E “Tu Tapapaanga” Ainei Toou?

“Mei te aa ra te tu tikai no kotou ei tangata i te au angaanga tapu e te au ravenga no te tu akono i te Atua ra, i te tatarianga e te tamou vaitata anga ki te manako i te taenga mai o taua ra o Iehova ra!”​—2 PETERO 3:11, 12, NW.

1, 2. Akapeea te akatutu anga e e “tu tapapaanga” to tatou no te ra o Iehova?

E TAMANAKO ana ki toou manako i tetai ngutuare tangata i te tapapa anga i te au manuiri no te kaikai. Te viviki ra te ora tei akanooia i to ratou tae mai anga. Te rave ra te vaine i te tuku i te au akapapa anga openga no te manga. Te tauturu ra tana tane e ta raua tamariki i te akatanotano meitaki e kua papa te au mea katoa. Te rekareka ra te katoatoa. Ae, te tapapa ra te katoaanga o te ngutuare te tae mai anga te au manuiri e te akara mataora ra ki tetai kaikai anga reka e te taokotaianga meitaki.

² Ei au Kerititiano, te tapapa nei tatou i tetai apinga puapinga maata roa atu. No teaa ra? E aa, te tapapa pouroa nei tatou i te “ra o Iehova”! Me tae mai te reira, ka anoanoia tatou kia aite ki te peroveta ko Mika, tei karanga e: “Ko Iehova taku ka akara tamou ua atu, ka akaari au i tetai tu tapapaanga no te Atua o toku ra ora.” (Mika 7:7, NW) Te akataka maira ainei te reira i te rave kore anga i te angaanga? Kare. E maata ua atu te angaanga ka raveia.

3. E tau ei kia 2 Petero 3:11, 12, (NW) eaa te tu te ka rauka i te au Kerititiano?

³ Te tauturu maira te apotetoro ko Petero ia tatou kia rauka te tu ngakau tika ia tatou e tapapa ra. Kua karanga maira aia e: “Mei te aa ra te tu tikai no kotou ei tangata i te au angaanga tapu e te au ravenga no te tu akono i te Atua ra, i te tatarianga e te tamou vaitata anga ki te manako i te taenga mai o taua ra o Iehova ra!” (2 Petero 3:11, 12, NW) E akara ana e e tuatua teia. Kare a Petero e ui nei i tetai uianga. I roto i tana nga reta akauru tu-Atua ia, kua akataka mai aia e mei te aa ra te tu tikai o te au tangata Kerititiano. Kua ako katoa aia ia ratou kia rave i te “au angaanga tapu e te au ravenga no te tu akono i te Atua.” Noatu e kua tere atu etai 30 mataiti i te oronga mai anga a Iesu Karaiti i te akairo no “te openga o teianei ao,” kare te au Kerititiano e tuku i to ratou paruru anga ki raro. (Mataio 24:3) Kia ‘tatari e te tamou vaitata [ra ratou] ki te manako’ te tae mai anga te ra o Iehova.

4. Eaa te o maira i roto i te “tatarianga e te tamou vaitata anga ki te manako i te taenga mai o taua ra o Iehova ra”?

⁴ Te tuatua Ereni te taikuia ra i konei “te tamou vaitata anga ki te manako” te aiteanga tikai kia “taviviki ia.” E tikai, kare e rauka ia tatou i te ‘akaviviki’ tikai i te ra o Iehova. No taua tumu nei, kare tatou e “kite i te rā, e te ora” me aere mai a Iesu Karaiti i te rave i te akavaanga ki runga i te au enemi o tona Metua. (Mataio 24:36; 25:13) Kua akamarama mai tetai tataanga e te aka no te verepa i konei no te tuatua “taviviki ia” te aite anga “‘kia tarapurapuia’ e te piri vaitata ra te reira ki te ‘toto mapu, maroiroi, te manako anga no runga i tetai apinga.’” No reira te raurau maira a Petero i te au oa irinaki kia anoano tikai kia tae mai te ra o Iehova. Ka rauka ia ratou i te rave i teia na te tamou putuputu anga i te reira ki roto i te manako. (2 Petero 3:12, NW) Te vaitata ua maira i teianei te “rā maata e te rikarika o Iehova,” ka tau kia akaari tatou i taua tu manako.​—Ioela 2:31.

