Matakite i te au Ereere a te Tiaporo!

“Kia ora . . . i te ereere a te diabolo.”​—2 TIMO. 2:26.

AKAPEEA KOE ME PAU?

Eaa ta tatou ka akara meitaki me akakeu ia tatou kia akaapa tau kore i tetai ke?

Eaa taau i kite mai mei te nga akaraanga o Pilato e Petero kia kore e tuku ua atu ki te taomianga e te mataku?

Akapeea koe me kopae kia kore e maata te manako akaapa?

1, 2. Eaa te au ereere a te Tiaporo ka uriuri tatou i roto i teia atikara?

TE ARUMAKI ra te Tiaporo i te iti tangata o Iehova. Kare tona akakoroanga e kia tamate ia ratou, mei tetai tangata opu manu e tamate ra i te manu tana ka inangaro. Inara, te akakoroanga maata o te Tiaporo kia opu ora i tana tangata e kia rave taua tangata ra i ta te Tiaporo e inangaro ra iaia kia rave.​—E tatau ia 2 Timoteo 2:24-26.

² Kia opu ora tetai tangata i te manu, ka taangaanga aia i tetai ereere. Penei ka tauta aia kia aere mai te manu ki tetai ngai atea ua kia rauka iaia i te opu i te reira. Me kore ka taangaanga aia i tetai ereere tei uunaia e ka uuti aia i te marei kia opu poitirere i te manu. E taangaanga ana te Tiaporo i tetai ereere mei te reira rai i te opu i te au tavini o te Atua. Me inangaro tatou i te kopae i te reira, kia matakite tatou i te au akairo akamatakiteanga te akaari maira kia tatou i te au ngai o ta Satani ereere. Ka uriuri teia atikara e akapeea tatou me paruru ia tatou mei te au ereere e toru ta te Tiaporo e taangaanga meitaki ra. Koia oki (1) te au tuatua akatere koreia, (2) te mataku e te taomianga, e te (3) maata te manako akaapa. Ka uriuri te atikara ka aru mai e rua akaou nga ereere a Satani.

AKAKORE I TE TUATUA AKATERE KOREIA

3, 4. Eaa te ka tupu mai me kare tatou e akatere meitaki i to tatou arero? Oronga mai i tetai akaraanga.

³ Kia rauka i te tuaru i te au manu ki vao mei te au ngai pipinianga, penei ka tutungi tetai tangata opu manu i te ngangaere e ka tauta i te opu i te au manu e oro ra ki vao. I roto i te tu akatutu ua, te inangaro ra te Tiaporo i te tutungi i te putuputuanga Kerititiano ki te ai. Me puapingaia te reira, ka rauka iaia i te akakeu i te au mema kia akaruke i te au ngai akaruruanga e kia topa atu ki roto i tana au ereere. Akapeea tatou me aru manako kore ua iaia kia rauka iaia i te opu ia tatou?

⁴ Kua akaaite te pipi ko Iakobo i te arero ki te ai. (E tatau ia Iakobo 3:6-8.) Me kare tatou e akatere meitaki i to tatou arero, penei ka akamata tatou i tetai ai akatutu ua i roto i te putuputuanga. Akapeea teia e tupu ei? Akamanako ana i te ka aru mai: I ko i tetai uipaanga a te putuputuanga, penei kua akakiteia mai e kua riro mai tetai tuaine ei painia tamou. Muri ake i te uipaanga, ka uriuri tetai nga papuritia e rua no runga i taua akakiteanga ra. Ka rekareka tetai ia raua e ka akameitaki aia i taua painia ou ra. Ka karanga tetai tuaine e ko te akakoroanga o taua tuaine painia ra, kia rauka mai iaia tetai turanga teitei i roto i te putuputuanga. Ko teea papuritia taau e inangaro ra kia riro mai ei oa noou? Kare i te mea ngata kia kite e ko teea ia raua te ka takino i te putuputuanga na roto i tana tuatua.

5. Ei akakore atu i te au tuatua akatere koreia, eaa to tatou tu kia akara meitaki tatou?

⁵ Akapeea tatou me akakore atu i te au tuatua akatere koreia? Kua tuatua a Iesu e: “No te ki oki o te ngakau ra e tuatuaʼi te vaa.” (Mata. 12:34) No reira ko te takainga mua koia oki kia akara meitaki i to tatou uaorai ngakau. Te kopae ra ainei tatou i te au manako kino te ka akamaata atu i te au tuatua kino? Ei akaraanga, me akarongo tatou e te itae ra tetai taeake i tetai apainga tavinianga, te irinaki ra ainei tatou e te tika ra tona akakoroanga, me kore te manako ra ainei tatou e te rave ra aia i te reira no tona uaorai inangaro? Me e mea matau no tatou kia manako kino, e mea meitaki kia maara e kua manako ekoko te Tiaporo i te akakoroanga o te tavini akarongo mou o te Atua ko Iobu. (Iobu 1:9-11) Kare tatou e manako tarotokaka i to tatou au taeake, kia akamanako ra tatou i te tumu i akaapa ei tatou iaia. E tumuanga meitaki tikai ainei to tatou kia manako mei tera rai? Me kore kua poitiniia ainei to tatou ngakau e te tu aroa kore e totoa ra i teia tuatau openga?​—2 Timo. 3:1-4.

