kua akara anga riro tikai ratou i te reira; tera ra, te tau ra ratou kia akangateiteiia no to ratou tiratiratu tau.” Kua akakite te Herald o Buenos Aires, i Argentina e: “Kua akapapuia te Au Kite o Iehova i te au mataiti ei aronga angaanga pakari, te mako, te karape, e e aronga mataku i te Atua.” Kua akakite te tangata Rutia apiiia ra ko Sergei Ivanenko e: “Te Au Kite o Iehova te matauia ra i te ao katoa nei ei au tangata mou i te ture e e maata oki no to ratou tu akono tau i te tutakianga tero.” Te manitia o tetai ngai taangaangaia i Zimbabwe e te Au Kite o Iehova no to ratou uruoaanga kua tuatua: “Te kite ra au i etai Au Kite ra i te koi pepa anga e te tama anga i te au are meangiti.Te ngai uruoaanga kua akarukeia mai e ma atu i to mua ana. E kaveinga tikai to kotou aronga mapu. Te anoano ra au e kua ki te ao katoa i te Au Kite o Iehova.”
Kauraro Anga Kerititiano
16. Eaa to tatou pirianga ma te aronga mana taoonga, e no teaa ra?
16 Kua tuatua katoa a Petero no to tatou pirianga ma te aronga mana taoonga ra. Kua karanga aia: “E kauraro i te au taoonga katoa o te tangata i te Atu ra; i te ariki ra ei runga rava atu ïa; E te au tutara ra, ei aronga ungaia mai e ia ei tutaki atu i te aronga i rave i te kino ra, e ei akameitaki i te aronga i rave i te meitaki ra. Ko to te Atua ïa anoano, kia mopani kotou i te vaa o te kite kore o te tangata neneva ra i ta kotou tuatua meitaki.” (1 Petero 2:13-15) Te ariki ra tatou i te au puapinga tei rauka mai mei te au kavamani akono tau ra, e tei aratakiia e te au tuatua a Petero, ka akarongo tatou i te au ture e ka tutaki oki i ta tatou au tero. Ia tatou e kite ra i te tika tei orongaia mai e te Atua no te au akautunga a te au kavamani i te aronga aati ture, ko te tumu maata no tatou kia kauraro i te au mana taoonga ra no “te Atu ra” ia. Ko te anoano ia o te Atua. Pera katoa oki, kare tatou e anoano kia apaiia mai te akakino ki runga i te ingoa o Iehova na te akautunga anga no te raveanga tarevake ra.—Roma 13:1, 4-7; Tito 3:1; 1 Petero 3:17.
17. Me patoi mai “te tangata neneva ra” ia tatou, eaa ta tatou ka irinaki?
17 E mea reka kore ra, ko tetai papaki o “te tangata neneva” o te mana taoonga te takinga kino ra ia tatou me kare te patoi ra ia tatou i etai atu tu—mei te akakeuanga i etai au angaanga akakino ia tatou. Inara, i ta Iehova ra tuatau tau, ka kite katoaia ta ratou au pikikaa ra, e to ratou “vaa o te kite kore” ka mopaniia. Te akakite ra to tatou rekoti no te rave anga akono ei Kerititiano iaia uaorai. No reira ra te au opita tika o te kavamani ra i putuputu ei te akapaapaa ia tatou ei aronga rave i te meitaki ra.—Roma 13:3; Tito 2:7, 8.
Au Tavini no te Atua
18. Ei au Kerititiano, na roto i teea au tu e raukai ia tatou kia kopae i te akono tau kore i to tatou tu rangatira?
18 Te akamatakite maira a Petero: “Ei aronga rangatira kotou, auraka ra taua rangatira ra e akariroia ei tapoki tuatua kino, ei tavini ra kotou no te Atua.” (1 Petero 2:16; Galatia 5:13) I teia tuatau, to tatou kite i te tuatua mou Pipiria te akarangatira ra ia tatou mei te au apiianga pikikaa a te akonoanga. (Ioane 8:32) Pera katoa, e anoano rangatira to tatou, e ka rauka ia tatou te au ikianga. Inara, kare tatou e akono tau kore ua i to tatou tu rangatira. I te au ikianga no te kapiti anga, te kakauanga, te akamaneaanga e te tamataora anga—pera katoa te kaikai e te inuanga—kia maara ia tatou e ko te au Kerititiano mou e au tavini no te Atua, kare e akamareka ia ratou uaorai. Te iki ra tatou kia tavini ia Iehova kare e kia tavini i to tatou uaorai au anoano kopapa me kare te au inangaro e te au peu o te ao.—Galatia 5:24; 2 Timoteo 2:22; Tito 2:11, 12.
