E Aere Kapiti ma te Kariota o Iehova i te Rangi Ra
“E ko taku nei au tuatua taau e karanga atu kia ratou, to ratou akarongo anga, e te kore anga.”—EZEKIELA 2:7.
1, 2. Eaa te pereoo ariki ta Ezekiela i kite ra, e eaa tei tuatuaia atu kiaia?
TE TU nei to Iehova kariota i te rangi ra i teianei ki mua i tona au tavini. Ma to ratou mata o te akarongo, te kite ra ratou i te reira apinga apai ariki no to ratou Atu Ngateitei. E kaka ia, e mea mataku, e teitei.
2 Kua tapu mai taua kariota o te ariki ra ki mua i te peroveta a te Atua koia a Ezekiela na roto i te orama i etai 2,600 mataiti i topa. Mei runga mai i teia kariota apai terono aere—koia te akaaerenga a te Atua i te rangi no te au mea ora vaerua ra—kua tuatua mai a Iehova i teia akauenga umere tikai kia Ezekiela: “E puke tamariki uouomatoa oki ratou, e te ngakau ketaketa Te tono nei au ia koe kia ratou; e ka karanga atu koe kia ratou, Te na ko maira te Atu ra ko Iehova. E ko ratou, to ratou akarongo anga, e te kore anga, e ngutuare meameaau rai oki ratou, e kite rai ratou e, e peroveta tei noo ana i rotopu ia ratou.”—Ezekiela 2:4, 5.
3. Eaa tei akatutuia maira e Ezekiela no teia tuatau nei?
3 Kua rave papu a Ezekiela i te reira angaanga, i te tavinianga koia anake ua i roto i te rima o te Atua ra. Mei te reira katoa, e apinga akaaere okotai ua ta te Atua i teianei nana e akatere ana. Ko te pupu Ezekiela, koia te toenga o te aronga akatainuia ra, ko ratou te aere ra na mua i te rave i te angaanga oronga i te akakite anga openga, ma te “urupu maata” o te au “mamoe ke atu” te tauturu ra e pini ua ake. (Apokalupo 7:9, 10, NW; Ioane 10:16) Kapiti katoa ratou “kia okotai oki anana,” ma te Tiaki mamoe Meitaki, koia a Iesu Mesia, i te aratakianga ia ratou i raro ake i te turanga ngateitei o Tei Akaoro ra i te Kariota meitaki, koia te Atua ko Iehova.
4, 5. I akapeea te tupu mai anga ta te Atua ra akaaerenga akara mataia, e eaa tana i kite tei rotai ra ki ta Isaia 60:22 tuatua?
4 I raro ake i ta Iehova arataki anga, kua tupu teia akaaerenga no te ao katoa nei mei te au akamata anga meangiti ua e kia riro mai ei rima rave ririnui i te akakiteanga i te akauenga “ka mataku i te Atua, e akakakā iaia; kua tae oki ki te ora akautunga anga nana.” (Apokalupo 14:7) Mei ia Ezekiela rai e kare nana i akatu me kare i akamana iaia uaorai ei peroveta, mei te reira katoa oki te akaaerenga akara mataia a te Atua ra kare nana i anga me kare i akamana iaia uaorai. Kare ia i tupu mai no te anoano o te tangata nei me kare no tana tauta anga. Na Tei Akaoro i te Kariota o te Atua ra i rave i teia akaaerenga kia tupu. Na te vaerua o te Atua i akamaroiroi e na te au angera tapu ra i turu, kua kite te au tangata o Iehova i te totoa anga umere tikai e kua riro tei ‘mea ngiti poepoe ei enua maroiroi ia.’—Isaia 60:22.
5 E tere atu i te 4,000,000 au Kite o Iehova te akakitekite nei i te tuatua no te Patireia i te 212 au enua katoa. Kua akaputuia ratou ki roto i te au putuputuanga e tere atu i te 63,000 e kua akanoonooia te au kotinga e te au tapere katoa oki. E maata te au opati manga e te au ngai neneianga te angaanga nei i raro ake i te arataki anga a te Pupu Akaaere ko ratou a rotopu i te akaaerenga o te opati maata ra. Mei te mea rai okotai ua tangata ma ratou katoa, te aere katoatoa ra ki mua, ma te tutuanga i te tuatua meitaki, i te apiianga i te aronga te ka akarongo, te akatuanga i te au are uipaanga. Ae, te aere kapiti tamou atura te akaaerenga akara mataia a Iehova ma taua kariota i te rangi ra ma tona Akaoro katoa oki.
