Kia Rauka te Katoa Anga o te Tuatua Mou!
“KARE rava au i kite ana i tena ingoa ki roto i taku Puka Tapu,” i tuatua atu ei a Francisco. I te aere anga mai te ingoa o Iehova ki roto i tetai uriuri anga ma tetai o te au Kite o Iehova. E tika, e kare aia i kite ana i te ingoa tapu i roto i tana Puka Tapu, te tataanga 1969 o te reo Poriki Almeida. Kare te ingoa o Iehova i roto i reira. Ei Katorika Paratiri e aere putuputu ana a Francisco ki te Pure i te au Tapati e te mataora ra i te tatau i te Puka Tapu i tona kainga. Inara kua umere tikai aia i te ingoa o Iehova.
Koai te Atua?
Tera mai epetoma, kua apai mai te Kite i tetai tataanga akaou o te reo Almeida. Kua akaaite raua i te nga tataanga e rua ia Salamo 83:18. E eaa ta raua i kite? I roto i te tataanga 1966, te tatau ra te reira irava: “Ko koe, tei ia koe anake ua te ingoa IEHOVA, tei Teitei Rava i te enua nei”! Inara, i te tataanga 1969, kare a “IEHOVA” mari ra ko te tuatua “ATU” to reira. “Akara koe, kua taui ratou i tetai apinga i konei,” i tuatuaʼi te Kite, e kua ui atu: “Kare rava te ‘Atu’ i te ingoa, ine rai?” “Kare,” i na Francisco ei. Akamea riri atura, kua tuatua atu aia: “Akapeea ratou i te rave anga i te reira?”
Kua akatuera teia i te mataara no tetai kimikimi anga meangiti no runga i to te Atua ingoa. Ei akaraanga, kua apii ana a Francisco tei tau ki The Catholic Encyclopedia (1910), ko Iehova “te ingoa tikai o te Atua i roto i te Koreromotu Taito.” Kua apii katoa mai aia e i roto i te reo Epera, koia oki i tataiaʼi te katoa anga o te “Koreromotu Taito,” te taikuia ra te reira ingoa e 7,000 taime. Kare o tetai tangata uri reo tika anga kia taui i te ingoa tikai o Iehova ki te taoonga ope kore ko te Atu. Kua inangaro a Francisco i te tuatua mou no runga i te ingoa o Iehova, e kua rauka iaia te reira mei roto uaorai i te Puka Tapu e na roto i te kimikimi anga tei aratakiia mai ma te tau.
Eaa to Iesu Turanga?
Mei tei akakiteia atu i te atikara i mua ake, kua taviiviiia te manganui o te au tuatua mou e te au akonoanga o teianei ao. Ei akaraanga, na roto i ta ratou angaanga tutu aere i tera are i tera are, e tuatau to te au Kite o Iehova te kite e eaa ta te tangata e irinaki ra. E tika, e tuke rai teia i tetai au ngai, inara te vaira etai au tu aitete. Ei akaraanga, me uiia atu, ‘Koai te Atua?’ ka tuatua etai aronga noo kainga, ko ‘Iesu.’ I teia te tuatua ra ratou e ko Iesu te Atua Mana Ririnui. Inara te komono ra ainei teia manako i te tuatua mou?
E tamanako ana i te au mea ka aru mai. Kua pure a Iesu ki tona Metua: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Te kite ra ainei koe e kare a Iesu i tuatua iaia uaorai mari ra ki tona Metua i te rangi e ko te “Atua mou ra”? No reira, kua tika ta Iesu au pipi mua tuatua anga kiaia: “Ko te Tamaiti tikai koe a te Atua.” Kua tuatua uaorai a Iesu e: “Ko te Tamaiti au na te Atua.” No reira, te tika anga tikai, kare a Iesu i te Atua Mana Ririnui, mari ra koia te Tamaiti a te Atua ko Iehova.—Mataio 14:33; Ioane 10:36.
Eaa Tei Tamanakoia no te Enua?
Akapeea i reira tei tamanakoia no teia uki e te enua? Kua karanga te peretiteni tei mate ra o te au Tuanga Enua Taokotaiia ko John F. Kennedy, i tana tuatua ki te UN General Assembly (Akaputuputuanga Matauia a te au Enua Taokotaiia): “Tei ia matou te mana no te maani e ko teia te uki meitaki rava atu o te tangata i roto i te tuatua enua o teianei ao—me kore te maani i te reira e ko te openga.” Te akaraanga te manako pera ra rai te au arataki o teianei ao i teia tuatau. Ta te au Kite o Iehova e akarongo putuputu ana i ta ratou angaanga tutu aere e, i te openga o teianei ao, ka takoreia te paraneta Enua e te ai me kore e te tamaki nukuria. Ei turu i teia irinaki anga, te tou ra etai pae kia Apokalupo 21:1, te karanga ra: “E kite atura au i te rangi ou e te enua ou, kua kore oki tei muatangana rangi e tei muatangana enua; e kare rava atura e tai.”
