Ka Ui ta Tatou Aronga Tatau
E Tika Tikai Ainei Te Tiaporo?
Ae, te apii maira te Pipiria e, e tika rai, e peretana tika tikai a Satani. Inara, te aviri nei te aronga akaapa i te Pipiria i taua akatutuanga ra no te Tiaporo. Te akatutu ua maira a Satani, i te kaveinga o te kino e noo ra i roto i te tangata, i karanga ei ratou.
Ka tau ainei tatou kia poitirere i teia akaoripuanga no runga i te akataka anga tikai ia Satani? Kare roa ia. Ei akatutuanga: Penei ka tama tetai tangata apa i te ture i te iraira o tona mangamanga rima mei te ngai i rave ei aia i te kino kia kore aia e kiteaia, e kia rave ua atu rai aia i tana angaanga aati ture ma te kitea koreia. Mei te reira rai a Satani, te pu o te kino tei mareka ua i te rave i te reira i roto i te muna, i te turuturu anga i te tu tau kore viivii. Kua akataka meitaki mai a Iesu ia Satani e ko te tumu no te au tu kino o te au angaanga a te tangata. Kua kapiki a Iesu ia Satani e ko “te ariki o teianei ao.”—Ioane 12:31.
Noea mai ra te Tiaporo? I te akamataanga, kua angaia aia ei peretana apa kore i te rangi, kua akariro teia angera meameaau iaia uaorai e ko te Tiaporo no tona anoano pakari kia akamori mai te tangata iaia, eiaa i te Atua. Kua rekoti te Pipiria i tetai tuatuaanga i te enua nei, i rotopu ia Satani raua ko Iesu i te akaari anga mai te Tiaporo i tona uaorai akakoroanga noinoi. Kua tauta a Satani i te akanauru ia Iesu “kia akatopa iaia ki raro e akamori” atu iaia.—Mataio 4:8, 9.
Pera katoa, i roto i te au tuatuaanga ma te Atua, tei rekotiia i roto i te puka a Iobu, kua akakite a Satani i tona au akakoroanga. Ka rave aia i tetai ua atu apinga kia akakeu i te tangata kia kopae i te Atua.—Iobu 1:13-19; 2:7, 8.
E akamanako ana: Me kua tuatua ana a Satani ki te Atua, ko Iehova e kia Iesu Karaiti, akapeea i reira a Satani i riro ei e, e manako kino ua e noo ra i roto i te tangata? Kare rava e kino i roto i te Atua me kore i tana Tamaiti! Te taka meitaki ua ra i reira e, e peretana tika tikai a Satani—e vaerua ora kino, kare e akangateitei ana ia Iehova me kore ia Iesu.
Te akapapu meitaki maira te tu kino o te au angaanga a te tangata e e tika tikai te Tiaporo. Te akaruke ua nei te au pa enua o teianei ao i ta ratou au kai toe kia pe ua, i to ratou iti tangata e mate nei i te onge. Te akaputu nei te pa enua i te au apinga tamaki ei akapou i te manganui, no te takore takiri anga. Te akataero nei ratou i te aorangi o te enua. E oti, kare te maataanga o te tangata i kite i te tumu o taua tu rikarika, e te ta ua ra. Eaa te tumu?
Te akaari maira te Pipiria e kua “akapoiriia to ratou ngakau” e Satani. (2 Korinetia 4:4) Ei akakeu i te tu tangata, te taangaanga nei a Satani i tetai akaaerenga kitea koreia. Koia “te mana o te demoni maata ra.” (Mataio 12:24) Mei te pu o tetai pupu tangata rave kino rai, e akaaere ra i tetai aka akaaerenga no te au angaanga kino ma te kore e akaari mai iaia uaorai ki te aronga pouroa e o atura ki te reira, mei te reira tikai a Satani e taangaanga ra i tana akaaerenga kino o te au angera kino, kia akaaere i te tangata e manganui, e noo kite kore ua nei i tana tuanga me kore i tana akakeuanga.
Mei teaa atura ta tatou akameitakianga e kua akataka meitaki mai te Pipiria i te Tiaporo e tana akaaerenga! No reira ka rauka ia tatou i te rave i te au takainga kia kopae atu i te akakeuanga a te Tiaporo. Te ako maira te Pipiria ia tatou e: “E kauraro atu kotou i te Atua. E patoi atu i te diabolo, e nana e rere ke atu.”—Iakobo 4:7.