6. Eaa te o atura ki te aere kapiti anga ma ta Iehova akaaerenga akara mataia?
6 Me ko koe tetai o te au Kite o Iehova, te aere kapiti ra ainei koe ma te akaaerenga akara mataia a te Atua ra? Kare te raveanga i te reira i te aere ua anga ki te au uipaanga Kerititiano e te akapouanga te taime i te angaanga tutu aere. Te mea mua, ko te aere anga ko te tere anga ia ki mua e te tupu anga i te pae vaerua. Te o maira te manako anga papu tikai, te akanooanga tika i te au mea maata ki mua e te kore katoa e topa ki muri i te kite. Me te aere kapiti ra tatou ma te kariota o Iehova i te rangi ra, te taokotai ra to tatou oraanga ma te tuatua i ta tatou e akakitekite ra.
7. Eaa ra i meitaki ei kia akamanako i to Ezekiela tu akono ei peroveta na te Atua ra?
7 No runga i te aere kapitianga, e maata ta te au tavini o Iehova i teia tuatau nei te ka kite mei te akaraanga o Ezekiela. Noatu rai e e peroveta taka ke na Iehova tona akataoonga angaia, i vai ana to Ezekiela au manako ngakau, te au manamanata, e te anoano oki. Ei akatauanga, e tangata ou ra aia e kua akaipoipoia, kua mamae aia i te mii i te matenga o tana vaine. Inara, kare i kore tona manako no tana angaanga ei peroveta na Iehova. Na te akamanakoanga i akapeea ta Ezekiela akono anga iaia uaorai i etai au tu katoa ra, ka rauka ia tatou i te akamaroiroi ia tatou uaorai kia aere kapiti atu ma te akaaerenga akara mataia a te Atua ra. E na teia e raukai ia tatou kia aere kapiti atu ma tana akaaerenga akara koreia ra.
Arikiia te Angaanga e Kua Akatupuia
8. No runga i tana angaanga, eaa te akatauanga ta Ezekiela i akanoo mai?
8 Kua akanooia e Ezekiela te akatauanga meitaki i te arikianga i tana angaanga e te akatupuanga i te reira. Inara, kua umuumuia te akarongo e te maroiroi no te rave i te reira, no te mea ka tatau tatou: “E ko koe, e te tamaiti a te tangata na, auraka e mataku atu ia ratou, auraka oki e mataku i ta ratou tuatua, tei ia koe oti te au rakau taratara e te tataramoa, e kua noo oti koe ki rotopu i te au sekopio: auraka e mataku i ta ratou tuatua, auraka oki e kakaravi i to ratou mata, e ngutuare meameaau rai oki ratou. E ko taku nei au tuatua taau e karanga atu kia ratou, to ratou akarongo anga, e te kore anga: e aronga meameaau oki ratou. Ko koe ra, e te tamaiti a te tangata na, e akarongo mai koe i taku e karanga atu kia koe nei; Auraka koe e meameaau, mei taua ngutuare meameaau nei.”—Ezekiela 2:6-8.
9. Na te rave anga anake i teaa ka kore ei a Ezekiela e akaapaia i te toto?
9 Kare a Ezekiela kia manako ngakau kore ua me kare kia mataku, ma te umuumuanga kia ko putuputuia kia akatupu i tana angaanga. Kare aia e apa i te toto me ka rave maroiroi ua atu aia ma te mataku kore i te tuatua anga i te au tuatua a Iehova. Kua akakiteia atu kia Ezekiela e: “Kia ako ra koe i te tangata kino ra, e kare aia i ariu mai i tona ra kino, e i te aerenga kino nona ra, ka mate aia i tana ra ara, kua akaora ra koe ia koe uaorai.”—Ezekiela 3:19.
