Kua Tae Mai “Te Ora Akautunga Anga”

KO APOKALUPO, te puka openga o te Pipiria, te akamatakite maira ia tatou ki te tika anga e te rere ra tetai angera na rotopu i te mareva ma te “evangelia mutu kore.” Te tuatua ra aia ma te reo maata: “Ka mataku i te Atua, e akakakā iaia; kua tae oki ki te ora akautunga anga nana.” (Apokalupo 14:6, 7) Te kapiti maira taua “ora akautunga anga” i nga akakiteanga e te akatupu anga o te akautunga anga tu-Atua. E poto ua te tuatau o teia “ora.” Ko te akatupu anga i te akavaanga te aere maira ei take no te “tuatau openga,” ta tatou e noo nei.​—2 Timoteo 3:1.

“Te ora akautunga anga” e tuatua meitaki ki te aronga te inangaro ra i te tuatua tika. E tuatau te reira e ka apai mai te Atua i te akamaru anga ki tona au tavini, tei tamamaeia ra i roto i nga rima o teia akatereanga o te au mea kino, aroa kore ra.

I teianei, i mua ake ka ope ei te “ora akautunga anga” i te akapouanga te akatereanga kino o te au mea nei, te raurau atu nei matou e: “Ka mataku i te Atua, e akakakā iaia.” Te rave ra ainei koe i te reira? E maata atu te kapitiia maira i te tuatua anga e, “Te irinaki nei au i te Atua.” (Mataio 7:21-23; Iakobo 2:19, 20) Ka akakeu te mataku tau i te Atua ia tatou kia tu ma te umere iaia. E mea tika ka akatupu te reira kia anga mai tatou mei te kino ra. (Maseli 8:13) E mea tika ka tauturu te reira ia tatou kia inangaro i te meitaki e kia rikarika i te kino. (Amosa 5:14, 15) Me akangateitei tatou i te Atua, ka akarongo tatou kiaia ma te akangateitei anga maata. Kare katoa tatou e akapou maata i te angaanga ki tetai ua atu au apinga i te tatau putuputu anga i tana Tuatua, te Pipiria. Ka irinaki tatou ki roto iaia i te au taime ravarai e ma to tatou ngakau katoa. (Salamo 62:8; Maseli 3:5, 6) Te aronga tei akangateitei tikai iaia ra kua kite i Tei Anga i te rangi e te enua, koia te Ngateitei i te Ao Katoa e Pini Ua Ake, e te kauraro aroa ra ratou kiaia ei Ngateitei e Pini Ua Ake no to ratou au ora. Me kite tatou e ka tau kia oronga maata atu tatou i te manako ki teia au tumu nei, e rave tatou i te reira ma te kore e taroaroa.

Te tuatau no te akatupu anga i te akavaanga ta te angera i tuatua ana kua kite katoaia e ko te “rā o Iehova.” Kua aere mai taua “rā” ki runga ia Ierusalema taito i te 607 M.T.N. no te mea kare tona au tangata i akarongo ana ki ta Iehova au akamatakite anga na roto i tana au peroveta. Na te taroaroa anga i to Iehova ra ra i roto i to ratou uaorai au manako, te takino ua atura ratou i to ratou au oraanga. Kua akamatakite ana a Iehova kia ratou e: “Kua vaitata, e te rapurapu roa maira.” (Zephania 1:14) Kua aere mai tetai atu “rā o Iehova” ki runga ia Babulonia taito i te 539 M.T.N. (Isaia 13:1, 6) Kua irinaki ki roto i tona au punanga e i tona au atua, kare to Babulonia i akarongo ana ki te au akamatakite anga tei orongaia atu e te au peroveta a Iehova. Inara i te po okotai ra, kua inga a Babulonia kia Madai raua ko Peresia.

