Kontinié lès Bondié gid aou dan out vi

1. Èk kèl bézoin Jéova la kré anou ? (Matié 5:3).

JÉOVA i koné sak bann zumin la bézoin. Par égzanp pou viv, nou la bézoin manjé, linj é in landroi ousa nou san anou an sékurité. Si i mank anou inn an parmi bann bézoin-la, nout vi i pé vni vréman difisil é mèm nou pé mor. Mé Jéova i koné ké néna in not zafèr bann zumin la bézoin. Li la kré anou èk lo bézoin konèt ali é kont su li pou gid anou (lir Matié 5:3). Si nou la anvi èt vréman éré, i fo nou rokoné ké nou la bézoin èt kamarad èk Jéova é fé ali konfians.

2. Kèl légzanp i èd anou konpran kosa i vé dir ‘rokonèt’ ké nou la ‘bézoin Bondié dan nout vi’ ?

² Kosa i vé dir ‘rokonèt’ ké nou la ‘bézoin Bondié dan nout vi’ ? So fraz-la dan la lang Grèk, i fé pans in mandian k’i rod lèd èspirituèl. Majine in moun i fé lo mandian. Son linj lé déchiré é li asiz atèr dann chemin. Li manj pa tro, la journé li lé asiz dann gro solèy, é kan i ariv la nuit i fé bien fré. Domoun i évit ali. Akoz tousa-la, li lé fatigé é bien maléré. Lo mandian i koné li la bézoin lèd pou gingn ansort ali é rès an vi. Lé parèy pou sak i rod lèd èspirituèl : li rokoné ké li la bézoin Bondié dan son vi pou ansort ali. Donk li la vréman anvi profit a fon bann gayar zafèr Jéova i done pou tout sak i èm ali.

3. Kosa nou sa oir dann sujé-la ?

³ Dann sujé-la, nou sa oir lo zistoir in madam ké la ansupli Jézu pou èd ali. Nou sa aprann koman fé parèy madam-la si nou vé ké Jéova i kontinié gid anou. Aprésa, nou sa koz dési légzanp Pièr, Pol èk David ké la kont su Jéova pou gid azot dan zot vi.

SAK NOU PÉ APRANN SU IN MADAM KÉ LA DOMAND LÈD

4. Kosa in madam té vé Jézu té fé pou èl ?

⁴ In jour, in madam Fénisièn la vni oir Jézu. Son fi té posédé par in démon ké té pou fé mizèr aèl (Mat. 15:21-28). Lo madam la ansupli Jézu a jonou pou èd son fi. Alon oir troi fason pou pran légzanp su madam-la.

5. Kèl kalité madam-la navé, é kosa Jézu la fé pou èl ? (agard osi lo zimaj).

⁵ Lo madam la vréman fé mont k’èl té pran pa aèl su la otèr. Poukosa nou pé di sa ? Parské èl la pa pran la kolèr kan Jézu la konpar aèl èk in ti chien, ké navé dan la kaz sak té pa juif lépok-la. Kosa ou noré fé si ou té son plas ? Èské ou noré pran la kolèr é ou noré dévir out talon ? Mé la pa sak lo madam la fé. Èl la pa pran aèl su la otèr. Mé èl la pa fé rienk sa. Èl la kontinié domand Jézu èd aèl. Kosa la pous aèl fé sa ? Èl navé la foi an Jézu. Kan Jézu la vu ké son foi té for, sa la pous ali èd lo madam. Mèm si li la di ké li la vni rienk pou èd lo pèp Israèl, Jézu la kan mèm èd madam-la é li la tir lo démon su son fi.

6. Kosa nou aprann dési lo zistoir lo madam Fénisièn ?

⁶ Si nou vé profit la dirèksion Jéova, nou doi pran légzanp su madam-la. Nou doi pa pran anou su la otèr é i fo nou kontinié domand Bondié èd anou. Nou doi osi aoir in foi for an Jézu Kris é fé konfians sak li la choizi pou dirij son bann disip (Mat. 24:45-47). Jéova é son Garson i pran plézir èd é gid sak i fé mont bann joli kalité-la (agard Jak 1:5-7). Astèr alon oir koman Jéova i gid anou é i done anou sak nou la bézoin pou èt éré. Nou sa oir osi kosa nou pé aprann kan nou gard légzanp Pièr, Pol é David.

PRAN LÉGZANP SU PIÈR É KONTINIÉ ÉTUDIÉ

7. Kosa Jézu la di Pièr, é kosa li lavé bézoin fé osi ? (Ébré 5:14 – 6:1).

⁷ Alon koz su légzanp Pièr. Li té inn an parmi sak té promié pou rokonèt Jézu kom Mési, lo moun ké Jéova la ansèrvi pou nouri son pèp èk « bann parol i done la vi pou toultan » (Jan 6:66-68). Avan mont dann sièl, Jézu la done Pièr in mision : « Done manjé mon bann ti brébi » (Jan 21:17). Li la obéi Jézu é li la done in koud’min pou done in lamontraj bann disip. Jéova la ansèrv ali osi pou ékri dé lèt ké lé dan la Bib. Mé Pièr lavé bézoin étudié la Parol Bondié par li mèm. Par égzanp, li la étudié bann lèt ké Pol lavé déja ékri. Pièr la rand ali kont ké na détroi zafèr ké Pol la ékri té ‘difisil pou konpran’ (2 Pièr 3:15, 16). Mé Pièr la kontinié étudié bann zafèr-la parské li navé konfians ké Jéova noré èd ali konpran é mèt an pratik sak li lavé aprann (lir Ébré 5:14 – 6:1).

