Akapeea Koe me Akapapa no te Akamaaraanga?

Akamata a teia mataiti, ka rauka ia tatou i te akapapa meitaki no te Akamaaraanga i to Iesu matenga. Me tano mai te Akamaaraanga ki tetai rā ua o te epetoma, kare e raveia ta tatou Uipaanga Oraanga Kerititiano e te Angaanga Orometua. Me topa ki te openga o te epetoma kare e raveia te akoanga e te apii Punanga Tiaki. Ka rauka ainei ia koe i te taangaanga meitaki i toou taime ki teia akanoonooanga? Mei te anere mataiti mua, ka akapapa meitaki tatou no teia akakoroanga puapinga. (Luka 22:7-13; km 3/15 1) Inara ka anoanoia tatou kia rave i tetai au mea ke atu e puapingaia ai teia. Eaa ta tatou ka rave?

• Akamanako i te puapinga me tae ki teia akakoroanga.—1 Kori. 11:23-26

• Kimi matatio i toou uaorai pirianga vaitata kia Iehova na roto i te pure.—1 Kori. 11:27-29; 2 Kori. 13:5

• Tatau e te akamanako i te au irava e akamārama maira i te puapinga o te Akamaaraanga.—Ioa. 3:16; 15:13

Tetai au taeake e tatau e te akamanako ana i te tatau anga Pipiria no te Akamaaraanga i roto i te puka Akara Matatio i te Tuatua Tapu i te au Rā. E taangaanga ana tetai pae i te au akanoonooanga mei roto i teia pia i raro nei. E ko tetai pae e akamanako ana ratou i te au apii mei roto i te Punanga Tiaki te uriuri ra i to Iehova e to Iesu aroa e akaari nei no tatou. Noatu taau au apii ka iki koe, kia riro te reira i te akavaitata atu ia koe kia Iehova e tana Tamaiti.