Eaa ta tatou e aro ra i teia tuatau? Ko tetai ake ra te itae mamao atura i te “ra o Iehova.” (2 Petero 3:11-14, NW) Kua akakiteia mai te akavaanga tu-Atua ki runga ia “Babulonia Maata.” Kia tau kia Apokalupo 14:8, te akakite maira tetai angera e: “Kua inga taua oire maata ra, ko Babulonia.” Kua tupu takere te reira. Kare e rauka akaou iaia i te tapu i te aronga akamori o Iehova. Kua akatuera ateaia tona uaorai kino e te piri atu anga ki roto i te tamaki. I teianei te vaitata maira tona akapouanga openga. No taua tumu ra, te raurau maira te Pipiria i te au tangata i te au ngai ravarai e: “Ka aere ke mai ana kotou ki vao [ia Babulonia Maata] . . . kia kore kotou e riro ei rave katoa i tana ra au ara, kia kore kotou e mate katoa i tona ra au mate. Kua taea oki te rangi i tana au ara, e kua manako te Atua i tana au tuatua-tika kore.”​—Apokalupo 18:4, 5.

Eaa oki a Babulonia Maata? E akatereanga i te ao katoa te reira no te akonoanga te akairo ra i te au tu o Babulonia taito. (Apokalupo, pene 17, 18) E akamanako ana i etai au tu aiteite:

• Kua piri oonu atu te au orometua o Babulonia taito ki roto i te au angaanga poritiki a te pa enua. Te tika ra te reira ki te maata anga o te akonoanga i teia tuatau.

• Kua akatupu putuputu te au orometua o Babulonia i te ravenga tamaki enua. Ko te au akonoanga i teia tuatau tei te ngai mua i te akameitaki putuputu anga i te au vaeau te aere atu anga te pa enua ki te tamaki.

• Kua taki atu te au apiianga e te au ravenga a Babulonia taito i te pa enua ki roto i te ravenga tau kore kino tikai. Me patoi te aronga arataki akonoanga i te turanga no te tu akono tau o te Pipiria ra, e maata ua atu te tu akono tau kore i rotopu i te orometua e te aronga aere pure. Tei kite meitaki katoaia ko te tika anga e te akaturi ra a Babulonia Maata iaia uaorai ki teia ao e to te reira au akatereanga o te au mea ra, te akataka maira a Apokalupo iaia ra e ei vaine akaturi.

• Te karanga katoa maira te Pipiria e te noo ra a Babulonia Maata i roto i “te akatietie maata.” I Babulonia taito ra, kua rauka i te akaaerenga iero te au potonga enua mamaata, e kua riro mai te au orometua ei aronga rongonui i roto i te au angaanga okooko anga. I teia tuatau, kapiti atura ki te au ngai no te akamori anga, e maata ua atu te au potonga enua pitiniti okooko a Babulonia Maata. Te oronga maira tana au apiianga e tana au orote i te au apinganui maata kiaia e ki tetai ke i roto i te ao pitiniti.

• Te taangaanga anga i te au tiki, te manamana, e te au purepure e mea matauia i Babulonia taito, mei te au ngai e manganui i teia tuatau. Ko te mate te manakoia ra e ko tetai aere anga ki tetai ua atu tu oraanga. Kua akakiia a Babulonia ma te au iero e te au are pure ei akangateitei anga i to te reira au atua, inara kua patoi te au Babulonia i te aronga akamori o Iehova. Ko taua au irinaki anga e te au angaanga te akataka maira ia Babulonia Maata.

I te au tuatau taito, na Iehova i akakeu i te poritiki ririnui e te au pa enua vaeau kia akautunga i te aronga tei patoi pakari maira iaia e tona ra anoano. No reira kua takoreia a Samaria e te au Asura i te 740 M.T.N. kua akataneaia a Ierusalema e te au Babulonia i te 607 M.T.N. e na te au Roma i te 70 T.N. Ko tei riro mai, kua autuia a Babulonia, e to Madai e to Peresia i te 539 M.T.N. No to tatou tuatau, te akakite maira te Pipiria e ka taanga te au kavamani poritiki, mei te puaka taae rai ki runga i te “vaine akaturi” e ka akaviivii iaia, i te akaari mai anga i tona tu tikai. Ka takore takiri ratou iaia.​—Apokalupo 17:16.

Ka rave ainei tikai te au kavamani o teianei ao i taua apinga ra? Te akakite maira te Pipiria e ka ‘tuku te Atua i te manako ki roto i to ratou ngakau.’ (Apokalupo 17:17) Ka tupu viviki ua te reira, ma te umere, e te poitirere, kare e kiteaia me kore kare e aere marie ua mai.

