To Iesu Aereanga Mai i te Kaka Patireia

“Kare tetai papaki o teianei aronga e tu mai nei, e rokoia e te mate, e kite ei ratou i te Tamaiti a te tangata i te aere anga mai i tona basileia.”​—MATAIO 16:28.

1, 2. Eaa tei tupu i muri poto ake ia Penetekote 32 T.N., e eaa te akakoroanga o taua tupu anga ra?

I MURI poto ake i te Penetekote 32 T.N., kua kite nga apotetoro e toru a Iesu Karaiti i tetai orama maaraaraia ra. Kia tau ki ta te tataanga akauruia ra, “kua arataki aturā Iesu ia Petero, ia Iakobo, e tona taeake ia Ioane, ki runga i tetai maunga teitei, ko ratou anake ra. E akatu keia aia ki mua ia ratou.”​—Mataio 17:1, 2.

² Kua kitea mai taua orama akatukeanga ra i tetai tuatau kino. Kua akamata ke ana a Iesu i te akakite ki tana au pipi e ka tamamaeia aia e ka mate aia ki Ierusalema, inara kua kitea e ratou e ngata tana au tuatua kia maramaia. (Mataio 16:21-23) Kua akamaroiroiia e te orama ra te akarongo o nga apotetoro e toru a Iesu ra i te teateamamaoanga no tona matenga te aere maira e pera katoa oki no te au mataiti rave angaanga pakari e te timataanga te ka aru mai no te putuputuanga Kerititiano ra. Ka rauka ainei kia kite tatou i tetai apinga mei taua orama maira? Ae, no te mea ko tei akaataia maira e te reira ka tupu tikai i to tatou tuatau nei.

3, 4. (a) Eaa ta Iesu i tuatua e ono ra i mua ake i te akatukeanga ra? (e) E akataka mai eaa tei tupu i te tuatau o te akatukeanga ra.

³ E ono ra i mua ake i te akatukeanga ra, kua tuatua a Iesu ki tana au pipi: “E tae mai oki te Tamaiti a te tangata ma tana au angela e te kakā o tona Metua; ei reira aia e tutaki mai ei i te tangata ravarai kia tau i tana angaanga.” Ka akatupuia teia au tuatua a “te openga o teianei ao.” Kua tuatua katoa a Iesu: “Tikai taku e karanga atu kia kotou nei, kare tetai papaki o teianei aronga e tu mai nei, e rokoia e te mate, e kite ei ratou i te Tamaiti a te tangata i te aere anga mai i tona basileia.” (Mataio 16:27, 28; 24:3; 25:31-34, 41; Daniela 12:4) Kua tupu te akatuke anga i te akatupu anga i teia au tuatua openga nei.

⁴ Eaa tikai ta te apotetoro e toru ra i kite? Ko te aru mai nei ta Luka akataka anga i taua tupu anga ra: “E te pure ra [a Iesu], tu ke atura tona mata, teatea atura tona kakau e te kakā. E i na, te tuatua maira kiaia e toko rua puke tangata, ko Mose e ko Elia; i mama mai raua i roto i te kakā, e kua tuatua iora i te matenga nona ra, te ka tupu iaia i Ierusalema.” I reira, “ko te tiao maira i te tapoki anga mai [i te au apotetoro]; kua mataku akera ratou i to ratou o anga ki roto i te tiao. E tetai reo maira no roto mai i taua tiao ra, i te na ko anga mai e, Ko taku Tamaiti akaperepere teia: ka akarongo iaia.”​—Luka 9:29-31, 34, 35.

