Eaa te Taviri ki te Turanga Kerititiano Tikai?

I TEIA tuatau, e maata te tangata e tuatua ra e te piri atura ratou ki te turanga Kerititiano tetai akonoanga ke atu i teianei ao. Inara te au irinaki anga a teia au Kerititiano akatutu ua ia ratou uaorai e mea pikikaa ia, kare ratou e taokotai ana, e etai taime ia ratou ka tamate tetai i tetai. Te papu ra, kare te manganui i te au Kerititiano tikai. Kua tuatua a Iesu e i to tatou tuatau, e manganui te ka tuatua kiaia e “e te Atu, e te Atu,” mei teia te tu ra, te akatutu ua e e au Kerititiano ratou, inara ka tuatua atu aia kia ratou: “Kare takiri au i kite ia kotou: ka aere ke atu kotou, te aronga rave tuatua kino.” (Mataio 7:21, 23) Te papu ra, e kare okotai ia tatou e inangaro kia tomo atu ki te reira pupu! No reira akapeea e raukaʼi ia tatou i te kite e me e au Kerititiano tikai tatou?

Te tika oki, e manganui te au mea e anoanoia ra kia riro ei Kerititiano tikai. E tau te Kerititiano tikai kia rauka tetai akarongo pakari no te mea “Kare ra e akarongo ra kare rava [te Atua] e mareka.” (Ebera 11:6) Ka tau te reira akarongo pakari kia tapiri mai te au rave anga tika. Kua akamatakite mai te pipi a Iakobo e “te akarongo kare e angaanga ra, e mea mate katoa ïa.” (Iakobo 2:26) Tei maata atu, kia kite tetai Kerititiano i te mana akaaere o “te tavini akono meitaki e te Pakari.” (Mataio 24:45-47) Inara te taviri ki te turanga Kerititiano tikai e tuanga ke atu te reira mei teia au mea.

Eaa te taviri? Kua akamarama te apotetoro a Paulo i roto i tana reta mua ki te au Korinetia: “Tuatua ua rai au i te au tuatua ravarai a te tangata nei, e ta te au angela katoa ra, e kare oku aroa, kua riro ïa au mei te veo tangi ra, e mei te sumebalo turituri ra. Tei iaku ua rai te totou, e te kite i te au tuatua ngaro katoa ra, e te au kite katoa; e tei iaku te au akarongo katoa, e tikaʼi iaku kia apai ke i te maunga, e kare oku aroa, kare ua aku e puapinga. E kia oronga au i taku au apinga ravarai ei angai i te putaua, e kia tuku ua au i taku kopapa kia taʼu naia ki te ai, e kare oku aroa, kare ua atu aku e puapinga.”​—1 Korinetia 13:1-3.

No reira ko te aroa te taviri ia ki te turanga Kerititiano tikai. Te akarongo, te rave angaanga, e te au piri anga tau e puapinga ia, kare e rauka i te komono. Inara me kare te aroa, kare to ratou puapinga e kitea. Eaa ra i pera ei?

No te mea no te tu o te Atua ta tatou e akamori ra. Kua akatutu te apotetoro a Ioane ia Iehova, te Atua o te turanga Kerititiano tikai, na teia au tuatua: “Ko te Atua oki te aroa.” (1 Ioane 4:8) E maata ua atu to te Atua ko Iehova au tu, mei te ririnui, te tika, e te pakari, inara i te mea e koia tikai te Atua o te aroa, eaa i reira te tu tangata tana ka inangaro i tona aronga akamori kia riro mai? Papu e ko te au tangata te aru ra iaia e te tatanu ra i te aroa.​—Mataio 5:44, 45; 22:37-39.