10. I akapeea te pupu Ezekiela i te akapapu anga e te aite ra ratou ki taua peroveta ra?
10 Mei ia Ezekiela rai, kua ariki te pupu Ezekiela tei akatainuia ra i ta ratou angaanga tei orongaia maira e te Atua e te akatupu ra i te reira. Me e Kite tatou no Iehova, ka tau kia maara tatou e ko to tatou oraanga e te oraanga o etai ke atura tei runga i to tatou akarongo te akamou anga. (1 Timoteo 4:15, 16) Ka anoanoia te au Kite tataki tai kia aere kapiti ma te akaaerenga a Iehova. Kare te Atua e tapeka atu ia tatou ki tona kariota e ka kukume aere ei ia tatou. Ko te manako ngakau kore e te ngakau rua te akameangiti ra i Tei Akaoro i te Kariota. No reira te akamaroiroi maira te akaaerenga akara mataia a Iehova ia tatou kia tamou i te manako i te Atua ki rotopu i to tatou oraanga. Na te tinamou o te manako ki te reira akamaroiroi anga e tamou ia tatou kia aru piri vaitata te takainga ma te akaaerenga a te Atua e ka akamaata atu i ta tatou angaanga tapu orometua ki runga ake i te ravenga, e te angaanga tei matauia ana. E mea tika e, ko te katoa anga o te au tangata o Iehova te akaari ra i te tu akono meitaki. Ko ta tatou tuanga tataki tai ko te tamou i te aere anga.
Raveia te au Tuatua a te Atua ki Roto i te Ngakau
11. Eaa te akatauanga ta Ezekiela i akanoo mai no runga i te au tuatua na te Atua ra?
11 Kua akanoo katoa a Ezekiela i te akatauanga meitaki na te raveanga i te au tuatua a te Atua ki roto i tona ngakau. I te akaue anga mai, kua kai aia i te pokai me kare te pokaikai tuatua, tei orongaia maira e te Atua. Kua karanga a Ezekiela e: “mei te meli te tu i toku nei vaa i te venereka.” Noatu rai e kua ki taua pokai ra i “te evakaku, e te mii, e te aue,” e venereka ia kia Ezekiela no te mea kua ariki aia te ngateitei i te tuatuaanga na Iehova. E tupuanga reka ki te peroveta ra te akatupu anga i tana angaanga no ko mai i te Atua ra. Kua tuatua atura te Atua kiaia: “E te tamaiti a te tangata na, ko te au tuatua katoa naku, taku e karanga atu kia koe ra; ka āriki mai i roto i to ngakau na, e akarongo mai oki to taringa.” (Ezekiela 2:9–3:3, 10) Na te reira au orama i akariro kia matakite tikai a Ezekiela i ta te Atua ra i akatika nana kia rave e kua akamaroiroi maira i tona pirianga ma Iehova.
12. Eaa ta Ezekiela i rave i te tuatau e tere atu i te rua ngauru mataiti o tana angaanga ei peroveta?
12 Kua orongaia atu te au orama e te au tuatua kia Ezekiela no te au akakoroanga ke ke e te au tu tangata tei akarongorongo atura. Kua tau aia kia akarongo marie e ei reira ka tuatuaʼi e ka rave ei mei tei akakiteia maira. Kua akakiteia atu kiaia te au akakite anga ou e te au ravenga katoa i etai 22 mataiti o tana rave anga angaanga ei peroveta. I etai taime kua tuatua a Ezekiela i te akakite anga tei akataka tikaia mai te au tuatua ra. I etai atu taime, kua rave aia na roto i te tu nuku rai, mei te takotoanga ki mua i te toka karakaraea ra ei akatutuanga ia Ierusalema. (Ezekiela 4:1-8) Ko tana akatauanga no te au apinga nona uaorai, mei tana i rave ra i te matenga tana vaine, e akakite anga katoa ia. (Ezekiela 24:15-19) Kua tika ra kia tano tana rave anga, kia oronga aia i te akakite anga tika e te rave anga i te angaanga tika i te tuatau tika katoa ra. Kua tapekaia a Ezekiela ki roto i tetai pirianga vaitata roa i te rave anga angaanga kapiti atu ma Iehova.
13. Akapeea e raukaʼi ia tatou i te akatupu i te pirianga vaitata ma Iehova?
13 Mei te reira katoa oki, kia patu e kia tamou marie i te pirianga vaitata ma Iehova ei oa rave angaanga nona, ka tau tatou kia tuku i te Tuatua a te Atua ki roto i to tatou ngakau. (1 Korinetia 3:9) Te aere kapiti anga ma te akaaerenga akara mataia a te Atua na teia tu te umuumuia nei tatou kia akono kia tau ki te aere anga mai o te kaikai vaerua i te oronga anga mai i te tuatau tau ra. (Mataio 24:45-47) Te totoa tamouia nei te “reo ma.” (Zephania 3:9, NW) Na to tatou aere anga kapiti anake e raukai ia tatou i te akono i te akarongo tika ki te arataki anga a Tei Akaoro i te Kariota ra.
