Ka Tutakiia te Tamou Marie

¹ “Na to kotou tamou marie anga ka ora ia kotou to kotou meta.” (Luka 21:19, NW) Taua au tuatua ra, tei riro e ko tetai tuanga o ta Iesu totou no runga i “te openga o te akatereanga o te au mea nei,” te akataka meitaki maira e i te akono anga i to tatou tu apakore, kia vai papa ua tatou i te aro atu i te au timataanga e manganui. Inara i roto i to Iehova maroiroi, ka rauka ia tatou ravarai kia “tamou marie ra e tae ua atu ki te openga” e “ka ora ia.”​—Mata. 24:​3, 13, NW; Philipi 4:13.

² Ka riro te takinokino, te au manamanata o te oraanga kopapa, te au tu ngata i te pae moni, e te manako ngakau taitaia ei timataanga i te au ra ravarai. Inara, auraka roa tatou e akangaropoina, e te tauta nei a Satani i te takino i to tatou tu apakore kia Iehova. Te ra okotai ka vai tiratiratu tatou ki to tatou Metua e ra ke akaou mai ia tei tauturu tatou i te tuku atu i tetai pauanga ki te akaaoanga a Tei Akakino maira. Mei teaa ra te akameitakianga kia kite e ko to tatou “roi-mata” i te aro anga atu i te timataanga kare i ngaropoina! E mea akaperepereia te reira e Iehova, e ka akarekareka to tatou tu apakore i tona ngakau!​—Sa. 56:8; Maseli 27:11.

³ Akamatutuia e te Au Timataanga: Ka akaari pu mai te mamae i te tu paruparu o te akarongo me kore i te tu tarevake, mei te ngakau parau me kore te akakoromaki kore. I te tamata atu kia kopae me kore kia akaope i te au timataanga na te au mataara tau kore i te tuatua tapu, e akarongo tatou i te ako a te Tuatua a te Atua kia “tuku i te tamou marie kia angaanga takiri.” No teaa ra? No te mea ka tauturu te tamou marie anga ma te tiratiratu ia tatou kia ‘ki katoa e te meitaki i te au tu ravarai.’ (Ia. 1:​2-4, NW) Ka tauturu te tu tamou marie ia tatou kia tatanu i te au tu puapinga, mei te tau tikai, te tangi, e te akaaroa.​—Roma 12:15.

⁴ Te Timataanga o te Akarongo: Me tamou marie tatou i te au timataanga, ka rauka ia tatou te timataanga o te akarongo tei puapinga maata atu i roto i te mata o te Atua. (1 Pe. 1:​6, 7) Ka akapapa taua akarongo ra ia tatou kia vai ngaueue kore i roto i te au timataanga i te tuatau ki mua. I runga ravao, ka kite tatou i to te Atua marekaanga, e ka akamaroiroi teia i to tatou manakonakoanga, i te akariro anga i te reira ei mea tika tikai kia tatou.​—Roma 5:​3-5.

⁵ Te tutakianga meitaki roa atu no te tamou marie te akakiteia maira ia Iakobo 1:12, (NW) tei karanga e: “E mataora te tangata tei tamou marie ua atura i te timata anga, no te mea e akatikaiaʼi ka rauka iaia te korona o te oraanga.” No reira, kia vai ngaueue kore tatou i roto i to tatou tu akono ia Iehova, ma te irinaki e ka tutaki maata mai aia i “te aronga tei tamou ua atu i te inangaro iaia.”

Tuanga 2—Rave Anga i te Au Apiianga Pipiria Tere ki Mua

Akapapa Anga no te Rave i te Apiianga

¹ Te apii anga kia puapinga meitakiia i ko i tetai apiianga Pipiria e maata atu te ka o mai i to te uriuri ua i te manako o te apii e te akara anga i te au irava tei akakiteia. Ka anoanoia tatou kia oronga i te akakiteanga na te mataara te ka akakeu i te ngakau o te tangata apiipii. No teia ka umuumuia te akapapaanga meitaki tikai ma te akamanako atu i te tangata apiipii.​—Maseli 15:28.

² Akapeea me Akapapa: Akamata na te pure anga kia Iehova no runga i te tangata e tona au anoano. Pati kia Iehova kia tauturu ia koe i te itae i te ngakau o te tangata apiipii. (Kolosa 1:​9, 10) Kia marama meitaki tikai i te tumu tuatua, e akamanako ana no tetai atianga ua i te upoko tuatua o te pene me kore o te apii, te au tumu manako, e tetai au tutu ei tauturu. E ui kia koe uaorai e: ‘Eaa ra te akakoroanga tikai o te manako o te apii?’ Ka tauturu teia ia koe kia tamou ki runga i te au manako maata ia koe e rave ra i te apiianga.

³ E akara meitaki akaou i te manako mei te parakarapa ki te parakarapa. Akataka i te au pauanga ki te au uianga tei tataia, te akairaira anga ua i te au tuatua maata e te au takiota tuatua. Makitoro marie e akapeea te au irava i akakiteia i te piri anga atu ki te manako maata o te parakarapa, e e iki ko teea te ka tatau i te taime o te apiianga. Penei ka kite koe e ka tauturu maata kia tata poto ua i te au manako ki te pae mai o te puka. E mea tau kia taka meitaki i te tangata apiipii i te kite e ko tana e apii ra no ko mai i te Tuatua a te Atua.​—1 Tesa. 2:13.

⁴ Akatano i te Apii ki te Au Anoano o te Tangata: Aru mai, e akamanako e kia tau tikai te apii ki te au anoano o te tangata apiipii. Tamata i te tapapa atu i tana au uianga e te au manako penei te ngata ra iaia kia marama me kore kia ariki. E ui kia koe uaorai e: ‘Eaa ra tana ka anoano kia marama me kore kia taangaanga kia tere ki mua i te pae vaerua? Akapeea e rauka ai iaku i te itae i tona ngakau?’ I reira ka akatano ei i taau apii anga kia tau ki te reira. I tetai au taime, penei ka kite koe i te anoano no te akapapa i tetai akatutuanga, i tetai akamaramaanga, me kore i tetai au uianga ei tauturu i te tangata apiipii kia marama i te aiteanga o tetai manako me kore irava. (Nehe. 8:8) Inara e kopae i te tauru anga i te akakiteanga ke atu kare tikai e pirianga ki te tumu tuatua. Na te akamanakoanga poto ua i te openga o te apiianga e tauturu iaia kia akamaara i te au manako maata.

⁵ Mei teea ra to tatou rekareka me uua mai te aronga ou i te ua o te tuatua tika ei akapaapaa ia Iehova! (Philipi 1:11) Ei tauturu ia ratou kia taena taua akakoroanga ra, e akapapa meitaki i te au taime ravarai ka rave koe i tetai apiianga Pipiria.