E Tapapa ma te “Au Angaanga Tapu”

5. Akapeea e rauka ai ia tatou i te akaari e te anoano tikai ra tatou i te kite i te “ra o Iehova”?

⁵ Me te anoano tikai ra tatou kia ora i te ra o Iehova, ka akaari tatou i te reira na roto i ta tatou “au angaanga tapu e te au ravenga no te tu akono i te Atua.” Te tuatua e e “au angaanga tapu” penei te akamaara meitaki maira ia tatou i ta Petero akoanga: “Mei te tamariki akarongo ra, auraka e akaarite ia kotou uaorai i te au inangaro taito i to kotou kamakura anga ra; Mei iaia i kapiki mai ia kotou e tapu ra, kia tapu katoa kotou i ta kotou tuatua ravarai ra; Kua oti oki i te tataia e, ‘Kia tapu kotou; te tapu nei oki au.’”​—1 Petero 1:14-16.

6. Kia tapu, eaa ta tatou ka tau i te rave?

⁶ Kia tapu, ka tau kia tamou marie tatou kia ma i te pae kopapa, te manako, te tu tau, e te pae vaerua. Te akateateamamao ra ainei tatou no te “ra o Iehova” na te akono anga ia tatou uaorai ma te tapu ei aronga tataki tai i te apai anga i to Iehova ingoa? Kare i te mea ngoie i teia tuatau kia tamou marie i taua tu ma no te mea te kino ua atura te au turanga tau o teianei ao. (1 Korinetia 7:31; 2 Timoteo 3:13) Te kite ra ainei tatou e te atea ua atura te tuke anga i rotopu i to tatou au turanga tau e to te aronga o teianei ao? Me kare, ka riro ia ei tumu anga manako na tatou. Kare ainei e ko to tatou au turanga, noatu e e teitei roa atu i to te aronga o teianei ao, te kino ua atura? Me koia ia, ka anoanoia tatou kia rave papu tikai i te angaanga kia akatikatika i te au tumu kia rauka i te akamareka i te Atua.

7, 8. (a) Akapeea e ngaro ke atu ei ia tatou te puapinga i te piri atu anga ki roto i te “au angaanga tapu” ra? (e) Eaa te au ravenga akatano anga te umuumuia ra?

⁷ Te tae mai anga te ravenga viivii ki runga i te Internet e no te tu muna ra te ka rauka i te reira, ko etai aronga kare i rauka ana taua apinga tau kore ra te kite ra i teianei e “e maata ua atu te au tuatau no te ravenga ainga,” i na tetai taote vairakau ei. Me ka kimi tatou i taua au ngai viivii i runga i te Internet, te kopae tikai ra tatou i te akauenga a te Pipiria e “auraka e arapaki ua atu i tetai mea viivii ra.” (Isaia 52:11) Te ‘tamou vaitata [ra ainei tatou] ki te manako i te taenga mai o taua ra o Iehova ra’? Kare ainei e te akaroaroa ra tatou i taua ra i roto i te manako, i te tamanako anga e noatu e me te taviivii ra tatou i to tatou manako ma te apinga viivii ra, te vai ua ra rai te tuatau no tatou i te tama ia tatou uaorai? Me kua aro atu tatou i tetai manamanata na roto i teia au mataara nei, mei teaa ra i reira te tu rapurapu anga kia pati akatenga atu kia Iehova kia ‘akaariu ke i to tatou mata kia kore e akara i te mea puapinga kore; akamaroiroi ia tatou i tona ra arataa’!​—Salamo 119:37.

