Pātu Akaou i Toou Pirianga Kia Iehova

I TE au mataiti ravarai, e maata te au mamoe akaperepere tei āriki akaouia ki roto i te putuputuanga Kerititiano. Akamanako ana i te “rekareka maata” i runga i te rangi me oki mai teia au mamoe. (Luka 15:7, 10) Me ko koe tetai tei āriki akaouia, ka papu ia koe e te mareka maira a Iesu, te au angera e Iehova e kua riro akaou mai koe ei mema no te putuputuanga. Noatu ra, ia koe e pātu akaou ra i toou pirianga kia Iehova, ka tupu te au turanga ngata. Eaa te reira, e eaa te ka tauturu ia koe?

EAA TE AU TURANGA NGATA?

Ka taitaia te maataanga o te au taeake e te au tuaine noatu kua oki mai ratou ki te putuputuanga. Penei ka mārama koe i te tuatua a te Ariki ko Davida. Noatu kua akakoreia tana au ara, karanga aia: “Kua rokoia au e taku nei au ara, kare e tika kia nānā ua atu au ki runga.” (Sala. 40:12; 65:3) Me oki mai tetai tangata kia Iehova, penei ka vai ua rai te manako apa e te akama no tetai tuatau roa. Ko Isabelle, kua akaateaia no tetai 20 tuma mataiti.a Karanga aia, “E ngata roa noku i te irinaki e ka akakore mai a Iehova i taku ara.” Me taitaia koe, penei ka paruparu akaou toou pirianga kia Iehova. (Mase. 24:10) Tauta auraka kia tupu te reira kia koe.

Penei ka manata tetai pae e e maata te angaanga ka anoanoia ei akatupu i tetai pirianga vaitata akaou kia Iehova. Muri ake i te āriki akaouia anga a Antoine, karanga aia, “Ngaropoina takiri iaku te au mea taku i kite e i rave i roto i toku oraanga Kerititiano i mua ana.” Me manako akapera tetai aronga, penei ka tāpu ratou ia ratou uaorai mei te rave maroiroi i te au angaanga pae vaerua.

Ei akatutuanga, me kua takinokinoia te kainga o tetai tangata e te uriia, penei ka taitaia aia me akamanako i te taime e te maroiroi ka anoanoia no te pātu akaou i tona are. Mei te reira katoa, me kua takinoia toou pirianga oa kia Iehova e te ara kino, penei ka manako koe e ka anoanoia kia tauta pakari ei akameitaki akaou i toou pirianga kia Iehova. Inara e tauturu tetai.

Te pati maira a Iehova ia tatou: “E akatikatika ana tatou i te tuatua.” (Isa. 1:18) Kua angaanga pakari koe i te “akatikatika” i toou oraanga. Akaperepere a Iehova ia koe no taau tautaanga. Akamanako ana: Kua oronga koe i te tikaanga no Iehova kia patoi atu i te au akaapaanga a Satani!—Mase. 27:11.

Na te oki anga mai kia Iehova, kua akavaitata atu koe kiaia, e te taputou maira aia kia akavaitata mai kia koe. (Iako. 4:8) Mea meitaki me kite mai tetai ke e kua oki mai koe ki te putuputuanga inara, e maata atu taau ka rave. Ka anoanoia koe kia akamatutu ua rai i toou inangaro no toou Metua e te Oa ko Iehova. Akapeea ra?

AKANOO I TE AU AKAKOROANGA TAU

Tauta kia akanoo i te au akakoroanga ka rauka ia koe i te itae. Penei kua maara ia koe te au tuatua mou taau i apii no runga ia Iehova e tana taputou no te parataito. Inara, ka anoanoia koe kia akatupu akaou i tetai akapapaanga. Ei akaraanga, kia akanoo koe i te tuatau no te tutu aere, te aere ki te au uipaanga e te piri atu ki te au taeake e te au tuaine. Akamanako ana i te au akakoroanga ka aru mai.

Tuatua putuputu kia Iehova. Ka mārama ua toou Metua e me manako apa ua koe i taau tarevake i rave, ka ngata ia koe kia pure kiaia. (Roma 8:26) Noatu ra, “tamou marie tikai i te pure” ma te akakite kia Iehova e ka inangaro tikai koe kia riro ei oa nona. (Roma 12:12) Maara ia Andrej: “Tataraapa tikai au e te akama. Inara kua maru mai toku ngakau i muri ake i taku pure. Tupu mai te manako ‘au kiaku.” Me kare koe e papu eaa taau ka pure, tatau i te pure tataraara a te Ariki ko Davida i roto ia Salamo 51 e te 65.

Apii putuputu i te Pipiria. Ka akamaroiroi teia i toou akarongo e ka akamatutu i toou inangaro no Iehova. (Sala. 19:7-11) “No te mea kare aku akapapaanga pae vaerua, kua paruparu toku akarongo e kua tamamae au ia Iehova,” i karanga ai a Felipe. “Kare au e inangaro kia tupu akaou teia, no reira kua iki au kia akariro i taku uaorai apii ei paruruanga noku.” Ka rauka katoa ia koe kia akapera. Me inangaro tauturu koe kia iki i tetai tumu manako no taau apii, pati i tetai oa e pirianga vaitata tona kia Iehova.

Akameitaki akaou i toou pirianga oa ki te au taeake e te au tuaine. Penei ka manata tetai pae tei oki mai ki te putuputuanga e ka manako kino mai tetai ke ia ratou. Akakite a Larissa: “Akama tikai au. Manako mai au e kua tamamae au i te au taeake e te au tuaine i roto i te putuputuanga. No tetai tuatua roa, kua vai ua rai teia manako.” E irinaki papu e ka inangaro te aronga pakari e te au taeake tukatau i te tauturu ia koe kia akameitaki akaou i toou pirianga kia Iehova. (Akara i te pia “Eaa ta te Aronga Pakari ka Rave?”) Rekareka ratou e kua oki mai koe, e ka inangaro ratou kia mataora koe!—Mase. 17:17.