Te Tumu Tau

Ae, te akatupu ra te aroa i te au Kerititiano kia riro mei te Atua rai ta ratou e akamori ra. Te aite anga e te aite ra ta ratou au tumu ki ta te Atua au tumu. Eaa i reira te tumu maata rava atu i akakeuiaʼi te Atua ko Iehova kia tuku mai ia Iesu ki te enua nei no te oronga mai i te tuatau no tatou kia rauka te oraanga mutu kore? Aroa. “Kua aroa maata maira te Atua i teianei ao katoa i oronga mai ei aia i tana Tamaiti anau tai, kia rauka i te katoatoa te taangaanga i te akarongo kiaia e kia kore e takoreia inara kia rauka te ora mutu kore.” (Ioane 3:16, NW) Eaa i reira ta tatou tumu no te raveanga i to te Atua anoano. Koia akaou rai, ko te aroa. “Teia oki te inangaro i te Atua, ko te akono i tana au akauenga.”​—1 Ioane 5:3.

Ka rauka ainei i te tavini i te Atua ma tetai tumu tarevake? Ae. Kua taiku a Paulo i tetai pae i tona tuatau te tavinianga na te tu morimori e te taumaroro. (Philipi 1:15-17) Ka tupu te reira kia tatou. E ao tarere teia, e ka tupu mai te reira vaerua kia tatou. Penei ka akaparau tatou i te manako e e vaa tuatua meitaki ake tatou me kare e maata atu ta tatou puka ka tua i tetai pae. Penei ka akaaite atu tatou i ta tatou akameitaki anga tavini anga ki te mea te rekarekaia ra e tetai pae e kua akaparau​—me kare tarotokaka. Penei ka vareae tetai tangata pakari i tona turanga akaaere, pera katoa te tae anga atu ki te turanga o te tapupuanga i tetai tangata mapu kite kia kore e tere ki mua. Penei na te anoano uaorai e raukaʼi te akakeu ia tatou kia tatanu i te piri anga taeake ki te au Kerititiano apinganui koi kopae ei i te aronga putaua.

Ka tupu rai teia au mea no te mea e tiama kore tatou. Inara, naringa​—e mei ia Iehova rai​—ka maani tatou i te aroa ei akakeu anga puapinga kia tatou, ka patoi atu tatou i te reira au tu. Te karapii, ko te anoano i te akakaka anga ia tatou uaorai, me kare te parau tamanako uaia na te reira e kopae atu i te aroa, “kare ua atu aku e puapinga.”​—Maseli 11:2; 1 Korinetia 13:3.

Te Aroa i Roto i Tetai Ao Karapii

Kua tuatua a Iesu i tana au pipi e “kare ratou no teianei ao.” (Ioane 17:14) Akapeea e raukaʼi ia tatou i te kopae i te apuku angaia e te mana o teianei ao takapini ia tatou? Na te aroa e tauturu ia tatou. Ei akaraanga, i teia tuatau te tangata “ei aronga inangaro i te au mea e navenave ra kare ei aronga inangaro i te Atua.” (2 Timoteo 3:4, NW) Kua akamatakite mai a Ioane ia tatou auraka kia pera. Kua tuatua aia: “Auraka e anoano i teianei ao, e te au mea ravarai o teianei ao. Ko te tangata i anoano i teianei ao ra, kare te anoano o te Metua i roto iaia ra. Ko te au mea ravarai oki o teianei ao, ko te anoano tika kore o te kopapa nei, e te anoano tika kore o te mata nei, e te akatietie o te ora anga nei, kare ïa i to ko mai i te Metua ra, no teianei ao anake ïa.”​—1 Ioane 2:15, 16.

Inara, kare i te mea ngoie ua i te uri ke mei te “anoano tika kore o te kopapa nei” e te “anoano tika kore o te mata nei.” Te inangaroia ra teia au mea no te mea e akaraanga taurekareka ratou ki te kopapa. I teia tuatau e maata atu te au navenave anga tukeke i te tuatau o Ioane ra, no reira i te mea e e manamanata te anoano o te mata ra i te reira tuatau, mei teaa atura tikai i teianei.

