Au Akaaere Kia Tiaki i te Anana

I TE tuatau o tana angaanga orometua i te enua nei, akakite a Iesu e koia “te tiaki mamoe meitaki.” (Ioa. 10:11) Te akara anga i te urupu e aru maira iaia, “aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.” (Mata. 9:36) Kua kite a Petero e te au apotetoro e te manamanata ra aia. Tuke takiri to Iesu tu mei to te au tiaki pikikaa o Iseraela tei akaruke i te anana kia pueurikiriki e kia onge i te Tuatua a te Atua! (Eze. 34:7, 8) To Iesu akaraanga meitaki i te apii e te akono i te mamoe, e te oronga i tona oraanga no ratou, kua apii te reira i te au apotetoro kia tauturu i te aronga akarongo kia oki mai kia Iehova, ‘te tiaki, te episekopo, o to ratou oraanga.’—1 Pete. 2:25.

² Te tuatua anga kia Petero i tetai atianga, kua akaari mai a Iesu e mei teaa te puapinga o te angai e te tiaki i te mamoe. (Ioa. 21:15-17) Kare ekoko kua tūkia to Petero ngakau e kua ako aia i te aronga pakari i roto i te putuputuanga Kerititiano mua kia “angai i te anana a te Atua i roto ia kotou na, ka rave i te taoonga tiaki auraka ra no te akaueue, no te anoano ra; auraka no te apinga tika kore ra kia rauka, no te tae tikai ra o te ngakau; Auraka ma te akaueue ua ki runga i te tuanga a te Atua ra, ei kaveinga ra kotou no te anana.” (1 Pete. 5:1-3) Tau katoa teia tuatua a Petero no te aronga pakari o te putuputuanga i teia tuatau. Te aru anga i to Iesu akaraanga, kua tavini ratou ma te ngakau tae e te maroiroi, i te arataki i te anana i roto i te akamorianga a Iehova.—Ebe. 13:7.

³ Kia akameitaki tatou i teia au akaaere i roto i te putuputuanga tei akamanaia e te vaerua tapu. Puapingaia nei tatou no ta ratou tauturu. Te akamaroiroi e te akono nei ratou i te katoatoa i roto i te putuputuanga. Te angaanga pakari ra ratou i te akaaere i te uipaanga i te au epetoma, kia matutu te katoatoa i roto i te akarongo. (Roma 12:8) Kua riro ta ratou paruruanga i te anana ei akatupu i te turanga tinamou kia kore te anana e tatipakeia e te aronga akono kore i te Atua. (Isa. 32:2; Tito 1:9-11) To ratou akaraanga i roto i te angaanga orometua, kua riro ei akamaroiroi ia tatou kia tutu ua rai te tuatua meitaki. (Ebe. 13:15-17) Oronga mai a Iehova i teia au tareni i roto i te tangata, ei akamatutu i te putuputuanga.—Ephe. 4:8, 11, 12.

AU TU TEI ANOANOIA I ROTO I TE AU AKAAERE

⁴ Ei akapapu e kia akono meitakiia te putuputuanga, ka anoanoia te au tangata tei ikiia ei au akaaere, kia rotai to ratou tu ki te au umuumuanga a te Tuatua a te Atua. Me kua tukatau ratou, ka tau i reira kia karangaia e kua akamanaia ratou e te vaerua tapu. (Anga. 20:28) I roto i te Tuatua a te Atua, e teitei te turanga tei akanooia no te au akaaere Kerititiano, no te mea e apainga maata teia i mua i te aroaro o Iehova. Inara no to ratou inangaro mou ia Iehova e to ratou rekareka kia taangaanga aia ia ratou, te akaari maira teia e ka rauka ia ratou noatu te teitei o Tona turanga. Ka taka ua ki te katoatoa e e au tangata mako teia au akaaere i te akono i te ako a te Pipiria i roto i to ratou oraanga.

⁵ I roto i tana reta mua kia Timoteo e Tito, kua akakite mai te apotetoro ko Paulo i te au kaveinga tei anoanoia kia aru te au akaaere. I roto ia 1 Timoteo 3:1-7, te na ko ra e: “Kia inangaro tetai tangata i te taoonga episekopo ra, kua inangaro aia i te angaanga meitaki. Ei tangata apa kore ra te episekopo e tikaʼi, ei tangata vaine okotai, e te maroiroi, e te akono meitaki, e te noo marie, e te kite i te tangata ke ke, e te tau kia apii; Eiaa e tangata inu ua i te wina, eiaa ei tangata momoto, eiaa e morimori apinga; ei tangata maru ra, eiaa ei tangata tauetono, eiaa ei noinoi moni; Ei arataki meitaki i tona uaorai ngutuare ra, e tana au tamariki i te kauraro marie anga iaia: (Ko te tangata oki kare i kite i te arataki i tona uaorai ngutuare, eaa e tikaʼi iaia kia tiaki i te ekalesia a te Atua?) Auraka ei tangata akarongo ou ua mai, ko te akateiteiia aea aia e te nengonengo, e rokoia iora aia i te akaapa i akaapaiaʼi te diabolo ra. Ei rongo meitaki oki tona i te aronga ki vao ra e tikaʼi; ko te rokoia aea aia i te akakino, e te ereere a te diabolo.”

