Fé viv bann zistoir la Bib dan out tèt

Dan la Bib néna bonpé zistoir ké la vréman èspasé é k’i aprann anou bann loson inportan. Si nou fé viv bann zistoir-la dan nout tèt, sa va èd anou mié konpran sak nou lir é nou va aprésié ali ankor plis. Ala détroi zafèr ou pé fé, pou fé viv lo zistoir dan out tèt.

• Lir for. Lir la Bib for i pé èd aou mié majine sak i èspas. Kan ou lir la Bib an famiy, ou pé di chakèn fé in pèrsonaj, komsa ou va fé viv lo zistoir.

• Majine sak i èspas. Ésèy trouv kosa chak pèrsonaj i pans é i rosan. Par égzanp, domand aou : « Akoz lo moun la fé sa ? Poukosa li la di sa ? Si mi té son plas, kosa mi noré pansé ? Kosa noré été mon santiman ? »

• Fé in désin. Mèm si out désin lé sinp sinp, si ou désine sak ou lir, sa va èd aou fé viv lo zistoir é ou va pa oubli ali.