Џи ко Римјања
1 Ме о Павле, кова со сиум о робо е Исус Христосескоро,* пишинава туменге акава писмо. Ов викинѓа ман* те овав апостоли хем биринѓа ман те проповединав е Девлескоро шукар хабери. 2 О Девел акава шукар хабери ветинѓа ле бут време англедер преку пле пророкија ко света списија. 3 О хабери керела лафи башо лескоро Чхаво, кова со сине бијамо ки пхув сар потомцо е Давидескоро, 4 ама адалеа со о Девел преку пли сила* воскреснинѓа ле таро муле, сине јасно кај ов тано е Девлескоро Чхаво, адава тано амаро Господари о Исус Христос. 5 О Девел преку лесте сикавѓа аменге пло шукарипе со на заслужинаја ле. О Исус биринѓа ман те овав апостоли те шај те поможинав е манушенге таро са о народија те сикавен вера, те овен послушна хем аѓаар те сикавен чест лескере анавеске. 6 А машкар ленде, тумен да сиен викиме те овен е Исус Христосескере следбеникија. 7 Акава писмо тано џи ко са окола сој ко Рим, колен со о Девел мангела хем колен со викинѓа те овен света:
Нека овел тумен о шукарипе со на заслужинаја ле хем о мир таро Девел, кова сој амаро Дад, хем таро Господари о Исус Христос.
8 Најангле, преку о Исус Христос, благодаринава е Девлеске баши сариненге туменге, соске баши тумари вера керела пе лафи ко цело свето. 9 Служинава е Девлеске цело вилеа аѓаар со проповединава о шукар хабери башо лескоро Чхаво, хем о Девел џанела кај ме секогаш спомнинава тумен ко мле молитве. 10 Молинава ман е Девлеске ако шај хем ако тани лескири волја те успејнав те авав ки туменде. 11 Соске, едвај аџикерава те дикхав тумен, те шај те дав тумен несаво духовно поклон* со ка керел тумари вера те овел позорали. 12 Уствари, заедно те охрабрина амен, ме тумаре, а тумен мле вераја.
13 Пхраљален, мангава те џанен кај бут пути мангљум те авав ки туменде, те проповединав хем те дикхав сар о мануша таро адава тхан хем о мануша таро јавера народија овена ученикија, ама нашти сине. 14 Дужно сиум те проповединав са е манушенге, хем е Грконге хем е манушенге таро јавера народија, хем е учиме манушенге хем околенге со нане учиме. 15 Адалеске иси ман бари желба те вакерав о шукар хабери туменге да ко Рим. 16 Ме на лаџава таро шукар хабери, соске преку лесте о Девел сикавела пли сила, која со спасинела секоле јекхе со сикавела вера, прво е Евреен, а пало адава е Гркон. 17 Соске, окола со верујнена, преку адава хабери дикхена е Девлескири праведност хем адава керела ленгири вера те овел позорали. Сар сој пишимо ко Списија: „О праведнико ка живинел адалеске со иси ле вера“.
18 О Девел сикавела пли холи таро небо упро са о мануша со керена лошна хем неправедна буќа. Адала мануша на мукхена те дознајнел пе о чачипе. 19 О буќа со шај те џанен пе башо Девел ола јасно шај те дикхен лен, соске о Девел сикавѓа ленге са. 20 Соске, иако нашти те дикха е Девле, сепак преку о буќа со створинѓа лен панда таро време кеда керѓа о свето, о мануша шај те дикхен лескере особине, сар сој лескири вечно моќ, а исто аѓаар шај те дикхен кај ов чаче тано Девел. Адалеске, адале манушен со на верујнена ко Девел, нане лен нисаво изговор. 21 Иако ола џанле кај ов тано о Девел, сепак на сикавѓе леске чест хем на заблагодаринѓе пе леске. Ленгере мисле уле безвредна хем ленгере виле нашти сине те хаљовен.* 22 Асавке мануша иако вакерена кај тане мудра, ола уствари тане глупава. 23 Соске, наместо те ден чест е Девлеске кова со нашти те мерел, ола дена чест е идоленге кола со личинена сар о мануша кола со мерена, сар о птице, сар е штаре пренгере животне хем сар о сапа хем о гуштерија.
24 Адалеске о Девел мукхља лен понадари да те постапинен спрема о нечиста желбе со иси лен ко вило, хем аѓаар ола лаџакерена пумаро тело. 25 Ола менинѓе о чачипе башо Девел ховајбаја хем обожавинѓе о буќа со створинѓа о Девел хем служинѓе ленге, наместо е Створителеске кова со створинѓа са. Ле ваљани те фалинел пе засекогаш. Амин. 26 Адалеске о Девел мукхља лен те овен контролириме таро одвратна неморална желбе. Ленгере џувља мукхле о природна односија е муршенцар те шај те керен адава со нане природно. 27 Аѓаар о мурша да мукхле о природна односија е џувленцар хем тхабиле тари страст башо јавера мурша, аѓаар мурш муршеа керена адава сој одвратно. Ола целосно приминена пумари казна со заслужинена ла башо пумаре румиме постапке.
28 Адалеске со ола мислинѓе кај нане важно шукар те пенџарен е Девле, о Девел мукхља лен понадари да те мислинен ко безвредна буќа хем те керен адава со на ваљани. 29 Асавке мануша тане ко са неправедна, лошна, бичале јакхјакере хем румиме. Ола тане пхерде завист, мударена, акошена пе е јаверенцар, ховавена, хем мислинена е јаверенге лошнипе. Ола оговоринена, 30 клеветинена,* мрзинена е Девле, дрска тане, чалмџие, икерена пе ко барипе, мислинена сар те керен лошнипе, на шунена пле родителен, 31 нане разумна, на икерена пе ко пло лафи, на мангена пле фамилија хем нане лен милост спрема о јавера. 32 Иако ола бут шукар џанена е Девлескири праведно осуда, кај о мануша со керена асавке буќа заслужинена те мерен, сепак на само со ола керена акала буќа, него хем одобринена е јаверен да со керена асавке буќа.