⁶ Kua tata a Paulo kia Tito e: “I vaoo ei au ia koe i Kereta na, kia akameitaki koe i tei toe ra, kia akataoonga i te aronga orometua i te au oire katoa ra mei taku i ikuiku ia koe na: Ko te tangata apa kore, vaine okotai ra, e te tamariki akarongo, kare i tapepeia i te kaimoumou, e te akongata. Ei tangata apa kore te episekopo e tikaʼi, mei te akaaere a te Atua ra; auraka ei tangata māro i tona uaorai inangaro, auraka e riri ua, auraka te inu maata i te wina, auraka ei tangata momoto, auraka ei morimori apinga i te mea tika kore; Ei tangata ou meitaki i te tangata, e te tau atu i te tangata meitaki, te akono meitaki, te tuatua-tika, te tapu e te noo marie; E te tāpu piri tikai i te tuatua-mou, i apiiia atu iaia ra, kia tika iaia kia apii i te tuatua ora, kia akakite atu i te ara a te aronga i patoi maira.”—Tito 1:5-9.

⁷ Noatu te akaraanga ngatā o teia au umuumuanga a te Pipiria no te au akaaere, eiaa te au taeake Kerititiano e tāpupu i te akaari i to ratou inangaro no te reira. Me akaari ratou i te au tu memeitaki tei anoanoia no te au akaaere, ka akamaroiroi te reira i etai ke i roto i te putuputuanga kia akapera rai. Kua tata a Paulo e ko taua ‘meitaki i roto i te tangata,’ i orongaia mai ‘kia tau te aronga tapu no te angaanga orometua, kia meitaki oki te kopapa o te Mesia ra: Kia riro tatou ravarai ei tangata pakari, i te akarongo okotai, e te kite i te Tamaiti a te Atua ra, i te Mesia.’—Ephe. 4:8, 12, 13.

⁸ Kare te au akaaere i te tamariki me kore i te au tangata ou i roto i te tuatua mou. Kua kite ratou i te tu o te oraanga Kerititiano, e kite maata to ratou e te karape no runga i te Tuatua a te Atua, e te akaperepere i te putuputuanga. E au tangata ngakau toa ratou i te ako e te akatikatika i te aronga rave ara, te paruru i te anana mei tetai ua atu te ka akaturori ia ratou. (Isa. 32:2) Mataora te au taeake i roto i te putuputuanga i te āriki i teia au akaaere no to ratou tu akaperepere e te takinga meitaki i te anana a Iehova.

⁹ Te aronga tei tau kia ikiia ei au akaaere, ka aru ratou i te kaveinga o te Pipiria i roto i to ratou oraanga. Me e tangata akaipoipo aia, ka aru aia i te au turanga Kerititiano no runga i te akaipoipo, koia oki, ei tangata vaine okotai, ei arataki meitaki i tona uaorai ngutuare. Me e tamariki tana i roto i te akarongo tei kauraro marie kiaia e kare i tapepeia i te au peu viivii e kare e akarongo kore, ka rauka i te au taeake i roto i te putuputuanga kia aravei atu iaia no tetai tauturu e te aratakianga no runga i te oraanga ngutuare Kerititiano. Ei tangata apa kore katoa te akaaere kare e tapepeanga, e rongo meitaki tona mei te aronga i vao ake i te akarongo. Kare e rauka kia akaapa iaia no te au peu tau kore te ka takino i te ingoa meitaki o te putuputuanga. Kare aia i akaapaia ana no te angaanga tarevake. Kua riro tera ei akakeu i te au taeake kia aru i tona akaraanga e kia irinaki iaia kia akono ia ratou i roto i te akarongo.—1 Kori. 11:1; 16:15, 16.

¹⁰ Te angaanga a teia au tangata i roto i te putuputuanga Kerititiano, aite rai mei te aronga pakari o Iseraela tei karangaia e e au tangata pakari, karape, e te kite. (Deu. 1:13) E au tangata ara te au akaaere Kerititiano, inara kua kite matauia ratou i roto i te putuputuanga ei au tangata tuatua tika e te akono Atua, tei akaari mai i te au taime tei aereia e te rotai ra to ratou oraanga ki te au kaveinga a te Atua. No to ratou tu tiratiratu, kua rauka ia ratou kia apii ma te akava ngakau mā.—Roma 3:23.

¹¹ Te au tane tei tau kia ikiia ei au akaaere, kia tau ta ratou uaorai au peu e to ratou tu ki etai ke. Kare ratou i te aronga marokiakia. Mari ra, te akaari maira to ratou tu oraanga i te tu tau e te kite i te akatere ia ratou uaorai. Ka akaari mai to ratou oraanga i teia au tu i roto i te au mea ta ratou e rave ana mei te kaikai, inuinu, me akangaroi, tarekareka e te tamataora. Ka inu ratou kia tau ua, kia kore ratou e akaapaia mai no te kona kava. Te tangata kua kona i te kava, kare e rauka iaia te akaaere i tana e rave ra, kare katoa aia e tau kia akono i te au anoano o te putuputuanga i roto i te akarongo.

¹² E rauka ai tetai tangata kia akaaere i te putuputuanga, ka anoanoia aia kia akatupu i te tu mako. Ka kitea tona au tu meitaki i roto i te tu e akamanea ana aia, te tu o tona kainga, e tana au peu i te au rā ravarai. Kare aia i te tangata tavarevare i te rave i te angaanga, kua kite aia eaa tei anoanoia e ka aru aia i tei akanooia. Ka aru aia i ta te Atua au kaveinga.

