Lantrotien nout bann sal lo Roiyom

Ala sak Nicole, in jèn sèr k’i abit Kolonbi, la di : « Mi èm mon sal lo Roiyom. Sé atèr la mi rotrouv mon famiy èspirituèl ! » Èské aou osi, ou rosan lo mèm zafèr ?

Partou dan lo monn, bann Témoin Jéova i fé zot rénion dann apépré 63 000 sal lo Roiyom. Bann sal-la lé pa rienk in gayar landroi ousa nou ador Bondié. David, ké lé pionié pèrmanan an Kolonbi, i di : « Nout Sal lo Roiyom i mèt anlèr nout joli lamontraj. Bonpé d’moun, k’i vien vizit la sal, i an rovien pa oir koman bann sal-la lé dan in bon léta. » Si lé komsa, lé pa akoz ti bonèr la chans. Nou travay dur pou nétoiy é pou antrotien nout sal lo Roiyom. Koman travay-la lé posib ?

Koman lantrotien lé organizé

Sé bann zasanblé lé rèsponsab pou fé lantrotien zot sal. Sé pou sa ké toultan bann frèr é sèr i nétoiy lo sal, i kontrol si tout lé dan in bon léta, é si la bézoin, i fé bann ti réparasion.

Pou èd bann zasanblé fé lantrotien zot sal lo Roiyom, lo sèrvis lokal pou dévlopman-konstruksion (LDC) i choizi bann frèr pou èt formatèr pou lantrotien. Chak formatèr i jèr ant sis é dis sal. Li sava sur plas pou done bann proklamatèr in formasion pou lantrotien zot sal. Tou lé troi zan, li vérifié bien dan kèl léta lo batiman i lé, é li not tout bann problèm an rapor èk la sékurité é lantrotien.

Bann frèr é sèr lé rokonésan gingn bann formasion. Indhumathi, in sèr i sort péi Lind, i di : « Lo formasion té tro gayar. Moin té bien kontan aprann koman gard nout sal an bon léta. » Evans, k’i abit Kénia, la di : « Nou la rand anou kont ké pou pa fé bann gro dépans larjan, i fo règ bann ti problèm avan ké sa i dovien pli grav. »

Koman i fé pou pèy tout lo bann dépans

Tou lé zan, i kout bann santèn é mèm bann milié euro pou fé march é antrotien in sal lo Roiyom. É sa, i dépan landroi lo sal i lé, dépi konbien d’tan i utiliz ali é osi lo kantité lasanblé i réini dédan. Koman i fé pou pèy tout lo bann dépans ?

Sé gras bann don, k’i gingn fé lantrotien bann sal lo Roiyom. Alexander, in frèr k’i abit Kazakhstan, i di : « I ansèrv in parti bann zofrann pou pèy lintèrnèt é zafèr kom dolo èk kouran ; in not parti pou pèy tout sak la bézoin kom sèrvièt papié, lo gan, bann produi pou lantrotien oubien la pintir. » É i done lo rès bann zofrann pou fé bann projé pli gro é pli chèr dan dot landroi su la tèr.

Bann pli gro projé lantrotien

Si in sal lo Roiyom la bézoin fé travo lantrotien, é ké larjan pou bann travo-la va kout pli chèr ké lo bann dépans k’i fé dabitud su dé ou troi moi kan i utiliz la sal, alor bann zansien va domand lavi lo formatèr lantrotien LDC. Si lo LDC lé dakor, va ansèrv bann don pou laktivité mondial pou pèy projé-la. Pandan lané d’sèrvis 2023, lavé 8 793 projé komsala ké la kout 76,6 milion dollara (70 600 000 €). Alon koz su dé légzanp.

Dann péi Langola, navé bonpé problèm su in sal lo Roiyom, ké té konstrui dépi 15 zan. Lèstrisité té pu bon dutou, bann mur té pété, é bann voizin té souplingn ké dolo té rant dan zot kaz. Lo LDC la organiz bann travo pou règ tousa problèm-la. Projé-la, la kout 9 285 dollar (apépré 8 500 €). Lo bann voizin té rokonésan é zot té an rovien pa lo fason la fé bann travo.

Dann péi la Pologn, lo toi in sal lo Roiyom té koul é té gingn pu fé rien èk lo mokèt. Lo LDC té dakor pou répar lo toi pou k’i koul pu é osi pou armèt in not mokèt. Projé-la, la kout 9 757 dollar (apépré 9 000 €). Dukou nora pu bézoin fé bann gro travo su sal-la pandan kèk zané.

Lantrotien nout bann sal i done lonèr Jéova

Lantrotien nout bann sal i done lonèr Jéova é i évit gaspi bann don. Shaun, in frè k’i abit Tonga, i di : « Gras bann travo lantrotien, nou ador Jéova dan in sal lo Roiyom ké lé prop, an nik é an bon léta. Sa i mèt an lèr lo non Bondié dann voizinaj. Nou lé fièr invit domoun dan nout sal. »

Koman ou pé èdé ?

Nout tout nou pé èdé pou nétoiy é fé lantrotien ousa nou fé ladorasion. Ala sak Marino, in formatèr pou lantrotien an Lostrali, i di : « Nout tout i pé gingn kontantman kan nou okip bien nout bann sal lo Roiyom. Kan nou fé sa, i pèrmèt fé gro zékonomi é komsa la, i gingn ansèrv bann zofrann ousa la vréman bézoin. »

Joel, in frèr dann péi Lind, i èm done kou d’min pou lantrotien son sal lo Roiyom. Li di : « Travay èk mon bann frèr é sèr, sa i done amoin in ti lavan gou lo monn nouvo. » Nicole, ké nou la fine kozé talèr la, i rakont : « Na poin lontan, moin la pas sèrpiyèr pandan ké bann frèr té pou aranj in fuit dolo dan lo sal lo Roiyom. Mèm si la pa moin la règ lo problèm, moin la fé mon par pou ké in laksidan i ariv pa. »

Si ou vé done in kou d’min pou lantrotien out sal lo Roiyom, koz èk bann zansien out lasanblé. An plis, oubli pa, out bann zofrann i ansèrv pa rienk pou fé lantrotien out sal, mé i ansèrv osi pou fé lantrotien dot sal lo Roiyom dan lo monn. Ou pé mèt out larjan dan bann boit zofrann ké lé dan out sal, oubien, ou pé fé sa dési lintèrnèt donate.jw.org. Nou lé rokonésan pou zot gran kèr.