E Kaiou ta Tatou ka Tutaki ki Tetai Ke

¹ Kua kite mai te apotetoro ko Paulo i te apainga kia tutu aere ki te au tangata. Kua kite oki aia e kua maani a Iehova kia rauka i te tangata katoa nei kia akaoraia na roto i te toto oko maata o Tana Tamaiti. (1 Timo. 2:3-6) No reira, kua karanga a Paulo: “E kaiou oki au na te Eleni, e na te tangata ke ke; na te aronga pakari, e na te kite kore.” Kua angaanga maroiroi aia ma te angaanga ua atu i te tutaki i tana kaiou ki te au taeake tangata na te oronga anga i te tuatua meitaki kia ratou.​—Roma 1:14, 15.

² Mei ia Paulo rai, te kimi ra te au Kerititiano i teia tuatau nei i te oronga anga i te tuatua meitaki ki to ratou au tangata tupu i te au atianga ravarai. Ma te “mate maata” e aere viviki maira, e mea rapurapu ta tatou kimi anga no te aronga ngakau tika. Kia riro e na te aroa tikai e akakeu ia tatou kia maroiroi i roto i teia angaanga akaoraanga.​—Mata. 24:21; Ezeki. 33:8.

³ Tutakianga i ta Tatou Kaiou: Te mataara maata e rauka ai ia tatou i te itae atu i te au tangata koia oki na te tutu anga mei tera ngutupa ki tera ngutupa. I te au ngai e manganui te au tangata kare i te kainga, na te akonoanga i te au rekoti meitaki tikai e te oki akaou anga i te au taime tukeke e rauka ai ia tatou i te aravei maata atu i te au tangata. (1 Kori. 10:33) Ka taeria katoa ia tatou te aronga tataki tai na te tutu anga i te au ngai pitiniti, i runga i te au mataara, i roto i te au paka, i te au ngai paka anga motoka, e na runga i te terepaoni. Ka rauka ia tatou i te ui kia tatou uaorai, ‘Te rave ra ainei au i te ka rauka meitaki iaku i te aruaru i te au ravenga katoa no te tutu anga e rauka ai i te oronga atu i te karere no te ora?’​—Mata. 10:11.

⁴ Kua kite mai tetai painia i te apainga rekareka tikai i te itae anga i te au tangata ravarai i tona ngai. I tetai are, e piri ua ana te ariki maramarama, e kare roa e tangata i te kainga. Inara, i tetai ra e kare oki te painia i runga i te angaanga orometua, kua kite atu aia i tetai motoka i mua i teia are e kare ua ana e tangata i te kainga. Kare oki i inangaro ana kia tuku ua atu i teia atianga kia pati, kua akatangi atu aia i te oe o te ngutupa. Kua aere mai tetai tangata, e kua taki atu teia pukapukaanga mua ki tetai au atoro akaou anga e manganui raveia e teia tuaine e tana tane. Taopenga mai, kua ariki teia tangata i tetai apii Pipiria, e e taeake papetito aia i teianei. Kua rekareka tikai aia e kua manako mai teia tuaine i tetai apainga kaiou kia tutu aere ki tetai ke.

⁵ Te pou viviki ua atu nei te tuatau, ko teia te taime i te tutaki i ta tatou kaiou ki to tatou au tangata tupu na te tauta maroiroi anga ia tatou uaorai i roto i te angaanga tutu anga.​—2 Kori. 6:1, 2.

Rave Anga i te Au Apiianga Pipiria Tere ki Mua

Tuanga 11: Tauturu Anga i te Aronga Apiipii i te Akono i te Atoro Akaou Anga

¹ Me akamata tetai tangata apiipii Pipiria i te piri atu ki roto i te angaanga tutu anga, ka aravei atu aia i te au tangata te akaari maira i te inangaro i roto i te tuatua meitaki. Akapeea tatou i te tauturu anga i te papuritia ou i te akono meitaki i te au atoro akaou anga e kia tatanu i te inangaro tana i kite mai?

² Te akapapaanga no tetai atoro akaou anga ka akamata roa mai ma te atoro anga mua. E akamaroiroi i te tangata apiipii kia akono i tetai inangaro tikai i roto i te aronga tana e tuatua ra. (Philipi 2:4) E tereni marie ua iaia kia maani ia ratou kia akakite mai i to ratou manako, kia akarongo ki ta ratou au tuatua, e kia tamou i te au apinga te manata ra ratou. Me akaari mai tetai tangata i te inangaro, e maani atu i te papuritia ou kia tata ki raro i te au akakiteanga tau no runga i te tangata. E taangaanga i taua akakiteanga i te tauturu iaia kia parani i tetai au uriurianga akaou atu.

³ Akapapa Anga kia Oki Akaou: Akara akaou i te atoroanga mua, e akaari atu ki te tangata apiipii e akapeea i te ikianga i tetai tuanga o te karere Patireia te ka rekaia e te ngutuare tangata. (1 Kori. 9:19-23) E akapapa kapiti i tetai akamataanga tuatua poto ua te akaari ra e tai irava Pipiria e kapiti katoa mai tetai parakarapa i roto i te puka apii. Kapiti katoa mai, e akapapa i tetai uianga te ka rauka i te uiia i te openga o te uriurianga kia akanoo i te papaanga no te atoro anga ka aru mai. E akaari ki te papuritia ou e akapeea i te akamaata atu anga i te kite o te tangata ra no te Tuatua a te Atua ma te atoro anga tataki tai te ka aru mai.

⁴ E mea meitaki katoa i te apii i te tangata apiipii i tetai tuatua akamataanga mama ua. I muri ake i te aravei anga i te ngutuare tangata, penei ka karanga aia: “Kua reka tikai au i ta taua pukapukaanga i tera taime akenei, e te oki mai nei au i te akakite akaou atu i tetai akakiteanga Pipiria no runga [taiku i tetai manako].” Ka inangaro katoa paa koe i te akaari i te papuritia ou e akapeea i te pauanga me e tangata ke te ka aere mai ki te ngutupa.

⁵ Maroiroi i te Oki Akaou: E akamaroiroi i te tangata apiipii i te akanoo i te akaraanga meitaki i te oki viviki atu anga ki te katoatoa tei akaari mai i te inangaro. Te rauka anga i te au tangata i te kainga penei ka umuumuia te tamou marie i te oki akaou anga. E apii i te tangata apiipii e akapeea i te akanooanga i te au taime kia atoro akaou, e tauturu iaia kia marama i te inangaro kia oki akaou atu mei tei taputouia. (Mata. 5:37) E tereni i te papuritia ou kia takinga meitaki, kia akamanako meitaki, e kia akangateitei iaia e kimi ra i te aronga mei te mamoe rai te tu e te tatanu ra i to ratou inangaro.​—Tito 3:2.