¹³ Ei tu maru to te akaaere. Kia rauka iaia te angaanga kapiti e te pupu aronga pakari e kia taokotai kia ratou. E mea tau kia kite aia i tona uaorai au tu paruparu, eiaa aia e mārō atu i etai ke. Me e tangata maru te akaaere kare aia e akatietie, e kare aia e maani e nona te manako meitaki atu i tona au taeake aronga pakari. Penei e meitaki atu te tu me kore te mārama o tetai papaki i tona. Te akaari ra te akaaere i te tu maru me akatumu aia i tona aerenga manako ki runga i te Tuatua a te Atua, e me tauta aia i te aru i te akaraanga o Iesu Mesia. (Phili. 2:2-8) Kare aia i te tangata tauetono me kore akatupu pekapeka, ka akaari ra aia i te tu akangateitei no etai ke ma te akamanako e i meitaki atu ratou iaia. Kare aia e māro kia aruia tona inangaro me kore kia ārikiia tona manako. Kare aia e riri ua mari ra e tangata akamoeau aia i roto i tona pirianga ki etai ke.

¹⁴ Mei tera katoa te tangata tei ikiia ei akaaere, ka anoanoia aia kia akono meitaki. Tera te aiteanga e tangata maru aia, kare e rapurapu i tana au tukuanga tika. Kua mārama meitaki aia i ta Iehova au kaveinga e to ratou aiteanga. Te tangata akono meitaki, ka āriki ua aia i te ako e te aratakianga. Kare aia i te tangata pikikaa.

¹⁵ Kua akamaara a Paulo kia Tito e ko te akaaere, e tangata inangaro i te meitaki, e tangata tuatua tika e te tiratiratu. Ka kiteaia teia i roto i tona tu ki etai ke e tona tu ngaueue kore no te mea tika e te meitaki. Ka tinamou tona inangaro ia Iehova e te akono marie i te au kaveinga tuatua tika. Ka rauka i te irinaki iaia. E tangata takinga meitaki i te taeake e te oronga ua i tona taime, maroiroi, e te apinga ei tauturu i etai ke.—Anga. 20:33-35.

¹⁶ E rauka ai te rave meitaki i tana apainga, ka anoanoia tetai akaaere kia tukatau i te apii. Akakite a Paulo kia Tito kia “tāpu piri tikai i te tuatua-mou, i apiiia atu iaia ra, kia tika iaia kia apii i te tuatua ora, kia akakite atu i te ara a te aronga i patoi maira.” (Tito 1:9) Ka rauka iaia te akamārama, akapapu, akakore i te patoianga, e te taangaanga i te Pipiria na roto i te tu te ka akaariu mai i etai ke, e te akamatutu i to ratou akarongo. Ka taangaanga te akaaere i teia tu karape i te atianga tau e te atianga ngatā. (2 Timo. 4:2) Tu akakoromaki tona me ako i tetai tangata apa, me kore i te akaariu mai i tei ekoko kia rave i te au angaanga memeitaki no tona akarongo. Me tukatau aia i te apii i mua i te tangata me kore i te tangata tataki tai, te akapapu maira tera e kua tau te akaaere no teia apainga puapinga.

¹⁷ Mea puapinga kia piri putuputu te aronga pakari ki te angaanga orometua. E tauta pakari ratou na roto i teia mataara i te aru i to Iesu akaraanga. Te tutu i te Patireia te mea puapinga roa atu kiaia. Kua akataka aia i tetai taime i te tereni i tana au pipi kia tukatau i te tutu evangeria. (Mare. 1:38; Luka 8:1) To ratou tu maroiroi i te piri ki roto i te angaanga orometua noatu te maata o ta ratou angaanga, ka akamaroiroi i te putuputuanga kia akapera rai. Me piri kapiti aia ki te angaanga orometua e tona ngutuare tangata e pera te au taeake i roto i te putuputuanga, ka akamatutuia to ratou pirianga, tetai e tetai.—Roma 1:11, 12.

¹⁸ Penei e maata roa te tapapaia nei i roto i tetai tei ikiia ei akaaere. E tika e kare okotai akaaere e rauka kia aru matatio i te turanga apa kore tei akanooia i roto i te Pipiria, inara me kua ngere te au akaaere i tetai o teia au tu, kia matakite eiaa te reira kia riro mai ei apa kino roa atu nona. Tetai au akaaere, penei e mea umere tikai tetai au tu i rauka ia ratou, tetai papaki ra, e meitaki atu ratou i tetai atu au tu ke mai. Te ka tupu mai, ka rauka i te pupu aronga pakari katoa, teia au tu memeitaki pouroa tei anoanoia no te akaaere meitaki i te putuputuanga o te Atua.

