Nout bann zansien i form pa in group le prèt. Zot lé pa péyé pou sad zot i fé dan la kongrégasion. Kom dann tan premié sièk, sé bann zom ke lé proch koté Jéova, é zot lé choizi pou èt bann bèrjé dan la kongrégasion (Akt 20:28). Banna i ranpli bann kondision ki fo pou dirij é prann soin la kongrégasion, « pa parske zot lé oblijé, mé volontèrman ; pa parske zot i ièm tir in profi malonèt, mé avèk gran keur » (1 Pièr 5:1-3). Kosa banna i fé pou nou ?

Banna i sousi a zot de nou é i protèj a nou. Bann zansien i gid, i protèj é i èd la kongrégasion pou rès proch koté Jéova. Zot i dominn pa nou, parske zot i konpran ke sé Bondieu ke la donn a zot se rol inportan la ; O kontrèr, zot i èd a nou pou ke nou san a nou bien é ke nou lé kontan (2 Korintien 1:24). Kom in bèrjé i pran soin chak brebi ke li néna, banna i fé tout zot posib pou konèt chak pèrsonn dan la kongrégasion (Provèrb 27:23).

Banna i ansègn a nou koman fé la volonté Bondieu. Chak semèn, bann zansien i dirij bann rénion la kongrégasion pou rann nout foi plu for (Akt 15:32). Bann zom la, lé fidèl é zot i donn osi le méyeur de zot mèm dan la prédikasion. Zot i prèch osi èk nou, é zot i form a nou dann tout form prédikasion.

Banna i ankouraj a nou. Pou èd chakèn d’nou raproch ankor plus koté Jéova, bann zansien i diskut ansanm nou kan nou lé la Sal du Roiyom, oubien zot i vien voir a nou nout kaz. Zot lintansion, sé èd a nou é ankouraj a nou avèk la Bib (Jak 5:14, 15).

An plus bann travay ke zot néna dan la kongrégasion, in bonpe zansien néna in travay é bann résponsabilité familial ki demann a zot bokou d’tan é bonpe zéfor. Bann frèr la « ki travay dur » i mérit nout réspé (1 Tésalonisien 5:12, 13).

• Kèl rol bann zansien néna dan la kongrégasion ?

• Kèl èd banna i aport chakèn d’nou ?

La Bib i amont ke néna deu group parmi bann krétien ke néna bann résponsabilité dan la kongrégasion : bann « survéyan » é bann « zasistan ministèryèl » (Filipien 1:1). Normalman, néna in bonpe dann chak kongrégasion. Alor, kosa bann zasistan ministèryèl i fé pou nou ?

Zot i èd bann zansien. Ke zot lé jeun ou ajé, bann zasistan ministèryèl, lé proch ansanm Jéova. Zot lé bann pèrsonn de konfians é zot i travay avèk sèryeu. Pou ke tout i fonksionn bien dan la kongrégasion, zot i okup a zot in bonpe zafèr ke lé inportan. Zot i jèr osi sèk i touch bann késtion matèryèl é sak i konsèrn lorganizasion. Sa i pèrmèt bann zansien pou mieu okup bann résponsabilité ke zot néna : ansénié é prann soin bann pèrsonn dan la kongrégasion.

Zot i rann a zot util pou lé zot. Bann zasistan ministèryèl i okup a zot pou akeuiy bann domoun, kan néna bann rénion. Désèrtin i okup a zot la sonorizasion, oubien i fé la kontabilité. Dot i remèt bann publikasion é bann téritoir pou préché, pou bann frèr é seur dan la kongrégasion. Zot i èd osi pou nétoiyé é antretien la Sal du Roiyom. Parfoi, bann zansien i pe demann a zot pou aport in lèd bann krétien la finn ajé. Ninport kèl résponsabilité ke bann zasistan ministèryèl néna, zot i fé avèk gran keur. Parsa, zot i gingn le réspé tout bann pèrsonn dan la kongrégasion (1 Timoté 3:13).

