Akaarianga i te Aroa ki te Aronga Tei Anoano i te Tauturu
TEI te au Kerititiano te apainga e te akameitakianga no te akaari i te tu aroa ki to ratou au taeake e te au tuaine tei anoano i te tauturu. (1 Ioane 3:17, 18) Kua tata te apotetoro Paulo: “E takinga-meitaki tatou i te tangata ravarai, kia maata atura ki to te ngutuare o te akarongo ra.” (Galatia 6:10) E taeake tei tavini ra ia Iehova vaitata e a ngauru mataiti i ou ake nei tei kite i te aroa o te akataeake anga Kerititiano i te tuatau o te maki o tana vaine e tona mate anga atu. Te tata ra aia:
“Mei te taime i toku akono anga i taku vaine i te kainga i te tuatau o tona maki, kare i rauka iaku i te angaanga moni vaitata e rua marama. Mei teaa atura toku rekareka i te anoano anga te au taeake i roto i te putuputuanga i te tauturu ia maua! E tatini ua atu au apinga aroa moni tauturu—‘ei tauturu i tetai atu au pira,’ mei ta te au kati ka aru mai e karanga ra—tei tutaki i te moni no te are, te vai e te uira, e tetai atu au pira.
“E rua epetoma i mua ake i te matenga o taku vaine, kua aere mai te akaaere kotinga i te atoro ma te akamaroiroi ia maua. Kua akaari katoa mai aia i te au tutu akaariari ta te putuputuanga ka akara i te openga o te epetoma. Kua rauka ia maua i te akarongo i te au uipaanga na runga i te terepaoni—kapiti mai te au uipaanga no te angaanga tutu aere tei raveia e te akaaere kotinga. I tetai o teia, kua rave aia i te katoatoa tei tae no te angaanga tutu aere kia karanga ‘kia orana,’ ei pupu, ki taku vaine. No reira, noatu e mamao aia i te pae kopapa, kare rava aia i manako ana e te noo ra aia koia anake ua.
“I roto i te tai ora i muri ake i tona matenga, vaitata te katoa anga o te aronga pakari i toku kainga. E tere atu i te tai anere au taeake e te au tuaine tei aere mai i tera ra anake ua. Kua mama ‘temeio’ ua mai te kai ki runga i te kaingakai no te katoatoa tei tae mai. Kare e rauka iaku i te tare i te au apinga aroa, te au tuatua tangi, te au tuatua akapumaana, e te au pure tei orongaia noku. Mei teaa atura te akamaroiroi ia ratou! I te openga kua pati au ki te au taeake kia akamutu i te oronga kai mai e te tauturu anga mai i te angaanga tama are!
“Iea ngai atu mari ra i roto i ta Iehova akaaerenga e kiteaʼi e tatou teia au tu tuatua oronga ua o te tu tangi, te akono, e te aroa? Ka rauka ua i te maata anga o te au tangata i te tare i te rima okotai te numero o te au oa tikai tei rauka ia ratou. Kua akameitaki a Iehova ia maua ma tetai pamiri maatamaata o te au taeake e te au tuaine i te pae vaerua!”—Mareko 10:29, 30.