Трито писмо е Јованескоро
1 Ме о пхуро мануш,* пишинава џи ко мангло Гај, касте со чаче мангава.
2 Манглеа пхрала, молинава ман те овел тут шукар састипе хем са о буќа ко тло живото те џан шукар, сар џи акана. 3 Соске, бут радујнѓум ман кеда о пхраља але хем вакерѓе кај икереа тут ко чачипе хем кај живинеа спрема о чачипе. 4 Ништо на керела ман порадосно* таро адава те шунав кај мле чхаве живинена спрема о чачипе.
5 Манглеа пхрала, са адава со кереа те шај те поможине е пхраленге, иако на пенџареа лен, сикавела кај сиан верно. 6 Ола вакерѓе е собраниеске башо тло мангипе. Молинава тут кеда ка џан песке, испратин лен ко начин сар со личинела е Девлескере слугенге. 7 Соске, ола геле те проповединен себепи е Девлескоро анав, бизо те очекујнен нешто е манушендар таро свето. 8 Адалеске, амен сием дужна асавке пхраленге те сикава гостопримство, те шај те ова ленцар соработникија ко чачипе.
9 Пишинѓум нешто е собраниеске, ама о Диотреф, кова со мангела те овел прво машкар ленде, на прифатинела хем на поштујнела ништо таро адава со вакераја. 10 Адалеске, ако авава, ка керав лафи башо буќа со керела лен, сар сој о лошна лафија со ширинела лен баши аменде. Ама адава да нане леске доволно, ов на мангела те приминел е пхрален хем на сикавела ленге поштовање. Хем ов трудинела пе те чхинавел хем те икалел таро собрание околен со мангена те приминен е пхрален.
11 Манглеа пхрала, ма џа пало пример околенгоро со керена лошна буќа, него џа пало пример околенгоро со керена адава сој шукар. Кој керела шукарипе, авела таро Девел. Кој керела лошнипе, на пенџарѓа е Девле. 12 Башо Димитриј, сарине вакерена шукар буќа, хем адава со ов живинела спрема о чачипе, сикавела кај адава тано чаче аѓаар. Уствари, амен да вакераја шукар буќа баши лесте хем ту џанеа кај адава со амен вакераја тано чаче.
13 Сине ман бут буќа со мангава те вакерав туке, ама на мангава те пишинав туке више ко писмо. 14 Него надинава ман кај панда хари ка дикхав тут, хем ка шај те кера лафи.
Нека овел тут мир.
О амала поздравинена тут. Поздравин мандар е амален, секас посебно.