6. (a) Eaa te aiteanga e kua ‘kakauia i te kakau teatea’ te aronga maata? (e) Akapeea e raukaʼi i te aronga maata te turanga tuatua tika ki mua ia Iehova? (ng) Eaa te maata o te akakeu anga ta te akarongo i roto i te toto akamaringiia o Karaiti ka apai mai ki te oraanga o te aronga maata?

⁶ Ta te apotetoro ko Ioane akataka anga i tana i kite te karanga ra e ko te au mema o teia aronga maata ‘kua kakauia i te kakau teatea.’ Te reira au kakau teatea te akatutu maira i to ratou turanga ma e te tuatua tika ki mua ia Iehova. Akapeea i raukaʼi ia ratou te reira turanga? Kua kite takere tatou e i roto i ta Ioane orama te tu ua ra ratou “ki mua i te Punua-mamoe.” Te kite ra ratou ia Iesu Karaiti e ko “te Punua-mamoe a te Atua tei apai ke atu i te ara a to te ao.” (Ioane 1:29) Kua akarongo a Ioane i tetai o te aronga taito ra koia oki, i roto i te orama, tei aere mai ki mua i te terono o te Atua i te akamarama anga e: “Kua orei i to ratou kakau, e kua akateatea i te toto o te Punua-mamoe ra. I noo ei ratou ki mua i te terono o te Atua ra.” (Apokalupo 7:14, 15) Ma te akatutu ua, kua orei ratou i to ratou au kakau na te taangaanga anga i te akarongo i roto i te toto akaora o Karaiti. Kare ratou i oronga i te akatika anga manako ua ki te apiianga a te Puka Tapu no runga i te oko. Te ariki anga i te reira te akakeu ra i te tu tangata i roto ia ratou; no reira, no “te ngakau oki” i taangaangaʼi ratou i te akarongo. (Roma 10:9, 10) E tupu anga maata rava ta teia ki runga i ta ratou e rave ra ki to ratou au oraanga. No te akarongo, kua akatapu ratou ia ratou uaorai kia Iehova na runga i te tumu o te atinga o Karaiti, te akatutu anga i te reira akatapu anga na roto i te taruku anga i te vai, te noo anga tikai kia rotai atu ki to ratou akatapu anga, e raukaʼi te rekareka i tetai pirianga marekaia e te Atua. Mei teaa ia akameitakianga manea​—e mea tau kia paruru meitakiia!​—2 Korinetia 5:14, 15.

‘Akamori i te Po e te Ao’

12. Me i te ao me kore i te po, eaa ta Iehova e kite maira i runga nei i te enua?

¹² Te oronga ra teia aronga akamori rekareka kia Iehova i te ‘akamori i te po e te ao i tona nao.’ (Apokalupo 7:15) Takapini te ao katoa, e mirioni ua atu te piri atura ki roto i teia akamori anga. Me e po i tetai au enua e te moe ra te au tangata i reira, i tetai atu au enua te iti ra te ra e te rave ua ra te Au Kite o Iehova i te akakitekiteanga. I te enua e taka ra, i te au taime ravarai i te po e te ao, te imene ra ratou i te au akapaapaa anga a Iehova. (Salamo 86:9) Inara te angaanga i te po e te ao e taikuia ra ia Apokalupo 7:15 te maata atura ia ki tetai uaorai.

13. Akapeea te au Tuatua Tapu i te akataka anga mai i te aite anga o te tavinianga “i te po e te ao”?

¹³ Te au tangata tataki tai o te aronga maata te akamori ra i te po e te ao. Ko te aite anga ainei o teia e ko ta ratou au angaanga katoatoa e rave ra te akaraia atura ei akamori anga? E tika rai noatu e eaa ta ratou e rave ra, te apii ra ratou i te rave i te reira na te mataara te ka akangateitei ia Iehova. (1 Korinetia 10:31; Kolosa 3:23) Inara, te taangaanga uaia ra te “akamori” ki te mea te o tika atura ki ta tetai akamori anga i te Atua. Te pirianga atu i roto i tetai angaanga “i te po e te ao” te akataka maira i te putuputu me kore i te tamou ua anga e pera katoa te tauta anga pakari.​—Akaaite ia Iosua 1:8; Luka 2:37; Angaanga 20:31; 2 Tesalonia 3:8.

14. Na teaa e akariro i ta tatou uaorai angaanga orometua kia tano i te akataka anga o te angaanga i te “po e te ao”?

¹⁴ Ia ratou e tavini ra i te paepae o to Iehova nao vaerua maata ra i te enua nei, te tauta ra te au tangata o te aronga maata i te piri putuputu atu e te tamou ua atu i te angaanga orometua. E manganui tei akakoro kia o atu i roto i tetai tuanga o te angaanga orometua i te au epetoma ravarai. Te akamaroiroi ra etai pae ia ratou uaorai ei au painia tamou me kore ei au painia tauturu. E putuputu te taime te rave ua ra teia aronga i te akakitekiteanga i runga i te mataara e i roto i te au toa i te popongi maiata. E raukaʼi te tauturu atu i te aronga tei inangaro, te rave ra tetai Au Kite i te au apii Puka Tapu i te roa anga po. Te akakitekite aere ra ratou i te ngai okookoanga, i te teretereanga, i te tuatau o te kaikai anga i te tuaero, e na roto i te tereponi.

15. Takake atu i te angaanga orometua, eaa te kapitiia maira ki ta tatou akamori anga?

¹⁵ Te pirianga atu ki roto i te au uipaanga putuputuanga e tuanga katoa ia no ta tatou akamori anga; mei te reira katoa te angaaanga e o atura ki te akatuanga e te akono anga i te au ngai o te akaputuputuanga Kerititiano. Te kapitiia maira te au angaanga maroiroi tei orongaia ei akamaroiroi e ei tauturu i to tatou au tungane e te au tuaine Kerititiano, i te pae vaerua e te pae kopapa, kia ora ua atu i te rave anga i te angaanga a Iehova. Te kapiti maira teia i te angaanga a to tatou au Hospital Liaison Committee (Kumiti Aravei Anga Are Maki). Te au ngai tukeke ravarai o te angaanga Betela, pera katoa te angaanga tauturu i ta tatou au uruoaanga, e au akamori anga katoatoa te reira. E tikai, me takapini to tatou oraanga i to tatou pirianga kia Iehova, te ki ra te reira i te akamori anga. Mei ta te tuatua tapu e karanga ra, te oronga ra te iti tangata o Iehova i te ‘akamori i te po e te ao,’ e te kite ra ratou i te rekareka anga maata i te raveanga i te reira.​—Angaanga 20:35; 1 Timoteo 1:11.