Zot i donn in bon légzanp. Bann zasistan ministèryèl lé choizi parske zot néna bokou d’kalité krétien. Kan néna bann rénion, zot i fé bann sujé ki ranfors nout foi. Nou lé ankourajé par zot bon légzanp dan la prédikasion. Kom zot i travay ansanm bann zansien, sa i aport la joi èk lunité dan la kongrégasion (Éfézien 4:16). Avèk le tan, zot i pe travay bann kalité ki fo pou devnir ansien.

• Kèl kalité bann zasistan ministèryèl i doi avoir ?

• Kèl èd banna i aport pou ke tout i march bien dan la kongrégasion ?

Bann zékritur grèk krétien i parl souvan su Barnabas èk lapot Pol. Dann tan premié sièk, banna lété survéyan itinéran, é zot té rann vizit bann kongrégasion. Pou kosa zot té fé sa ? Parske zot té sousi a zot vréman, pou konèt si bann krétien té i san a zot bien. Pol la di : « Alon artourn vizit bann frèr [...] pou voir koman zot i lé » (Akt 15:36). Li lété pré pou fé in tralé kilomèt, pou alé ranfors la foi banna. Bann survéyan itinéran nout lépok i fé parèy.

Zot i vien pou ankouraj a nou. Chak survéyan sirkonskripsion i vizit apepré 20 kongrégasion deu foi dan lané ; zot i pas in semèn dann chak kongrégasion. Léspèryans ke zot nana é sak zot madam (si zot lé maryé) i fé a nou du bien. Zot i ièm fé konésans avèk bann jeun é bann moin jeun. Zot i akonpagn a nou osi pou préché é pou fé bann zétud biblik. Avèk bann zansien, zot i vizit bann frèr é seur pou aport chakèn lèd ke zot la bezoin. Dann bann rénion pou la kongrégasion é dann bann zasanblé, zot i fé diskour pou ankouraj a nou (Akt 15:35).

Zot i intérès a zot tout domoun. Bann survéyan sirkonskripsion i éd bann pèrsonn dan la kongrégasion pou gingn in méyeur relasion avèk Jéova. Zot nana in rénion avèk bann zansien é bann zasistan ministèryèl pou fé le poin su bann progré ke la été fé. Zot i donn bann konsèy pou èd banna asum zot résponsabilité. Zot i èd bann pionié pou gingn bon rézulta dan la prédikasion. Zot lé kontan fé konésans èk bann nouvo ke lé dan la kongrégasion é zot i ve konèt kèl progré banna la fé osi. Chak survéyan lé bien dispozé pou sèrv lé zot. Li konsidèr a li kom « in konpanion d’travay pou [n]out bien » (2 Korintien 8:23). Zot foi é zot fidélité pou Bondieu lé in bon légzanp pou nou imité (Ébreu 13:7).

• Pou kosa bann survéyan sirkonskripsion i vizit bann kongrégasion ?

• Koman ou pe tir profi zot bann vizit ?

Kan i ariv in katastrof, nou organiz a nou toutsuit pou èd bann Témoin Jéova ke lé dann soufrans. Bann zéfor ke nou fé, i pèrmèt a nou mont nout lamour sinsèr pou nout bann frèr é seur (Jan 13:34, 35 ; 1 Jan 3:17, 18). Kosa nou fé pou èd a zot ?

Nou donn larjan. Dann tan premié sièk, bann krétien Antioch la anvoiy larjan pou dot krétien ke té abit an Judé, parske lavé in gran faminn (Akt 11:27-30). Ojourdui, dann désèrtin landroi, nou antan parfoi ke bann Témoin lé dan le bezoin. Kan i ariv sa, nou fé bann don matèryèl pou èd a zot. Sa i pas par la kongrégasion (2 Korintien 8:13-15).

