Мэ думиндём со Дэвлэс нанэ

РОСПХЭНЭЛАС ПАЛ ПЭСТЭ

Мэ бияндыём дрэ нанэ баро гаворо дрэ Саксония. Дрэ одова времё ада исыс территория Германско Демократическо Республика (ГДР). Кэ амэ исыс дружно семья, о дад и дай дэнас мангэ лачё воспиниё. ГДР исыс коммунистическо государство, и мануша дрэ амари местность напатянас дрэ Дэвлэстэ. Мэ кокоро думиндём, со Дэвлэс нанэ. Кэ 18 бэрш мэ бариём тэлэ атеизмо и коммунизмо.

Коммунисты ракирнас, со сарэ мануша равна и мангэ адава камэласпэс. Адякэ мэ думиндём, со явэла справедливо, кэдэ роздэн имущество, собы тэ наявэл барвалэн и чорорэн. Палдава мэ гэём, дрэ коммунистическо организация ваш тэрнэнгэ. Кэдэ мангэ исыс 14 бэрш мэ сомас дрэ екх проекто, саво заракхэлас природа и пирикэрлас макулатура. Рая дро форо Ауэ дэнэ мангэ званиё, савэса накхарэлпэс почётно гражданино. Мэ сомас ещё тэрно, нэ мэ ужэ джиндём манушэн, савэ исыс известна дрэ политика ГДР. Мэ джиндём, со мандэ правильна цели дро джиипэн и ман дужакирэл лачё будущё.

Нэ дриван резко саро парудяпэс. Дро 1989 бэрш пэя Берлинско ванта, а кэтанэ ласа роспэнэпэс и коммунистическа страны дро Восточно Европа. А пал адая бида явья и явирто. Сыго мэ уґалыём, со дро ГДР исыс бут несправедливость. Например, кэ одолэ мануша савэ наподрикирнас коммунистическо строё, накучь отлыджянаспэс. Сыр ада возможно? Амэ жэ, коммунисты, патясас, со сарэ мануша равна. Неужэли коммунизмо — ада хохаибэн? Мангэ кэрдяпэс дриван пхаро.

Мэ парудём пэскиро джиипэн и про перво штэто чудём музыка и искусство. После музыкально училищё мэ мог тэ джяв тэ сыклёвав дро университето. Мэ мечтал тэявав художникоса и музыкантоса. Лачё воспитаниё, саво дэнэ мангэ о дад и дай мэ лэём тэ бистрав. Саро свободно времё мэ гулиндём. Например, мэ мог встречаться дрэ екх времё нанэ екхэ ракляса. Нэ музыка, искусство и локхо джиипэн наулэнэ пустота сави исыс дро миро джиипэн. Дажэ картины, савэ мэ рисовал, сыкавэнас мири дар и переживаниё. Мэ постоянно думиндём: со явэла ангил? Палсо мэ дживав?

Сыго мэ лакхтём ответы прэ вопросы, пал савэ мэ думиндём. Сыр то бэвэле дро училищё, амэ группаса самас бэштэ и ракирасас пал одова, со явэла ангил. Екх студентка Мандиa, ей исыс Яхваскиро Свидетелё. Дрэ одоя бэвэль, ей дэя мангэ лачё совето. «Андреасо,— пхэндя ей,— если камэс тэ лакхэс ответы прэ пэскирэ вопросы, подык дрэ Библия».

Мэ наполавас кокоро пэс, мангэ исыс интересно и мэ саек напатявас. Нэ мангэ исыс дриван интересно. Манди сыкадя мангэ пророчество дрэ 2-ро глава дрэ книга Даниила. Мэ удивился. Дрэ лэстэ ракирэласпэс, со державы савэ дро миро парувэнас екх екхэс и ада исыс бут веки и догэя кэ амарэ дэвэса. Манди дякэ жэ сыкадя мангэ библейска пророчества савэ сыкавэн, со дужакирэл манушэн ангил. Кана мэ полыём кай тэ лакхав ответы прэ пэскирэ вопросы! Нэ кон мог адя точнэс тэ роспхэнэл пал одова со явэла ангил? Неужэли Дэвэл исы?