Akamaroiroiia te Akarongo

5. Eaa te akatupu anga a te akatukeanga ra ki runga i te apotetoro ko Petero?

⁵ Kua oti ke ana i te apotetoro ko Petero te akataka ia Iesu e “ko te Mesia koe, ko te Tamaiti a te Atua ora.” (Mataio 16:16) Kua akapapuia e ta Iehova au tuatua mei te rangi maira taua akataka anga ra, e ko te orama o to Iesu akatukeanga ra e akaata anga momua mai ia i to Karaiti aerenga mai i te mana e te kaka Patireia, i te openga ra kia akava i te au tangata katoa. E tere atu i te 30 mataiti i muri ake i taua akatukeanga ra, kua tata a Petero: “Kare oki ta matou i te tuatua taeke ua i akatupuia e te pakari ra, ka akakite atu ei matou ia kotou i te mana e te aerenga mai o to tatou Atu ra o Iesu Mesia, kua kite tikai ra to matou mata i tona tapunui. I rauka oki iaia i te Atua Metua ra te akangateitei e te kakā, ka tae mai ei iaia taua reo no roto mai i te kakā maata ra e, ‘taku tamaiti akaperepere teia, kua mareka rava au iaia.’ Kua akarongo matou i taua reo no te rangi maira, ia matou ma ia katoa ki runga i te maunga tapu ra.”​—2 Petero 1:16-18; 1 Petero 4:17.

6. I akapeea te akatuera anga te au tupu anga i muri ake i te akatukeanga ra?

⁶ I teia tuatau, te akamaroiroi katoaia ra to tatou akarongo na taua mea i kitea e nga apotetoro e toru ra. Inara, kua tupu katoa mai etai atu apinga mei te 32 T.N. mairai. I te mataiti i muri iora, kua mate a Iesu e kua akatuakaouia, kua aere atu ki te rima katau o tona Metua. (Angaanga 2:29-36) Ia Penetekote o taua mataiti ra, kua anauia mai te “Iseraela [ou] o te Atua,” e kua akamataia tetai tutuanga maata, tei akamataia ki Ierusalema e i muri iora kua totoa ki te au openga o te enua katoa. (Galatia 6:16; Angaanga 1:8) I muri ua akera kua timataia te akarongo o te au pipi a Iesu ra. Kua tapekaia te au apotetoro ra e kua papaia no to ratou kore e akamutu i te tutuanga. Kare i roa kua tamateia a Setephano. E i reira, kua tamateia a Iakobo, koia tetai tei kite mata i te akatukeanga ra. (Angaanga 5:17-40; 6:8–​7:60; 12:1, 2) Inara, kua ora atu a Petero raua ko Ioane, kia tavini tiratiratu ia Iehova no etai mataiti e manganui. Ko te tika, i te vaitata anga ki te openga o te anere mataiti mua T.N., kua tataia e Ioane etai atu akara anga orama i to Iesu kaka anga i te rangi ra.​—Apokalupo 1:12-20; 14:14; 19:11-16.

7. (a) I naea te orama akatukeanga ra i akamataʼi te tupu anga? (e) I naea a Iesu i tutaki ei i tetai papaki kia tau ki ta ratou angaanga?

⁷ Mei te akamataanga mai “te rā o te Atu ra” i te 1914, e manganui te au orama tei akaraia ra e Ioane kua akatupuia. (Apokalupo 1:10) Eaa oki to Iesu ra ‘aerenga mai i te kakā o tona Metua,’ tei akaataia maira na te akatukeanga ra? Kua akamataia te akatupu anga i teia orama i te anau mai anga te Patireia o te Atua i te rangi ra i te 1914. I to Iesu tu anga mai ki runga i te ngai o te ao katoa e pini ua ake ei tetai Ariki akaterono ouia ra, mei tetai etu popongi, koia oki, mei te mea rai e akirata no tetai ra ou. (2 Petero 1:19; Apokalupo 11:15; 22:16) I tutaki ainei a Iesu i etai i taua tuatau ra kia tau ki ta ratou angaanga? Ae. Te vaira te akapapu anga ketaketa e i muri poto akera, kua akamataia te tuakaouanga ki te rangi o te au Kerititiano akatainuia ra.​—2 Timoteo 4:8; Apokalupo 14:13.

8. Eaa te au tupu anga te ka akairo i te akaoti anga o te tupu anga o taua orama akatukeanga ra?

⁸ Inara, kare e roa atu, ka tae mai a Iesu “ma tona kakā, e te aronga angela tapu ravarai” kia rave i te akava anga i te au tangata ravarai. (Mataio 25:31) A taua tuatau ra, ka akakite aia iaia uaorai i tona kaka tapunui katoa e ka oronga ki te “aronga taki tai” i te tutaki tau no tona angaanga. Ka akatuangaia te aronga mei te mamoe rai te tu i te ora mutu kore ki roto i te Patireia tei teateamamaoia no ratou, e te aronga mei te puakanio rai te tu ka aere ke atu ki roto i te “mate mutu kore.” Mei teaa ra tetai akaope anga meitaki roa te reira ki te akatupu anga i te orama o te akatukeanga ra!​—Mataio 25:34, 41, 46; Mareko 8:38; 2 Tesalonia 1:6-10.