Nou organiz bann sekour. Bann zansien ke lé dann landroi ousa la ariv in katastrof i rod chak pèrsonn zot kongrégasion, pou konèt si zot tout lé bien. Néna in group bann Témoin (in komité d’sekour) ki organiz lèd médikal é distribusion manjé, de lo prop, bann linj é in landroi pou dormi. In kantité Témoin, ke lé kalifié dan zot travay, i désid par zot mèm déplas a zot, avèk zot prop moiyen, pou aport lèd oubien pou répar bann kaz é bann Sal du Roiyom ke lété dégréné. Kom nou lé uni é ke nou lé abitué travay ansanm, vit fé nou mèt la min ansanm kan i ariv in katastrof. Nou èd « nout bann frèr dan la foi », mé osi, si lé posib, dot moun ninport kèl relijion (Galat 6:10).

Nou konsol avèk la Bib é nou aport in rékonfor. Bann domoun ke la viv in katastrof la surtou bezoin èt rékonforté. Kan i ariv sa, nou trouv la fors koté Jéova, « le Bondieu ki donn tout konsolasion » (2 Korintien 1:3, 4). Kan nou parl bann promès la Bib avèk bann domoun ke lé dann traka, nou asur a zot ke le Roiyom Bondieu i tard pa pou anlèv bann katastrof, bann douleur èk bann soufrans (Révélasion 21:4).

• Kan in katastrof i ariv, pou kosa nou réaji vitman ?

• Koman nou rékonfort bann domoun ke la viv in katastrof ?

In pe d’tan avan son mor, Jézu la koz avèk kat son bann disip — Pièr, Jak, Jan é André. Li la parl a zot su le « sign de son prézans », ke noré arivé dan le tan bann dèrnié jour, é li la poz in késtion inportan : « Kisa i lé lésklav fidèl é saj ke son mèt la établi su son bann doméstik, pou donn banna zot nouritur o moman ki fo ? » (Matieu 24:3, 45 ; Mark 13:3, 4). Isi le mo « nouritur », i ve dir ke sé in nouritur éspirituèl, ke lé la konésans su Bondieu. Jézu, le « mèt », lavé promèt son bann disip ke li noré choizi sak té sar donn a zot konésans la an kantité dann dèrnié jour. Kisa i sré « lésklav » la ?

Sé inn ti group bann krétien oin. Le mo « Oin » i ve dir, choizi par léspri Bondieu. « Lésklav » la, sé le Kolèj santral bann Témoin Jéova. Li donn la nouritur éspirituèl dot zadorateur Jéova. Gras lésklav la nou gingn nout « kantité d’nouritur o moman ki fo » (Luk 12:42).

Li jèr la « mézoné Bondieu » (1 Timoté 3:15). Jézu la donn « lésklav » la, le gran résponsabilité pou jèr bann resours é bann zaktivité pou lorganizasion Jéova ke lé su la tèr : dirij la prédikasion é lansègnman dan nout bann kongrégasion. Pou donn a nou sèk nou la bezoin, é kan nou la bezoin, « lésklav fidèl é saj » i distribu la nouritur éspirituèl. Pou fé sa, zot i utiliz bann publikasion ke nou ansèrv pou préché, é zot i utiliz osi lansègnman ke lé prézanté kan néna bann rénion é bann zasanblé.

« Lésklav » la, i rès « fidèl » bann vérité biblik é son mision pou prèch la bonn nouvèl osi. Kom li jèr bien bann zintéré le Kris su la tèr, sé pousa i di ke li lé « saj » (Akt 10:42). Jéova i béni lésklav la, sé pousa ke li produi la nouritur éspirituèl an grann kantité é ke in bonpe domoun i aksèp la vérité (Izai 60:22 ; 65:13).

• Kisa Jézu la choizi pou donn son bann disip la nouritur éspirituèl ?

• Pou kosa nou pe dir ke « lésklav » lé « fidèl » é « saj » ?

Dann tan premié sièk, lavé « inn ti group bann zapot èk bann zansien dann Jéruzalèm » ke té i form in kolèj santral. Zot té i pran bann désizion inportan pou tout bann krétien oin zot lépok (Akt 15:2). Zot tout té ariv tonm dakor pou pran bann désizion. Pousa, zot té i réfléchi su bann Zékritur é zot té i lès a zot gidé par léspri Bondieu (Akt 15:25). Ojourdui, le Kolèj santral i suiv le mèm légzanp.

