Tuanga 3—Rave Anga i te Au Apiianga Pipiria Tere ki Mua

Taangaanga Meitaki Anga i te Au Tuatua Tapu

1. Eaa ra tatou ka akamaata atu ei i te au Tuatua Tapu e te rave anga i te au apiianga Pipiria?

¹ To tatou akakoroanga i te rave anga i te au apiianga Pipiria koia oki kia ‘akariro i te pa enua ei pipi’ na te tauturu anga i te au tangata kia marama e kia ariki i te au apiianga no te Tuatua a te Atua e kia akono i te reira i roto i to ratou oraanga. (Mata. 28:​19, 20; 1 Tesa. 2:13) No reira, ka tau te apii kia akamouia ki runga i te au Tuatua Tapu. I te akamataanga, penei e mea meitaki kia akaari ki te aronga apiipii e akapeea i te kimi anga i tetai au irava tikai i roto i ta ratou uaorai kopi o te Pipiria. Akapeea, ra, e rauka ai ia tatou i te taangaanga i te au Tuatua Tapu i te tauturu i taua aronga kia tere ki mua i te pae vaerua?

2. Akapeea tatou i te ikianga e ko teiea te au irava Pipiria ka tatau e ka uriuri?

² Iki i te Au Irava kia Tatau: I roto i taau teateamamao anga, e akara e akapeea te au irava tataki tai tei taikuia ra i roto i te apii e kapiti atura ki te tumu manako no te uriurianga, e iki i reira e teiea taau ka akara e ka uriuri i te tuatau apiianga. Tei matauia, e mea meitaki kia tatau i te au irava te akaari ra i te tumuanga Tuatua Tapu no to tatou au irinakianga. Te au irava te oronga maira i te au akakiteanga takake penei kare e inangaroia kia tatauia. E akamanako ana oki i te au umuumuanga e te au turanga o te aronga apiipii tataki tai.

3. Eaa te puapinga no te taangaanga anga i te au uianga, e akapeea tatou i te rave anga i te reira?

³ Taangaanga i te Au Uianga: Kare e akamarama atu i te au irava Pipiria ki te tangata apiipii ra, e tuku e nana e akamarama mai te reira kia koe. Naau e akakeu atu iaia kia rave i teia na te taangaanga karape anga i te au uianga. Me te kite uaia ra te akonoanga o tetai irava, penei ka rauka ua ia koe i te ui atu e akapeea te irava i te turuanga i ta te parakarapa e akakite maira. I tetai atu au turanga, penei ka umuumuia tetai uianga takake atu me kore tetai au putunga uianga kia arataki atu i te tangata apiipii ki te taopenga anga tau. Me ka umuumuia tetai atu au akatakaanga, ka rauka teia i te akonoia i muri ake i te pauanga a te tangata apiipii.

4. Mei teaa rai te maata o te akatakaanga te ka inangaroia no te au irava ta tatou ka tatau?

⁴ Akono Ngoie ua i te Reira: E umuumu putuputu ana tetai tangata kakao karape e tai ua rai kakao kia puta atu tetai takete. Mei te reira katoa, kare tetai puapii karape e umuumu ana i te au tuatua e manganui kia tuku atu i tetai tumu manako. Ka rauka iaia i te oronga ngoie ua i te akakiteanga, ma te taka meitaki, e te tano tikai. I tetai au taime, penei ka inangaroia koe kia rave i tetai kimikimianga i roto i te au puka Kerititiano kia marama meitaki i tetai irava e kia akataka tika atu i te reira. (2 Timo. 2:15) Inara e kopae i te tautaanga kia akataka atu i te au tu ravarai o te irava tataki tai i roto i te apiianga. E kapiti ua mai i te ka inangaroia kia akono atu i te tumu manako te uriuriia ra.

5, 6. Akapeea tatou i te tauturu anga i te aronga apiipii kia akono i ta te Atua Tuatua i roto i to ratou oraanga, inara eaa ta tatou ka kopae atu?

⁵ Tuku Anga i te Akonoanga Tau: Me te tau ra, e tauturu i te tangata apiipii i te kite e akapeea te au irava Pipiria e akonoia ra kiaia uaorai. Ei akaraanga, i te akamanakoanga ia Ebera 10:​24, 25 i tetai tangata apiipii kare ake rai i aere mai ki te au uipaanga Kerititiano, penei ka uriuri koe i tetai o te au uipaanga e ka pati atu iaia kia aere mai ki te reira. Inara e kopae i te maroanga iaia. E tuku na te Tuatua a te Atua e akakeu iaia kia akono i te angaanga e umuumuia ra i te akamareka atu ia Iehova.​—Ebera 4:12.

⁶ Ia tatou e rave ra i te akauenga kia akariro i te pa enua ei pipi, kia rauka ia tatou i te “akono akarongo” na roto i ta tatou taangaanga meitaki anga i te au Tuatua Tapu.​—Roma 16:26.

Te ka Tuatuaia no te Au Makatini

Te Punanga Tiaki Noe. 15

“Te inangaro ra te maata anga o te tangata i te oraanga kopapa meitaki e tetai oraanga roa. Naringa e ka rauka te reira, ka inangaro ainei koe i te ora e tuatau ua atu? [Tiaki no te pauanga. Tatau i reira ia Ioane 17:3.] Te uriuri ra teia makatini i ta te Pipiria taputou no te oraanga mutu kore. Te akara matatio katoa ra te reira e eaa te tu o te oraanga me akatupu tikai ia taua taputou ra.”

Awake! Nov. 22

“I roto i te 20 mataiti i topa, kua rave maata ia te tereanga ki mua i roto i te maramaanga e te rapakauanga no te AIDS. Inara, e manganui rai te au tangata kare e kite meitaki ana. [Akaari i te pia “Myths About AIDS,” e tiaki no te pauanga.] Te uriuri ra teia makatini e akapeea te au metua i te paruru anga i ta ratou tamariki.” Tatau ia Deuteronomi 6:​6, 7.

Te Punanga Tiaki Titema 1

“Ko tetai tu te akatakake ra te au tangata mei te au manu koia oki ko te tu kite i te kite anga i te tika mei te tarevake. Ma te tangi, e manganui te au tangata te rave ra i te au apinga kino. Eaa toou manako i akapera ei? [Tiaki no te pauanga. Tatau i reira ia Ieremia 17:9 me kore ia Apokalupo 12:9.] Te uriuri ra teia makatini e eaa te ka tauturu ia tatou kia kite e kia rave i tei tika ra.”

Awake! Dec. 8

“Kare te au tereanga ki mua i roto i te technology i taui ana i te tumu umuumuanga tangata no te pirianga oa. Inara te kite ra ainei koe e ka akariro te au tauianga i roto i te taiate ei akaaoanga i teia tuatau nei kia tatanu i te au pirianga oa vaitata ra? [Tiaki no te pauanga. Tatau i reira ia Maseli 18:24.] Te uriuri ra teia makatini e akapeea tatou i te akono anga e te mou ua atu anga ki te au oa tika tikai.”