Ma te tau ra, e manganui te au mea navenave i teia tuatau ta teianei ao e oronga maira kare te reira i tarevake ia ratou uaorai. Kare e mea tarevake kia rauka tetai are maatamaata, tetai motoka manea, tetai tivi, me kare tetai terio. Kare katoa e aati ra i tetai ua atu ture a te Puka Tapu kia rave i te au terepu reka e te au orote mataora. Eaa i reira te manako i ta Ioane akamatakiteanga? Tetai mea, me riro teia au mea ei mea puapinga rava kia tatou, ka akatupu te reira i tetai vaerua karapii, te apinganui, e te parau i roto ia tatou. E te tauta anga i te angaanga kia rauka mai te moni no te oko mai ia ratou, penei na te reira e tapupu i ta tatou angaanga tavini anga kia Iehova. Pera katoa te mataoraanga i teia au mea, e kua kotingaia te taime o tetai Kerititiano, te manako anga i tana apainga no te apii i te Puka Tapu, te aravei anga i te au taeake Kerititiano no te akamori, e te tutu aere i te tuatua meitaki o te Patireia.​—Salamo 1:1-3; Mataio 24:14; 28:19, 20; Ebera 10:24, 25.

I teia tuatau apinganui, ka anoanoia te tauta pakari i te ‘tuku i to te Atua basileia na mua’ e te patoi i te ‘taangaanga anga i teianei ao ki tona ki katoa.’ (Mataio 6:33; 1 Korinetia 7:31) Ka riro te akarongo maroiroi ei tauturu. Inara na tetai inangaro tika tikai ia Iehova e to tatou tangata tupu e akamaroiroi ia tatou kia patoi i te au maunu, me akaraia kare e tarevake ana, inara ka paruru te reira ia tatou mei te ‘rave tamou i ta tatou angaanga orometua.’ (2 Timoteo 4:5, NW) Me kare teia aroa, ka kino ua atu ta tatou angaanga orometua ma te ngoie ki tetai mea rave uaia.

Te Aroa i Roto i te Putuputuanga

Kua tuatua a Iesu i te puapinga o te aroa i tona tuatua anga: “Ko te mea teia e kite ei te katoatoa e e au pipi kotou naku, me e aroa to kotou i rotopu ia kotou uaorai.” (Ioane 13:35, NW) Eaa ra te aronga pakari ka akapou maata ei i te taime no te tiakianga e te tauturuanga i te au taeake Kerititiano i te mea kare ratou e inangaro ana ia ratou? Eaa ra te putuputuanga ka akakoromaki uaʼi i te au tu apikepike o to ratou au taeake​—kapiti atu te aronga pakari—​kare mari ra ko te aroa? Te akakeu ra te aroa i te au Kerititiano kia tauturu i tetai e tetai na roto i te pae kopapa me akarongo ratou e te anoano ra tetai pae. (Angaanga 2:44, 45) I te au tuatau takinga kino anga, kua paruru te au Kerititiano i tetai e tetai pera katoa te mate anga no tetai e tetai. No teaa ra? No te aroa.​—Ioane 15:13.

I etai taime te au akapapu anga maata rava atu o te aroa kua na roto mai te reira i te au mea rikiriki. Tetai tangata pakari tei raro takere i te taomi anga no tetai rave anga angaanga teiaa, penei ka araveiia atu aia e tetai taeake Kerititiano tei taokioki ua i tetai kopekope anga tei uriuri takere raua e maata te taime. Ka tau ainei te tangata kia riri? I te mea e kare e tuku i teia kia riro mai ei akatupu i te vee anga, ka rave atu aia i teia ma te tu akakoromaki e te takinga meitaki ki tona taeake. Ka uriuri kapipiti raua i teia mea, e ka kite mai e e meitaki ake to raua oaoa anga i mua ana. (Mataio 5:23, 24; 18:15-17) Kare raua tataki tai e inangaro ua ake i ta raua tika, mari ra ka tauta katoatoa i te tatanu i te ngakau maata ta Iesu i tuatua mai, te vai papa ua anga i te akakore i to tatou au taeake e “kia itu ngauru ma itu taime.” (Mataio 18:21, 22, NW) No reira, ka tauta pakari te au Kerititiano i te akakakau ia ratou uaorai ki te aroa, “ko taua tatua apa kore ua ra ïa.”​—Kolosa 3:14.