СЫР Э БИБЛИЯ ПАРУДЯ МИРО ДЖИИПЭН

Манди познакомила ман Яхваскирэ Свидетеленца лэн кхарнас Хорстоно и Ангелика, онэ исыс ром ромняса, савэ сыклякирнас ман пирэ Библия. Мэ быстро полыём, со Яхваскирэ Свидетели — ада единственно религия, сави ракирэл Дэвлэскиро лав Яхва, и роспхэнэл пал лэстэ явирэнгэ (Псалом 83:18; Матфея 6:9). Мэ уґалыём, со Дэвэл Яхва обещает тэ дэл манушэнгэ вечно джиипэн, дро раё прэ пхув. Дрэ Псалом 37:9 ракирэлпэс: «Кон надеются прэ Яхвастэ лэна тэ дживэн прэ пхув». Мангэ дриван камьяпэс, со адасави возможность исы кажнонэстэ кон старается тэ дживэл адя сыр камэл Дэвэл.

Нэ тэ парував бут, со налачё дрэ пэскиро джиипэн мангэ исыс нанэ локхо. Мэ бут со домардёмпэс дрэ музыка и дрэ искусство и ячьём гордо, пал адава мангэ чеинэ было тэ сыклёвав одолэскэ, собы тэявав смиренно. Мангэ исыс пхаро тэ отпхэнавпэс джиипнастэр, саво исыс нанэ лачё дрэ Дэвлэскирэ якха. Мэ дриван благодарно Яхваскэ, пал лэскиро терпениё, милосердиё и пониманиё, кэ одолэ мануша савэ сарэ илэстэр камэн тэ дживэн пир лэскирэ законы!

18 бэрш мэ дживавас сыр коммунисто и атеисто. Потом мэ решил, со лава тэ дживав адя, сыр сыклякирэл э Библия. Мэ пириячьём тэ даравпэс одолэстэр, со явэла ангил и лакхтём смысло дро джиипэн. Дро 1993 бэрш мэ болдёмпэс и ячьём Яхваскиро Свидетелё, а дро 2000 бэрш мэ жэниндёмпэс пэ христианкатэ, ла кхарнас Табита ей тожэ служинэл Яхваскэ. Амэ отдас бут времё, собы тэ поможинас манушэнгэ тэ уґалён пал Библия. Кэдэ, амэ ракирас пал Дэвлэстэ амэнгэ встречаются мануша, савэн тожэ сыклякирлас коммунизмо и атеизмо. Мангэ камэлпэс тэ распхэнав адасавэнгэ манушэнгэ пал Яхвастэ.

СЫР МИРО ДЖИИПЭН КЭРДЯПЭС ФЭДЫР

Кэдэ мэ лэём тэ сыклёвав пирэ Библия Яхваскирэ Свидетеленца, мирэ дадэскэ и дакэ адава накамьяпэс. Онэ удыкхнэ, сыр парудяпэ миро джиипэн, кэдэ мэ лэём общаться Свидетеленца. Кана онэ гинэн э Библия и явэн про встречи ко Яхваскирэ Свидетели, и мэ адалэскэ дриван радо.

Мэ и Табита бахталэ, амэ стараемся тэ прилас советы, савэ исы дрэ Библия. Например, совето собы тэявас верна екх екхэскэ, поможинэл амэнгэ тэ ракхас лаче отношения (Евреям 13:4).

Кана мэ уверенно дрэ одова, со явэла ангил. Мандэ исы пшала прэ саро свэто, машкир амэндэ чачуно миро и единство. Дрэ адая духовно семья сарэ равна. Адава всегда камья миро ило.