Rénion bann zasanblé lokal par viziokonférans

Dann monn antié, in bonpe d’gouvèrnman la oblij domoun gard zot distans ansanm inn é lot, é la intèrdi bann rénion an group. Bann Témoin Jéova i obéi la loi é kom zot i pran prékosion sa i anpèch pa zot kontinué réuni azot. Pousa, bann zasanblé lokal la ansèrv bann zaplikasion de viziokonférans kom Zoom pou fé zot rénion.

Pou ke nou kontinué réuni anou chak semèn é an sékurité, le Kolèj santral la été dakor utiliz larjan zofrann pou achèt kont Zoom pou bann zasanblé lokal. Sa la été util pou in pe d’zasanblé ke té gingn pa achèt in kont viziokonférans ki kout 15, 20 ero ou mèm plus. Avansa, bann zasanblé té ansèrv zaplikasion gratuit mé navé poin in bonpe d’moun ke té gingn konèkt azot é lété pa tro sékurizé. Mé astèr, èk le bann kont Zoom ke lorganizasion la of azot, lé plu fasil pou bann zasanblé mèt la sékurité desu é na in bonpe d’moun ki gingn konèkt azot pou chak rénion. Jordi, na plu de 65 000 lasanblé dan plu de 170 péi ki ansèrv bann kont la.

Dann péi Lindonézi, lasanblé de Kairagi a Manado (dan l’Nor Soulaouézi), la lès tonbé bann zaplikasion viziokonférans gratuit pou in kont Zoom ofèr par lorganizasion. Frèr Hadi Santoso i ésplik : « Astèr, mèm bann frèr é seur ke té koné pa tro ansèrv in laparèy léléktronik i gingn profit bann rénion, tousala parske zot la pu bezoin rekonèkt azot in bonpe d’foi pandan le mèm rénion. »

Dann péi Lékoiteur, a Gouayakil, Lester Jijón, ansien dann lasanblé Gouayakanès-Ès, i rakont : « Kom in bonpe d’frèr é seur lé pov, lé sur, na detroi zasanblé noré pa gingn achèt in lisans Zoom pou ke tout lasanblé i asist bann rénion. Astèr, kom avèk le bann kont Zoom ke la pèy pou nou, lé posib avoir in bonpe konéksion, nou la pu peur invit in tralé domoun nout bann rénion. »

Dann péi Zanbi, a Louzaka, Johnson Mwanza, ansien dann lasanblé Ngouéréré-Nor, i ékri : « Bokou d’frèr é seur i di ke depui k’lorganizasion la donn in kont Zoom, zot i san azot plu proch de zot bann frèr é seur, mé osi zot i rosan ke Jéova i ièm azot ankor plus é i pran soin d’zot. »

Sé èk larjan pou port sekour ke lorganizasion i of bann kont. Larjan la i vien bann zofrann volontèr ke lé fé pou laktivité mondial. In bonpe d’zofrann lé fé su linternèt su donate.jw.org. Mèrsi pou tout sak zot i donn èk gran keur, sa i sèrv osi pou èd nout bann frèr é seur in pe partou dan l’monn (2 Korintien 8:14).