14, 15. Eaa te ravenga tau e raukai te aere anga kapiti tei akanooia maira e te akaaerenga a te Atua ra?
14 Kia tupu ei te reira, ka tau rai tetai ravenga na tatou uaorai no te pure, te apii, e te rave i te angaanga tapu i te tutu anga i te tuatua meitaki. (Roma 15:16) E tamanako ana i ta Ezekiela akatauanga i te kai anga i te pokaikai tuatua na te Atua ra. Kua apuku atura Ezekiela i taua pokaikai katoa ra, kare e e tuanga ua no te reira. Kare aia i iri me kare i iki ua i te au ngai tei meitaki ra ki tana tongi anga. Mei te reira katoa ta tatou apii tataki tai anga i te Puka Tapu e te au puka Kerititiano ka tika rai kia akapapaia kia kapiti atu ki te tae anga mai o te kaikai vaerua, e ka tau tatou kia kai i te au mea ravarai te tukua mai ra ki runga i te kaingakai vaerua ra, kapiti katoa anga i te au tuatua mou oonu.
15 Te tauta ra ainei tatou ma te pure kia marama i te aite anga o te kai pakari ra? Ko te aerenga kapiti te anoanoia ra to tatou kite e te marama kia tupu kia tere atu i to te au apiianga mua ra, ka tatau tatou e: “Ko tei kai katoa oki te u anake ra, kare ïa i pakari i te tuatua-tika ra: e kaiu rai aia. Kareka te kai pakari ra, na te tangata pakari ïa, na te aronga no te mātau i kite ei to ratou ngakau i te meitaki e te kino.” (Ebera 5:13, 14) Ae, ko te tupu anga i te pae vaerua e tuanga puapinga maata ia no te aere kapiti anga tei akanooia mai ra e te akaaerenga a te Atua.
Kare e Paruparu no te Manako Koreia
16, 17. Eaa ta Ezekiela i rave no te manako koreia mai, te aviriia, e te kore e akarongoia?
16 Kua akanoo katoa a Ezekiela i te akatauanga meitaki na te akarongo e kare i tuku iaia uaorai kia paruparu no te manako koreia me kare no te aviriia. Mei te reira katoa, na te aere kapiti anga ma te tupu anga o te reo ma ra, te aru ra tatou i te arataki anga tei akanooia maira e te Akaoro Kariota ariki ra. E no reira kua papa tatou kia aru i tana au akauenga, kua akamaroiroiia kia kore e akaparuparuia no te manako kore me kare no te aviriia mai e te aronga ta tatou e tuatua atura i ta Iehova akakite anga akavaanga. Mei ia Ezekiela rai, kua akamatakite mai te Atua ia tatou e ka patoi mairai tetai papaki tangata, no te upoko maro e te ngakau maro. Ko tetai papaki kare e akarongo no te mea kare ratou e inangaro kia akarongo atu kia Iehova. (Ezekiela 3:7-9) Te vaira tetai aronga e au pikikaa, mei ta Ezekiela 33:31, 32 e akakite maira: “E te aere maira ratou kia koe mei toku iti tangata i aere maira, e te noo ra ratou ki mua ia koe ra mei toku iti-tangata ra, e te akarongo ra ratou i to au tuatua, kare ra ratou e rave i taua au tuatua ra: te maata ra to ratou aroa vaa ua, te riro atura to ratou ngakau ki ta ratou apinga. E i na, kua riro koe mei te peʼe inangaro maataia no ratou ra, e mei te tangata reo meitaki ra, e tei tika kia akatangi meitaki i te apinga tangi ra: te akarongo ra oki ratou i taau au tuatua, kare ra ratou e rave i taua au tuatua ra.”
