Izai

55 Vien azot, zot tout ké la soif, vien trap dolo ! Azot ké na poin larjan, vien azot, pran é manj ! Oui, vien azot, pran dovin èk dolé, pa bézoin larjan é pa bézoin pèy rien. 2 Poukosa zot i kontinié dépans zot larjan pou sak lé pa in vré manjé ? Poukosa zot i dépans zot pèy pou sak i ranpli pa lo vant ? Ékout amoin bien mèm, é manj sak lé bon ; komsa zot va lis zot doi avèk lo méyèr kalité manjé. 6 Rod Jéova pandan k’i pé trouv ali. Apèl ali pandan ké li lé pa loin d’ou. 7 I fo ké lo méchan i kit son mové chemin é lo bonom mové, son bann pansé ; ké li rovien vèr Jéova, ké nora pitié d’li, oui koté nout Bondié, parské li pardone larjman. 8 Parské mon bann fason pansé lé pa kom zot bann fason pansé, é mon bann fason aji lé pa kom zot bann fason aji, Jéova i di. 9 Parèy kom lo sièl lé pli o la tèr, parèy mon bann fason aji lé pli o zot fason aji é mon bann fason pansé pli o zot fason pansé. 10 Parèy la plui èk la nèj i tonm depui le sièl é i artourn pa la o sank li la finn bien aroz la tèr, sank li la finn produi é fé jèrmé, é sank li la finn donn le grin sak i plant é donn de pin sak i manj, 11 lé parèy pou la parol k’i sort dan mon bouch. Non, li va pa artourn vèr moin san rézulta, mé li sa fé vréman tout sak i kontant amoin, é lé sur, li va réaliz lo travay ma la anvoy ali pou fé.