Puapingaanga Mei “te Kai no te Au Rangi”

I MURI poto ua ake i te akaora temeio anga ia ratou mei Aiphiti, kua akaari to Iseraela i te ngere anga i te akarongo i roto i to ratou Akaora, koia a Iehova. Tei tupu, kua tuku a Iehova e kia ori aere ratou ki roto i te metepara o Sinai e 40 mataiti. I te reira au taime, kua kai e kua inu to Iseraela e te “katoa e manganui” o te au tangata ke ke tei piri atu kia ratou ma te “merengo tikai.” (Exodo 12:37, 38) Te akakite maira a Salamo 78:23-25 kia tatou e akapeea teia i te rauka anga: “Kua akaueia ra e ia [Iehova] te au tumurangi i runga ra, e kua kiritia e ia te au ngutupa o te rangi ra: E kua akatopa ua maira i te māna ki runga ia ratou ei kai; e te kai no te au rangi ra tei orongaia mai e ia na ratou: Kua kai te tangata katoa i te kai a te aronga mana; kua tuku maira aia i te kai na ratou e kia merengo tikai.”

E ko tetai tei kai i te mana, kua akataka mai a Mose i teia kai umere tikai. Kua tata aia i te popongi, i muri ake “e peke akera taua au i topa ra, i na, e mea rikiriki punupunu, tei raro i te one i taua medebara ra, e mea rikiriki mei te topata au te tu. E kite akera te tamariki a Iseraela i taua mea ra, tuatua akera ratou ki ratou uaorai, Eaa teia?” me kare i te reo Epera tikai, “man huʼ?” Penei ko teia tuatua te akamata anga o te tuatua “manā,” te ingoa ta te au Iseraela i tapa no te kai. Kua tuatua a Mose: “E teatea, mei te ua korio te tu; e mei te uefa meli ra kia kai.”​—Exodo 16:13-15, 31, tataanga i raro akaaite ki te NW.

Kare te mana i tetai kai natura ra, i taumaro ei tetai. Kua o te mana ririnui ki roto i tona oronga angaia mai. Ei akaraanga, kare tona rauka anga i kotingaia ki tetai ngai me kare tuatau. Me akatoeia i te po, ka ki te reira i te toke e ka aunga; inara, ko te tuanga taki rua ta te pamiri tataki tai i akaputu i te ra i mua ake i te Tapati kare i kino i te po, ka raukai i te kai i te Tapati​—i te ra kare e mana. Papu rai, e apinga oronga temeioia mai te mana.​—Exodo 16:19-30.

I te taiku anga o te “aronga mana,” me kare “au angera,” i roto ia Salamo 78 te taiku maira penei e kua taangaanga a Iehova i te au angera kia oronga mai i te mana. (Salamo 78:25, tataanga i raro akaaite ki te NW.) Noatu e eaa te tu, e tumu meitaki to te tangata no te akameitaki i te Atua no tona tu takinga meitaki. Inara, kua akaari te maata anga i te tu mareka kore ki Tei akaora mai ia ratou mei te tuikaa i Aiphiti. Penei ka manako kore rai tatou i ta Iehova apinga oronga me kare ka mareka kore me kore tatou e maaraara i tona tu takinga meitaki. No reira kia akameitaki tatou e kua kapiti mai a Iehova i te tataanga no runga i to Iseraela akaora angaia e tetai atu au tupuanga “kia kite tatou.”​—Roma 15:4.

E Apiianga no Iseraela Kua Akapuapinga i te Au Kerititiano

I te oronga anga mai a Iehova i te mana, e maata atu tana i manako i te akamerengo ua anga i te au anoano i te pae kopapa no etai toru mirioni Iseraela. Kua inangaro aia i te ‘taakaaka ia ratou, e ei timata anga ia ratou’ kia akatikatika e kia ako ia ratou no to ratou uaorai puapinga. (Deuteronomi 8:16; Isaia 48:17) Me ariu mai ratou ki te akatikatika anga e te ako anga, ka rekareka a Iehova e ‘kia meitaki ratou iaia a muri atu’ na te oronga anga kia ratou i te au, te meitaki, e te mataora i te Enua Taputouia.

Ko tetai apinga puapinga tei anoanoia ratou kia kite koia oki “e kare o te areto anake ra te mea e oraʼi te tangata nei, ko te au mea katoa ra no roto mai i te vaa o Iehova ra, e ora te tangata i te reira.” (Deuteronomi 8:3) Naringa kare te Atua i oronga mai i te mana, ka mate te tangata i te pongi​—kua aaki ua ratou i te reira. (Exodo 16:3, 4) Kua akamaaraia i te au ra te au Iseraela ariki ua no to ratou irinaki ua anga ki runga ia Iehova e no reira kua akaaka ua. I te taime i roto i te Enua Taputou ma te maata i te au apinga, kare ratou e akangaropoina ia Iehova e to ratou irinaki anga ki runga iaia.

