Дујто писмо е Јованескоро

1 Ме о пхуро мануш,* пишинава џи ки бирими пхен* хем џи ко лакере чхаве, колен со чаче мангава, а на само ме, него хем са окола со запознајнѓе о чачипе. 2 Мангаја тумен себепи о чачипе кова сој ко амаре виле хем кова со ка ачхол адатхе засекогаш. 3 О Девел, о Дад, хем лескоро Чхаво, о Исус Христос ка сикавен аменге о шукарипе со на заслужинаја ле хем пумари милост, ка ден амен мир, ка ден амен о чачипе хем ка сикавен аменге мангипе.

4 Бут радујнава ман соске дознајнѓум кај несаве таро тле чхаве живинена спрема о чачипе, сар со заповединѓа аменге о Дад. 5 Адалеске, акана пхене, родава тутар те сикавен мангипе јекх јекхеске. (На пишинава туке неви заповед, него заповед со добинѓем ла панда таро почеток.) 6 Хем о мангипе значинела акава: понадари да те живина спрема лескере заповедија. Сар со шунѓен ко почеток, лескири заповед тани секогаш те сикавен мангипе. 7 Соске, ко свето појавинѓе пе бут мануша со ховавена е јаверен. Ола на признајнена кај о Исус Христос ало ки пхув сар мануш. Ола тане адала со ховавена хем сој против о Христос.*

8 Пазинен те на нашавен о буќа коленге со амен бут трудинѓем амен, те шај те добинен и целосно награда. 9 Секова јекх со на ачхола ко адава со сикавѓа о Христос хем сикавела нешто со нане точно, о Девел нане леа. Секова јекх со ачхола ко е Христосескоро сикљојбе, о Дад хем о Чхаво тане леа. 10 Ако некој авела ки туменде хем на сикавела спрема адава со о Христос сикавѓа, ма приминен ле ко тумаро кхер, ни ма поздравинен ле. 11 Соске, окова со поздравинела ле, учествујнела ко лескере лошна постапке.

12 Иако иси ман бут со те вакерав туменге, на мангава те пишинав туменге башо адава ко писмо, соске надинава ман кај ка шај те авав ки туменде, те дикха амен хем те кера лафи, те шај тумари радост те овел целосно.

13 Поздравинена тут о чхаве тле пхењакере, која сој бирими.