6, 7. (a) Eaa tetai au tumu e akaapa ana tatou i tetai ke? (e) Akapeea ra tatou me pau atu me akakinoia mai tatou?

⁶ Akamanako ana i tetai atu tumu e akaapa ana tatou i tetai ke. Penei te inangaro ra tatou kia kiteaia mai ta tatou e rave ra. Penei kia akaraanga puapinga atu tatou na te taakaaka anga i tetai ke. Me kore te tauta ra tatou i te tangarongaro atu i tetai au ngai paruparu o tatou. Me te akatereia ra tatou e te tu akaparau, vareae e te manako tinamou kore, ka kino atu to tatou turanga.

⁷ Penei ka manako tatou e e tikaanga to tatou i te akaapa atu i tetai ke. Penei i tuatua akaapa ana aia ia koe. Me koia ia, auraka tatou e akakino atu iaia. Ka akakino atu te reira i te au turanga e te rotai ra te reira ki te anoano o te Tiaporo, kare i to te Atua. (2 Timo. 2:26) E mea meitaki kia aru tatou ia Iesu. Te akakinoia anga aia, “kare aia i tuatua tutaki atu.” Mari ra, ‘kua tuku aia iaia uaorai’ ki tei akava mai ma te tuatua tika. (1 Pete. 2:21-23) Kua papu tikai ia Iesu e ka akono a Iehova i te au turanga na roto i Tana uaorai mataara e Tona uaorai taime. E kia irinaki katoa rai tatou i te Atua. Me taangaanga tatou i ta tatou tuatua ei akaora anga, ka tauturu tatou i te akono i ‘te taokotaianga au.’​—E tatau ia Ephesia 4:1-3.

KIA ORA MAI MEI TE EREERE O TE MATAKU E TE TAOMIANGA

8, 9. Eaa ra a Pilato i akaue ei e kia tamateia a Iesu?

⁸ Me opuia tetai manu, kare e rauka i taua manu ra i te oro. Mei te reira rai te tangata e mataku ra e e taomiia ra kare e rauka i te akatere i tona oraanga. (E tatau ia Maseli 29:25.) Ka uriuri tatou i te au akaraanga o tetai nga tangata tei tuku ua atu ki te taomianga e te mataku, e ka akara tatou eaa ta tatou ka kite mai mei to raua tupuanga.

⁹ Kua kite te Kavana o Roma ko Ponotio Pilato e e tangata apa a Iesu e kare aia e inangaro ana i te akakino iaia. Kua tuatua a Pilato e ‘kare rava a Iesu i ara ana i tau ei aia kia mate.’ Inara, kua akaue a Pilato kia tamateia aia. No teaa ra? No te mea kua tuku ua atu a Pilato ki te taomianga a te au tangata. (Luka 23:15, 21-25) “Kia tuku koe i tenana tangata, kare koe i to Kaisara,” i kapiki mai ei taua au tangata patoi ra, te maro anga kia raveia ta ratou e inangaro ra. (Ioa. 19:12) Penei kua mataku a Pilato e ka ngere aia i tona taoonga teitei​—me kore tona oraanga—​me turu aia ia Karaiti. No reira kua akatika aia iaia uaorai kia akakeuia kia rave i te anoano o te Tiaporo.

10. Eaa tei akakeu ia Petero kia karanga e kare aia i kite ia Karaiti?

¹⁰ Ko te apotetoro ko Petero tetai oa piri vaitata o Iesu. Kua akakite aia e ko Iesu te Mesia. (Mata. 16:16) Kua vai tiratiratu a Petero te kare anga tetai au pipi i marama ana i te aiteanga o ta Iesu i tuatua e kua akaruke Iaia. (Ioa. 6:66-69) Te opu anga te au enemi ia Iesu, kua taangaanga a Petero i tetai koke i te paruru i tona Pu. (Ioa. 18:10, 11) I muri mai ra, kua mataku a Petero e kua akakite e kare aia i kite ia Iesu Karaiti. No tetai tuatau poto ua, kua topa atu aia ki roto i te ereere no te mataku i te tangata e kare aia i aru i te arataa mataku kore.​—Mata. 26:74, 75.

11. Eaa te au akakeuanga kino ka anoanoia tatou kia autu atu?

¹¹ Ei au kerititiano, ka anoanoia tatou kia kopae i te taomianga kia rave i te au mea te ka akamareka kore i te Atua. Penei ka tauta te au oa angaanga me kore tetai ke i te taomi ia tatou kia pikikaa me kore kia rave i te ainga tau kore. Penei ka maro mai te au oa apii ia koe kia pikikaa i roto i te tarereanga, kia akara i te au ainga viivii, kia kai i te avaava, kia kai i te au apinga akakona, kia inu maata i te kava, me kore kia rave i te ainga tau kore. No reira, eaa te ka tauturu ia tatou kia kopae i te ereere o te mataku e te taomianga kia rave i te au mea te ka akamareka kore ia Iehova?