Sé in group bann krétien ke Bondieu i utiliz pou fé son volonté. Bann krétien oin ki fé parti le Kolèj santral, i ièm in bonpe la Parol Bondieu. Zot nana in bonpe léspèryans pou jèr bann késtion pratik é relijieu. Le Kolèj santral nana in rénion chak semèn pou diskut bann bezoin ke bann Témoin néna su tout la tèr. Kom dann tan premié sièk, le Kolèj santral i donn bann zinstruksion bazé su la Bib. Pousa, zot i anvoiy bann lèt oubien zot i utiliz bann survéyan itinéran. Tousa i fé ke le peup Bondieu lé uni dann zot fason d’pansé é par sak zot i fé (Akt 16:4, 5). Le Kolèj santral i donn zankourajman pou préché é li prépar osi la nouritur éspirituèl. Li mèt an plas osi bann frèr pou asum bann résponsabilité.

Sé in group bann krétien ki lès a zot gidé par léspri Bondieu. Le Kolèj santral i chèrch la diréksion Jéova, le Souvrin lunivèr, é sad Jézu, le Chèf la kongrégasion (1 Korintien 11:3 ; Éfézien 5:23). Sèk i fé parti le Kolèj santral i konsidèr pa zot kom bann chèf dan le peup Bondieu. Zot i « kontinu suiv Lanio [Jézu] ninport kèl landroi ousa li sava », avèk tou lé zot krétien oin (Révélasion 14:4). Le Kolèj santral lé rekonésan pou tout bann priyèr ke nou fé pou zot.

• Dann tan premié sièk, kisa té i fé parti le kolèj santral ?

• Koman le Kolèj santral nout lépok i chèrch diréksion Bondieu ?

Dan la lang ébreu, Bétèl i ve dir « Mézon Bondieu » (Jenèz 28:17, 19, not). Le non la i kol bien, parske bann batiman la, lé utilizé in pe partou dan le monn pou organizé é ankourajé la prédikasion bann Témoin Jéova. Sé a partir le sièj mondial ke lé o Zéta-Zuni (dan Léta Nou-Iork), ke le Kolèj santral i dirij le travay ke lé fé dann bann buro nasional ou filial, dann in bonpe péi. Sad i travay dann bann batiman la, i apèl a zot la « fami du Bétèl ». Kom in fami, bann Bétélit la, i viv é i manj ansanm. Banna i travay kot a kot é i étudi la Bib dann lunité (Psom 133:1).

In landroi éspésial ousa chakèn i donn de li mèm dann in gran « fami ». Dann chak Bétèl, néna bann Témoin, om é fam, i travay a plin tan pou fé la volonté Bondieu é pou fé avans bann zintéré le Roiyom (Matieu 6:33). La poin pèrsonn lé péyé pou fé sa, mé sèk i travay la, lé lojé é nouri. Zot i gingn inn ti moné pou zot prop dépans. Chakèn néna in travay pou fé, i pe èt dann buro, dan la kuizinn, dan la sal a manjé oubien dann linprimri. Dot i travay ousa i fé bann liv, é désèrtin i fé ménaj, i okup linj, i fé lantretien tout zafèr, é dot choz ankor.

In landroi ousa i travay dur pou fé avans la prédikasion. Lobjéktif inportan ke chak Bétèl néna, sé ke le plus domoun posib i antan parlé bann vérité biblik. Brochur la lé in bon légzanp. Li la été ékri sou le diréksion le Kolèj santral. Dann in premié tan, i anvoiy bann dokuman par lintèrnèt pou bann santèn lékip traduksion é sa, dan le monn antié. Aprésa, i anvoiy a li dann diféran Bétèl pou èt inprimé su bann machinn grann vitès. An dèrnié, li lé éspédié dann 110 000 kongrégasion é plus. Pou chak létap la, la « fami du Bétèl » i aport in vré soutien pou laktivité le plu zinportan : la prédikasion la bonn nouvèl (Mark 13:10).