⁸ Te maata anga o te Au Kite o Iehova, te au mapu e te ruaine, te mou piri ra ki te au turanga akono teitei a te Atua e te kopae anga i te au mea akavare tau kore a teianei ao. Te kite anga i te tu rapurapu o to tatou au tuatau e ta Petero akamatakite anga e te “tae maira te ra o Iehova mei te keia,” ka rave ua atu ratou i te “au angaanga tapu.” (2 Petero 3:10, NW) Te akapapu maira ta ratou au angaanga e te ‘tatari [ra ratou] e te tamou vaitata ra ki te manako i te taenga mai o taua ra o Iehova ra.’a

E Tapapa i te “Au Ravenga no te Tu Akono i te Atua”

9. Eaa ta te tu akono i te Atua e akakeu ra ia tatou kia rave?

⁹ “Te au ravenga no te tu akono i te Atua” e puapinga katoaia me tamou tatou ki te manako i te ra o Iehova. “Te tu akono i te Atua” te o atura ei akatapu anga i te Atua te akakeu anga ia tatou kia rave i te mea te mareka maira tona nga mata. Te pirianga tiratiratu kia Iehova ko te mana akakeuangaia i muri i taua au ravenga no te tu akono i te Atua. Ko tona anoano te reira kia “inangaro i te tangata katoatoa kia ora, e kia rauka te kite i te tuatua-mou.” (1 Timoteo 2:4) “Kare [te Atua] e anoano kia akapouia tetai mari ra te anoano ra aia kia rauka te tataraara i te katoatoa.” (2 Petero 3:9, NW) I teianei, kare ainei to tatou tu akono i te Atua ei mea tau kia akamaroiroi ia tatou kia akamaata atu i ta tatou au tautaanga i te tauturu anga i te au tangata kia kite ia Iehova e kia aru iaia ra?​—Ephesia 5:1.

10. Eaa ka tau ei kia matakite tatou i “te pikikaa o te apinga” ra?

¹⁰ Ka maata ua atu to tatou oraanga i te au ravenga no te tu akono i te Atua me kimi tatou na mua i te Patireia o te Atua. (Mataio 6:33) Te o atura teia te rauka mai anga ia tatou i te akara tau anga i te au apinga materia. Kua akamatakite maira a Iesu e: “E akono meitaki e e matakite ia kotou i te morimori apinga: e maata ua oki to te tangata nei apinga, kare oki tei taua apinga nona ra tona ora.” (Luka 12:15) Penei e mea ngata ia tatou uaorai i te akamanako e ka akamatapoia mai e te anoano no te moni ra, e mea meitaki kia akara tatou e ko “te anoano maata i to teianei ao, e te pikikaa o te apinga” ra ka “pokia atura te tuatua” a te Atua. (Mataio 13:22) Penei kare e ngoie i te rave angaanga no te oraanga. I tetai au tuanga o te ao, i na reira ei kua manako te manganui e kia maani i tetai oraanga meitaki atu, ka neke atu ratou ki tetai enua puapinga maata, penei te akaruke mai anga i to ratou ngutuare tangata no tetai au mataiti. Kua manako katoa rai etai au tangata o te Atua na teia mataara. Te aere atu anga ki tetai enua ke, penei ka rauka ia ratou i te oronga atu ki to ratou ngutuare tangata te au apinga ou. Inara, eaa ra te ka tupu ki te turanga pae vaerua o te aronga akaperepere o ratou tei akarukeia i te enua ra? Me kare te upoko ngutuare e taangaanga meitakiia i roto i te kainga ra, ka rauka ainei ia ratou te tu pae vaerua te anoanoia kia ora ua atu i te ra o Iehova ra?

11. Akapeea tetai tangata angaanga no tetai enua ke i te akaarianga e e puapinga maata atu te au ravenga no te tu akono i te Atua i to te au apinga ra?

¹¹ Ko tetai tangata angaanga i te enua ke mei Piripine ra kua kite i te tuatua mou o te Pipiria no ko mai i te Au Kite o Iehova i Tiapani. I te kiteanga i te au apainga Tuatua Tapu no te taoonga upoko, kua kite aia e te anoanoia ra aia kia tauturu i tona ngutuare tangata kia riro mai ei au tangata akamori ia Iehova. (1 Korinetia 11:3) Kua patoi pakari mai tana vaine mei te enua anauia ra i tona akarongo kitea ouia e kua inangaro kia tuku ua mai aia i te moni e eaa oki e oki mai ki te enua anauia ra i te apii i te ngutuare tangata i tona au irinaki anga akatumuia ki runga i te Pipiria. Kua akakeuia no te tu rapurapu o te au tuatau e te manako anga no te aronga akaperepere ona ra, kua oki atu aia ki tona enua anauia. Kua paunaia tona akakoromaki anga i te akono aroa anga i te au mema ngutuare. Kare i roa ana, kua taokotai mai tona ngutuare tangata ki roto i te akamori anga mou, e kua tomo atu tana vaine ki roto i te angaanga orometua tamou.