12. Eaa te au apiianga ta tatou ka kite mai mei ia Pilato e Petero?

¹² Akara ana tatou eaa ta tatou ka kite mai mei te akaraanga o Pilato e Petero. Kare e maata ana ta Pilato i kite no runga ia Karaiti. Inara, kua kite aia e e tangata apa kore a Iesu e kare aia i te tangata noa ua nei. Inara kare a Pilato i te tangata akaaka e kare aia i inangaro ana i te Atua mou. Kua akavareia aia e te Tiaporo. Kua kite tikai a Petero i te Atua e e inangaro tona iaia. Tetai au taime ra, kare a Petero i akaari ana i te tu akaaka, kua riri aia, e kua akavareia. Mua ake i to Iesu opuia anga, kua tuatua ngakau parau a Petero e: “Kia maitu te tangata katoa ia koe, kare takiri au nei.” (Mare. 14:29) Tano anga kua papa meitaki te apotetoro no te timataanga te ka tupu mai naringa aia i rave i ta te tata taramo i rave tei irinaki ki te Atua e kua imene e: “Tei iaku a Iehova, kare au e mataku; eaa ta te tangata kia rave mai iaku?” (Sala. 118:6) I te po openga o Tona oraanga i te enua nei, kua apai a Iesu ia Petero e tetai nga apotetoro ki roto roa i te aua o Getesemane. Inara kare a Petero e tona au oa i vai ara ua, kua varea ratou e te moe. Kua akaara a Iesu ia ratou e kua karanga atu e: “E ara, e pure, kia kore kotou e rokoia e te timataanga.” (Mare. 14:38) Inara kua moe akaou a Petero e i muri mai kua tuku ua atu aia ki te mataku i te tangata.

13. Akapeea tatou me kopae i te taomianga kia rave i te mea tarevake?

¹³ Ka apii mai te au akaraanga o Pilato e Petero ia tatou i tetai apiianga puapinga tikai: Ka anoano tatou i te kite, te tu akaaka, te tu manako tau, kia inangaro i te Atua, e kia mataku ia Iehova e kia kore e tuku ua atu ki te au taomianga e te mataku i te tangata. Me akatumu tatou i to tatou akarongo ki runga i te kite mou tikai, ka tuatua mataku kore tatou no runga i to tatou irinakianga ma te papu tikai. Ka tauturu teia ia tatou kia kopae e kia autu i te mataku i te tangata. Auraka tatou e manako e ka autu tatou i te reira na roto i to tatou uaorai maroiroi. Inara, kia kite tatou ma te tu akaaka e te anoano ra tatou i te mana o te Atua kia kopae i te taomianga a te au oa. Ka anoanoia tatou kia pure no te vaerua o Iehova e kia akakeuia e tona aroa kia akangateitei i tona ingoa e tona au turanga. Tei maata atu, kia papa ua tatou i te patoi i te au taomianga i mua ake ka timataia ai tatou. Ei akatauanga, ka tauturu te akapapa vave anga e te pure i ta tatou tamariki kia tukatau i te patoi atu me taomiia mai ratou e to ratou au oa apii kia rave i te mea tarevake.​—2 Kori. 13:7.a

KOPAE I TE EREERE TE KA AKAPAII—MAATA TE MANAKO AKAAPA

14. No runga i te au mea apa ta tatou i rave ana i mua ana, eaa ta te Tiaporo e inangaro ra ia tatou kia akamanako?

¹⁴ Tetai taime e akapapaia ana tetai rakau teiaa me kore tetai toka e tautau ra ei ereere i rungao i te mataara e aere putuputu ana te au manu na runga. Me tutuki atu te manu ki runga i te taura, ka topa mai te rakau teiaa me kore te toka ki runga i te manu, e ka paii atu te reira. Penei ka rauka i te akaaite atu i te maata o te manako akaapa ki te akapaiiia anga ki tetai rakau teiaa me kore ki tetai toka. Me akamanako tatou i te au mea apa ta tatou i rave ana i mua ana, penei ka manako “paruparu roa” atu tatou. (E tatau ia Salamo 38:3-5, 8.) Te inangaro ra a Satani ia tatou kia manako e e maata rava ta tatou ara e kare a Iehova akaaroa mai ia tatou me kare e rauka ia tatou i te aru i Tana au umuumuanga.

15, 16. Akapeea koe me kopae i te ereere no te maata o te manako akaapa?