• Kisa i lé bann Bétélit, é èske zot lé péyé ?

• Kèl laktivité inportan chak Bétèl i soutien ?

Dann in buro nasional ke i apèl osi Bétèl oubien filial, néna diféran sèrvis ki jèr la prédikasion dann inn ou in tralé péi : pou traduir, inprimé, relié, éspédié bann publikasion, é fé bann zanrejistreman odio-vidéo, é dot choz ankor.

Li organiz nout bann zaktivité avèk lèd in Komité buro nasional. Le Kolèj santral i donn o Komité buro nasional la résponsabilité pou jèr chak Bétèl ou filial. Dann in komité buro nasional néna o moin troi zansien ke néna in bonpe léspèryans. Se komité la, i inform le Kolèj santral bann progré su laktivité ke lé fé dan le péi ke li okup, é si néna bann problèm. Bann rapor ke li fé, i pèrmèt le Kolèj santral désid kèl sujé i sra parlé dann bann prochin publikasion, bann sujé pou bann rénion é pou bann zasanblé. Bann reprézantan le Kolèj santral i vizit souvan bann Bétèl oubien bann filial, pou èd bann komité buro nasional asum zot résponsabilité kom ki fo (Provèrb 11:14). Pandan in rénion éspésial, le reprézantan le buro mondial i fé in diskour pou ankouraj tout bann Témoin dan le péi ke li vizit.

Li soutien bann kongrégasion lokal. Dann in buro nasional, néna bann frèr ke i donn zot lakor pou kré bann kongrégasion. Zot i jèr osi laktivité bann pionié, bann misionèr é bann survéyan sirkonskripsion. Zot i organiz osi bann zasanblé, é i jèr la konstruksion bann Sal du Roiyom. Zot i fé an sort ke bann publikasion lé anvoiyé pou bann kongrégasion pou réponn zot bezoin. Tout sèk lé fé dann in buro nasional i pèrmèt ke la prédikasion lé fé dan lord (1 Korintien 14:33, 40).

• Koman bann komité buro nasional i èd le Kolèj santral ?

• Kosa lé fé dann in buro nasional ?

Kom lé inportan ke nou anons la « bonn nouvèl » pou « tout nasion, é tribu, é lang, é peup », nou fé sort bann publikasion dann anviron 750 lang (Révélasion 14:6). Koman nou gingn fé in gran nafèr komsa ? Sé gras in lékip intèrnasional bann rédakteur é in group bann tradukteur dévoué. Zot tout lé Témoin Jéova.

Le tèks dorijinn lé ékri dabor an anglé. Le Kolèj santral ke lé o buro mondial, i supèrviz tout sak lé fé dan le sèrvis rédaksion. Sèrvis la i dirij bann travay bann rédakteur ke lé o buro mondial é sèk lé dann désèrtin buro nasional osi. Kom néna in lékip intèrnasional, sa i pèrmèt trèt bann sujé pou diféran kultur ki intérès domoun tout péi.

Le tèks lé anvoiyé pou bann tradukteur. Kan le tèks la finn korijé é aprouvé, li lé anvoiyé par lintèrnèt pou nout bann tradukteur dan le monn antié. Banna i travay an ékip pou tradui, réviz é korij zot traduksion. Zot i fé zéfor pou bien tradui dan zot lang bann « parol la vérité ke lé égzak », pou ke néna le mèm sans ke bann tèks an anglé (Éklézias 12:10).

Bann zordinateur i fé gingn le tan. In lordinateur i pe pa ranplas in rédakteur oubien in tradukteur. Par kont, bann diksionèr éléktronik é bann lojisièl pou fé rechèrch é pou èd tradui, i fé gingn le tan. An plus, bann Témoin la invant in sistèm éléktronik pou lédision multiling (MEPS) ki pèrmèt konpoz bann tèks dann pluzieur santèn de lang. Li aranj bann tèks avèk bann zimaj pou èt inprimé.