Eaa te angaanga te anoanoia ra kia rave koe? E ui kia koe uaorai: ‘Te mou ua ra rai ainei au ki tetai akaaerenga akonoanga tei taviiviiia e te au apiianga e te au ravenga te akairo ra i te reira ei tuanga ia no Babulonia Maata?’ Noatu e kare koe e mema, penei e ui koe kia koe uaorai e: ‘Kua akatika ainei au i te reira vaerua kia akakeu mai iaku nei?’ E tu vaerua aa? Ko tetai vaerua te akatika ua ra i te au tu akono tau kore, te inangaro ra i te au apinga materia e te au mea e navenave ei ra kare e kia aroa atu i te Atua, me kare te manako kore ma te akakoro ra (noatu i roto i te au mea akara anga meangiti ua) i te Tuatua a Iehova. E akamanako meitaki i taau ra pau anga.

Kia rauka ia tatou to Iehova mareka anga, e mea puapinga tikai kia oronga tatou i roto i ta tatou au angaanga e i roto i te au anoano o to tatou ngakau, i te akapapu anga e kare tikai tatou ei tuanga no Babulonia Maata. Kare e taime no te taroaroa. I te akamatakite anga mai ia tatou e te vaitata maira te openga, te akakite maira te Pipiria e: “Mei te reira katoa te oire maata ra ko Babulonia i te uri takiri angaia ki raro, e e kore rava e kitea akaouia atu.”​—Apokalupo 18:21.

Inara e maata ua atu te vaira. I tetai ake tu o taua “ora akautunga anga,” ka akava te Atua ko Iehova i te akatereanga poritiki o te ao, to te reira au tutara, e te aronga katoatoa tei patoi i tona tutara tikai na roto i tona Patireia i te rangi ra i roto i nga rima o Iesu Karaiti. (Apokalupo 13:1, 2; 19:19-21) Te orama totouia tei tataia i roto ia Daniela 2:20-45 te akatutu maira i te tutara poritiki mei te tuatau taito i Babulonia ki teia tuatau ei tiki maata tei maaniia ma te auro, te ario, te veo, te auri, e te karakaraea. No runga i to tatou tuatau, te akakite maira te totou e: “E akatupu ei te Atua no te rangi i tetai basileia, te ka kore rava e akakoreia e tuatau ua atu.” E no runga i ta te Patireia ka rave i te “ora akautunga anga” o Iehova, te akakite maira te Pipiria e: “E riro na te reira e akapueurikiriki e e akapou i taua au basileia [tei maaniia e te tangata] katoa ra, e ka vai rai te reira e tuatau ua atu.”​—Daniela 2:44.

Te akamatakite maira te Pipiria ki te aronga akamori mou i te inangaro anga i “te au mea ravarai o teianei ao”​—te tu o te oraanga tei akatupuia mai e teianei ao te takake maira mei te Atua mou. (1 Ioane 2:15-17) Te akaari maira ainei taau au ikianga e te au angaanga e te ariki tikai ra koe i te Patireia o te Atua? Te tuku tikai ra ainei koe i te reira ko te mea mua i roto i toou oraanga?​—Mataio 6:33; Ioane 17:16, 17.

[Pia i te kapi 14]

Aea te Openga e Tae Mai Ei?

“I te ora kare kotou e manako atu na, ka tae mai ia te Tamaiti a te tangata.”​—Mataio 24:44, NW.

“Kia matakite ia kotou, kare kotou i kite i te rā, e te ora.”​—Mataio 25:13.

“E kare e tavarevare.”​—Habakuka 2:3.

[Pia i te kapi 14]

Ka Riro Ainei ei Tukeanga me kua Kite oki Koe?

Me kua kite papu tikai koe e kare e tae vave mai te akautungaanga te vaitata maira no te akavaanga tu-Atua no tetai au mataiti ra, ka taui ainei te reira i te tu e taangaanga ra koe i toou oraanga? Me kua roroa te tae anga mai o te openga o teia akatereanga o te au mea taito i taau i tapapa ana, kua akatika ainei koe i teia kia akamarie mai ia koe i roto i ta Iehova angaanga ra?​—Ebera 10:36-38.

