Akakoromaki Anga i Toou Mamae Ngakau

E maata te au manako tauturu no runga i teia. Inara, kare te katoaanga e tauturu ia koe. Ei akaraanga, penei ka karanga atu tetai pae kia koe e, auraka e aue me kore e akaari i toou manako ngakau na tetai ua atu mataara. I tetai tua, penei ka māro tetai pae ia koe kia akaari i toou manako ngakau pouroa. Te oronga maira te Pipiria i te manako tau tei turuturuia e te aronga kimi kite o teia tuatau.

I roto i tetai au enua, kare te tane e aue ana. Inara ka anoanoia ainei kia akamā i te aue i te ngai tangata? Ko te aronga kite no te tuanga o te maki manako, kua akatika ratou e ko te aue, e tuanga mātauia teia no te mamae ngakau. Aere ua rai, ka ngaro te mamae ngakau noatu e e āka tumatetenga tei tupu kia koe. Inara me tāpu ua koe i toou tu mamae ngakau, ka maata atu te kino ka tupu mai i to te meitaki. Kare te Pipiria e turuturu i te manako e e tarevake no te tane kia aue. Akamanako ana i to Iesu akaraanga. Noatu e mana tona i te akaora mai i tei mate, kua aue aia i mua i te katoatoa no tei mate tona oa akaperepere ko Lazaro!​—Ioane 11:33-35.

E tuanga te riri no te mamae ngakau, i te au turanga tikai me mate poitirere ua tetai. E maata te tumu e riri ana te tangata tei mate tona akaperepere, tetai akaraanga me tuatua manako kore mai tetai tangata tei akangateiteia. “E 14 rai oku mataiti te mateanga toku papa,” i tuatua ai tetai tangata Aperika Apatonga ko Mike tona ingoa. “I ko i te tanumanga, kua karanga tetai orometua Anglican e te anoano ra te Atua i te au tangata meitaki e kua apai vave ia ratou.a Kua riri au i teia no te mea te anoano maata nei matou i to matou papa. E 63 mataiti i teianei, te mamae ngakau nei rai au.”

Akapeea ra me kinokino toou ngakau? Koia oki me mate poitirere tei akaperepereia, e ka oki ua rai toou manako i te karanga e, ‘Naringa au i rave i teia me kare i tera, kare rai te reira e tupu.’ Me kore penei i te taime openga i aravei ei koe i tei mate, kua taumāro ana korua. Ka kinokino i reira toou ngakau.

Me kua ki koe i te manako kinokino e te riri, e mea puapinga auraka kia akamou ua i te reira. Mari ra, e tuatua atu ki tetai oa te ka akarongo kia koe e ka akapapu e e mea mātau ua teia manako taitaia no te aronga tei mate to ratou akaperepere. Te akamaara maira te Pipiria ia tatou: “E aroa mairai te taunga i te au tuatau katoa ra, i anau maira te taeake no te tuatau e tumatetengaʼi ra.”​—Maseli 17:17.

Ko te oa meitaki roa atu no tetai tangata kua mate tona akaperepere, ko te Atua ko Iehova Tei Anga mai ia tatou. E akakite kiaia eaa to roto i toou ngakau na roto i te pure no te mea “koia oki te tiaki mai” ia koe. (1 Petero 5:7) Tetai rai, te taputou maira aia “e na te au o te Atua, ko tei maata ua atu i te kite tangata” e akamaru mai i te au manako e te ngakau o te aronga pouroa e na roto ra i teia. (Philipi 4:6, 7) Pera katoa e tuku e na te Atua e akamaru mai i toou tu taitaia na roto i te akapumaana anga a tana Tuatua, koia te Pipiria. E akapapa i te au irava akapumaana anga. (Akara i te pia i raro.) Penei ka inangaro koe i te tamou ngakau i tetai au irava. Ka riro teia au akamaaraara anga ei mea puapinga tikai i te po e e ngata i te moe ia koe e noo ra ko koe anake ua.​—Isaia 57:15.

Tetai tangata e 40 ona mataiti, e kapiki ana matou iaia ko Jack, koi mate ua ake tana vaine i te maki cancer. Karanga a Jack e i tetai au taime, e maromaroa tikai au. Inara kua tauturu te pure iaku. “Me pure au kia Iehova,” i nana ai, “kare au e maromaroa ana. Maata te taime ka ara au i te po e kare e varea e te moe. Muri ake i te tatau anga e te akamanako anga i te au manako pumaana mei te au Tuatua Tapu e te akakite anga i toku manako ngakau na roto i te pure, kua kite mai au i te tu maru e te au, te akamaru anga i toku manako e te ngakau e kua varea ia au e te moe.”

Tetai vaine mapu ko Vanessa kua maki e kua mate tona mama. Kua kite katoa aia i te mana o te pure. “I te au tuatau ngata tikai,” karanga aia, “ka kapiki ua au i te ingoa o te Atua e ka aue. Kua akarongo mai a Iehova i taku pure e kua oronga mai i te maroiroi kiaku.”

Akakite tetai aronga tei akamaroiroi i te aronga e mii ra kia tauturu i tetai ke me kore ra kia akapou i te tuatau i roto i tetai angaanga a te oire. Me akapera tetai tangata, ka rauka iaia te rekareka e penei ka maru mai tona mamae ngakau. (Angaanga 20:35) Maata te au Kerititiano kua mate to ratou akaperepere tei rauka mai te pumaana maata no te tauturu a tetai ke.​—2 Korinetia 1:3, 4.