17 Eaa te ka tupu? Te tapiri maira te Ezekiela 33 irava 33 e: “Kia tupu ra te reira ra, i na, e tupu mairai, ei reira ratou e kite ei e, e peroveta tei tae mai i rotopu ia ratou ra.” Te akakite maira taua au tuatua ra e kare a Ezekiela i akamutu ua no te kore i akarongoia mai. Kare te manako ngakau kore o te au tangata ra i riro ei akamanako ngakau kore iaia. Noatu me ka akarongo mai te au tangata e me kare ra, kua akarongo aia i te Atua e kua akatupu i tana angaanga.
18. Eaa nga uianga tau naau kia ui kia koe uaorai?
18 Te rave maata atura te akaaerenga akara mataia a Iehova i teianei i te akakitekite anga e kia mataku te au tangata ravarai i te Atua ra e kia akakaka iaia. Te rave tamou atura ainei koe me ka akaapaia mai no toou tu mataku kore i te raveanga i te akakite aere i te Patireia, e no te mako o toou tu oraanga? Te tu ngaueue kore ra ainei koe me ko koe te takete no te taomianga no te kore e akatika i te rave i te toto, no te kore e akamori i te au akatutu anga no te enua, no te kore e akono i te au orote o teianei ao?—Mataio 5:11, 12; 1 Petero 4:4, 5.
19. No te arataki anga, eaa ta tatou ka rave kia aere kapiti atu ei ma te kariota o Iehova i te rangi ra?
19 Kare teia i te mataara ngoie ua, inara ko te aronga te ka rave tamou ua atu e tae roa ki te openga ka ora ia ratou. (Mataio 24:13) Ma ta Iehova tauturu ra, auraka tatou e tuku i te au tangata o teianei ao kia akariro ia tatou kia aite atu kia ratou ra, e kia kore tatou e aere kapiti katoa ma te kariota o Iehova i te rangi ra. (Ezekiela 2:8; Roma 12:21) Me te aere kapiti ra tatou ma te akaaerenga a te au angera mei te kariota rai te tu, ka viviki ua tatou i te aru i te arataki anga e te apiianga no ko mai i te akaaerenga akara mataia a te Atua ra. Te oronga maira a Iehova i tei anoanoia no tatou ei paruru atu i te au patoi anga i to tatou akarongo, kia tamou i ta tatou mou anga i te Tuatua ora, e kia tamou i to tatou mata ki runga i te au mea vaerua tikai te manako atura ki te Ariki Akaoro o te kariota i te rangi ra.
Akakeuia Kia Aere Kapiti
20. Eaa etai apinga tei tataia ra e Ezekiela te ka tau kia akakeu ia tatou kia aere kapiti?
20 Ka tau rai te au orama a Ezekiela kia akakeu ia tatou kia aere kapiti. Kare aia i akakite anake ua i ta te Atua au akakite anga akautunga no Iseraela mari katoa ra kua tata aia i te au totou no te akaoki akaou anga. Kua tou atura Ezekiela ki Tei iaia ra te tika kia tutara ki rungao i to Iehova terono a te tuatau tau ra. (Ezekiela 21:27) Ko te reira Ariki Tavini, ko “Davida,” nana e akaputu akaou i to te Atua au tangata e nana e tiaki ia ratou. (Ezekiela 34:23, 24) Noatu rai e ka tamakiia mai ratou e Gogo o Magoga ra, na te Atua e akaora ia ratou, e ka oparaia Tona au enemi kia ‘kite ia Iehova’ noatu rai e te topa atura ratou ki te akapouanga. (Ezekiela 38:8-12; 39:4, 7) Ei reira to te Atua au tavini ka rekarekaʼi i te ora mutu kore ki roto i te akatereanga o te akamori anga mou te kapiti ra i te iero vaerua. Ka riro te au vai ora te ka tae mai no te ngai tapu ra ei tumu no te akamatutu anga e te akaoraanga, e ka akatuangaia ratou i te kotinga enua ei akameitakianga no ratou.—Ezekiela 40:2; 47:9, 12, 21.