19-21. (a) Eaa to tatou manako no te aronga mana taoonga ra? (e) Akapeea tetai papaki i te akaari anga i te ‘aroa no te au taeake’? (nga) Eaa ta tatou apainga puapinga maata ra?
19 Kua tuatua ua atu a Petero: “E akangateitei atu i te tangata ravarai. E aroa atu i te au taeake. Ka mataku i te Atua. Ka akateitei i te Ariki.” (1 Petero 2:17) I te mea te akatika ra te Atua ko Iehova i te au tangata kia riro i etai au turanga o te mana taoonga, ka akaari tatou ki taua aronga ra i te ngateitei tau. E pure katoa oki tatou no ratou, kia akatikaiai tatou kia aruaru i ta tatou angaanga orometua i te au e ma te akono i te Atua. (1 Timoteo 2:1-4) Inara, i taua taime rai, ko tatou “e aroa atu i te au taeake.” Ka rave tamou tatou i te meitaki, kare i te kino, no to tatou au taeake Kerititiano ra.
20 Ei akatauanga, i te akapueuia anga tetai iti tangata Aperika ra e te taanga eteniki, kua tuke te rave anga akono ei Kerititiano o te Au Kite o Iehova. Kua ripoti te nuti pepa Reformierte Presse o Switzerland: “I te 1995, te au Tika o Aperika . . . kua rauka kia akapapu i te tuanga a te au akonoanga katoatoa ra [i te tamaki anga] ko te Au Kite o Iehova ra kare i o ana ki roto.” I te tae anga te nuti o te rave kino ra ki te ao i vao maira, kua tuku viviki atu te Au Kite o Iehova i Europa ra i te kai e te vairakau ei tauturu ki to ratou au taeake e etai ke atu i taua enua takinga kinoia ra. (Galatia 6:10) Kua akono ratou i te au tuatua ia Maseli 3:27: “Auraka koe e tāpu i te meitaki i te tangata e tau iaia ra, e tei to rima rai taua meitaki ra kia o atu.”
21 Inara, te vaira, te apainga puapinga maata atu i te akangateitei anga ta tatou e kaiou ra ki tetai ua atu aronga mana taoonga e noatu rai ki te aroa ta tatou e kaiou ra ki to tatou au taeake. Eaa te reira? Kua tuatua a Petero: “Ka mataku i te Atua.” E maata roa atu ta tatou kaiou kia Iehova i ta tatou kaiou ki tetai ua atu tangata. Akapeea i tikai te reira? E akapeea e raukai ia tatou i te parani i ta tatou au apainga ki te Atua ma ta tatou kaiou ki te aronga mana taoonga ra? Ka pauia teianei au uianga i te atikara e aru maira.
Maara Ainei ia Koe?
• Eaa te au apainga a te au Kerititiano i roto i te pamiri?
• Akapeea ta tatou te akaarianga i te tu oronga ua i roto i te putuputuanga?
• Eaa ta tatou au apainga ki te aronga mana o teianei ao?
• Eaa ra etai au puapinga te aere maira mei to tatou mou pirianga i te turanga teitei o te tu akono?
[Tutu i te kapi 9]
Akapeea te pamiri Kerititiano i te riro anga ei tumu no te rekareka maata?
[Au Tutu i te kapi 10]
Eaa ra te Au Kite o Iehova i aroa ei i tetai e tetai?
[Au Tutu i te kapi 10]
Ka rauka ainei ia tatou te akaari i te aroa no to tatou au taeake noatu me kare tatou i kite tikai ia ratou?