¹⁵ Akapeea koe me kopae i te ereere te ka akapaii? Me kua rave koe i tetai ara kino, tauta i te akaora mai i toou pirianga kia Iehova i teianei. E aravei atu i te aronga pakari, e pati atu i ta ratou tauturu. (Iako. 5:14-16) E rave i taau ka rauka i te akatikatika atu i te tarevake. (2 Kori. 7:11) Me akoia mai koe, eiaa e manako taitaia. E akairo papu te reira e te aroa maira a Iehova ia koe. (Ebe. 12:6) Auraka e rave akaou i taua ara ra, e kia akapapu e kare rava koe e rave i tetai ua atu mea te ka taki atu ia koe kia rave i taua ara ra. Me tataraara koe, kia irinaki e ka riro te atinga oko o Iesu Karaiti ei tapoki anga i taau ara.​—1 Ioa. 4:9, 14.

¹⁶ E manako akaapa ua ana tetai pae ia ratou uaorai no ta ratou au ara tei akakoreia. Me te manako akapera ra koe, e akamaara e kua akakore a Iehova i te ara a Petero e tetai au apotetoro no te akaruke anga i Tana Tamaiti akaperepere i te tuatau e anoano maata ra a Iesu ia ratou. Kua akakore a Iehova i te ara a te tangata tei akaateaia mei te putuputuanga i Korinetia no tona tu tau kore, e kua tataraara taua tangata ra i muri mai. (1 Kori. 5:1-5; 2 Kori. 2:6-8) Te tuatua ra te Tuatua a te Atua no te aronga tei rave kino i te ara e kua tataraara e kua akakoreia te ara e te Atua.​—2 Para. 33:2, 10-13; 1 Kori. 6:9-11.

17. Eaa ta te atinga oko ka rave no tatou?

¹⁷ Ka akakore e ka akangaropoina a Iehova i taau au ara i rave ana i mua ana me tataraara tikai koe e me ariki i tona tu tangi aroa. Auraka e manako e kare te atinga oko o Iesu e tapoki i taau ara. Me manako akapera koe, ka topa koe ki roto i tetai ereere a Satani. Noatu eaa ta te Tiaporo e inangaro ra ia koe kia irinaki, ka rauka te atinga oko i te tapoki i te au ara a te aronga tei rave i te ara e tei tataraara. (Mase. 24:16) Ka tauturu mai te irinaki anga i te atinga oko ia koe kia kore e maata te manako akaapa e kia tavini maroiroi i te Atua ma toou ngakau, manako, e toou vaerua katoa.​—Mata. 22:37.

KUA KITE TATOU I TA SATANI AU RAVENGA

18. Akapeea tatou me kopae i te au ereere a te Tiaporo?

¹⁸ Kare a Satani e kea atu ana e ko teea ereere te ka opu ia tatou. I te mea e kua kite tatou i ta Satani au ravenga, ka rauka ia tatou i te kopae kia kore tatou e opuia e te Tiaporo. (2 Kori. 2:10, 11) Kare tatou e opuia e tana au ereere me pure tatou no te pakari kia autu atu i te au timataanga. “Kia ngere ra tetai tangata i te pakari,” i tata ei a Iakobo, “ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana.” (Iako. 1:5) Ka anoanoia tatou kia angaanga rotai ki ta tatou au pure na te rave putuputu anga i ta tatou uaorai apii e te taangaanga anga i te Tuatua a te Atua. Te akamarama maira te au puka Pipiria no ko mai i te pupu tavini akono meitaki e te pakari i te au ereere ta te Tiaporo i akanoo, e ka tauturu mai te reira ia tatou kia kopae i te au ereere.

19, 20. Eaa ra tatou ka rikarika ai i te kino?

¹⁹ Ka akatupu te pure e te apii anga Pipiria i te inangaro ki roto ia tatou kia rave i te mea meitaki. Inara e mea puapinga kia rikarika tatou i te kino. (Sala. 97:10) Ka tauturu mai te akamanako oonu anga i te au tupuanga kino no te aruaru anga i te au anoano noinoi ia tatou kia kopae i te reira. (Iako. 1:14, 15) Me rikarika tatou i te kino e me inangaro tatou i te mea meitaki, kare te au maunu ta Satani i tuku ki roto i tana au ereere e opu ia tatou.

²⁰ Te akameitaki nei tatou i te Atua no te mea te tauturu maira aia ia tatou kia kore tatou e opuia e Satani! Na roto i Tona vaerua, Tana Tuatua, e Tana akaaerenga, te akaora ra a Iehova ia tatou mei “te kino.” (Mata. 6:13) I roto i te atikara ka aru mai, ka kite tatou akapeea me kopae e rua akaou ereere ta te Tiaporo i kite mai te ka riro ei mea meitaki no te opu anga i te au tavini o te Atua.

[Tataanga Rikiriki i Raro]

[Tutu i te kapi 21]

Ka rauka te tuatua akatere koreia i te takino i te putuputuanga

[Tutu i te kapi 24]

Ka rauka ia koe i te kopae kia kore e maata te manako akaapa

Patoi e e Kopae i te au Ereere a Satani!