8. Koman Pièr la réaji kan li la gingn in vizion Bondié ?

⁸ Pièr la fé mont li navé la foi an Jéova parské li la obéi sak Jéova la di ali. Par égzanp, in jour, Pièr la gingn in vizion ousa in lanj la di ali manj bann zanimo ké la loi Moiz té intèrdi. Pou bann juif, sa té chokan. An promié Pièr la répond : « Surtou pa Ségnèr, parské ma la jamé manj in nafèr ké lé sal dapré la Loi, ni in nafèr k’lé pa pur. » Lanj la répond ali : « Di pu ké bann zafèr Bondié la rand pur lé “sal” » (Akt 10:9-15). Pièr la obéi é li la chanj son fason pansé. Koman nou koné sa ? Jus apré son vizion, troi bonom la vni rod Pièr son kaz. Kornèy la anvoy azot di Pièr vien oir ali. Normalman, kom Kornèy té pa juif, Pièr noré jamé alé son kaz. Sa té akoz bann chèf la rolijion, banna té amont ké té pa bien pou in juif, alé la kaz in moun té pa juif (Akt 10:28, 29). Mé toutsuit pou toutsuit, Pièr la chanj son fason pansé pou obéi Jéova (Prov. 4:18). Li la prèch èk Kornèy é son lantouraj. Tout banna la aksèp la vérité, zot la gingn lèspri sin é zot la fé batiz azot (Akt 10:44-48).

9. Sé koué lé dé rézon k’i pous anou étudié bann zafèr difisil pou konpran ?

⁹ Kom Pièr, nou la bézoin nouri anou souvan èk bann vérité sinp ké nou trouv dan la Parol Bondié. Mé nou doi osi étudié bann zafèr difisil pou konpran é i fo nou aprésié fé sa. Lé vré, i fo pran lo tan é èt paré pou fé d’zéfor pou mié konpran la Parol Bondié, é sa i vo lo kou ! Akoz sa ? Ala dé rézon : an promié, nou va aprann plis zafèr dési Jéova, é sa va fé grandi nout lamour é nout rèspé pou li ; an dézièm, plis nou va aprann bann zafèr inkroiyab dési nout Papa dann sièl, plis sa va pous anou partaj sa èk lé zot (Rom. 11:33 ; Rév. 4:11). Légzanp Pièr i amont anou ankor in nafèr : kan nou gingn in nouvo lèsplikasion su la Parol Bondié, i fo pa nou tard pou chanj nout fason pansé é nout fason aji. Sé sèlman komsa, ké Jéova va kontinié gid anou é ké nou va gingn rès ali fidèl.

PRAN LÉGZANP SU POL É FÉ MONT BANN JOLI KALITÉ

10. Dapré Kolosien 3:8-10, kosa i fo nou fé pou fé plézir Bondié ?

¹⁰ Pou fé plézir Bondié, nou doi profit in not zafèr li la mèt an plas : lo linj èspirituèl. Kosa i vé dir ? Lapot Pol la ékri ké té falé « anlèv lo vié tanpéraman » é abiy anou avèk lo « nouvo pèrsonalité » (lir Kolosien 3:8-10). Mèt so linj-la lé pa fasil. Alon pran légzanp Pol. Kan li té marmay, li la travay dur pou gingn la favèr Bondié (Gal. 1:14 ; Fil. 3:4, 5). Mé li té konpran pa vréman koman ador Bondié lo bon fason. Kom li té koné pa bann lamontraj Jézu, é k’an plis ké sa li té in moun orgéyé, sa té fé d’li in « moun insolan » (1 Tim. 1:13).

11. Èsplik kèl chanjman Pol té doi fé ?

¹¹ Avan vni krétien, Pol té pran la kolèr fasilman. Dann liv Akt i di ké Pol té tèlman an kolèr kont bann disip Jézu, ké li té vé tué azot (Akt 9:1). Apré k’li la vni krétien, lé sur Pol la travay dur pou métriz son kolèr, é li la vni in moun pasian é janti (Éféz. 4:22, 31). Mé Pol la fé bann zérèr. Kan ali èk Barnabé la disput ansanm, zot la rant dan in « gran kolèr » (Akt 15:37-39). Lèr la, Pol la pa fé sak Bondié té vé, mé li la kontinié travay dur pou vni in bon moun pou fé plézir Jéova (1 Kor. 9:27).

