APII 6

Akataka i te Apiianga i Roto i te Irava

Angaanga 17:2, 3

MANAKO MAATA: Auraka e tatau ua i tetai irava e oti neke atu ki tetai manako ke. Akapapu e kua mārama te tangata eaa te manako maata i roto i te irava e te manako taau e inangaro ra ia ratou kia kite.

PEEA ME RAVE I TE REIRA:

Iki i te au kupu te ka turu i taau tumu manako. Me oti ia koe te tatau i tetai irava, akaira i te au kupu te ka turu i taau tumu manako. Ka rauka ia koe te rave i te reira na te taiku akaouanga i te reira au kupu, me kore, ui i tetai uianga kia akamanako te tangata eaa te au kupu puapinga.

Me e tuke ke te au tuatua taau ka taangaanga ei akamārama i te manako i roto i te irava, akapapu e ka mārama rai te tangata i taau tumu manako.
Akataka eaa te au manako maata. Me ka anoanoia koe kia tatau i tetai irava, akamārama eaa te apiianga i reira e turu ra i taau tumu manako.

Ia koe e akamārama ra i tetai irava, e akatuera ua i taau Pipiria. Me pera koe, ka akatuera rai te katoatoa i ta ratou Pipiria, e ka kite ratou eaa taau e akamārama ra.
Akamārama eaa te apiianga. Eiaa e tuatua i tetai au manako kare e turu ana i taau e uriuri ra. Akamanako eaa ta te tangata i mārama no runga i taau tumu manako, me kore i taau manako maata. Ka rauka i reira ia koe te kimi eaa atu tetai au ravenga ei akamārama meitaki i taau tumu manako.