To Iesu Au Oa Akakakaia Ra

9. Ka tau ainei tatou kia manako atu ia Mose raua ko Elia kia kapiti atu ma Iesu i te tupu anga te orama akatukeanga ra? E akataka mai.

⁹ Kare ko Iesu anake i roto i te akatukeanga ra. Kua mama mai oki a Mose raua ko Elia ma ia katoa ra. (Mataio 17:2, 3) I reira tikai ainei raua? Kare, no te mea ko aua nga tangata e rua ra kua roa te mate anga e te moe ra i roto i te one pueu te tatari ra i tetai tuakaouanga. (Koheleta 9:5, 10; Ebera 11:35) Ka mama mai ainei raua ma Iesu katoa a tona aerenga mai i te kaka no te rangi ra? Kare, no te mea kua ora a Mose raua ko Elia i mua ake i te tuera mai anga te manakonako anga no te rangi ki te au tangata. Ka riro raua ei tuanga no te “tuakaouanga to . . . te aronga tuatua-tika.” (Angaanga 24:15) No reira ko to raua mama anga mai i te orama o te akatukeanga ra e akatutu anga ia. No teaa?

10, 11. Koai ta Mose raua ko Elia i akatutu maira i te au akanoonooanga ke ke ra?

¹⁰ I roto i etai atu au tataanga, e akatutu totou anga a Mose raua ko Elia. Ei te rotopu no te Ture koreromotu ra, kua akaata mai a Mose ia Iesu, koia te Rotopu o te koreromotu ou. (Deuteronomi 18:18; Galatia 3:19; Ebera 8:6) Kua akaata mai a Elia ia Ioane Papetito ra, e momua mai aia no te Mesia ra. (Mataio 17:11-13) Pera katoa oki, i te tataanga ia Apokalupo pene 11, kua akaata mai a Mose raua ko Elia i te toenga o tei akatainuia ra i te tuatau openga. Akapeea tatou i kite ei i te reira?

¹¹ E eeu mai kia Apokalupo 11:1-6. I te irava 3 ka tatau tatou: “E naku e poroki i nga kite tokorua naku ra, kia totou raua ma te kakau paoa, e kia okotai ake tausani, kia rua anere, e kia ono oki ngauru i te rā.” Kua akatupuia teianei totou anga ki runga i te toenga o te au Kerititiano akatainuia i te tuatau o te Tamaki I o Teianei Ao ra.a Eaa ra e e rua nga kite? No te mea te rave ra te toenga o tei akatainuia ra i nga angaanga, i te pae vaerua, te aite ra ki ta Mose e ta Elia. Te tuatua ua atura nga irava 5 e te 6 e: “E kia rave kino mai tetai ia raua, te puroro atura te ai no roto i to raua vaa, e pou atura to raua enemi: e kia rave kino maira tetai ia raua, e akaperaia aia e mate takiri atu. E mana to raua kia mopani i te rangi e, auraka te ua e topa mai i to raua au rā totou anga ra: e e mana oki to raua i te au vai, kia akariro ei toto, e kia pāpā putuputu i te enua i te au mate ravarai nei, mei ta raua e inangaro ra.” No reira, te akamaaraia mai ra tatou i te au temeio tei raveia e Elia raua ko Mose.​—Numero 16:31-34; 1 Ariki 17:1; 2 Ariki 1:9-12.

12. I te tataanga no te akatukeanga ra, koai ma te akatutuia maira e Mose raua ko Elia?

¹² Koai, i reira ta Mose raua ko Elia i akaata maira i roto i te tataanga no te akatukeanga ra? Kua karanga a Luka e i mama mai raua ma Iesu “ma te kakā.” (Luka 9:31) Te taka meitaki ra e, te akaata maira raua i te au Kerititiano tei akatainuia ra ma te vaerua tapu ei “aronga tuanga” ma Iesu e no reira kua rauka ia ratou te manakonako anga umere kia “akakakā kapipitiia” ma ia katoa oki. (Roma 8:17) Ka kapitiia atu te aronga akatainuia ra ma Iesu me akatuakaouia mai ratou i tona aerenga mai i te kaka o tona Metua kia “tutaki mai ei i te tangata ravarai kia tau i tana angaanga.”​—Mataio 16:27.