Te Akamaataanga i to Tatou Aroa no Tetai e Tetai

Ae, ko te aroa te tumu tau ra no te tavinianga ia Iehova. Na te aroa e akaketaketa ia tatou kia vai takake mai mei teianei ao, e na te aroa e akapapu e kia vai Kerititiano tikai te putuputuanga. Koi akamamao mai ei mei te tu viviki, na te reira e tauturu i te aronga i te ngai akaaere kia kore e akangaropoina i te tu takinga meitaki e te maru te raveraveanga atu ma tetai pae. Ka tauturu te aroa ia tatou ravarai kia “akarongo i to kotou au arataki, e kauraro atu kotou.”​—Ebera 13:17.

Kua raurau te apotetoro a Petero ia tatou e “ko te aroa rai, kia maata tikaia ïa” no te mea “ka ngaro oki te apa e manganui i te aroa.” (1 Petero 4:8) Akapeea e raukaʼi ia tatou i te rave i teia? Kua angaia te tangata i te tu o te Atua e no reira e ka rauka iaia i te aroa ma te natura. Inara te tu aroa ta tatou e tuatua nei i konei te anoanoia ra tetai mea maata atu. Te tika, e ua puapinga rava te reira o to te Atua vaerua tapu. (Galatia 5:22) No reira, te tatanu i te aroa, e tau kia akatuera atu ia tatou ki te vaerua o te Atua. Akapeea? Na te apiianga i te Puka Tapu, tei akauruia e te vaerua o Iehova. (2 Timoteo 3:16) Na te pureanga no te vaerua o Iehova kia akamaroiroi mai to tatou aroa no Iehova e to tatou au taeake. E na te pirianga atu ki te putuputuanga a Iehova, te ngai e aere ua ra te vaerua ma te tapupu koreia.

Te anoano katoa ra tatou i te akara matatio ia tatou uaorai e kiteaʼi tetai ua atu angaanga aroa kore me kare au manako. Ka akamaara ana, na te ngakau e angaanga ana i te aroa, e “e pikikaa maata to te ngakau i te au mea katoa nei, e kua kino takiri.” (Ieremia 17:9) Noatu te au tauturu ravarai ta Iehova e oronga maira, i etai taime ka angaanga tatou na roto i tetai mataara aroa kore. Penei ka tuatua tatou ma te kokoi e te anoano koreia ki tetai taeake Kerititiano, me kare penei ka makitakita e te riri atu i tetai tei tuatuaia. No reira, te meitaki ra tatou i te akaoti akaou i ta Davida pure: “E unuunumou mai koe iaku, e te Atua, kia kite oki koe i toku ngakau; e timata mai iaku, e kia kite koe i toku manako. E akara mai i te aerenga kino e vai nei i roto iaku nei, e e arataki koe iaku i te arataa e tika i te vai marie anga te meitaki ra.”​—Salamo 139:23, 24.

Mei ta te Puka e tuatua ra, “kare rava te aroa e kore.” (1 Korinetia 13:8) Me taangaanga tatou i te aroa i tetai e tetai, kare rava tatou e kitea e te puapinga kore ra i te au tuatau timataanga. Te aroa te vaira i rotopu i te iti tangata o te Atua na te parataito vaerua te vaira i teia ra e akatupu ra i te reira. Ko te aronga anake ua te aroa maata tikai ra i tetai e tetai mei te ngakau ka kite ratou i te mareka anga te nooanga i roto i te ao ou. No reira, e aru i to Iehova tu na te akaarianga i teia tu aroa i reira e akaketaketaʼi i te tapeka anga o te taokotai anga. Ka tatanu ana i te aroa, e raukaʼi te taviri ki te turanga Kerititiano tikai.