Au Uianga a te Aronga Tatau
Eaa “te tamaki . . . o te Atua mana katoatoa ra” i Aramagido, e eaa te ka tupu?—Apokalupo 16:14, 16.
Te pauanga mama ua, te tamaki o Aramakito e tamakianga te reira no te tuatau ki mua te ka takapini i te ao katoa, e ka takore to Iehova Ariki akatainuia, ko Iesu Karaiti, i te au enemi o te Atua. Te akamarama maira te Pipiria e kua taokotaiia teia au enemi ra, “te ui ariki o te ao katoa nei,” e te au tuatua akauruia a te au temoni e kua akaputuputuia ratou ki “te tamaki i taua rā maata o te Atua mana katoatoa ra. . . . i tetai ngai, ko Aramagido te ingoa i te tuatua Ebera.”—Apokalupo 16:14, 16.
Te ngai e akaputuputu ra te au pupu tamaki, kare te reira i te ngai tikai. Te ingoa Aramakito, tei uriia i roto i tetai au urianga Pipiria e ko “Aramagido,” tona aiteanga te “Maunga o Megido.” (Apokalupo 16:16, tataanga i raro, NW) Kare e maunga i kiteaia ana te akairo ra i te reira ingoa. Pera katoa, kare e rauka i “te au ariki o te ao nei, e to ratou au nuku tamaki” i te akaputuputu mai tikai i roto e tai ngai okotai. (Apokalupo 19:19) Mari ra, te taiku ra te “ngai” ki tetai turanga e aratakiia ra te au tutara poritiki o te ao nei e to ratou aronga turuturu—tetai turanga te patoi ra ia Iehova e “te au nuku o te rangi ra” i raro ake i te mana vaeau o te “Ariki o te au ariki, e e Atu o te au atu ra,” ko Iesu Karaiti.—Apokalupo 19:14, 16.
Ei mea puapinga maata rava, te tuatua “Aramagido” te piri atura ki te oire o Iseraela taito ko Megido. Kua akanoo meitakiia ki te tua itinga o te Maunga Karamela, ko Megido te ngai okookoanga maata e ko te ngai katoa e na roto mai ana te au vaeau i te aere mai anga, i te reira tuatau. Ko te ngai katoa te reira e autuia ana te au tamakianga. Ei akaraanga, i “te pae o te vai ra ko Megido” i autu atu ei te Akava Iseraela ko Baraka i tetai pupu vaeau Kanaana ririnui tei aratakiia e te Tianara ko Sisera. (Te Au Akava 4:12-24; 5:19, 20) I roto i te reira ngai katoa, kua autu te Akava ko Gideona i te au Midiana. (Te Au Akava 7:1-22) Na te akapiri atu anga ia Megido ki te tamakianga e aere maira, te akapapu maira te Pipiria kia tatou e, na roto i tana Tamaiti, ka autu takiri te Atua i te au pupu vaeau patoitoi katoatoa.
Eaa te ka tupu? Ka takore takiri te tamaki o Aramakito i te au pikikaa e te au kino katoatoa i te enua nei. Ka akatuera te reira i te mataara no tetai tuatau kaka rava roa atu i roto i te tuatua enua katoatoa o te tangata ravarai. (Apokalupo 21:1-4) I raro ake i te aratakianga a te Patireia o te Atua, ka tauiia te enua ei parataito e ka noo te aronga tuatua tika e tuatau ua atu.—Salamo 37:29.