¹⁹ Me iki te pupu aronga pakari i tetai taeake kia akamanaia ei akaaere, kia akamaara ratou i te tuatua a te apotetoro ko Paulo: “Teia taku tuatua kia kotou katoatoa e ope rava ake, i te meitaki i orongaia mai kiaku nei, eiaa e maata te manako iaia uaorai, i tei tau iaia kia manako ra; ka akono tikai ra te manako kia arite i te tu o te akarongo i tuaia e te Atua i te tangata katoatoa.” (Roma 12:3) Ei tu akaaka to te tangata pakari. Me akara te aronga pakari e me kua tau tetai taeake kia riro ei akaaere, eiaa tetai e māro e kia aite to tera taeake tu tuatua tika ki tona. (Kohe. 7:16) Me taka meitaki i te aronga pakari te au umuumuanga a te Pipiria no te au akaaere, kia akapapu ratou e ka rauka i te taeake ka ikiia i te akono i taua au turanga ra. Kia akamaara e e tu apa ua to tatou, kia kopae i te tu papakitai e te akaapaapa, kia rave i ta ratou tukuanga tika na roto i te tu akangateitei no to Iehova au turanga tuatua tika kia puapingaia te putuputuanga. E pati kia Iehova no te aratakianga a te vaerua tapu e kia akapapu e te aru ra aia i te au umuumuanga a te Tuatua a te Atua. Ko tetai teia o te au apainga puapinga ta ratou e akono nei, e ka anoanoia kia tau ta ratou rave anga i te reira ki te ako a Paulo: “Eiaa e rapurapu i te tuku i te rima ki runga i te tangata.”—1 Timo. 5:21, 22.

TE UA O TE VAERUA

²⁰ Te au tangata tei ikiia ka aru ratou i te aratakianga a te vaerua tapu e ka taangaanga ratou i te au ua o te vaerua i roto i to ratou oraanga. Te akakite maira a Paulo eaa te au ua o te vaerua, ko “te inangaro ïa, te rekareka, te au, te akakoromaki, te takinga-meitaki, te meitaki, te pikikaa kore, Te maru, te akono meitaki.” (Gala. 5:22, 23) Ka riro teia au akaaere ei akamaroiroianga no te au taeake e ei taokotai i te putuputuanga i roto i te akamorianga. Te akaari maira to ratou tu, e te puapinga tei rauka no ta ratou angaanga pakari e, na te vaerua tapu i akamana ia ratou.—Anga. 20:28.

AU TANGATA TEI AKATUPU I TE TU ROTAI

²¹ E mea puapinga kia angaanga kapiti te aronga pakari i te akatupu i te tu rotai i roto i te putuputuanga. Noatu e tuke tuke to ratou tu, inara me akarongo ratou i tetai e tetai ma te akangateitei, ka vai rai te tu rotai i rotopu ia ratou noatu kare ratou e āriki i te au mea ravarai ka uriuriia. Me kare e kaveinga Pipiria e aatiia, kia akatika e kia turu ratou i te tika openga a te katoatoa. Ka akaari mai te tu taokotai i te ‘pakari no runga mai’ koia oki i te ‘tu au e te maru.’ (Iako. 3:17, 18) Eiaa tetai tangata pakari kia manako e tei runga atu aia i etai ke, e kare aia e akariro e tei iaia te tika i etai ke. Me taokotai ratou ei pupu okotai kia puapingaia te putuputuanga, tera te aiteanga, te taokotai ra ratou kia Iehova.—1 Kori., pene 12; Kolo. 2:19.

ARUARU KIA RIRO EI AKAAERE

²² E mea tau no te au tane Kerititiano kia akatupu i te inangaro kia riro mai ei akaaere. (1 Timo. 3:1) Inara e maata te angaanga e ō maira e ka anoanoia te tu akaatinga no tetai e tavini ra ei tangata pakari. Kia papa ua aia i te tauturu i te au taeake kia akamou i tetai pirianga vaitata kia Iehova. Ka tauta pakari ratou i te aru i te au umuumuanga tei akanooia i roto i te tuatua a te Atua no te au akaaere.

PENEI KA TAUI TE TURANGA

²³ Penei kua roa tetai taeake i te tavini tiratiratu anga e kua rokoia e te maki me kore kua paruparu takiri te kopapa. E penei kua ruaine aia e kare e rauka akaou i te akono i tana au apainga ei akaaere. Kia akangateiteiia aia e kia akaperepereia me te tavini ra rai aia ei akaaere ikiia. Kare aia e anoanoia kia akamutu. Kua tau rai te akangateiteianga nona mei tei orongaia no te au akaaere, no ta ratou angaanga pakari i te tiaki anga i te anana.

²⁴ Me ka manako te taeake e e meitaki atu kia akangaroi mai aia no tona turanga makimaki, kare e araiia tana ikianga. (1 Pete. 5:2) E mea tau kia akangateiteiia rai aia. E maata te puapinga ka rauka i te putuputuanga no tana tauturu noatu kare aia e rave akaou i te au apainga ta te aronga pakari e rave ra.

AU APAINGA I ROTO I TE PUTUPUTUANGA

²⁵ Tuke tuke te au apainga e akono ana te aronga pakari i roto i te putuputuanga. E taeake tauturu tetai no te pupu aronga pakari, e tekeretere, akaaere angaanga orometua, akaaere no te apii Punanga Tiaki, e te akaaere o te Uipaanga Oraanga e te Angaanga Orometua. Maata anga o te aronga pakari, e au akaaere no te pupu tutu evangeria. Kare i akanooia eaa te roa ka akono ratou i teia au apainga. Inara me ka neke aia ki tetai ngai ke e kare e rauka i te akono akaou i tana au apainga no te mea kua makimaki aia me kore kua akarukeia mai aia no te akono kore i te au umuumuanga a te Pipiria, ka ikiia tetai tangata pakari ke mai ei akono i tana apainga. I roto i te au putuputuanga e tokoiti ua te aronga pakari, penei e maata atu te apainga ta tetai akaaere ka akono e tae ua atu ki te taime e tau ei tetai au taeake kia ikiia ei aronga pakari.

