Rave Anga i te Au Apiianga Pipiria Tere ki Mua

Tuanga 6: Me Ui Mai te Tangata Apiipii i Tetai Uianga

¹ Me akanoo meitakiia ana tetai apii Pipiria, tei matauia e mea meitaki i te akamanako i te au apiianga Pipiria na roto i te tu mako auraka ra kia rererere ua mei tetai tumu manako ki tetai tumu manako. Ka tauturu teia i te tangata apiipii i te patu i tetai tango no te kite tika tikai e kia tere meitaki ki mua i te pae vaerua. (Kolosa 1:9, 10) E putuputu ana, ra te taime, e uiui mai ana te aronga apiipii i te au uianga no runga i te au tumu manako tukeke i te tuatau apii. Akapeea teia i te akonoia anga?

² Kia Kite Meitaki: Te au uianga te kapiti atura ki te apii tei akamanakoia ra ka rauka ua i te pauia i taua taime rai. Me ka uriuriia tetai uianga i muri roa mai i roto i te puka apii, penei ka rava ua i te taiku atu i te reira. Inara, me kare te uianga e kapiti atura ki te manako e apiiia ra me kore ka umuumuia tetai kimikimianga kia pau meitaki atu, penei e mea meitaki atu i te akamanako i te tumu manako i muri ake i te apii me kore a tetai tuatau ke. Te kite ra tetai papaki e na te tataanga i te uianga ki raro te akapapu ra ki te tangata apiipii e te manako pakariia ra tana uianga e te tauturu ra kia kore te apii e aere ke ua.

³ E manganui te au apiianga Pipiria e akamanako poto ua ia ra i roto i ta tatou au puka apii ua nei. Akapeea me te ngata ra i tetai tangata apiipii i te ariki i tetai apii anga tikai me kore te mou ra rai ki tetai irinakianga pikikaa? Penei e mea puapinga i te akamanako atu i tetai atu au puka te uriuri meitaki ra eaa ta te Pipiria e tuatua ra no runga i te reira tumu manako. Me kare rai te tangata apiipii e irinaki ana, akaruke ua i te tumu manako no tetai tuatau ke e tamou ua atu i tana apii rave putuputuia. (Ioane 16:12) Iaia e marama maata maira i te kite no te Pipiria e te tere meitaki ra ki mua i te pae vaerua, penei ka kite mai aia i taua apiianga Pipiria ra.

⁴ Kia Tau Ua: Me kare koe e papu roa ana i te pauanga ki tetai uianga, e kopae i te timataanga i te oronga ua atu i tetai tamanakoanga. (2 Timo. 2:15; 1 Pe. 4:11) Akataka atu e ka kimikimi koe no runga i te tumu tuatua e ka oki akaou mai ma te pauanga. Penei ka rauka ia koe i te taangaanga katoa i taua tuatau ra i te apii i te tangata apiipii e akapeea i te raveanga i te kimikimi anga. E akaari ua rai kiaia e akapeea i te taangaanga anga i te au apinga kimikimi tukeke tei orongaia mai e ta Iehova akaaerenga. Aere rai na roto i teia mataara ka rauka iaia i te pau i tana uaorai au uianga.​—Angaanga 17:11.

Tauturu ia Ratou kia Rauka Akaou Atu Tetai Akakitekite Anga

¹ Ia tatou e oronga ra i te tuatua meitaki, e putuputu ana tatou i te aravei i te au tangata e noo ana i vao ake i to tatou ngai e angaanga ana me kore te tuatua ra i tetai reo ke, kapiti katoa mai te reo akairo. Tetai aronga ke atu kua rekareka meitaki tatou i te au uriurianga Pipiria penei ka neke atu ki vao i to tatou ngai e angaanga ra. Akapeea e rauka ai ia tatou i te akanoo no taua aronga ra kia rauka akaou atu tetai akakitekite anga? Na te taangaanga anga i te pepa Please Follow Up (S-43).

² E putuputu ana te au tangata i te akarongo meitaki mai ki te tuatua meitaki me te orongaia ra te reira i roto i to ratou reo tupuna. (Anga. 22:1, 2) No reira, i te maataanga o te taime, me aravei tatou i tetai tangata te tuatua ra i tetai reo ke, ka tau tatou kia akaki i te pepa noatu me kare rai te tangata e akaari ana i te inangaro i roto i te karere Patireia. Inara, i te ngai e e maata rai te tangata e tuatua ra i te reo tukeke e te rauka putuputu ra i te akakitekiteanga i roto i to ratou uaorai reo, penei kare e umuumuia kia akakiia te pepa tera ua me e inangaro tetai tei akaariia mai.

³ Akaki Anga i te Pepa: E tauta ma te tau kia rauka te ingoa o te tangata, tona atereti, e tona numero terepaoni. E akairo i te maata o te inangaro tei akaariia mai, aea e rauka ai te tangata kia itaeia, te puka tei oake ia atu me kore tei patiia mai, e te reo ta te tangata e marama meitaki ana. I muri ake i te akakianga i te pepa, e oake viviki i te reira ki te tekeretere o te putuputuanga, e ka tuku atu aia i te reira ki te putuputuanga me kore te pupu tau.

⁴ Tuku Atu Anga i te Pepa: Me kare te tekeretere e kite ana e teiea te putuputuanga me kore te pupu tau kia tukuia atu te pepa me kore kare ana atereti no te mere anga, penei ka rauka iaia i te terepaoni atu i te Service Desk i te opati manga kia rauka te akakiteanga e umuumuia ra.

⁵ Me rauka ana i tetai putuputuanga me kore i tetai pupu tetai pepa Please Follow Up tei akakiia, ka tau kia raveia te au akanoonooanga kia atoro vivikiia atu teia tangata. Ia tatou e akono meitaki ra i ta tatou tuanga, ka papu ia tatou e ka akatuera a Iehova i te au ngakau o te aronga “tei inangaro tikai ra i te ora mutu kore.”​—Angaanga 13:48.