Te Au Kite Mei ia Mose Raua ko Elia

13. Ko teea te au tuanga te akairo maira ia Mose raua ko Elia ei au tutu tau no te totou mai i te aronga akatainuia akatuangaia ra ma Iesu tei akakaka katoaia ma ia ra?

¹³ Te vaira te au tu taka meitaki tei akairo maira ia Mose raua ko Elia ei nga akatutu totou tau no te aronga tuanga akatainuia ra o Iesu. Kua tavini a Mose raua ko Elia ei nga vaa tuatua no Iehova no etai mataiti e manganui. E rua raua ravarai kua aro atu i te riri o tetai tutara. I tetai tuatau ngere ra, kua turuia raua taki tai e tetai pamiri tangata ke ra. E rua raua kua totou mataku kore ua ki nga ariki e kua maro ngaueue kore atu i te au peroveta pikikaa. Kua akara katoa a Mose raua ko Elia i nga akakite anga i to Iehova mana i runga ia Maunga Sinai (tei tapa katoaia ra ko Horeba). Kua akataoonga raua i nga komono i te pae itinga o Ioridana ra. E te au tuatau o Mose (ma Iosua) e to Elia (ma Elisaia) kua kiteaia te au temeio maata roa, i te pae atu i to tei rokoia ra i te tuatau o to Iesu ora anga.b

14. I akapeea tei akatainuia ra i te tavini anga ei vaa tuatua no Iehova, mei ia Mose raua ko Elia ra?

¹⁴ Kare ainei te reira katoatoa e akamaaraara ia tatou i te Iseraela o te Atua ra? Ae, tikai. Kua akaue atura Iesu i tana au pipi tiratiratu: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; ma te apii atu ia ratou, kia akono i te au mea katoa taku i akaue atu kia kotou: e i na, tei vaitata ua ra au ia kotou, e tae ua atu ki te openga o teianei ao.” (Mataio 28:19, 20) I te akarongo anga i teianei au tuatua, kua tavini te au Kerititiano akatainuia ra ei au vaa tuatua mei te Penetekote 33 T.N. tae roa mai ki teianei. Mei ia Mose raua ko Elia ra, kua aro atu raua i te riri o te au tutara e kua akakitekite atu kia ratou ra. Kua tuatua a Iesu ki tana au apotetoro e 12 ra: “E noku nei i taki uaiaʼi kotou ki mua i te aroaro o te au tutara, e te ui ariki, ei kite no ratou, e no te au etene.” (Mataio 10:18) Kua putuputu te tupu anga tana au tuatua i te tuatau o te tuatua enua o te putuputuanga Kerititiano ra.​—Angaanga 25:6, 11, 12, 24-27; 26:3.

15, 16. Eaa te au aiteite anga te vaira i rotopu i tei akatainuia i tetai pae e ia Mose raua ko Elia i tetai pae i te tumu no te (a) mataku kore te tu anga no te tuatua mou? (e) te raukaanga te tauturu mei ko mai i te aronga kare ra i te ngati Iseraela?

¹⁵ Pera katoa, e mataku kore te au Kerititiano akatainuia ra mei ia Mose raua ko Elia i te tu anga no te tuatua mou i te patoi anga i te akonoanga pikikaa. Kia maara i akapeea ta Paulo akaapa anga i te peroveta pikikaa ngati Iuda ra ko Bara-Iesu e te akakite atea anga tau e te ngaueue kore i te pikikaa o te au atua o to Atene ra. (Angaanga 13:6-12; 17:16, 22-31) Kia maara, katoa oki, e i teia tuatau nei kua akakite atea te toenga o tei akatainuia ra ma te mataku kore i te apa o Kerititome ra e kua mamae aia i taua akakitekiteanga.​—Apokalupo 8:7-12.c