²⁶ Ko te taeake tauturu o te pupu aronga pakari, koia te tiamana o te au uipaanga a te aronga pakari. Ei tu akaaka tona me angaanga kapiti e tona au oa aronga pakari i te akono i te anana a Iehova. (Roma 12:10; 1 Pete. 5:2, 3) Ei tangata meitaki i te akaaere e te akono i tana au apainga.—Roma 12:8.

²⁷ Na te tekeretere e akono i te au rekoti a te putuputuanga e me tae mai tetai au reta me kore au imere puapinga, ka akakite aia ki te aronga pakari. Me ka anoanoia, penei ka ikiia tetai tangata pakari ke me kore tavini tauturu i te tauturu iaia.

²⁸ Na te akaaere angaanga orometua e akono i te au akanoonooanga no te tutu evangeria e etai atu au angaanga. Ka akanoo aia i tetai taime kia atoro putuputu i te au pupu tutu evangeria ke ke i te openga marama. I roto i te au putuputuanga rikiriki e tokoiti ua te pupu tutu evangeria, e rua taime i te mataiti ka atoro aia e tai pupu. Ka rave aia i te au uipaanga no te tutu evangeria, angaanga kapiti e te au taeake i roto i te angaanga orometua, e te tauturu i te au papuritia i te atoro akaou i tei ariu mai, e te rave apii Pipiria.

AU AKAAERE NO TE PUPU TUTU EVANGERIA

²⁹ Tetai tikaanga ngateitei i roto i te putuputuanga koia oki kia riro ei akaaere no te pupu tutu evangeria. Tana au apainga, te ō maira te (1) tauturu i te akamatutu i te akarongo o te au taeake i roto i te pupu; (2) tauturu ia ratou kia maroiroi e kia rekareka i te piri putuputu ki roto i te angaanga orometua; (3) tauturu e te tereni i te au tavini tauturu i roto i te pupu kia riro ei akaaere e kia tukatau no te au apainga i roto i te putuputuanga. Kia iki te pupu aronga pakari i te taeake tei tukatau roa atu i te rave i te au tuanga pouroa o teia apainga.

³⁰ No te maata o te au apainga puapinga e ō maira, mea tau kia ikiia tetai tangata pakari ei akaaere no te pupu tutu evangeria. Me kore, na tetai tavini tauturu e rave i te reira e rauka ua mai tetai tangata pakari ei akono i te pupu. Te tavini tauturu ka rave i teia tuanga, kapikiia aia e tavini no te pupu tutu evangeria, no te mea kare aia i te akaaere i roto i te putuputuanga. Ka aru aia i te aratakianga a te aronga pakari me rave i teia apainga.

³¹ Tetai tuanga puapinga o te angaanga a te akaaere no te pupu, kia piri ki roto i te angaanga tutu. Ka riro tona tu maroiroi, te aruaru e te piri putuputu ki teia angaanga ei akamaroiroi i te au taeake i roto i tona pupu. E mea puapinga ki te au taeake te akamaroiroianga e te tauturu e rauka ana i ko i te uipaanga no te tutu aere, no reira e mea meitaki kia akapapa i tetai akanoonooanga te ka tau no te maataanga. (Luka 10:1-16) Ka anoanoia te akaaere kia akapapu e te rava ra te ngai tutu. Nana e rave ana i te uipaanga no te angaanga tutu aere e te akanoonoo i ta te au taeake ka rave no tera rā. Me kare aia e tae, kia pati aia i tetai tangata pakari me kore i tetai tavini tauturu, e me kare raua e vā mai, kia pati i tetai papuritia tukatau ei akono i te pupu no te tutu aere.

³² Kia akateateamamao te akaaere o te pupu i te au taeake i mua ake ka atoro mai ei te akaaere angaanga orometua, kia papa ratou i te tapapa atu anga i te au apiianga kia puapingaia ratou. Me kite te katoatoa i roto i tana pupu i teia akanoonooanga, ka rekareka ratou i te turuturu i te reira.

³³ Kua akakoroia kia meangiti ua teia au pupu tutu aere. Ka tauturu teia i te akaaere o te pupu kia matau meitaki ki te aronga tei akatakaia no tona pupu. Ka akono aia ia ratou mei te tiaki aroa rai. Ka tauturu e ka akamaroiroi ia ratou no te angaanga orometua e kia turu i te akanoonooanga no te au uipaanga. Ka tauta katoa aia i te rave i tetai ua atu mea tei tau ei tauturu i te au taeake tataki tai kia matutu to ratou akarongo. Ka puapinga katoa te aronga tei rokoia e te maki e tei taitaia, me atoro atu aia ia ratou. Penei na te au manako akamaroiroi, te ako maru, e akakeu i tetai aronga kia aruaru i tetai au apainga i roto i te putuputuanga te ka riro ei tauturu i to ratou au taeake. Te akakoroanga maata o te akaaere o te pupu, kia tauturu i te au taeake i roto i tana pupu tutu evangeria.—Anga. 20:17, 28.

³⁴ Tetai apainga a te akaaere o te pupu, kia koi mai te ripoti a te au taeake i roto i tona pupu. Ka tukuia teia au ripoti ki te tekeretere. Ei tauturu i to ratou akaaere, kia tuku vave atu te au papuritia i ta ratou ripoti. E oronga tika atu i te ripoti ki te akaaere o te pupu i te openga marama me kore kia tuku i te reira ki roto i te pia tei akatakaia no te au ripoti i ko i te Are Uipaanga Patireia.