12. Kosa la èd Pol kontinié fé bann chanjman dan son pèrsonalité ?

¹² Pol la gingn fé bann chanjman parské li la pa baz ali su son prop fors (Fil. 4:13). Kom Pièr, Pol té kont su « la fors ké Bondié i done » (1 Pièr 4:11). Pourtan nadfoi, Pol té fé d’zérèr é sa té dékouraj ali. Mé kan li té dépité, li té rapèl bann bon zafèr ké son Papa dann sièl té fé pou li. É pou fé mont son rokonésans, li té ésèy fé tout pou chanjé é fé plézir Jéova (Rom. 7:21-25).

13. Koman nou pé fé parèy Pol ?

¹³ Nou pé fé parèy Pol, kinport lo nonm dané nou sèrv Jéova, nou doi kontinié fé zéfor pou tir lo vié tanpéraman é abiy anou èk lo nouvo pèrsonalité ké Bondié i done. Nou va toujour fé d’zérèr. Nou pouré pran la kolèr, di oubien fé bann zafèr pa janti. Kan sa i ariv, nou doi pa pans ké jamé nou va gingn fé plézir Jéova. Olèrk’sa, nou doi kontinié fé zéfor pou chanj nout fason pansé é nout fason aji (Rom. 12:1, 2 ; Éféz. 4:24). É osi, nou doi rapèl anou in zafèr inportan : normalman in linj lé fé pou k’i rant su nou, mé lo linj èspirituèl ké Jéova i done, sé nou k’i doi fé zéfor pou rant dédan. Lé normal ké sé nou i doi chanjé, pou fé sak Bondié i domand anou.

PRAN LÉGZANP SU DAVID É LÈS JÉOVA PROTÈJ AOU

14-15. Par koman Jéova i protèj son pèp ? (Psom 27:5 ; agard lo zimaj).

¹⁴ Pou èt vréman éré, nou la vu ké nou la bézoin lo manjé èk lo linj èspirituèl. Mé nou la bézoin osi ké Jéova i protèj anou. Koman li fé sa ? É kosa i fo nou fé pou ké li protèj anou ?

¹⁵ Lo roi David la di ké Jéova va kachièt ali pou protèj ali (lir Psom 27:5). Koman Jéova i protèj son pèp jordi ? Li protèj azot kont tout domoun oubien tout zafèr k’i pouré fé pèrd azot la foi. Li promèt ké tout bann zarm ké lé fagoté pou fé mal son pèp, va pa réusi (Ps. 34:7 ; Izai 54:17). Mèm si Satan, son bann démon èk tout sak li ansèrv lé puisan, Jéova lé pli for k’zot. Mèm si banna i tué anou, Jéova va résusit anou (1 Kor. 15:55-57 ; Rév. 21:3, 4). Jéova i èd anou osi sobat kont nout bann pèr é nout bann gro traka, komsa nou arèt pa sèrv ali (Prov. 12:25 ; Mat. 6:27-29). É nout papa plin lamour i done anou in famiy èspirituèl k’i soutien anou, é osi bann zansien k’i gid anou (Izai 32:1, 2). An plis ké sa, kan nou sa la sal, i rapèl anou souvan par koman nou pé profit la protèksion Jéova (Ébré 10:24, 25).

16. Koman Jéova la protèj David ?

¹⁶ Kan David té obéi, Jéova té èd ali pran bann bon désizion é David té éré. Sé komsa Jéova té protèj ali (agard Provèrb 5:1, 2). Mé kan David té dézobéi, Jéova té protèj pa li. Sé pou sa, li té souf akoz son bann mové désizion (2 Sam. 12:9, 10). É kan li té souf alork té pa son fot ? David té dévid son kèr èk Jéova dan la priyèr, é Jéova té soulaj son kèr, té pran soin d’li é té rapèl ali ké li té èm ali (Ps. 23:1-6).

17. Koman nou pé fé parèy David ?

¹⁷ Alon fé parèy David, alon rod konsèy koté Jéova avan pran in désizion. Nadfoi, nou doi rokonèt ké si nou pas dann malizé, sé pa parské Jéova la pa protèj anou, mé sé parské nou la pran bann mové désizion (Gal. 6:7, 8). É kan nou pas dann malizé alork la pa nou lotèr, nou dévid nout kèr sanm Jéova dan la priyèr, é lé sur li va protèj nout kèr é nout bann pansé (Fil. 4:6, 7).

ALON KONTINIÉ LÈS JÉOVA GID ANOU

18. Kèl fason pansé i pouré détèn dési nou é koman nou pé kontinié lès Jéova gid anou ? (agard osi su bann zimaj).

¹⁸ Ala nout tèks pou lané 2026 : « Sak i rokoné zot la bézoin Bondié [...] dan zot vi, lé éré. » É jordi plis ké jamé, sa lé vré ! Poukosa ? Parské in bonpé domoun i aksèp pa Bondié dan zot vi. Na dot i kroi an Bondié mé zot i préfèr ador ali zot prop fason. É na dot i préfèr suiv la fason pansé domoun. Mé tousa-la i rand azot maléré. Parkont anou, nou doi pa fé kom banna. Koman nou va fé sa ? Alon manj lo manjé èspirituèl Jéova i done anou, alon abiy anou èk lo nouvo pèrsonalité é alon rod la protèksion koté Jéova.