“Patoi i te ravenga pakari a te diabolo.”​—EPHE. 6:11.

AKAPEEA KOE ME PAU?

Eaa ta tetai tavini o Iehova ka rave kia kore e opuia e te ereere o te au apinga nui?

Eaa te ka tauturu i tetai Kerititiano akaipoipo kia kore e topa ki roto i te ereere o te akaturi?

Eaa koe ka irinaki ei e e puapinga i te patoi atu i te au apinga nui e te pirianga ainga tau kore?

1, 2. (a) Eaa ra a Satani kare e tangi ana i te aronga akatainuia e te “mamoe ke atu”? (e) Eaa te au ereere a Satani ta tatou ka uriuri i roto i teia atikara?

KARE te Tiaporo a Satani e tangi ana i te au tangata, te aronga tikai e tavini ra ia Iehova. Te tikaanga, te tamaki ra a Satani i te toenga o te aronga akatainuia. (Apo. 12:17) Te arataki maroiroi ra taua au Kerititiano tiratiratu ra i te angaanga tutuanga o te Patireia i teia tuatau, e kua akakite ratou e ko Satani te tutara o teianei ao. Kare te Tiaporo e inangaro katoa ana i te “mamoe ke atu,” te turuturu ra i te aronga akatainuia e tei tau no te oraanga mutu kore​—e manakonakoanga tei kare e rauka akaou ia Satani. (Ioa. 10:16) No reira aia i riri maata ai! Noatu e manakonakoanga to tatou no te rangi me kore no te enua, kare a Satani e manako mai ana i to tatou oraanga. Tona akakoroanga kia takore ia tatou.​—1 Pete. 5:8.

² E rauka ai iaia i te akatupu i tona akakoroanga, kua akanoo a Satani i tetai au ereere me kore au marei. I te mea e kua ‘akapoiri aia i te au manako’ o te aronga akarongo kore, kare ratou e ariki ana i te tuatua meitaki e kare katoa e kite ana i teia au ereere. Inara, te marie katoa ra te Tiaporo i tetai aronga kare e ariki ana i te karere o te Patireia. (2 Kori. 4:3, 4) Te akaari maira te atikara i mua ana e akapeea tatou me kopae i ta Satani au ereere e toru: (1) te tuatua akatere koreia, (2) te mataku e te taomianga, e te (3) maata te manako akaapa. Ka akamanako ana tatou akapeea me patoi atu i tetai nga ereere a Satani​—te au apinga nui e te timataanga kia rave i te akaturi.

AU APINGA NUI​—E EREERE TE KA AKAPOKIA

3, 4. Akapeea te au anoano maata o teianei ao te taki atu anga ki te au apinga nui?

³ I roto i tetai o tana akatutuanga, kua taiku mai a Iesu i tetai ua tei ruruia ki roto i te au rakau taratara. Kua akakite mai aia e ka akarongo tetai tangata i te tuatua, inara ka ‘pokia atura te tuatua no te anoano maata i teianei ao, e te pikikaa o te apinga nui, e kare atura i ua mai.’ (Mata. 13:22) Ae, ko te au apinga nui tetai ereere ta to tatou enemi ko Satani e taangaanga nei.

⁴ Me kapitiia teia nga akakeuanga, ka akapokia te reira i te tuatua. Tetai o te reira ko “te anoano maata i to teianei ao.” I roto i teia nga turanga “kino maata,” e maata te au mea te ka akataitaia ia koe. (2 Tim. 3:1) Penei no te oko maata o te au apinga e kare e maata ana te angaanga moni, ka kite mai koe e e ngata tikai e rauka mai ei te au mea o te oranga. Penei ka manamanata koe no te tuatau ki mua e ka manako e, ‘Ka rava ainei taku moni i muri ake ka ritaea mai ei au?’ No taua au manako taitaia ra, kua aruaru tetai pae i te au apinga nui, te manako anga e ka oronga mai te moni i tetai oraanga tinamou.

5. Na teea au mataara e riro ana ‘te pikikaa o te au apinga nui’ ei akavare anga?

⁵ Kua tuatua mai a Iesu i tetai atu akakeuanga​—koia oki ‘te pikikaa o te apinga nui.’ Me kapiti mai taua akakeuanga ra ki te taitaia, ka akapokia te reira i te tuatua. Kua akakite mai te Pipiria e “e akapuanga tei te moni.” (Kohe. 7:12) Inara, kare i te mea meitaki i te aruaru i te au apinga nui. Maata tei kite mai e ko te maata atu i ta ratou tauta anga kia rauka mai te au apinga nui, maata atu ta te reira e marei ana ia ratou. Kua riro tetai au tangata ei tuikaa no te au apinga nui.​—Mata. 6:24.

6, 7. (a) Akapeea te au apinga nui te riro anga ei mea kino i te ngai angaanga moni? (e) Eaa te au mea kia akamanako tetai Kerititiano me ka patiia mai aia kia angaanga maata atu?