¹⁶ I to Mose oro ke anga i te riri o Pharao ra, kua kitea e ia te akapuanga ki roto i te are o tetai tangata kare i te ngati Iseraela, ko Reuela, kua tapa katoaia ko Ietero. I tetai tuatau i muri akera, kua rauka mai ia Mose te akoanga akaaerenga puapinga mei ia Reuela maira, e kua arataki tana tamaiti ko Hobaba i to Iseraela i roto i te metepara ra.d (Exodo 2:15-22; 18:5-27; Numero 10:29) Kua tauturuia ainei te au mema o te Iseraela o te Atua ra mei tera te tu e te aronga kare ra i te au mema akatainuia no te Iseraela o te Atua ra? Ae, kua turuia ratou e te “aronga maata” o te “au mamoe ke atu,” tei mama maira i teia tuatau openga nei. (Apokalupo 7:9; Ioane 10:16; Isaia 61:5) I te totouanga mai i te turu anga pumaana e te aroa ta teia “au mamoe” te ka oronga ki tona au taeake akatainuia, kua na ko maira Iesu kia ratou na te tu totou anga: “I pongi ana au, e kua angai mai kotou iaku; i kaki vai ana au, e kua akainu mai kotou iaku: i tangata ke ana au, e na kotou i kite mai iaku: I putaua ana au, e kua akakakau mai kotou iaku: i maki ana au, e kua utuutu mai kotou iaku: i tapekaia ana au, e kua aere ake kotou kiaku. . . . Koia mou taku e karanga atu kia kotou nei, Ko kotou i pera i tetai taeake mea ngiti rava o taku au taeake nei, kua pera mai ïa iaku.”​—Mataio 25:35-40.

17. Eaa tetai tupu anga ki tei akatainuia ra tei aiteite ra ki to Elia i runga i te Maunga o Horeba ra?

¹⁷ Pera katoa, kua tupu ki te Iseraela o te Atua ra tetai tupu anga aiteite ki to Elia ra i te Maunga o Horeba ra.e Mei ia Elia i te tuatau i oro ke ra aia i te Ariki Vaine ko Iezebela, kua manako te toenga o tei akatainuia tei mataku ra e kua oti ta ratou angaanga i te openga o te Tamaki I o Teianei Ao ra. I reira, mei ia Elia katoa ra, kua tuatua katoa ratou ma Iehova, tei aere maira kia akava atu i taua au akaaerenga tei karanga ra e ko ratou “te ngutuare o te Atua.” (1 Petero 4:17; Malaki 3:1-3) I te kitea anga e te ngere ra a Kerititome, kua kiteia te toenga o tei akatainuia ra ei “te tavini akono meitaki e te pakari” e kua akariro iaia ei akaaere i te au apinga ravarai a Iesu i te enua nei. (Mataio 24:45-47) I Horeba ra, kua akarongo atu a Elia i tetai “reo iti poepoe maira” tei kitea ra e no Iehova ia, i te orongaanga kia tere atu te angaanga nana kia rave. I te tuatau maru ua i nga mataiti i muri ake i te tamaki ra, kua akarongo atura te au tavini akatainuia tiratiratu o Iehova ra i tona reo mei te au kapi mai o te Pipiria ra. Kua kite katoa ratou e e angaanga ta ratou kia akatupu.​—1 Ariki 19:4, 9-18; Apokalupo 11:7-13.

18. Akapeea te au akakiteanga meitaki no to Iehova ra mana i te na roto anga i te Iseraela o te Atua ra?

¹⁸ Ei mea openga, kua tukuia mai ainei te au akakite anga meitaki i te mana o Iehova na roto i te Iseraela o te Atua ra? I muri ake i te matenga o Iesu, kua rave te au apotetoro ra e manganui te au temeio, inara kua akamutu marie atu te reira. (1 Korinetia 13:8-13) I to tatou tuatau nei, kare tatou e kite ana i te au temeio i tetai tu kopapa nei. I tetai pae, kua tuatua a Iesu ki tana au pipi: “Tika, tika tikai taku e karanga atu kia kotou, Ko te akarongo mai iaku ra, ka rave katoa aia i teianei au angaanga taku e rave nei: e maata ua atu rai tana e rave i teia.” (Ioane 14:12) Kua tupu tetai tupu anga mua no teia i te tutu aere anga te au pipi a Iesu i te tuatua meitaki takapini te Patireia o Roma i te anere mataiti mua ra. (Roma 10:18) E maata atu oki te angaanga te raveia nei i teia tuatau i te taki anga te toenga o tei akatainuia ra i te tutu anga i te tuatua meitaki “e kako rava ake te ao katoa nei; ei kite no te pa enua ravarai.” (Mataio 24:14) Te tupu anga? Kua akakiteaia i te 20 anere mataiti nei te akaputuanga i te numero maata rava o te au tavini akatapuia o Iehova tei tiratiratu ra i te tuatua enua. (Apokalupo 5:9, 10; 7:9, 10) Mei teaa ra te akakiteanga meitaki i to Iehova ra mana!​—Isaia 60:22.