12. Eaa ka tau ei kia tuku tatou i te au apinga pae vaerua i te ngai mua i roto i te oraanga?

¹² Penei kua akaaiteia to tatou turanga ki tetai aronga i roto i tetai are te ka ra. Ka tau ainei kia orooro neneva aere ua kia rauka i te rave mai i te au apinga materia no roto mai i te are e ka ra te vaitata ra i te topa ki raro? Kareka ra, kare ainei e mea puapinga maata kia akaoraia te au oraanga​—to tatou uaorai e te aronga o to tatou ngutuare tangata e tetai ua atu te noo ra i roto i te are? I na, te viviki ua atura teia akatere anga o te au mea kino ki tona openga, e tei roto i te tu kino te au oraanga. I te kite anga i teia, ka tau tikai i reira kia tuku tatou i te au anoano pae vaerua na mua e te irinaki maroiroi anga ki runga i te angaanga tutuanga i te Patireia i te akaora anga i te oraanga.​—1 Timoteo 4:16.

Anoanoia ra Tatou kia “Topata Kore”

13. Te inangaro ra tatou i te turanga aa me tae mai te ra o Iehova?

¹³ I te akaketaketa anga i te puapinga no te tamou marie anga i tetai tu tapapa anga, kua tuatua maira a Petero e: “E taku au akaperepere e, i te mea e te tatari nei kotou i teia au mea nei, e rave ra kotou i te maroiroi kia kiteaia mai e [te Atua ra] ma te topata kore e te kino kore e i roto ra i te au.” (2 Petero 3:14, NW) I runga atu i tana akoanga kia piri atu ki roto i te au angaanga tapu e te au ravenga no te tu akono i te Atua, kua akaketaketa mai a Petero i te puapinga kia kiteaia mai e Iehova ra e ei aronga kua tamaia e te toto okomaata o Iesu. (Apokalupo 7:9, 14) Te umuumuia ra teia e kia akono tetai tangata i te akarongo i roto i te atinga o Iesu e kia riro mai ei tavini akatapuia e te papetitoia no Iehova.

14. Eaa te ka o mai te riro mai anga kia “topata kore” ra?

¹⁴ Te raurau maira a Petero ia tatou kia rave tatou i te maroiroi kia kiteaia mai ma te “topata kore.” Te akono ra ainei tatou i to tatou kakau no te tu Kerititiano e te tu tangata kia topata koreia, kare i taviiviiia e teianei ao? Me kite tatou i tetai topata i runga i to tatou au kakau, ka viviki tatou i te rave i te tama atu i te reira. Me kua tou to tatou kakau marekaia ra, ka tama meitaki tatou i te reira. Te manako ainei ra tatou ma taua mataara me kua toutou to tatou au kakau Kerititiano, mei te mea e, no tetai tarevake i roto i to tatou tu tangata nei me kare te tu akono ra?

15. (a) Eaa ra te ngati Iseraela i maani ei i te au veruveru ki runga i te tapa o to ratou au kakau? (e) Eaa i tuke roa ai te au tavini o Iehova i teia tuatau?