Mei te au Iseraela, kia manako ua rai te au Kerititiano no to ratou irinaki anga ki runga i te Atua e raukai te au apinga i te pae oraanga​—pae kopapa e te pae vaerua. (Mataio 5:3; 6:31-33) I te pau anga i tetai o te au timata anga a te Tiaporo, kua taiku a Iesu Karaiti i te au tuatua a Mose ka kiteia i roto ia Deuteronomi 8:3, te na ko ra: “Kua tataia, ‘Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.’” (Mataio 4:4) Ae, te utuutu meitakiia ra te aronga akamori mou o te Atua na te tatau anga i te au tuatua a Iehova kiteia i roto i tana Tuatua. Pera katoa, ka akaketaketaia to ratou akarongo me kite ratou i te au tupu anga puapinga o teia au tuatua i roto i to ratou au oraanga ia ratou e aaere ra ma te Atua e te tuku anga i tona au anoano Patireia i te ngai mua.

Ka ngaro katoa i te au tangata apa kore to ratou tu ariki anga no te au apinga kua riro ei tuanga no to ratou oraanga​—noatu e e akaata anga teia au apinga no te manako aroa o Iehova. Ei akaraanga, te au oronga anga umere o te mana kua akapoitirere e kua akamerengo i to Iseraela i te akamata anga, inara kare i roa ana e manganui tei koumuumu. “Kua iu matou i teianei kai māmā ua,” kua kopekope ngateitei kore ratou​—e akakite anga e te akamata ra ratou i te “akaruke anga i te Atua ora.” (Numero 11:6; 21:5; Ebera 3:12) No reira, ko to ratou akaraanga, kua riro ei “ako mai oki ia tatou, i te aronga i rokoia mai i te openga o te au tuatau nei.”​—1 Korinetia 10:11.

Akapeea tatou me akono i teia akaraanga akamatakite anga? Ko tetai mataara koia oki auraka e tuku i te au apii anga Pipiria me kare te au apinga te rauka ra ia tatou na roto i te pupu tavini akono meitaki e te pakari kia riro mai ei apinga ua, me kare ei mea matauia. (Mataio 24:45) Me akamata tatou i te manako kore no runga i ta Iehova au apinga me kare ka maromaroa i te reira, ka akamata to tatou pirianga kiaia i te anuanu.

No te tumu meitaki, kare a Iehova i akapuke mai ia tatou ma te au apinga ou reka tikai e ma te putuputu. Mari ra, te oronga marie maira aia i te marama maata no runga i tana Tuatua, te tere meitaki ra. (Maseli 4:18) Ka akatika teia i tona iti tangata kia apai e kia taangaanga i te au apinga ta ratou e apii ra. Kua aru a Iesu i te akaraanga a tona Metua i te apii anga i tana au pipi mua. Kua akamarama aia i te Tuatua a te Atua kia ratou “i tei tau ia ratou kia akarongo,” me kare “kia marama,” tei tataia e tetai atu au urianga.​—Mareko 4:33; akaaite ia Ioane 16:12.

Akaketaketa i Toou Ariki Anga i te Au Apinga a te Atua

Kua taangaanga katoa a Iesu i te ripiti anga. E tikai, ko te manako, penei ka marama ua i tetai tumu manako​—e kaveinga Pipiria, ei akaraanga​—inara te tuku anga ki te ngakau e te akariro anga i te reira ei tuanga na te Kerititiano “akatangata ou” penei ka roa, i te mea tikai te oonu ra te au tu i te ao taito e te au tu kino. (Ephesia 4:22-24) Ko te reira te turanga ki te au pipi a Iesu i te taeanga mai ki te autu anga i te ngakau parau e te akatupu anga i te tu akaaka. Kua apii atu a Iesu kia ratou no runga i te tu akaaka e maata te taime, i te au taime tataki tai te oronga maira i te tumu ngoie mei tetai akaraanga tuke e oonu atu ei te reira, i te openga ra kua pera.​—Mataio 18:1-4; 23:11, 12; Luka 14:7-11; Ioane 13:5, 12-17.

