Матеј

19 Откеда о Исус вакерѓа акала буќа, гело песке тари Галилеја, накхља тари река Јордан хем ало ко тхана сој ки граница тари Јудеја. 2 Пали лесте але бут мануша хем ов сасљарѓа лен адатхе.

3 Тегани але ки лесте о фарисеија* те искушинен ле, хем пучле ле: „Смејнела ли о ром те развединел пе пле ромњатар баши било сави бути?“ 4 Ов вакерѓа ленге: „На читинѓен ли кај окова со керѓа лен ко почеток, керѓа лен мурш хем џувли 5 хем вакерѓа: ’Адалеске о мануш ка мукхел пле даде хем пле даја хем ка спојнел пе пле ромњаја хем ола ка овен јекх тело‘? 6 Аѓаар ола нане више дуј, него јекх тело. Адалеске, о Девел со спојнѓа те овел јекх,* о мануш ма те одвојнел!“ 7 А ола вакерѓе леске: „Тегани соске о Мојсеј заповединѓа о ром те дел пле ромњаке потврда башо развод хем те мукхел ла?“ 8 Ов вакерѓа ленге: „Адалеске со сиен тврдоглава о Мојсеј дозволинѓа те развединен тумен таро тумаре ромња, ама ко почеток на сине аѓаар. 9 Адалеске вакерава туменге, секова јекх со ка развединел пе тари пли ромни, освен башо неморал,* хем кхувела ко брако јавераја, керела прељуба“.

10 Тегани о ученикија вакерѓе леске: „Ако асавки тани и врска машкар о ром хем и ромни, тегани пошукар тано те на кхувел пе ко брако“. 11 А ов вакерѓа ленге: „Нашти сарине те живинен аѓаар, него само окола со иси лен адава поклон. 12 Иси несаве со нашти те женинен пе* соске бијандиле аѓаар, иси јавера со нашти те женинен пе соске о мануша керѓе лен те овен аѓаар, хем иси асавке со на мангена те женинен пе башо небесно Царство. Кој шај те живинел аѓаар, нека живинел аѓаар“.

13 Тегани о родителија анѓе ки лесте е чхавен те благословинел лен* хем те молинел пе ленге, ама о ученикија хољанѓе хем вакерѓе ленге те циден пе. 14 А о Исус вакерѓа: „Мукхен е чхавен! Ма чхинавен лен те авен ки манде, соске асавкенге тано дендо о небесно Царство“. 15 Хем ов благословинѓа лен хем гело песке адатхар.

16 Тегани јекх терно мануш ало ки лесте хем пучља ле: „Учителе, саво шукарипе мора те керав те шај те добинав вечно живото?“ 17 А ов вакерѓа леске: „Соске пучеа ман башо адава сој тано шукар? Само јекх тано шукар. Адалеске, ако мангеа те добине живото, стално икер тут ко е Девлескере заповедија“. 18 О мануш пучља ле: „Кола заповедија?“ О Исус вакерѓа леске: „Ма мудар, ма кер прељуба, ма чор, ма де ховавни изјава сар сведоко, 19 поштујн тле даде хем тле даја, хем манг тле пашутне сар туте“. 20 Тегани о терно мануш вакерѓа леске: „Ме керава са акава. Со панда ваљани те керав?“ 21 О Исус вакерѓа леске: „Ако мангеа те ове совршено,* џа хем бикин са со иси тут хем де о паре е чороленге, тегани ка овел тут барвалипе ко небо. Пало адава ава хем ов мло ученико“. 22 Кеда о терно мануш шунѓа акава, гело песке разочаримо соске сине ле баро барвалипе. 23 Тегани о Исус вакерѓа пле учениконге: „Чаче вакерава туменге, пхаро ка овел е барвалеске те кхувел ко небесно Царство. 24 Палем вакерава туменге, полокхо ка овел те накхавел пе камила тари сув, него о барвало мануш те кхувел ко е Девлескоро Царство“.

25 Кеда о ученикија шунѓе адава, бут изненадинѓе пе хем пучле ле: „Тегани кој шај те спасинел пе?“ 26 О Исус дикхља лен ко јакхја хем вакерѓа ленге: „О мануша адава нашти те керен, ама о Девел шај те керел са“.

27 Тегани о Петар вакерѓа леске: „Аке, амен мукхлем са хем џаја пали туте. Со ка добина башо адава?“ 28 О Исус вакерѓа ленге: „Чаче вакерава туменге, кеда о Девел ка керел са о буќа неве хем о манушикано Чхаво ка бешел ко пло славно престол, тегани тумен со џана сине пали манде ка бешен ко 12 престолија хем ка судинен е 12 племенге таро Израел. 29 Хем секој со мукхља кхера, пхраља, пхења, дад, дај, чхаве или пхув баши манде, ка добинел 100 пути повише хем ка добинел вечно живото.

30 А бут џене сој тане прва ка овен последна, а о последна ка овен прва.