¹⁵ Kua anoanoia te ngati Iseraela kia maani i “te veruveru ki runga i te tapa o to ratou kakau” e kia ‘tuku i tetai ri kerekere ki rungao i taua veruveru i te tapa ra.” No teaa ra? Kia rauka ia ratou i te akamanako i ta Iehova au akauenga, kia akarongo ki te reira, e “kia tapu” atu ki to ratou Atua. (Numero 15:38-40) Ei au tavini no Iehova i teia tuatau, e tuke tikai tatou mei to teianei ao no te mea te akarongo ra tatou ki te au ture e te au kaveinga tu-Atua. Ei akatauanga, te tamou marie ra tatou i te tu akono ma, te akangateitei ra tatou i te tu tapu o te toto, e te kopae ra tatou i te akamorianga itoro o tetai ua atu au tu. (Angaanga 15:28, 29) E manganui te akangateitei ra ia tatou no te manako tauta anga ketaketa o tatou kia akono ia tatou uaorai ma te viivii kore.​—Iakobo 1:27.

Anoanoia ra Tatou kia “Kino Kore”

16. Eaa te o maira ki roto i te tamou marie anga ia tatou uaorai kia “kino kore” ra?

¹⁶ Kua karanga katoa a Petero e ka kitea tatou ma te “kino kore.” Akapeea ra te reira e rauka ai? Te mea matauia ka rauka tetai topata i te taparaia me kare i te tamaia kareka ra te kino kare e rauka i te tamaia. Te akataka maira te kino e kua tarevake tetai apinga i roto roa, me kare te apa ra. Kua ako te apotetoro ko Paulo i te au taeake Kerititiano i Philipi: “E rave i te au mea ravarai ma te urutoe kore, e te taumāro kore: Kia riro kotou ei aronga apa kore, e te kino kore, ei tamariki na te Atua, kare e akakino anga, i rotopu i te uki piko e te māro: kia kakā kotou i rotopu ia ratou mei te rama i teianei ao.” (Philipi 2:14, 15) Me aru tatou i taua akoanga, ka kopae ke tatou i te au urutoe e te au taumaroanga e ka tavini i te Atua ma te manako ma. Ka akaueia tatou e te aroa no Iehova e to tatou au tangata tupu ia tatou e tutu aere ra i “te evangelia o te basileia.” (Mataio 22:35-40; 24:14) E ko tera tetai, ka rave ua atu tatou i te akakiteanga i te tuatua meitaki noatu rai e kare te au tangata e maara ana e eaa ra tatou i oronga ai i to tatou au taime i te tauta anga i te tauturu i tetai kia apii no runga i te Atua e i tana Tuatua, te Pipiria.

17. E tu aa ainei to tatou me te itae ra tatou i te au taoonga i roto i te putuputuanga Kerititiano?

¹⁷ Te inangaroia ra kia kiteaia ma te “kino kore,” e mea meitaki kia akara matatio tatou i to tatou au tu i roto i ta tatou au aruaru anga katoatoa ra. Kua akaruke atu tatou to teianei ao tu i te raveanga i te au mea no te au tumu noinoi, i te aruaru anga ra kia rauka mai te au apinganui me kare te mana anga. Me te itae ra tatou i te au apainga i roto i te putuputuanga Kerititiano, kia vai ma ua rai to tatou au tu e kia akakeu uaia tatou e te aroa no Iehova e no tetai ra. E akamaroiroi anga te reira kia akara atu te au tane pae vaerua tei ‘inangaro i te taoonga episekopo’ ma te rekareka e te anoano akaaka kia tavini ia Iehova e to ratou au taeake irinaki ra. (1 Timoteo 3:1; 2 Korinetia 1:24) E tikai, ko te aronga te tau ra i te tavini ei aronga pakari ra “ka angai i te anana a te Atua i . . . te anoano ra; auraka no te apinga tika kore ra kia rauka, no te tae tikai ra o te ngakau; Auraka ma te akaueue ua ki runga i te tuanga a te Atua ra, ei kaveinga ra kotou no te anana.”​—1 Petero 5:1-4.