Te taangaanga maata ra te Puka Tapu i te tuatua “enua” na te tu akatutuia, ki te au tangata nei. Te kiteia ra tetai akaraanga ia Genese 11:1, te karanga ra: “Okotai ua oki o to te ao katoa nei reo, okotai oki tuatua.” (Akara katoa ia 1 Ariki 2:1, 2; Salamo 96:1) Ia Apokalupo 21:1, te tau ra “tei muatangana enua” ki te totaiete tangata te ka takoreia, kare ki te paraneta. Ka akatuera teia i te mataara no te akaoki akaou anga mai i te Parataito ki te enua nei. (Luka 23:43; 2 Tesalonia 1:6-9; Apokalupo 21:4) E te akatika ra teia ki te toenga o te Puka Tapu, te akakite ra e kare rava te enua ua nei e takoreia. Ei akaraanga, ia Salamo 104:5 te akakite ra i te Atua tei “akamou i te tumu o te enua, kia kore roa e ngaueue e tuatau ua atu.” (Akaaiteia atu kia Koheleta 1:4.) E tikai, a Iehova i ‘anga i te enua kia tangataia’ kare e openga.—Isaia 45:18.
Eaa ra Kia Rauka te Katoa Anga o te Tuatua Mou?
E au akaraanga to mua ake nei no te au manako tarevake tei matauia i teia tuatau. Tera ua, me te anoano ra tetai tangata i te kainga i te uriuri ma te akarongo, mei ia Francisco rai, ka rekareka te au Kite o Iehova mei te mea ra kua tuera te mataara no tetai uriuri anga akamarama anga i te au tuatua mou o te Tuatua Tapu.
Penei ka arataki tei kore e rauka te katoa anga o te tuatua mou ki te au turanga tau kore. Ei akatutu: Ia Iesu i runga i te enua nei, e manganui tei aruaruia kia irinaki e e tamaiti ua aia na Maria e Iosepha, e tangata kamuta i mua ana no Nazareta mai. I reira, kare rava ratou i akarongo atu ana kiaia. I tetai ngai, te tika ua ra ta ratou. E tamaiti a Iesu na Maria, tei toia e te vaerua tapu. E tamaiti angai aia na Iosepha, e kua angaanga ana rai aia ei kamuta. (Mareko 6:3) Tera ra, ko te reira ainei te katoa anga o te tuatua mou no runga iaia? Kare! Koia te Mesia e te “Ariki o te au ariki ra” tei tamanakoia. (Apokalupo 17:14; Luka 1:32-35; Angaanga 2:36) Ma te kore e rauka te katoa anga o te tuatua mou no runga ia Iesu kua arataki te reira i te manganui o te au tangata kia ngere i te tuatau kare e rave akaouia—te mataora i te pirianga taeake kia Iesu uaorai i te enua nei.
E Kimi i te Katoa Anga o te Tuatua Mou
Te oire o Berea tei (kapikiia i teianei ko Véroia) i Makedonia i taito ra, kua kite maataia e e aronga tatau Puka Tapu i te tu akameitakiia o te au tangata i te anere mataiti mua ra. Eaa te reira tu? Te tuatua ra te papaanga e kua: “Āriki ua oki ratou i te tuatua [tei tutu aereia e te apotetoro ko Paulo] ma te ngakau maora, e te kimi anga i te tuatua i tataia ra, i te tau anga oki i taua tuatua ra.” Tei tupu? “E aronga maata maira to ratou i akarongo; e te au vaine Eleni taoiau ra, ma te tane katoa, kare e tokoiti.”—Angaanga 17:11, 12.
Kare i meangiti mai te akapaapaanga tei tau i te tu o te au peroveta i taito ra a te Atua. Kua rave i te “uiui, e kua kimi pu tikai” i te akaora anga te ka na roto mai i te Mesia. (1 Petero 1:10) Kua akameitaki te Atua i to ratou tauta anga. Te tika i reira e, kare rava i tapotoia. Ma te aruaru i te kimi e te akara oonu anga i te au apiianga—ko teia te mataara kia rauka te katoa anga o te tuatua mou mei te Puka Tapu!
Penei ka tamanako koe e, ‘Ka akamata au kiea?’ I muri ake i te tatauanga i etai au puka Kerititiano, kua tata tetai vaine te noo ra ki Paratiri: “Kare i roa ana kua kite mai maua [vaine e te tane], e ka anoano maataia ra maua no te reira tu kite, kia rauka te au pauanga manganui no ta maua au uianga . . . Akapeea ine, e raukaʼi iaku tetai Puka Tapu e tetai atu au puka te ka tauturu iaku kia kite maata atu i to tatou Metua i te rangi?” Tei runga aia i te ara tau: te tatauanga i te Puka Tapu ma te au puka Puka Tapu tuatua mou. Me ka inangaro rai koe i te katoa anga o te tuatua mou, e akatuera i toou ngakau ki te Atua ko Iehova e e pati i te tauturu kiaia. E akara i teia au tuatua akamaroiroi ine: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana. E pati ra aia ma te akarongo, e te ekoko kore.”—Iakobo 1:5, 6.
Te uriuri ra e mirioni ua atu au tangata i te Puka Tapu ki te au Kite o Iehova, te uiui anga ma te aruaru e te kimi marie anga i te tuatua mou. Te aiteanga o te apai anga e te taangaanga anga i teia kite tika tikai i te Atua mou ra e Iesu Mesia ka rauka te oraanga mutu kore. (Ioane 17:3) Ka riro te reira ei akameitakianga maata me kimi koe ma te aruaru e kia rauka te katoa anga o te tuatua mou.
[Tutu i te kapi 7]
Te katoa anga o te tuatua mou no runga ia Iesu tera ra koia oki te Mesia, kare no te kamuta ua