Eaa te ka akavaitata ia koe ki te putuputuanga? Rave maroiroi i te au angaanga ta te au taeake e te au tuaine e rave ra—te aere ki te au uipaanga e te rave putuputu i te angaanga tutu aere. Akapeea teia me tauturu ia koe? Karanga a Felix: “Kua tapapa mataora te putuputuanga i toku oki mai anga. Kite mai au i te aroa o te katoatoa. Tauturu mai ratou iaku kia kite e e mema akaou au no te putuputuanga, kua akakore mai a Iehova i taku ara e ka tavini ua atu au ia Iehova.”—Akara i te pia “Eaa Taau ka Rave?”

AURAKA E TUKU I TE ‘AU!

Ei akaparuparu ia koe, ka tuku ua mai a Satani i te au “uriia” ia koe e pātu akaou ra i toou pirianga oa kia Iehova. (Luka 4:13) Kia vai teateamamao ua na te akaketaketa anga i toou are pae vaerua i teia taime.

Taputou mai a Iehova no tana au mamoe: “Naku e kimi i tei ngaro ra, e e akaoki mai i tei îia keia, e e tākaikai i tei aati ra, e e akamaroiroi i tei maki ra.” (Eze. 34:16) Kua tauturu ke ana a Iehova i te manganui kia akameitaki akaou i to ratou pirianga kiaia. E irinaki papu e ka inangaro aia i te tauturu ia koe kia pātu i tetai pirianga ketaketa roa atu kiaia.

Eaa ta te Aronga Pakari ka Rave?

E tuanga puapinga ta te aronga pakari no te tauturu i te au papuritia tei oki mai kia pātu akaou i to ratou pirianga kia Iehova. Akamanako ana i ta ratou ka rave no te au taeake tei āriki akaouia mai.

Akamaroiroi ia ratou. Kua kite te apotetoro ko Paulo e ka “apuku uaia [te tangata ara tei tataraara] i te aue maata.” (2 Kori. 2:7) Ka viviki ua aia i te akama e te taitaia. No reira a Paulo i akaue ei i te putuputuanga: “E akakore atu kotou i tana ara, e e akapumaana atu e tikaʼi.” Ka anoanoia te au taeake tei āriki akaouia kia kite e te akaperepere maata ra a Iehova e to ratou au taeake irinaki ia ratou. Me putuputu te aronga pakari i te akameitaki e te tauturu ia ratou, kare ratou e taitaia.

Pure no ratou. “Te pure a te tangata tuatua-tika i akatupu mouia ki roto ra, e mea manuia maata ïa.” (Iako. 5:16) Karanga a Larissa, tei taikuia i mua ana: “Akakite au ki te aronga pakari i toku au manako ekoko e toku mataku. Kua pure ratou noku. Mārama au e kare te aronga pakari e riri iaku. Kua inangaro ratou i te tauturu iaku kia akameitaki akaou i toku pirianga kia Iehova.” Karanga a Theo: “Kua riro te pure a te aronga pakari ei akapapu kiaku e te akaperepere tikai ra a Iehova iaku e te kite ra aia i te meitaki, kare i te kino i roto iaku.”

Akaoaoa atu kia ratou. Ka inangaro te au taeake tei āriki akaouia i te au oa i roto i te putuputuanga. Karanga tetai tangata pakari ko Justin: “E pati putuputu ia ratou kia angaanga kapiti kia koe i roto i te angaanga tutu aere e te mea puapinga, kia atoro ia ratou i roto i to ratou kainga. Mea puapinga tikai kia riro ei oa no ratou!” Karanga tetai tangata pakari ko Henry, “Me kite te au taeake i roto i te putuputuanga e e oa te aronga pakari no te au taeake tei āriki akaouia, ka tauta katoa ratou kia akapera.”

Tauturu ia ratou kia apii. Ka tauturu tetai oa mou i te taeake tei āriki akaouia kia akanoo i tetai akapapaanga meitaki no te apii. Akakite tetai tangata pakari ko Darko: “E reka ana au i te akakite i taku i kite mai mei taku apii ei akaari i toku rekareka maata no te apii i te Pipiria. Kua akanoo katoa au kia apii maua i tetai atikara akamaroiroi.” Karanga tetai tangata pakari ko Clayton: “Ka akamaroiroi au ia ratou kia kimi i te au tua i roto i te Pipiria no te aronga tei na roto i te au mea aiteite tei tupu kia ratou e kia kite eaa ta ratou ka apii mai.”

Kia riro ei tiaki meitaki. Kua kite te au taeake tei āriki akaouia mai i te riroanga te aronga pakari ei akava. Inara i teia taime tikai, ka anoanoia ratou kia kite i te aronga pakari ei au tiaki meitaki. (Iere. 23:4) No reira kia viviki ua i te akarongo e te akameitaki. E karangaranga putuputu kia ratou. Teia ta tetai tangata pakari ko Marcus i tuatua no te au atoroanga akamaroiroi: “Ka tatau matou i tetai irava, ka akameitaki ia ratou, e ka akapapu i to matou rekareka maata no tei tauta pakari ratou kia oki mai kia Iehova. I te openga o te atoroanga, ka akanoo matou i tetai rā no te atoro akaou.”

a Tauiia te au ingoa i roto i teia atikara.