⁶ I te akamataanga, kare e kino ana i te inangaro atu i te au apinga nui. Ei akaraanga, akamanako ana i teia akatutuanga. Kua aravei mai toou pu ia koe e kua tuatua mai e: “E nuti meitaki taku! Kua orongaia mai tetai angaanga maata na te kamupani. Tera te aiteanga ka angaanga maata atu koe no tetai au marama. Inara te akapapu atu nei au e ka tutaki meitakiia koe no taau angaanga pakari.” Akapeea koe me ariu atu ki te reira? E tika e mea puapinga i te akono i te turanga pae materia o toou pamiri, inara kare ko te reira ua taau apainga. (1 Timo. 5:8) E au apainga ke atu tetai taau ka akamanako. Eaa te maata o te ora taau ka angaanga? Ka tamanamanata ainei taau angaanga moni i taau au angaanga pae vaerua, kapiti mai i te au uipaanga e taau Akamorianga a te Ngutuare i te aiai?

⁷ Na te akamanako meitaki anga i taau ikianga, eaa taau ka akamanako e ko te mea puapinga atu​—ko te angaanga maata anga ainei kia maata atu taau moni i roto i te pangika, me kore ko toou turanga pae vaerua ainei? Ka akamutu ainei koe i te tuku i te anoano o te Patireia na mua no toou inangaro kia maata atu taau moni? Te kite ra ainei koe e eaa ta te au apinga nui ka akatupu kia koe me kare koe e akono i toou turanga pae vaerua e to te pamiri? Me te tupu ra te reira kia koe i teianei, akapeea koe i te patoi anga e te kopae anga kia kore koe e akapokiaia e te au apinga nui?​—E tatau ia 1 Timo. 6:9, 10.

8. Eaa te au akaraanga Tuatua Tapu te ka tauturu ia tatou kia akara meitaki i ta tatou e rave ra?

⁸ Me kare tatou e inangaro kia akapokiaia e te au apinga nui, e akara meitaki i ta tatou e rave ra i tetai au taime. Kare rava koe e inangaro kia aite koe mei ia Esau rai, tei akaari mai e kua akavaavaa aia i te au apinga pae vaerua! (Gene. 25:34; Ebe. 12:16) Papu e kare koe e inangaro ana kia aite mai mei te tangata apinga nui rai ta Iesu i pati kia oko i tana au apinga e kia oronga atu ki te aronga putaua e kia aru iaia. Kare te tangata i rave ana i te reira, mari ra kua ‘aere ke atura aia ma te aue no tona apinga maata.’ (Mata. 19:21, 22) No tei ereereia e te au apinga nui, kua ngere taua tangata ra i te tikaanga ngateitei maata​—kia aru i te tangata maata rava atu tei ora ana! No reira, kia matakite e kia kore e ngaro to tatou tikaanga ngateitei ei au pipi na Iesu Karaiti.

9, 10. Eaa taau ka tuatua no runga i te manako o te au Tuatua Tapu no runga i te au apinga nui?

⁹ Ei akakore atu i te au manamanata puapinga kore no runga i te au apinga nui, e aru i ta Iesu akoanga: “E teianei, auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e, Eaa to matou kakau kia kakau? (Te kimi ra oki te au etene i taua au mea katoa ra:) kua kite oki to kotou Metua i te ao ra e, kia rauka taua au mea katoa ra ia kotou e tikaʼi.”​—Mata. 6:31, 32; Luka 21:34, 35.

¹⁰ Kia kore e pikikaaia e te au apinga nui, tauta i te aru i te tu manako o te tangata tata Pipiria ko Agura, tei tuatua e: “Auraka e tuku iaku kia putaua me kore kia apinga nui. E oronga ua mai ra i taku e anoano ra.” (Mase. 30:8, Contemporary English Version) Taka ua ra e kua marama a Agura e e puapinga te moni ei akapuanga e te tu pikikaa katoa o te au apinga nui. No reira, kia marama e ka takino te anoano maata o teianei ao e te tu pikikaa o te au apinga nui i to tatou turanga pae vaerua. Ka pou to tatou taime i te manamanata puapinga kore i te au apinga nui, e to tatou maroiroi, e kare tatou e aruaru i te au anoano o te Patireia. No reira, kia matakite kia kore koe e opuia e ta Satani au ereere o te au apinga nui!​—E tatau ia Ebera 13:5.

AKATURI​—MEI TE VAARUA UUNA KARAPEIA

11, 12. Akapeea tetai Kerititiano me topa ki roto i te ereere o te akaturi i te ngai angaanga?

¹¹ E ko ana tetai tangata opu manu i tetai vaarua i te ngai e aere putuputu ana te manu ei opu anga i te reira. E uuna ia ana te vaarua na te tapoki anga i te reira ki tetai au rakau e te one. Te aiteite ra tetai o ta Satani timataanga kino roa atu ki taua tu ereere ra. Koia oki, te ara kia rave i te ainga tau kore. (Mase. 22:14; 23:27) Maata te au Kerititiano kua topa ki roto i taua ereere ra na te tuku anga ia ratou ki roto i te au turanga mama ua i te akatupu i te ainga tau kore. Kua akaturi tetai au Kerititiano akaipoipo i muri ake i te akatupuanga i tetai akainangaro anga tau kore ki tetai ke.