I teia tuatau, te aru ra te au uipaanga Kerititiano e te au puka Punanga Tiaki i te akaraanga a Iesu na roto i te ripiti anga manako meitakiia. No reira kia ariki tatou i teia ei akakite anga i to te Atua manako anga ia tatou e auraka rava e taitaia i tei rauka ia tatou, mei to Iseraela tei taitaia ra i te mana. E tikai, ia tatou e taangaanga marie ra ia tatou uaorai kia akono i te au akamaara anga putuputu a Iehova, ka kite tatou i te au ua meitaki i to tatou au oraanga. (2 Petero 3:1) Te akaari maira taua tu ariki tikai e te “kite akera” tatou i te Tuatua a te Atua i to tatou ngakau e pera katoa to tatou au manako. (Mataio 13:15, 19, 23) No te reira, e akaraanga meitaki to tatou i te tata taramo ko Davida, noatu e kare i rauka iaia te kai tukeke i te pae vaerua te rauka nei ia tatou i teia tuatau, kua akataka i ta Iehova au ture e “venereka ïa i to te meli i te topatapata anga no roto i te melikerio”!​—Salamo 19:10.

“Māna” te Oronga Maira i te Ora Mutu Kore

“Ko au te kai e oraʼi,” i akakite ei Iesu ki te ngati Iuda. “I kai ana to kotou ui metua i te māna i te medebara ra, e mate atura. . . . Ko au te kai ora, ko tei eke mai mei te rangi: ko te ka kai i teianei kai, ka tika ïa i te ora anga e tuatau ua atu: ko taku kai e oronga atu, ko toku ïa kopapa, ko taku ïa e oronga atu ei ora no to te ao.” (Ioane 6:48-51) Kare te varaoa tikai me kare te mana i oronga i te ora mutu kore. Inara ko te aronga tei akono i te akarongo ki roto i te atinga oko o Iesu i te openga ra ka rekareka i te akameitakianga o te ora mutu kore.​—Mataio 20:28.

Ko te maata anga o te tangata tei puapinga mei te oko o Iesu ka rekareka i te ora anga mutu kore ki roto i te Parataito i te enua nei. “E arong maata rava” i teia​—te akatutuia maira i te “katoa anga e manganui” o te aronga tuke tei kapiti mai ki to Iseraela i to ratou Aerenga anga mai mei Aiphiti​—ka ora i te “mate maata” te aere maira te ka akakore i te kino pouroa mei te enua. (Apokalupo 7:9, 10, 14; Exodo 12:38) Te rekareka ia ra tetai atu tutaki anga maata e te aronga tei akaataia mai e Iseraela uaorai. Kua akataka te apotetoro ko Paulo i teia aronga, te numero e 144,000, e ko ratou te Iseraela vaerua o te Atua. Ta ratou tutaki anga i te matenga koia ko te tuakaouanga ki te ora i te rangi ra. (Galatia 6:16; Ebera 3:1; Apokalupo 14:1) I reira ka oronga a Iesu kia ratou i tetai mana tuke tikai.

Te Aiteanga o “te Māna Uunaia”

“Te riro iaia te re ra, e angai ïa au iaia i te māna uunaia ra,” i na Iesu akatuia mai ra ki te Iseraela pae vaerua. (Apokalupo 2:17) Te mana akatutu ua te akamaara maira i te mana ta te Atua i akaue ia Mose kia tuku ki roto i te tia auro ki roto i te aruna tapu koreromotu. Kua akonoia te Aruna ki roto i te pia o te Ngai Tapu Tikai o te iero. I reira kua vai ua kare e kiteaia atu, kua uunaia. Kua akonoia ei akamaara anga, kare teia mana i kino koi vai ei ki roto i te Aruna, no reira kua riro ei akairo no te oronga anga i te kai kare e kino. (Exodo 16:32; Ebera 9:3, 4, 23, 24) I te oronga anga i te mana uunaia ki te 144,000, kua akapapu a Iesu i te rauka anga ia ratou te meta mate kore e te pe kore ei tamariki vaerua na te Atua.​—Ioane 6:51; 1 Korinetia 15:54.

“Tei ia koe [e Iehova] oki te tumu o te ora,” i tuatuai te tata taramo. (Salamo 36:9) Mei teaa te meitaki o te mana​—tika tikai e te akatutu anga—​te akapapu maira i taua tumu tuatua mou! Ko te mana ta te Atua i oronga ki to Iseraela taito, te mana akatutu tana i oronga i te tu o te kopapa o Iesu kua orongaia no tatou nei, e te mana uuna akatutuia tana i oronga na roto ia Iesu ki te 144,000 te akamaara maira kia tatou katoatoa i to tatou irinaki anga tikai ki runga i te Atua no te ora. (Salamo 39:5, 7) Kia akakite akaaka ua tatou, ma te tau, e te putuputu i teia irinaki anga. Aru mai, “kia meitaki koe iaia [ia Iehova] a muri atu.”​—Deuteronomi 8:16.

[Au Tutu i te kapi 26]

E raukai te ora mutu kore, te irinaki ra te au tangata ravarai i te “te kai ora, ko tei eke mai mei te rangi”

[Tutu i te kapi 28]

Te akaata ra te tae putuputu anga ki te au uipaanga Kerititiano katoatoa i to tatou ariki anga i ta Iehova akamaaraara anga