KUMITI RAVERAVE O TE PUTUPUTUANGA

³⁵ Tetai au angaanga na te Kumiti Raverave o te Putuputuanga e akono. Te ō maira te taeake tauturu o te pupu aronga pakari, te tekeretere, e te akaaere angaanga orometua. Ei akaraanga, na te kumiti raverave e oronga mai i te tika kia taangaanga i te Are Uipaanga Patireia no te au akaipoipo e te au tanumanga, e na ratou e iki e koai te au papuritia ka tukuia ki roto i te au pupu tutu evangeria tuke ke. Na te kumiti raverave e akamana i te au patianga a te au painia tamou e te au painia tauturu, e te au apainga ou ke atu. Ka aru te kumiti raverave i te aratakianga a te pupu aronga pakari.

³⁶ Na te opati Betela e akataka mai i te au tuanga angaanga a teia au taeake—pera katoa ta te akaaere Apii Punanga Tiaki, te akaaere o te Uipaanga Oraanga e te Angaanga Orometua, e etai atu o te pupu aronga pakari.

³⁷ E uipa kapiti ana te pupu aronga pakari o te au putuputuanga tataki tai, i te uriuri i te au mea e ō maira te turanga akarongo o te au taeake. Kapiti mai ki te uipaanga a te aronga pakari i te taime e atoro mai ana te akaaere kotinga, ka rave te aronga pakari i tetai uipaanga e toru marama i muri ake i te atoroanga a te akaaere kotinga. Inara me ka tupu mai tetai au turanga i tetai ua atu taime, penei ka anoanoia te pupu aronga pakari kia uipa akaou.

KIA KAURARO

³⁸ E tu apa ua to teia au akaaere e oti akera, te raurauia maira te katoatoa i roto i te putuputuanga kia kauraro kia ratou no te mea na Iehova teia akanoonooanga. Ka akava a Iehova ia ratou no ta ratou ka rave. Ko ratou ta Iehova i iki ei mata nona e no tana tutaraanga. Te na ko ra a Ebera 13:17 e: “E akarongo i to kotou au arataki, e kauraro atu kotou: te tiaki ra ratou i to kotou au vaerua, e akakiteia oki ta ratou tuatua ia kotou i te Atua ra; kia akakite ra ratou ma te rekareka, eiaa ma te aue; kare oki e puapingaia ta kotou i te reira.” Na te vaerua tapu o Iehova e akamana i tetai tangata kia tavini ei akaaere, e na taua vaerua tapu rai e akaatea iaia ei akaaere me kare aia e akaari i te ua o te vaerua me kore e aru i te au kaveinga Pipiria i roto i tona oraanga.

³⁹ Kare ainei tatou e mareka ana i te angaanga pakari e te akaraanga meitaki a teia au akaaere? I roto i tana reta ki te putuputuanga i Tesalonia, kua raurau atu a Paulo i te au taeake e: ‘Te ako atu nei matou ia kotou, e te au taeake, e kite atu kotou i te aronga i rave i te angaanga a te Atu ki roto ia kotou na, ko te akakite ki rungao ia kotou i te Atu nei, e te ako atu oki ia kotou; E kia maata rava i te akangateitei ia ratou ma te aroa no ta ratou angaanga.’ (1 Tesa. 5:12, 13) I roto katoa i tana reta mua kia Timoteo, kua taiku atu a Paulo i te tu ka anoanoia te au taeake i roto i te putuputuanga kia akaari ki te au akaaere i te karanga anga e: “Ko te au aronga orometua i arataki meitaki ra, kia maata atu ïa i te akateitei atu, kia maata atura i tei angaanga i te ako e te apii ra.”—1 Timo. 5:17.

AU APAINGA KE MAI I ROTO I TE AKAAERENGA

⁴⁰ Tetai taime, ka ikiia tetai au akaaere no te Pupu Atoro Aronga Maki. Tetai papaki i roto i te Kumiti Aremaki, ka atoro ratou i te aremaki e te au taote i te akamaroiroi ia ratou kia rapakau i te Au Kite o Iehova e kia akakite atu i tetai au ravenga ke no te rapakauanga kare e anoanoia te toto. Ko etai atu au akaaere, ka rauka ia ratou kia tauturu i te au akakoroanga o te Patireia i te pātu e te akono i te au Are Uipaanga Patireia e te au Are Uipaanga Akaputuputuanga me kore kia piri ki roto i te Kumiti Uruoaanga. Mareka tikai te ngakau o te katoatoa i roto i te akaaerenga i te angaanga pakari a teia au taeake i te akapou i to ratou taime e te maroiroi i te tauturu. Ae, e mea tau tikai ‘kia manako meitakiia ratou.’—Phili. 2:29.

AKAAERE KOTINGA

⁴¹ Na te Pupu Akaaere e maani i te akanoonooanga no te iki anga i te au tangata pakari tukatau ei au akaaere kotinga. Na te opati Betela e akamana ia ratou kia atoro i te au putuputuanga i roto i to ratou au kotinga, e rua taime i te mataiti. Ka atoro katoa ratou i te au painia i te au ngai mamao kare e maata ana te tangata. Ka akapapa meitaki ratou i to ratou tere e oti, akakite atu ki te au putuputuanga i mua ake ka tae atu ei ratou, kia puapingaia te akakoroanga.