Pou kosa tousa zéfor la lé fé pou produi bann publikasion, mèm pou bann lang ke lé parlé par detroi milié d’moun seulman ? Parske Jéova i ve « ke tout kalité domoun lé sové é i ariv juska gingn in konésans égzak su la vérité » (1 Timoté 2:3, 4).

• Koman nout bann publikasion lé ékri ?

• Pou kosa nou tradui dann in bonpe lang komsa ?

Chak ané, nou publi é nou distribu gratuitman bann santèn milion d’bib é dot publikasion. A koté d’sa, nou konstrui é nou fé lantretien bann Sal du Roiyom é bann Bétèl. Nou pran an charj bann milié Bétélit é bann misionèr. Néna osi lèd ke nou aport pou bann Témoin Jéova é dot pèrsonn dann difikulté ou kan i ariv in katastrof. Ou demann a ou petèt : « Ousa i tir larjan pou fé tousa ? »

Nou demann pa la dim, la poin kotizasion é nou fé pa la kèt. Lé vré ke nout laktivité mondial i ariv chèr, mé jamé nou demann larjan. Néna plus in sièk, dan le deuzièm numéro La Tour de Garde té i di avèk fors, kom nou lé sur ke Jéova lé nout soutien, jamé nou va demann ou rechèrch lèd bann zom. É nou la tien nout parol ! (Matieu 10:8).

Nout bann zaktivité lé soutenu par bann zofrann ke lé fé d’bon keur. Néna in bonpe domoun ke i aprési nout laktivité lansègnman biblik é banna i fé bann zofrann pou soutien sa. Bann Témoin lé kontan donn zot tan, zot fors, zot larjan é dot resours ankor pou ke la volonté Bondieu lé fé su tout la tèr (1 Kronik 29:9). Dan la sal du Roiyom é bann sal lasanblé, sad i ve donn in nafèr i pe mèt dann bann boit pou zofrann. In gran parti bann zofrann ke nou resoi, lé fé par bann pèrsonn ke lé pa rich. Banna lé in pe kom la veuv ke lété pov é ke Jézu la parl an bien, parske li la donn deu ti piès larjan pou le trézor le tanp (Luk 21:1-4). Komsa, chakèn i pe régulièrman « mèt inn ti kékchoz de koté » pou doné « kom li la désidé dan son keur » (1 Korintien 16:2 ; 2 Korintien 9:7).

Nou lé sur ke Jéova va kontinué pous sèk la anvi onor a li avèk zot « bann choz ke na la valeur », pou soutenir bann zaktivité pou le Roiyom, pou ke son volonté lé fé (Provèrb 3:9).

• Kosa i rann a nou diféran lé zot relijion ?

• Kosa i fé avèk bann zofrann volontèr ?

Kom zot non i amont, bann Sal du Roiyom, lé bann zandroi ousa in lansègnman biblik bazé su le Roiyom Bondieu lé doné. Le Roiyom Bondieu, sé lansègnman prinsipal ke Jézu té i prèch (Luk 8:1).

Sé bann zandroi ousa i pratik le vré ladorasion. Sé a partir bann Sal du Roiyom la, ke la prédikasion la bonn nouvèl lé organizé, é sa, dann chak péi (Matieu 24:14). Bann Sal du Roiyom na poin le mèm grandeur ni le mèm modèl, mé tout lé konstrui in fason sinp. Souvandéfoi, i ariv ke in bonpe kongrégasion i utiliz le mèm Sal du Roiyom. Sé dèrnié tan, in bonpe domoun i asis bann rénion dann bann kongrégasion. Sé pousa, nou la konstrui bann Sal du Roiyom par dizèn de milié (an moiyèn sink par jour). Koman in nafèr komsa lé posib ? (Matieu 19:26).

Bann Sal du Roiyom lé konstrui gras bann zofrann ke lé plasé su in kont unik. Bann zofrann lé anvoiyé o buro nasional é lé doné pou bann kongrégasion ke la bezoin konstrui oubien répar bann Sal du Roiyom.

