6. (a) Eaa te aiteanga e kua ‘kakauia i te kakau teatea’ te aronga maata? (e) Akapeea e raukaʼi i te aronga maata te turanga tuatua tika ki mua ia Iehova? (ng) Eaa te maata o te akakeu anga ta te akarongo i roto i te toto akamaringiia o Karaiti ka apai mai ki te oraanga o te aronga maata?

⁶ Ta te apotetoro ko Ioane akataka anga i tana i kite te karanga ra e ko te au mema o teia aronga maata ‘kua kakauia i te kakau teatea.’ Te reira au kakau teatea te akatutu maira i to ratou turanga ma e te tuatua tika ki mua ia Iehova. Akapeea i raukaʼi ia ratou te reira turanga? Kua kite takere tatou e i roto i ta Ioane orama te tu ua ra ratou “ki mua i te Punua-mamoe.” Te kite ra ratou ia Iesu Karaiti e ko “te Punua-mamoe a te Atua tei apai ke atu i te ara a to te ao.” (Ioane 1:29) Kua akarongo a Ioane i tetai o te aronga taito ra koia oki, i roto i te orama, tei aere mai ki mua i te terono o te Atua i te akamarama anga e: “Kua orei i to ratou kakau, e kua akateatea i te toto o te Punua-mamoe ra. I noo ei ratou ki mua i te terono o te Atua ra.” (Apokalupo 7:14, 15) Ma te akatutu ua, kua orei ratou i to ratou au kakau na te taangaanga anga i te akarongo i roto i te toto akaora o Karaiti. Kare ratou i oronga i te akatika anga manako ua ki te apiianga a te Puka Tapu no runga i te oko. Te ariki anga i te reira te akakeu ra i te tu tangata i roto ia ratou; no reira, no “te ngakau oki” i taangaangaʼi ratou i te akarongo. (Roma 10:9, 10) E tupu anga maata rava ta teia ki runga i ta ratou e rave ra ki to ratou au oraanga. No te akarongo, kua akatapu ratou ia ratou uaorai kia Iehova na runga i te tumu o te atinga o Karaiti, te akatutu anga i te reira akatapu anga na roto i te taruku anga i te vai, te noo anga tikai kia rotai atu ki to ratou akatapu anga, e raukaʼi te rekareka i tetai pirianga marekaia e te Atua. Mei teaa ia akameitakianga manea​—e mea tau kia paruru meitakiia!​—2 Korinetia 5:14, 15.

“Mei Roto i te Mate Maata”

18. (a) Me tupu ana te mate maata, koai ma te ka paruruia? (e) Eaa te au akakite anga mataora te ka raveia i te reira taime?

¹⁸ Me tuku te au angera i nga matangi no te takore anga tei taikuia ia Apokalupo 7:1, kare te “au tavini [akatainuia] o to tatou Atua” e kite anake i te paruru anga aroa a Iehova ka kite katoa ra te aronga maata tei kapiti atu ia ratou i roto i te akamori anga mou. Mei tei akakiteia ki te apotetoro ko Ioane, te au tangata o te aronga maata ka “aere mai mei roto i te mate maata” ei au tangata te ka ora atu. Mei teaa ia aoa akameitaki e te akapaapaa ta ratou ka oronga i te reira taime ia ratou e tuatua ra e: “No to tatou Atua te ora, tei noo ki rungao i te terono, e no te Punua-mamoe”! E ka kapiti mai te au tavini tiratiratu katoatoa o te Atua i te rangi i to ratou au reo i te tuatuaanga e: “E tika ïa: ko te akapaatu, e te kakā, e te pakari, e te akameitaki, e te ngateitei, e te mana, e te maroiroi, ei to tatou Atua ïa, e tuatau e tuatau ua atu. Koia ïa.”​—Apokalupo 7:10-14.

19. Ka piri maroiroi atu te au tangata i ora mai i roto i teea angaanga rekareka?

¹⁹ Mei teaa ia tuatau mataora! Te au tangata katoatoa e ora ra ka riro ei au tavini no te Atua mou anake! Te rekareka anga maata rava atu o teia au mea katoatoa ko te tavinianga atu ia Iehova. E maata tikai te angaanga ka raveia​—e angaanga rekareka tikai! Ka tauiia te enua ei Parataito. E tauatini ua atu i te mirioni o te aronga mate ka akatu akaouia mai e i reira ka apiiia i to Iehova au aerenga. Mei teaa ia akameitakianga rekareka i te piri anga atu ki te reira!