⁴² Kia rave te taeake tauturu no te pupu aronga pakari i te au mea ravarai na roto i te tu te ka akamaroiroi i te katoatoa. (Roma 1:11, 12) Me tae atu te karere no te atoro a te akaaere e no runga i te au mea ka anoanoia nona e tona tokorua (me kua akaipoipo aia), ka akateateamamao te taeake tauturu no te pupu aronga pakari ki te au taeake, i tetai ngai nooanga e tetai atu au mea ka anoanoia. Ka akapapu aia e kia kite te katoatoa e te akaaere kotinga, i teia au akanoonooanga.

⁴³ Ka akakite te akaaere kotinga ki te taeake tauturu no te pupu aronga pakari no runga i te akanoonooanga no te au uipaanga e te au uipaanga no te angaanga tutu evangeria. Kia raveia teia kia tau ki ta te akaaere kotinga i akakite mai, e te aratakianga mei ko mai i te opati Betela. Ka inangaroia kia kite te katoatoa i mua ake, no runga i te taime e te au ngai ka uipa aia e te putuputuanga, te au painia, te aronga pakari e te au tavini tauturu, pera katoa te taime e te ngai ka raveia te au uipaanga no te angaanga tutu evangeria.

⁴⁴ Te avatea Ruirua, ka akara te akaaere kotinga i te Congregation Publisher Records, te rekoti no te numero e tae mai ana ki te uipaanga, te rekoti no te au ngai tutu evangeria e te rekoti no te moni a te putuputuanga. Na teia e akaari mai kiaia eaa te ka anoanoia no te putuputuanga e ka akapeea aia i te tauturu anga i te aronga na ratou e akono ana i teia au rekoti. Ka akapapu te taeake tauturu no te pupu aronga pakari i mua ake e kua papa teia au rekoti na te akaaere kotinga.

⁴⁵ Iaia i reira, ka tuatua aia ki te au taeake tataki tai me rava te taime—i ko i te uipaanga, te angaanga tutu, te ora kaikai e te vai atura. Ka uipa katoa aia e te aronga pakari, te au tavini tauturu, i te oronga i tetai aratakianga, tetai au manako tauturu e te akamaroiroi, kia rauka ia ratou te akono i ta ratou apainga i te tiaki i te anana. (Mase. 27:23; Anga. 20:26-32; 1 Timo. 4:11-16) Ka uipa katoa aia e te au painia i te akamaroiroi ia ratou i te rave i ta ratou angaanga e te tauturu ia ratou kia kite eaa te mea tau kia rave me aro atu ratou i te au tu ngatā i roto i te angaanga orometua.

⁴⁶ Me e au mea ke atu tetai ka anoanoia tana tauturu, ka tauta aia kia akonoia te reira i tera epetoma. Me kare te reira e oti i te reira taime, ka tauturu te akaaere kotinga i te aronga pakari me kore i te aronga e ō maira, kia rave i tetai kimikimianga no runga i te aratakianga a te Pipiria no te reira. Me te inangaro maira te opati Betela kia kite no runga i teia, ka tuku aia e te aronga pakari i tetai ripoti i te akataka meitaki atu i teia manamanata.

⁴⁷ Me atoro mai aia i te putuputuanga, ka aere te akaaere kotinga ki te au uipaanga pouroa a te putuputuanga. Kia akatanotanoia teia mei tera taime ki tera taime kia tau ki te au aratakianga mei ko mai i te opati Betela. Ka oronga aia i te au akoanga kua akakoroia ei akamaroiroi, ei akakeu, ei apii e ei akamatutu i te putuputuanga. Ka tauta aia i te akatupu i te inangaro akaperepere no Iehova, no Iesu e to te Atua akaaerenga ki roto i te ngakau o te au taeake.

⁴⁸ Tetai akakoroanga me atoro mai te akaaere kotinga, kia akaaraara i te inangaro kia piri ki te angaanga orometua, e te oronga mai i tetai au ravenga māmā i te taangaanga. Penei ka rauka i tetai aronga i te akatanotano i to ratou turanga kia piri ki roto i te angaanga tutu i tera epetoma katoa, e penei kia painia tauturu i te marama ka atoro mai aia. Tetai ua atu ka inangaro kia angaanga kapiti kiaia me kore e tana vaine, kia akanoo i tetai taime. E maata te meitaki ka rauka mai me apai koe i te akaaere kotinga me kore i tana vaine ki taau au apii Pipiria me kore te au atoro akaou. Ka āriki rekareka roaia taau tauturu i roto i teia tuanga o te angaanga.—Mase. 27:17.

⁴⁹ Te au mataiti ravarai, e rua akaputuputuanga kotinga e akanooia ana no te kotinga okotai. Na te akaaere kotinga te apainga no te akaaere anga i te angaanga ka raveia no teia nga akaputuputuanga. Ka iki te akaaere kotinga i tetai taeake ei akaaere no te akaputuputuanga, e tetai tauturu no te akaaere o te akaputuputuanga. Ka tauturu raua i te akaaere kotinga i te rave i te au akanoonooanga no te akaputuputuanga. Ka rauka i reira i te akaaere kotinga i te akamou ki runga i te au mea puapinga o te akaputuputuanga. Ka iki katoa aia i tetai au taeake tukatau ei akono i te au angaanga tuke ke. Ka pati katoa aia i tetai tangata kia akara i te rekoti moni a te kotinga i muri ake i te au akaputuputuanga ravarai. E tai akaputuputuanga i te mataiti, ka atoro mai tetai mata o te opati Betela ei vaa tuatua. No te mamao e no te meangiti ua i te au ngai no te akaputuputuanga, kua akatuangaia tetai au kotinga, ka raveia e tai akaputuputuanga i te tuanga okotai.