Bann Sal du Roiyom lé konstrui gras bann volontèr diféran péi. Dann in bonpe péi néna bann zékip pou la konstruksion bann Sal du Roiyom (dann group la néna bann volontèr é bann sèrviteur pou la konstruksion bann Sal du Roiyom). Banna i déplas a zot dann in kongrégasion apré lot, mèm si lé loin, pou èd dot Témoin Jéova konstrui zot Sal du Roiyom. Dan dot péi, bann Témoin ke lé kalifié i okup a zot pou organiz la konstruksion é la réparasion bann Sal du Roiyom dann in réjion. Néna bann Témoin ke néna léspèryans é ki abit dan la réjion i vien donn in koud’min su bann konstruksion. Mé, sé surtou bann Témoin ki abit dan le koin ki fé le plu gro travay. Bann zafèr komsa lé posib gras léspri Jéova é osi gras bann zéfor ke son peup i fé èk tout zot keur (Psom 127:1 ; Kolosien 3:23).

• Pou kosa bann zandroi ousa nou ador Bondieu i apèl Sal du Roiyom ?

• Koman nou konstrui bann Sal du Roiyom su tout la tèr ?

Le sin non Bondieu lé ékri su tout bann Sal du Roiyom bann Témoin Jéova. Lé inportan pou nout ladorasion Bondieu ke nou gard bann Sal du Roiyom prop, prézantab é dann in bon léta, é sa, sé in loneur pou nou. Nout tout i pe mèt la min ansanm pou fé lantretien.

Nou lé volontèr pou fé nétoiyaj apré in rénion. Apré chak rénion, bann Témoin lé kontan fé inn ti nétoiyaj zot Sal du Roiyom. In gran nétoiyaj lé fé in foi par semèn. In ansien oubien in asistan ministèryèl i dirij lantretien. Dabitud, zot i suiv in lis bann travay ke néna pou fé. Si na bezoin, désèrtin lé volontèr pou pas balié, pou pas laspirateur, pou pas sèrpiyèr, anlèv bann pousièr, ranj bann chèz, nétoiy bann toilèt, bann vit èk bann glas, vid bann poubèl oubien fé lantretien la kour. Nana in jour ke lé rézèrvé pou in gran nétoiyaj a fon o moin in foi dan lané. Kan nou fé partisip nout bann zanfan pou nétoiy la Sal du Roiyom, nou aprann a zot réspèk landroi ousa nou ador Bondieu (Éklézias 5:1).

Nou fé bann réparasion. Tou lé zan, nana in kontrol tout bann Sal du Roiyom ke lé fé, dedan kom deor. Aprésa, pou gard la Sal dann in bon léta, nana bann travo ke lé fé souvan, komsa i évit bann dépans inutil (2 Kronik 24:13 ; 34:10). In Sal du Roiyom prop é dann in bon léta, sé in landroi ke lé bien pou ador Bondieu. Kan nou aport nout lèd pou fé bann travo, nou mont ke nou ièm vréman Jéova é landroi ousa nou ador a li (Psom 122:1). Sa i donn osi in bon témoiniaj pou domoun dan lé zalantour (2 Korintien 6:3).

• Pou kosa nou doi pa néglij landroi ousa nou ador Bondieu ?

• Koman nou fé lantretien nout bann Sal du Roiyom ?

Èske ou èmré fé bann rechèrch pou mieu konèt la Bib ? Èske ou èmré konèt plus su in vèrsé, oubien su in pèrsonaj, ou petèt in landroi ou in nafèr ke lé parlé dan la Bib ? Si ou néna in traka, èske ou la finn demann a ou si la Parol Bondieu i pe èd a ou ? Si oui, alor utiliz la bibliotèk la Sal du Roiyom.

Li néna bann bon liv é dot choz pou fé rechèrch. Petèt ou la poin tout publikasion biblik bann Témoin Jéova dann out lang. Mé dan la bibliotèk la Sal du Roiyom néna bann dèrnié publikasion, é petèt detroi vèrsion la Bib, in bon diksionèr é dot liv ke lé util. Ézit pa utiliz a zot avan ou apré bann rénion. Si néna in lordinateur ke lé disponib, ou pouré fé rechèrch avèk le lojisièl Watchtower Library. Sé in bibliotèk éléktronik ke néna in bonpe publikasion ke nou la fé. An plus, lé fasil pou fé rechèrch dedan pou trouv bann ransègnman su in sujé, in mo oubien in vèrsé.

