Eaa te Tuatau ki Mua no to Tatou Enua?

“Kare atu e anere mataiti i rekotiia e aiteite atu ki te 20 anere mataiti i roto i te ta kino roa atu a te tangata, te au maro anga tei raveia e manganui, te au kopu tangata oro kimi ora tei tupu mai, te au mirioni tangata i tamateia i roto i te tamaki, e te aka moni i pou ki runga i te ‘apinga paruru,’” i na te World Military and Social Expenditures 1996 ei. Ka taui ainei teia turanga?

Kua akamaaraara te apotetoro ko Petero i te au Kerititiano no runga i tetai taputou ta te Atua i tuatua i te au anere mataiti i mua atu: “Te tatari nei ra tatou i te rangi ou e te enua ou [ta te Atua] i tuatua maira, i te vai tika anga o te tuatua-tika ra.” (2 Petero 3:13) E tuanga te reira au tuatua i mua ana no te totou a Isaia. (Isaia 65:17; 66:22) Kua kite ana a Iseraela taito i teia tupuanga mua i te akaoki angaia te iti tangata ki tona enua taputouia i muri ake i te mouria anga ei tuikaa i Babulonia e 70 mataiti. Na te tuatua akaou anga i taua taputou o te “rangi ou e te enua ou,” te akaari maira a Petero e ka akatupuia taua totou ma te maata rava atu​—i te ao katoa!

Te akanoo anga i te au turanga tuatua tika i te enua katoa nei ko to te Atua ia anoano, e ka akatupuia teia na roto i tana Patireia i te rangi ra ma Karaiti ei Ariki. “Kare tetai enua e tamaki mai ki tetai enua i te koke, kare oki ratou e apii akaou i te tamaki.” (Isaia 2:4) Ko te au e te tinamou tikai i runga i te enua ta Iesu ia i apii ki tana au pipi kia tapapa atu e kia pure no te reira tei matauia i te kapikiia e to Matou Metua, me kare te Pure a te Atu, te na ko anga: “Kia tae toou basileia. Kia akonoia toou anoano i te enua nei, mei tei te ao katoa na.”​—Mataio 6:9, 10.

Ka rekareka ainei koe i te noo anga ki roto i tetai ao tuatua tika mei te rangi rai? Ko te reira te manakonakoanga ta te Pipiria e oronga maira ki te katoatoa te kimi ra ma te ngakau katoa i te kite i te Atua e kia noo kia tau ki tana au tu tuatua tika.