Kua Aere Mai to Iesu Au Taeake ma te Kaka

19. Aea te au taeake akatainuia o Iesu e kiteaʼi ma ia katoa i te tu kaka?

¹⁹ I te oti anga te angaanga a te toenga o to Iesu ra au taeake akatainuia i te enua nei, kua akakakaia ratou ma ia katoa ra. (Roma 2:6, 7; 1 Korinetia 15:53; 1 Tesalonia 4:14, 17) No reira kua riro ratou ei ui ariki e ei kau taunga mate kore i te Patireia o te rangi ra. Ma Iesu katoa ra, ei reira ratou e ‘tutara i rungao i te au tangata ma te sepeta auri ra; e e ungaungā rava ratou mei te kapu a te potera ra.’ (Apokalupo 2:27; 20:4-6; Salamo 110:2, 5, 6) Ka noo ratou ma Iesu katoa ki rungao i te au terono kia akava i “te au kopu o Iseraela raungauru e rua ara.” (Mataio 19:28) Kua tatari marie te au mea angaia nei ma te ngunguruanga i teia au tupu anga, ei tuanga no “te akakite angaia mai i te tamariki a te Atua.”​—Roma 8:19-21; 2 Tesalonia 1:6-8.

20. (a) No runga i teea manakonako anga ta te akatukeanga ra akamaroiroi anga i to Petero akarongo? (e) Akapeea ta te akatukeanga ra akamaroiroi anga i te au Kerititiano i teia tuatau?

²⁰ Kua tuatua a Paulo no te akakiteanga mai a Iesu i te “mate maata ra” i tana tataanga: “Kia tae ki te rā e tae mai ei aia ra kia akakakāia aia i tona aronga tapu, e kia umereia i te aronga katoa i akarongo ra.” (Mataio 24:21; 2 Tesalonia 1:10) Mei teaa ra tetai manakonako anga meitaki no Petero, e Iakobo, e Ioane, e te au Kerititiano katoatoa tei akatainuia i te vaerua ra! Kua akamaroiroi mai te akatukeanga ra i to Petero akarongo. E mea tika, ka akamaroiroi katoa i to tatou akarongo te tatauanga i te reira e ka akaketaketa i to tatou irinaki anga e kare e roaia ka rave a Iesu e “tutaki mai ei i te tangata ravarai kia tau i tana angaanga.” Te au Kerititiano tiratiratu tei akatainuia ra tei ora mai ki teia tuatau nei te kite ra i te akapapu anga i to ratou irinaki anga e ka akakakaia ratou ma Iesu katoa ra. Te au mamoe ke atu te akamaroiroiia ra to ratou akarongo i te kite anga e ka akaora aia ia ratou na roto i te openga o teianei akatereanga kino o te au mea nei ki roto i tetai ao ou kaka. (Apokalupo 7:14) Mei teaa ra tetai akamaroiroi anga kia tu ngaueue kore tae roa ki te openga! E ka apii teia orama ia tatou kia maata atu, mei ta tatou ka kite i te atikara te ka aru mai.

[Au Tataanga Rikiriki i Raro]

Te Maara Ainei ia Koe?

◻ Koai tei mama maira ma Iesu katoa i te akatukeanga ra?

◻ I akapeea te akamaroiroi angaia te akarongo o te au apotetoro e te akatukeanga ra?

◻ I te mama mai anga a Mose raua ko Elia “ma te kakā” i te kapiti anga ma Iesu i te akatukeanga ra, koai ma ta raua i akatutu maira?

◻ Eaa te au tu aiteite i rotopu ia Mose raua ko Elia i tetai pae e te Iseraela o te Atua i tetai pae?

[Tutu i te kapi 10]

Kua akamaroiroi te akatukeanga ra i te akarongo o te au Kerititiano i te tuatau i topa e i teianei