“E Amo oki i Oou Mata i te Vairakau Mata”

KUA orongaia taua akauenga e Iesu Karaiti ki te putuputuanga Kerititiano o te anere mataiti mua i Laodikea, Asia Minora.

Kua tuatua a Iesu: “E oko . . . e amo oki i oou mata i te vairakau mata, kia kite koe.” Kare i reira, i te maki mata tikai, mari ra e maki matapo i te pae vaerua tei anoanoia kia rapakauia. Kua akakeuia te au Kerititiano i Laodikea e te tu puapinga i te pae materia o taua oire te noo ra ratou i roto ra e kua manako merengo ua no runga i to ratou au anoano anga i te pae vaerua.

Te tuatuaanga no runga i teia e ko te tumu i kino ei to ratou mata, kua akakite a Iesu: “Te karanga na koe, E apinga maata taku, e kua akamaata au i taku taonga, e kare ua e mea toe iaku, e kare koe i kite e, e mate maata toou, e mei te mea e aroaia ra, e te puapinga kore, e te matapo, e te putaua.” Noatu kare i kite i te reira, kua anoanoia te “vairakau mata” rapakau no te au mema o te putuputuanga te ka rauka ua na te kauraroanga ki te apiianga e te ako anga a Iesu Karaiti. “E oko mai iaku nei,” i na Iesu ei.​—Apokalupo 3:​17, 18.

Tei tika oki ki te aronga i Laodikea, te anoanoia nei te au Kerititiano o teia tuatau kia matakite e auraka kia akakeu maataia, penei kare i kite, e te au mea materia e te reva akanavenave te noo nei ratou i roto. Te akauenga kia akono tamou i te akara anga maroiroi i te pae vaerua te akakiteia maira i roto i te raurau anga: “E oko mai [mei ia Iesu] . . . e amo oki i oou mata i te vairakau mata, kia kite koe.”

Tei tau kia akamanakoia ko te tika e ko teia “vairakau mata” te anoanoia ra kia okoia. Te o maira te tutaki anga. Kia akapouia te taime no te apii anga e te akamaaraara anga i te Tuatua a te Atua. Ko teia Tuatua, te akapapu maira te tata taramo kia tatou, “e mea viivii kore ïa, e māramaʼi te mata [pae vaerua] nei.”​—Salamo 19:8.