Anoanoia ra Tatou kia “Au”

18. No teea au tu i kite meitakiia ai te Au Kite o Iehova?

¹⁸ Ei taopenga anga, kua akakite mai a Petero kia tatou e kia kiteaia te “au.” Kia rauka i te akono tau i teia umuumuanga, ka anoanoia kia au tatou ma Iehova e ki to tatou tangata tupu ra. Kua akaketaketa mai a Petero i te puapinga anga kia rauka te “aroa rai, kia maata tikaia ïa ia kotou uaorai” e te tamou marie anga i te au ma to tatou au taeake Kerititiano. (1 Petero 2:17; 3:10, 11; 4:8; 2 Petero 1:5-7) Kia tamou marie i to tatou au, ka tau kia akaari tatou i te aroa i rotopu ia tatou uaorai. (Ioane 13:34, 35; Ephesia 4:1, 2) Kua kite meitakiia to tatou aroa e te au i te rave anga i ta tatou au uruoaanga pa enua. I tetai uruoaanga i Kota Rika i te 1999, kua manata tikai tetai tangata tiaki toa i te ngai to anga pairere no te mea kua arairaiia tana ngai pitiniti e te Au Kite o reira i te turou anga i te au tereketi tei tae mai. Inara, te rua o te ra, kua kite aia i te aroa e te au e akaariia ra i te turou maoraora anga tei orongaia atu ki te au tereketi, noatu e kare te Au Kite o reira i kite tikai ia ratou. I te ra openga ra, kua piri atu te tangata tiaki toa ki roto i te turou anga e kua pati atu i tetai apiianga Pipiria.

19. Eaa ra i puapinga ai kia aruaruia te au ma te au taeake irinaki ra?

¹⁹ To tatou tu ngakau tae i te aruaru anga i te au ma to tatou au taeake e te au tuaine i te pae vaerua penei te mana maira e mei teaa tikai to tatou inangaro i te tapapa anga i te ra o Iehova e tona ao ou tei taputouia mai. (Salamo 37:11; 2 Petero 3:13, NW) Penei kua kite tatou e e mea ngata i te tamou marie i te au ma tetai taeake irinaki ra. Te kite ra ainei tatou ia tatou uaorai i te noo anga ma te au kiaia i roto i te Parataito? Me e akaapa anga ta tetai taeake kia tatou, kia viviki tatou i te ‘akatupu i ta tatou au kiaia.’ (Mataio 5:23, 24, NW) Na te rave anga i te reira e mea puapingaia me te inangaro ra tatou kia au kia Iehova.​—Salamo 35:27; 1 Ioane 4:20.

20. Ko tetai “tu tapapaanga” ka tau kia akaariia na roto i teea au mataara?

²⁰ Te ‘tatari e te tamou vaitata [ra ainei tatou uaorai] ki te manako i te taenga mai o taua ra o Iehova ra’? To tatou anoano tikai te kite anga i te takoreia anga te ravenga kino kua akaariia mai na te tamou marie anga tatou i te tu tapu i roto i teia ao tau kore nei. E tera tetai, to tatou anoano tikai kia tae mai te ra o Iehova e te nooanga i raro ake i te tutara anga o te Patireia kua akaariia mai na roto i ta tatou au ravenga no te tu akono i te Atua. E to tatou tapapa anga kia ora ua atu i roto i tetai ao ou ma te au kua akaataia mai i te aruaru anga tatou i te au ma to tatou au taeake akamori i teia tuatau. Na roto i taua mataara nei, te akaari ra tatou e e “tu tapapaanga” to tatou e te “tatarianga e te tamou vaitata anga ki te manako i te taenga mai o taua ra o Iehova ra.”

[Tataanga Rikiriki i Raro]

Maara Ainei ia Koe?

• Eaa te aite anga kia tamou ‘vaitata ki te manako i te taenga mai o taua ra o Iehova ra’?

• Akapeea i te akaari anga i te “tu tapapaanga” tei piri atura ki to tatou tu?

• Eaa ra i puapinga ai “te au ravenga no te tu akono i te Atua”?

• Eaa ta tatou ka rave kia kiteaia mai e Iehova e te “topata kore e te kino kore e i roto ra i te au”?

[Tutu i te kapi 11]

Ko tetai “tu tapapaanga” kua akaariia mai na roto i te au angaanga tapu

[Au Tutu i te kapi 12]

E angaanga akaora anga ora te tutu anga i te Patireia

[Tutu i te kapi 14]

Ia tatou e tapapa ra i te ra o Iehova, kia aruaru tatou i te au ma tetai atu