21. Eaa ra i maataʼi te turanga o te au Kite o Iehova i teia tuatau nei, i to Ezekiela ra?
21 Mei teaa ra te rekareka o Ezekiela i te tata anga i taua au totou nei! Inara, ko te angaanga a te au Kite o Iehova i teia tuatau nei e maata atu ia. Te ora nei i te tuatau te akatupuia nei tetai papaki o taua au totou ra. Ko te tika e, e aronga angaanga katoa tatou i etai o teia au akatupu anga. Na to tatou tu oraanga, te akaari nei ainei tatou i te manako papu e te tutara nei a Iesu i teianei e koia te pu tikai? Te papu ra ainei to tatou manako tatakitai e kare e roa atu ka akatapu a Iehova iaia uaorai e ka akaora atu i te aronga te aere kapiti ra ma tana akaaerenga ki roto i tana ao ou? (2 Petero 3:13) Na te reira manako anga papu, kapiti katoa te au angaanga akarongo, te akakite maira e te aere kapiti ra tatou ma te kariota o Iehova i te rangi ra.
E Tamou i te Aere Kapiti Anga
22. Eaa te ka rauka kia rave ei kopae atu i te au manamanata kia tamouiaʼi te akara anga meitaki no te tuatau ki mua?
22 I te mea kua ‘tuku tatou i to tatou rima ki te arote’ auraka tatou e akara ki muri ma te inangaro anga i te au mea te orongaia maira e teianei ao. (Luka 9:62; 17:32; Tito 2:11-13) No reira e akakore tatou i etai ua atu manako no te akaputu apinga i te enua nei, e kia meitaki to tatou mata, kia akara i te Patireia ra. (Mataio 6:19-22, 33) Na te akakoreanga i te manamanata no to tatou oraanga, te kopaeanga i te au teiaa te ka rauka kia akarukeia, ka tauturu ia tatou kia aere kapiti ma te akaaerenga a Iehova. (Ebera 12:1-3) Ka rauka i te au tamanata anga i te akakino i to tatou akara anga i te kariota i te rangi ra e Tei Akaoro oki i te reira. Inara ma tana tauturu, ka rauka ia tatou i te tamou i te akara anga meitaki i te pae vaerua, mei ta Ezekiela rai.
23. Eaa ta te au Kite tiratiratu ka tau kia rave no te aronga ou ra?
23 Ko tetai tuanga o ta tatou apainga ei au Kite no Iehova te tapiri maira i te tauturuanga i te aronga ou e manganui kia aere kapiti ma to te Atua kariota i te rangi ra. I te 1990 e vaitata i te 10,000,000 tei aere atu ki te Oroa Akamaaraanga i to Iesu Mesia matenga. I te mea e manganui o teia aronga tatakitai te aere ra ki etai uipaanga tokoiti ua a te au Kerititiano, ka tau ratou kia kite i te puapinga maata o te aere anga ki mua ma te akaaerenga akara mataia a Iehova. Ei au Kite tiratiratu, ka rauka ia tatou i te tauturu atu ia ratou na te vaerua ta tatou ka akaari e te akamaroiroi anga ta tatou e oronga atu.
24. Eaa te mea meitaki na tatou kia rave i teia tuatau kua tae ki tona take?
24 E au tuatau teia kua tae ki tona take. Ma te mata o te akarongo, kua kite tatou i te tapu anga mai te kariota i te rangi ra ki mua ia tatou. Kua oronga mai te Ariki Akaoro Kariota ra i tana akaaerenga akara mataia i tetai akauenga kia tutu aere ki to te pa enua ravarai, e i te openga ra, ka kite ratou e koai tikai a Iehova. (Ezekiela 39:7) E rave kia rauka te meitaki maata rava no teia tuatau kia piri atu ki te akatika anga i to te Atua ngateitei e te akatapu anga i tona ingoa tapu na te aere kapiti anga ma te kariota o Iehova i te rangi ra.
Akapeea Koe Me Pau?
◻ Eaa ta Ezekiela akatauanga i akanoo maira no tana angaanga?
◻ Eaa te aiteanga e kia aere kapiti ma ta te Atua ra akaaerenga?
◻ Eaa to Ezekiela manako no ta Iehova au tuatua ra?
◻ Akapeea e raukai ia tatou kia aru i ta Ezekiela akatauanga i te akakoromaki anga i te tu manako koreia maira?
◻ Eaa te mea tau ei akakeu i te au tavini o Iehova kia aere kapiti atu ma tona kariota i te rangi ra?
[Au Tutu i te kapi 15]
Eaa te umuumuia ra kia aere kapiti atu ei ma to Iehova kariota i te rangi ra?
[Tutu i te kapi 16]
Kua ariki a Ezekiela i tana au akameitakianga no ko mai i te Atua ra. Te pera nei ainei koe?