⁵⁰ Ka tuku tika atu te akaaere kotinga i tana ripoti no te angaanga tutu evangeria ki ko i te opati Betela i te openga marama. Me e au apinga tetai te ka anoanoia kia tutaki—no te motoka, te kai, ngai nooanga e tetai atu au apinga tei anoanoia kia rauka i te rave i tana angaanga—e kare e rauka i te putuputuanga tana i atoro atu i te tutaki, kia tuku aia i te reira ki ko i te opati Betela. Irinaki pu tikai te au akaaere tutaka e me tuku ratou i te au anoano o to Iehova Patireia na mua, ka akonoia te au anoano o te pae kopapa mei ta Iesu i taputou mai. (Luka 12:31) Kia akamaara ua rai te au putuputuanga i to ratou tikaanga ngateitei kia akono i teia aronga pakari tiratiratu e tavini nei ia ratou.—3 Ioa. 5-8.

KUMITI BETELA

⁵¹ I ko i te au opati Betela ravarai o te Au Kite o Iehova i te ao katoa nei, mei te toru me kore e ā au taeake tukatau e te pakari i roto i te akarongo tei ikiia ei Kumiti Betela, kia akaaere i te angaanga tutu evangeria i taua enua me kore i te au enua i raro i ta ratou akatereanga. Tetai mema o ratou, koia te taeake tauturu no te Kumiti Betela.

⁵² Na te au taeake i roto i te Kumiti Betela e akono ana i te au mea e ō maira te au putuputuanga i roto i te au ngai tutu a te opati Betela. Na te Kumiti e akaaere i te angaanga tutu aere o te nuti meitaki o te Patireia e te akapapu e te rave meitaki ra te au putuputuanga e te au kotinga i tei anoanoia no te ngai tutu aere. Ka akono katoa te Kumiti Betela i te au akanoonooanga no te angaanga mitinari, painia takake, painia tamou e te painia tauturu. Te au akanoonooanga e te au tuanga angaanga ka raveia no te au akaputuputuanga e te au uruoaanga, na te kumiti e akaaere kia rauka te “au mea ravarai ma te tika e te manea.”—1 Kori. 14:40.

⁵³ I tetai au enua, ka ikiia tetai Kumiti Enua i raro i te akatereanga a te Kumiti Betela i tetai enua ke mai. Māmā ake i te akaaere meitaki i te angaanga i te ngai te reira te Kumiti Enua. Ka akono te reira i te au angaanga i roto i te Kainga Betela e te opati, te mere e te ripoti, e te akono i te au angaanga no te tutu evangeria. Ka taokotai te Kumiti Enua ki te Kumiti Betela i te akono anga i te au anoano o te Patireia.

⁵⁴ Na te Pupu Akaaere e iki i te au taeake pouroa no te Kumiti Betela e te Kumiti Enua.

AU MATA NO TE PUPU AKAAERE

⁵⁵ Mei tera taime ki tera taime, ka tuku te Pupu Akaaere i tetai au taeake tukatau kia atoro i te au opati Betela takapini i teianei ao. Te taeake ka ikiia ei rave i teia, koia te mata o te opati maata o te Au Kite o Iehova. Tana angaanga, e akamaroiroi i te au taeake e noo ra i Betela e te tauturu i te Kumiti Betela no runga i tetai ua atu manamanata, me kore i te pau i tetai ua atu au uianga no runga i te angaanga tutu evangeria e te akariro i te tangata ei pipi. Ka aravei katoa teia taeake i tetai au akaaere kotinga e te au mitinari. Ka tuatua aia kia ratou no runga i to ratou manamanata e to ratou au anoano, te akamaroiroi atu no runga i ta ratou angaanga puapinga e rave ra i te tutu i te evangeria o te Patireia e te akariro i te tangata ei pipi.

⁵⁶ Ka inangaro te mata o te opati maata kia kite eaa te raveia ra i roto i te ngai e akatere ra te opati Betela no runga i te angaanga tutu evangeria o te Patireia e te au anoano o te putuputuanga. Me rava te taime, penei ka atoro atu aia i tetai au opati uri reo. Me atoro aia i tetai opati Betela, ka piri aia i tetai au taime ki roto i te angaanga tutu evangeria o te Patireia.

AKANOONOOANGA AROA

⁵⁷ Ka puapinga maataia tatou mei te angaanga pakari e te tu akaperepere o teia au taeake Kerititiano. Ia tatou e kauraro ra ki te au akaaere tei ikiia ei tiaki i te anana, ka taokotaiia tatou ki te Upoko o te putuputuanga, ko Iesu Mesia. (1 Kori. 16:15-18; Ephe. 1:22, 23) Te ka tupu, ka vai ua rai te vaerua o te Atua i rotopu i te au putuputuanga i te ao katoa nei, e ka riro te Tuatua a te Atua ei arataki i te angaanga i te pa enua katoa.—Sala. 119:105.