¹² Ka tupu mai tetai akainangaro anga tau kore i ko i taau ngai angaanga. E tika, kua akaari mai tetai kimikimianga e e maata atu i te apa o te au vaine e te maataanga o te au tane tei rave i te ainga tau kore ki tetai oa angaanga. Te umuumu maira ainei taau angaanga e kia kapiti atu koe ki te au mema tane me kore vaine? Me koiaia, eaa te turanga o toou pirianga kia ratou? E kotinga ana ainei koe i toou pirianga kia kore e riro mai ei pirianga akainangaro? Ei akaraanga, i muri ake te pukapuka putuputuanga tetai tuaine Kerititiano ki tetai tangata angaanga, penei ka riro mai raua ei oa piri vaitata, e ka akakite atu te tuaine i tona au manamanata akaipoipo kiaia. I roto i tetai atu turanga, kua akaari tetai taeake i te tu oaoa ki tetai vaine i te angaanga, penei ka manako aia e: “E ariki mai ana aia i toku au manako e e akarongo mai ana aia me tuatua atu au kiaia. E te akangateitei maira aia iaku. Manako ua atu ana au e kia akapera mai taku vaine iaku i te kainga!” Te kite ra ainei koe e akapeea taua au turanga ra te akavare anga i te au Kerititiano kia rave i te akaturi?

13. Akapeea tetai tu akainangaro anga tau kore e tupu ei i roto i te putuputuanga?

¹³ Ka tupu mai te tu akainangaro anga tau kore i roto i te putuputuanga. Akara ana i tetai akaraanga tika tikai. E nga painia tamou a Daniel raua ko tana vaine ko Sarah.a Kua akakite mai a Daniel e, “e tangata pakari aia kare e rauka iaia i te karanga e kare.” E ariki rekareka ua ana aia i te au apainga te ka orongaia mai kiaia. Ei tuanga no tana angaanga orometua, kua apii a Daniel i te Pipiria ki tetai au mapu tane e rima​—e toru ia ratou kua papetitoia. Te anoano ra teia au taeake ou tei papetitoia tetai tauturu. E tauturu mai ana a Sarah me maata te au angaanga teokaratiki a Daniel. Kua riro teia ei angaanga matauia: Te anoano ra te aronga apii Pipiria mua a Daniel i tetai tauturu i te pae manako, e kua oronga atu a Sarah i te reira. Te anoano katoa ra a Sarah i tetai turuturu anga, e kua oronga atu te aronga apii Pipiria a Daniel i te reira kiaia. Kua riro te reira ei turanga kino. “Kua pou te maroiroi o taku vaine i te pae vaerua e te pae manako no te turuturu anga i tetai ke no tetai au marama,” i karanga ai a Daniel. “Kapiti mai, kare au i akono ana iaia, e kua taki atu te reira ki tetai tupuanga kino. Kua akaturi taku vaine ki tetai o te tangata i apii ana au i mua ana. Kua paruparu aia i te pae vaerua e kare rava au i kite atu ana, kua maata rava toku manako ki runga i taku au apainga.” Akapeea koe me kopae i taua tu kino ra?

14, 15. Eaa te au mea te ka tauturu i te au Kerititiano akaipoipo kia kopae i te ereere o te akaturi?

¹⁴ Kia rauka i te kopae i te ereere o te akaturi, akamanako i te aiteanga o te koreromotu akaipoipo. Kua tuatua a Iesu e: “Ta te Atua i topiri ra, auraka te tangata e akataka ke atu.” (Mata. 19:6) Auraka rava e manako e e puapinga atu taau au apainga teokaratiki i toou tokorua. Mari ra, kia akamaara e me akapou koe i toou taime ki te au angaanga puapinga kore e kare ki toou tokorua, te akaari maira e te paruparu ra toou akaipoipo e ka timataia koe kia rave i te akaturi.

¹⁵ Me e tangata pakari koe, akapeea ra te au anana? Kua tata mai te apotetoro ko Petero e: “Ka angai i te anana a te Atua i roto ia kotou na, ka rave i te taoonga tiaki auraka ra no te akaueue, no te anoano ra; auraka no te apinga tika kore ra kia rauka, no te tae tikai ra o te ngakau.” (1 Pete. 5:2) E akono i te au mema o te putuputuanga e tiaki ra koe. Inara, eiaa e akapou ua i te taime ki taau angaanga tiaki e kia akangaropoina i taau apainga ei tane akaipoipo. E mea puapinga kore​—e te kino katoa—​kia akamou ua i toou manako i te angai i te putuputuanga inara te “matepongi” ra toou tokorua i te kainga. Kua akakite mai a Daniel e, “Eiaa rava koe e akapou ua i toou taime ki runga i taau au apainga e kia akangaropoina i toou pamiri.”

