Џи ко Филемон
1 Ме о Павле, кова со сиум пханло башо Христос Исус, а акате манцар тано хем амаро пхрал о Тимотеј, пишинава акава писмо џи туте Филемон, кова со сиан амаро мангло пхрал хем соработнико, 2 џи ки Апфија, амари пхен, хем џи ко Архип, кова со служинела верно сар војнико заедно аменцар, хем џи ко собрание кова со кхедела пе ко тло кхер:
3 Нека овел тумен о шукарипе со на заслужинаја ле хем о мир таро Девел кова сој амаро Дад хем таро Господари о Исус Христос.
4 Секогаш благодаринава ман мле Девлеске кеда спомнинава тут ко мле молитве, 5 соске шунава баши тли вера ко Господари о Исус хем башо тло мангипе спрема лесте хем спрема са о света мануша.* 6 Молинава ман и вера со иси тут, која со иси амен да, те керел те ове свесно баши секоја шукар бути со иси амен преку о Христос. 7 Бут радујнѓум ман хем охрабринѓум ман кеда шунѓум башо тло мангипе мо пхрал, соске ту охрабринѓан* о виле адаленгере сој света.*
8 Адалеске, иако иси ман бари слобода е Христосеске ко анав те заповединав туке те кере адава сој исправно, 9 ме повише би мангава те замолинав тут те кере адава таро мангипе, соске ме, о Павле, кова со сиум пхуро мануш хем акана сиум пханло башо Христос Исус, 10 молинава тут башо мло чхаво о Онисим, колеске со уљум сар дад ко затвор. 11 Ов англе на сине туке корисно, ама акана тано корисно хем туке хем манге. 12 Ле, коле со бут мангава, бичхалава ле те иранел пе ки туте.
13 Би мангава ов те ачховел акате манцар, те шај туке ко тхан те служинел манге џикоте сиум пханло башо шукар хабери. 14 Ама на мангљум те керав нешто бизо англедер те пучав тут дали ту ка согласине тут адалеа, соске на мангава те кере несаво шукарипе адалеске со мора те кере, него адалеске со мангеа. 15 Шај адалеске да одвојнѓа пе тутар кратко време, те шај те иранел пе туке засекогаш, 16 ама на више сар робо, него повише таро робо, сар мангло пхрал. Ме бут мангава ле, а ту ка манге ле панда повише, соске тано туке хем робо хем пхрал ко Господари. 17 Адалеске, ако дикхеа ман сар амал, примин ле ко шукар начин сар со би приминеа ман. 18 Ако грешинѓа туке нешто или ако дужинела туке нешто, пишин ле адава манге ки сметка. 19 Ме, о Павле, пишинава туке мле вастеа: ме ка платинав туке адава. А ни на ваљани те спомнинав туке кај ту дужинеа манге чак тло живото да. 20 Молинава тут пхрала, себепи о Господари, поможин манге. Охрабрин мло вило себепи о Христос.
21 Пишинава туке, соске сиум уверимо кај ка шуне ман, а џанава кај ка кере чак повише таро адава со замолинѓум тут те кере. 22 Освен адава, спремин манге тхан коте со ка шај те ачховав, соске надинава ман кај себепи тумаре молитве ка овав ослободимо хем палем ка авав ки туменде.
23 Поздравинела тут о Епафрас, кова со исто сар манде тано пханло ко затвор башо Христос Исус. 24 Исто аѓаар, поздравинена тут мле соработникија о Марко, о Аристарх, о Димас хем о Лука.
25 Амаро Господари о Исус Христос нека сикавел туменге о шукарипе со на заслужинаја ле адалеске со иси тумен исправно стави.