No te mea e kare tatou i kite i te ora tikai ra te orongaia maira te tuatau kia tatou kia akaari e te tavini ra tatou i te Atua ma te au akakeuanga ma. Ko te aronga tei kite ia Iehova te kite ra e ko tetai akaari anga maroiroi i te openga tikai ra kare ia e akamareka i te Atua, ko tei kite maira e eaa to roto i te ngakau.​—Ieremia 17:10; Ebera 4:13.

No te aronga tei aroa tika tikai ia Iehova ra, koia te mea mua. Mei tetai au tangata, penei te rave ra te au Kerititiano mou i te angaanga. Inara, to ratou akakoroanga, kare kia apinganuiia, mari ra kia rava ua te au apinga materia e tetai manga ua no te oronga atu ki tetai ke. (Ephesia 4:28; 1 Timoteo 6:7-12) Kua rekareka katoa ratou i te tarekarekaanga tau e tetai tauianga i te aereanga, inara to ratou anoano koia oki kia akaoraoraia, kare e kia rave ua i ta te katoatoa e rave ra. (Mareko 6:31; Roma 12:2) Mei ia Iesu Karaiti rai, te rekareka ra ratou i te rave i to te Atua ra anoano.​—Salamo 37:4; 40:8.

Te inangaro ra te au Kerititiano mou kia ora e kia tavini ia Iehova e tuatau ua atu. Kare i meangiti mai taua manakonakoanga no te mea ka tatari ra ratou no tetai au akameitaki anga no tetai tuatau roroa ake i ta tetai i tapapa atu ana.

[Pia/Tutu i te kapi 15]

Te Maroanga no te Tu Ngateitei

Kia marama ra e eaa te Atua i tuku ua ai i te mamae maata, te anoanoia ra tatou kia marama i te maroanga no te tu ngateitei. Eaa ra te tu ngateitei? E turanga ngateitei te reira no te mana taoonga.

No te mea ko Iehova Tei Anga ra, tei iaia te tika anga kia tutara ki runga ake i te enua e i te katoatoa te noo ra i runga i reira. Inara, te akataka maira te Pipiria, e i te akamata anga o te tuatua enua o te tangata, kua akaaoia to Iehova tu ngateitei. Kua akaapa a Satani te Tiaporo e e maata roa ta Iehova kotinga anga, e kua pikikaa Aia ki to tatou nga metua mua e eaa te ka tupu me kare raua e akarongo ki ta te Atua ture e te rave anga i te au mea i to raua uaorai aerenga, e e meitaki ake tikai me akaaere raua ia raua uaorai me takake mai mei te Atua ra.​—Genese, pene 2, 3.

Naringa te Atua i takore takiri atu i te au meameaau ra, te akaari maira te reira i tona mana, inara kare te reira e akatikatika i te au maroanga tei akatupuia mai. Kare i takore vivikiia atu te au meameaau ra, kua akatika a Iehova i te au mea kite katoatoa tei angaia kia kite i te tupuanga no te meameaauanga. Noatu e te kapiti maira te mamae i roto i teia, kua rauka katoa te reira kia orongaia mai te tuatau kia anauia mai tatou.

Pera katoa, mei te maata i te tutaki kiaia uaorai, kua oronga aroa mai a Iehova i te au akanoonooanga e ko te au tangata te akarongo ra kiaia e te akono ra i te akarongo na roto i te atinga oko o tana Tamaiti ka akarangatiraia mai mei te ara e te au tupuanga o te reira e ka noo i roto i te Parataito. Me ka anoanoia, ka rauka teia na roto i te ravenga o tetai akatuakaou anga mei te mate mai.

Te akatika anga i te tuatau no te akanoo anga i te maroanga kua oronga katoaia te tuatau ki te au tavini o te Atua kia akaari e te rauka ra ia ratou te ariu atu ki to te Atua aroa e te akapapu anga i to ratou tiratiratu kia Iehova i raro ake i te au turanga katoa. Te akanoo anga i te maroanga o te tu ngateitei tu-Atua, pera katoa te au maroanga te piri atura ki te tiratiratu o te tangata, e mea puapinga maataia e rauka ai no te akapapu i te akangateitei tau no te ture i te ao katoa e pini ua ake. Me kare te reira, kare rava te au tika tikai e rauka.a

[Tataanga i Raro Ake]

[Tutu i te kapi 15]

Ka akaopeia te akatereanga i te ao katoa o te tutaraanga poritiki