Li lé util pou bann zélèv ke i partisip pou la Rénion Vi é Ministèr. Ou pouré petèt utiliz la bibliotèk la Sal du Roiyom kan ou néna in devoir pou préparé. Sé le résponsab Rénion Vi é Ministèr ki okup a li bibliotèk la. Li asur a li ke bann liv lé bien ranjé é ke bann dèrnié publikasion lé dedan. Le survéyan oubien out lansénian i pe mont a ou koman ou pe fé pou trouv sèk ou la bezoin. Mé oubli pa, pèrsonn i doi amèn bann liv la an deor la Sal du Roiyom. Bien sur, nou doi fé atansion pou pa abim bann liv la é nou doi pa ékri dedan.

La Bib i ésplik ke, pou « trouv la konésans su Bondieu », i fo chèrché « kom bann trézor ke lé kachièt » (Provèrb 2:1-5). La bibliotèk la Sal du Roiyom i pe èd a ou trouv sa.

• Kosa nou trouv dan la bibliotèk la Sal du Roiyom ?

• Kisa i pe èd a ou pou bien utiliz bibliotèk la ?

Jézu Kris la di avèk son bann disip : « I fo ke zot lumièr i briy devan bann domoun, pou ke banna i voi zot bon zaksion é i rann gloir zot Papa ke lé dann sièl » (Matieu 5:16). Pou ariv fé sa, nou utiliz in bonpe téknik modèrn, kom Lintèrnèt. Le sit ofisièl pou inform a nou su bann kroiyans é bann zaktivité bann Témoin Jéova sé nout sit ouèb, jw.org. Kosa nou trouv su sit la ?

La répons ke la Bib i donn su bann késtion ke lé souvan pozé par in bonpe d’moun. Ou pe trouv su le sit la répons su désèrtin késtion inportan su la vi. Par égzanp, bann trak Èske nou va arèt soufèr in jour ? é Èske sèk lé mor i pe reviv in jour ? lé disponib an lign an 600 lang é plus. Ou pe trouv osi la Traduction du Monde Nouveau an 130 lang é plus, bann liv pou étudié la Bib kom Qu’enseigne réellement la Bible ?, é bann dèrnié numéro La Tour de Garde é Réveillez-vous ! I gingn osi lir oubien ékout su lintèrnèt in bonpe bann publikasion la, oubien télécharj a zot dann bann forma ke lé konu kom MP3, PDF, oubien EPUB. Ou pe mèm inprim detroi paj dann in not lang, pou in moun ki ve mieu konèt la Bib. Néna osi bann vidéo dann diféran lang dé sign su sit la. Ou pe fé a ou plézir é télécharj bann léktur biblik sou form piès téat, bann piès téat biblik é bann joli muzik.

Bann ransègnman su bann Témoin Jéova. Nout sit i propoz osi bann dèrnié zinformasion é bann vidéo muzikal su nout laktivité dan le monn antié. Ou pe voir osi bann zévènman ki konsèrn bann Témoin Jéova é sèk lé fé pou èd lé zot kan i ariv in katastrof. Ou va trouv osi bann zadrès nout bann buro nasional é bann ransègnman su nout bann zasanblé.

Sé komsa ke nou fé briy la lumièr d’la vérité partou dann bann zandroi le plu loin posib su tout la tèr. Lé vré, bann zabitan dan tout bann péi, mèm an Lantartik, i sa va su nout sit. Nou pri pou ke « la parol Jéova i kontinué répann » su tout la tèr, pou rann gloir Bondieu (2 Tésalonisien 3:1).

• Par koman jw.org i fé dékouv la vérité biblik ?

• Kosa ou èmré alé voir su nout sit ouèb ?