16, 17. (a) Eaa ta te au Kerititiano akaipoipo ka rave i te ngai angaanga kia kite mai tetai ke e kare ratou e inangaro ana i tetai pirianga akainangaro? (e) Oronga mai i tetai akaraanga o tetai nga makatini tei neneiia te ka tauturu i te au Kerititiano kia kopae i te akaturi.

¹⁶ Maata te au akoanga meitaki i roto i Te Punanga Tiaki e te makatini E Ara! ei tauturu i te au Kerititiano akaipoipo kia kore e topa ki roto i te ereere o te akaturi. Ei akatauanga, te oronga maira Te Punanga Tiaki o Tepetema 15, 2006, i teia akoanga e: “I roto i te ngai angaanga, e i tetai ngai ke atu, e matakite i te au turanga penei ka akatupu i tetai pirianga. Ei akaraanga, te noo roa anga e te angaanga kapiti anga ki tetai tane me kore ki tetai vaine, ko te akamataanga te reira no tetai timataanga. Ei tane me kore ei vaine akaipoipo, ka tau koe kia akataka meitaki na roto i taau tuatua e toou tu e kare oou inangaro i roto i tetai ke. Ei tangata e aruaru ra i te akamorianga tau i te Atua, kare rava koe e inangaro i te akakeu i te inangaro na te akameameaanga me kore na te tu tau kore o toou kakau e toou akamanea anga. . . . Te tukuanga i te au tutu o toou tokorua akaipoipo e taau tamariki i roto aere i te ngai angaanga ka riro ei akamaaraanga tikai kia koe e ki tetai ke e e puapinga maata toou pamiri kia koe. E tauta e auraka rava e akamaroiroi atu​—me kore e akatika ua atu—​te au akavareanga akainangaro mei tetai ke.”

¹⁷ Te akamatakite maira te atikara “Akaipoipo Tiratiratu​—Eaa Tikai te Aiteanga? i roto i te makatini E Ara! o Aperira 2009 no runga i te manako pirianga ainga ki tetai tangata ke kare i te tokorua akaipoipo noou. Te akakite maira te atikara e ka riro te manako pirianga ainga ei akakeu i tetai kia rave i te akaturi. (Iako. 1:14, 15) Me kua akaipoipo koe, e mea meitaki kia akara akaou korua ko toou tokorua i taua au manako ra i tetai au taime. E mea tapu tikai te akaipoipo tei akanooia mai e Iehova. E mea meitaki kia tuku i tetai taime kia pukapuka kapiti e toou tokorua no runga i te akaipoipo, kia akaari e te akaperepere ra korua i te au mea tapu.​—Gene. 2:21-24.

18, 19. (a) Eaa te au tupu anga kino no te akaturi? (e) Eaa te au mea puapinga ka rauka mai me tiratiratu tatou ki te akaipoipo?

¹⁸ Me kite mai koe e te tupu maira tetai tu akainangaro anga tau kore, akamanako meitaki i te au kino ka tupu mai no te rave anga i te moeaana e te akaturi. (Mase. 7:22, 23; Gal. 6:7) Kua akamareka kore te aronga tei rave i te ainga tau kore ia Iehova e kua tamamae i to ratou tokorua e ia ratou uaorai. (E tatau ia Malaki 2:13, 14.) No reira e akamanako i te au mea puapinga ka rauka mai i te aronga tei akono tamou i te tu tiratiratu. Ka rauka ia ratou te manakonakoanga no te oraanga mutu kore e ka mataora katoa ratou i tetai oraanga meitaki atu i teianei, e tetai akava ngakau ma.​—E tatau ia Maseli 3:1, 2.

¹⁹ Kua imene te tata taramo e: “E au maata to te aronga i inangaro i taau [Atua] ture; kare o ratou e turorianga.” (Sala. 119:165) No reira kia inangaro i te tuatua mou, e “kia matakite i to kotou aerenga, eiaa mei ta te kite kore, mei ta te aronga pakari ra” i teia tuatau kino. (Ephe. 5:15, 16) Kua ki te mataara ta tatou e aru nei i te au ereere tei akanooia e Satani ei opu anga i te aronga akamori mou. Inara, kua papa meitaki tatou no te paruru anga ia tatou. Kua oronga mai a Iehova i ta tatou e anoano ra kia “patoi” e kia ‘tamate i te au tao ai ravarai a te vaerua kino ra’!​—Ephe. 6:11, 16.

[Tataanga Rikiriki i Raro]

[Tutu i te kapi 26]

Ka akapokia te au apinga nui i tetai tangata i te pae vaerua. Auraka rava e akatika i te reira kia tupu kia koe

[Tutu i te kapi 29]

Ka taki atu te akameameaanga​—me kore te ariu atu anga ki te reira—​i tetai kia rave i te akaturi