Писмо таро Јуда

1 Ме о Јуда, робо е Исус Христосескоро, а пхрал е Јаковескоро, пишинава џи ко са окола сој викиме, колен со о Девел, о Дад, мангела хем аракхела лен башо Исус Христос:

2 О Девел нека сикавел туменге панда повише милост хем мангипе хем нека дел тумен панда побаро мир.

3 Мангле пхраљален, англедер чаче мангљум те пишинав туменге башо амаро заедничко спасение, ама акана дикхљум кај иси потреба те пишинав туменге те шај те поттикнинав тумен храбро те боринен тумен баши вера која со јекх пути засекогаш сине денди околенге сој света. 4 Акава керава адалеске со машкар туменде кхувѓе почоране несаве мануша кола со више одамна тане осудиме спрема о Списија. Ола тане лошна мануша кола со е Девлескоро шукарипе со на заслужинаја ле користинена сар изговор башо пумаро безобразно понашибе* хем кола со нане верна амаре единствено сопственикоске хем Господареске, е Исус Христосеске.

5 Иако са акава више шукар џанена, мангава те сетинкерав тумен кај о Јехова,* иако спасинѓа јекхе народо таро Египет, пало адава ов уништинѓа околен со на верујнѓе. 6 Е ангелен да, кола со на ачхиле ки пли положба со сине лен, него мукхле пло чачутно тхан живибаске, ов икерела лен пханле е вечна синџиренцар ки бари темница те овен судиме ко баро диве. 7 Исто аѓаар, о Содом хем Гомор, хем о дизја околу ленде, мукхле пе ко гадно неморал* хем задоволинѓе пумаре телесна желбе кола со нане природна. Ола тане осудиме ки јаг со вечно тхабљола, а адава со уло ленцар предупредување тано аменге.

8 Освен адава, акала да мануша, кола со почоране кхувѓе машкар туменде, стално ховавена пумари годи, мељарена пумаро хем е јаверенгоро тело, дикхена сар потеле пестар околен со иси лен авторитети хем керена лошно лафи околендар коленге со о Девел сикавѓа чест. 9 А кеда о архангел Михаел сине ле проблеми е Бенгеа башо е Мојсеескоро тело, ни на мислинѓа кај ов тано адава со ваљани те осудинел ле лафенцар со вреџинена, него вакерѓа леске: „О Јехова* нека укоринел тут“. 10 Ама акала мануша, керена лошно лафи башо са о буќа кола со уствари на хаљовена лен. А са адава со хаљовена ле водиме таро инстинкт сар неразумна животне, керела панда повише те овен румиме.

11 Тешко ленге, соске геле пало е Каинескоро друмо, хем баши награда сиѓарѓе те грешинен сар о Валаам, хем муле адалеске со бунтовно керѓе лафи сар о Кореј. 12 Ола тане опасна сар гаравде карпе тело пани џикоте хана хем пиена туменцар кеда кхедена тумен сар пхраља, пастирија кола со бизи дар грижинена пе само песке, облакија со на анена бршим колен со ингарела и бавлал, кашта колен со ни ко крајо тари есен нане лен плоди, кола сој целосно шуке хем икалде таро корено, 13 дива морска бранија кола со керена пена хем аѓаар икалена те дикхјол адава колестар со ваљани те лаџан, ѕвезде кола со движинена пе бизо правцо, колен со засекогаш аџикерела лен и најкали темница.

14 Баши ленде пророкујнѓа хем о Енох, кова сој о ефтато ко редо пало Адам, кеда вакерѓа: „Аке, о Јехова* ало пле света ангеленцар кола сој добором бут со никој нашти те гејнел лен,* 15 те судинел сариненге хем те осудинел са е лошна манушен башо са о лошна буќа со керѓе лен хем те осудинел о дрска лафија кола со адала грешникија вакерѓе лен против лесте“.

16 Адала тане мануша кола со жалинена пе хем нане задоволна адалеа со иси лен ко живото, живинена спрема пумаре желбе хем фрдена баро чалми пумаре лафенцар, а ко исто време фалинена е јаверен те шај те овел лен несави корист лендар.

17 А тумен, мле мангле, сетинен тумен ко лафија кола со вакерѓе лен* о апостолија амаре Господарескере е Исус Христосескере. 18 Ола вакерѓе туменге: „Ко последна диве ка појавинен пе мануша кола со ка асан башо адава сој шукар хем ка џан пало пумаре лошна желбе“. 19 Акала мануша тане адала со керена поделбе, ола тане телесна мануша* колен со нане лен е Девлескири сила.* 20 А тумен, мангле пхраљален, користинен тумари вера која сој бут свето те зојракерен коркори тумен хем мукхен е Девлескири сила* те водинел тумаре молитве, 21 те шај те ачховен ко е Девлескоро мангипе џикоте аџикерена и милост амаре Господарескири, е Исус Христосескири која со ингарела ко вечно живото. 22 Исто аѓаар, понадари да сикавен милост околенге со иси лен сумње, 23 спасинен лен аѓаар со ка циден лен тари јаг. А понадари да сикавен милост е јаверенге, ама џикоте керена адава, пазинен тумен хем мрзинен чак о шеј кова со мељардило таро тело.*

24 О Девел шај те заштитинел тумен те на сопкинен тумен хем шај те керел те терѓовен англи лескири слава* бизи флека хем те дел тумен бари радост. 25 Е единствено Девлеске, амаре Спасителеске преку о Исус Христос амаро Господари, припадинена и слава, о барипе, и моќ хем о авторитети отсекогаш, акана хем засекогаш. Амин.