3 ПУЧИБЕ
Сар те керав лафи мле родителенцар?
СО БИ КЕРЕА ТУ?
Замислин туке акаја ситуација: Среда раќате. О Даниел (17) само со завршинѓа пли бути кхере, бешља конечно те одморинел пе! Мукхља и телевизија хем пружинѓа пе ки пли омилено фотеља.
Ко адава моменти авела лескоро дад кова со нане баш расположимо.
„Даниел! Бешљан англи телевизија, а нели пхенѓум туке те поможине тле пхрале те пишинел о домашно! Никогаш на шунеа ман!“
„Еј пак почминѓа“, вакерела бут похари о Даниел, ама лескоро дад шунела адава.
О дад лескоро хољамо пхенела: „Со вакерѓан!?“
„Ништо“ вакерела о Даниел, хем иранела пе јакхја.
Е акана о дад лескоро чаче хољанѓа! „Ма те шунав тут панда јекх пути те кере манцар аѓаар лафи“ вакерѓа леске.
Те ове сине ко е Даниелескоро тхан, со би кереа сине те шај те чхинаве и кавга?
АЧХОВ ХЕМ РАЗМИСЛИН!
И комуникација тле родителенцар тани сар кеда возинеа врда. Ако ко друмо иси несаве пречке на значинела кај тано крајо башо са — шај те аракхе јавер да друмо.
ПРИМЕР:
„Пхаро и манге те керав лафи мле дадеа“ пхенела и Лија. „Понекогаш ка пхенав леске нешто а ов пучела ман ,Со вакерѓан на шунѓум?‘ “
Е ЛИЈА ИСИ ЛА НАЈХАРИ ТРИН ОПЦИЕ:
А. Те викинел пле дадеске.
И Лија хољами викинела: „Абе тато, шај ли те шуне ман! Акава тано манге важно!“
Б. Те на керел леа лафи.
И Лија откажинела пе, хем на керела побутер леа лафи башо пле проблемија.
В. Те аџикерел пошукар моменти те керел леа лафи.
И Лија покасно керела леа лафи или пишинела леске писмо башо пло проблеми.
Според туте, која опција ваљани те биринел и Лија?
РАЗМИСЛИН: Е Лијакоро дад размислинела башо нешто јавер хем на дикхела кај ој нервиринела пе. Ако и Лија биринела и опција А, лакоро дад нане те хаљовел соске викинела леске. Акале опцијаја нане те керел о дад лакоро полокхесте те шунел ла, а исто аѓаар ка сикавел кај на поштујнела ле (Ефешаните 6:2). Значи, акалеа нане ништо те керел.
О пречке ки тли комуникација тле родителенцар на ваљани те пханден тло друмо те кере ленцар лафи
И опција Б шај тани најлокхи, ама нане и најпаметно. Соске? Те шај успешно те решинел о проблемија, и Лија мора те керел пле дадеа лафи, ов мора те џанел со овела лакере животоја.
Ама е опцијаја В, и Лија на мукхела ништо те спречинел ла те керел лафи пле дадеа, него само мислинела кај адава ка овел пошукар те керел ле ки јавер прилика. Ако одлучинѓа те пишинел леске писмо, шај одма ка осетинел пе пошукар.
Адава со ка пишинел писмо ка поможинел лаке пошукар те размислинел со чаче мангела те вакерел пле дадеске. Кеда ка читинел о писмо, ов ка џанел башо со мангља и Лија те керел леа лафи, а адава ка поможинел ле пошукар те хаљовел со мучинела ла. И опција В корисно тани хем е Лијаке хем лакере дадеске. Бизи разлика дали леа ка керел лафи лично или ка пишинел леске писмо, ако и Лија биринѓа и опција В, ка сикавел кај мангела те шунел о совет тари Библија кова со вакерела: „Те кера о буќа со анена мир“ (Римјаните 14:19).
Кола јавера опцие иси е Лија?
Пишин ако џанеа несави јавер опција, хем пало адава пишин сар ка влијајнел адава ки лате.
ОВ КОНКРЕТНО ХЕМ ЈАСНО
Ма бистре, со вакерѓан хем сар ка хаљовен адава тле родителија, нане секогаш исто.
ПРИМЕР:
Тле родителија пучена тут сој туке. Ту пхенеа: „На мангава те керав лафи башо адава“.
Ама ола адава дикхена ле сар: „На верујнава туменге. Пошукар ка вакерав мле амаленге“.
Замислин туке кај иси тут баро проблеми хем тле родителија мангена те поможинен тут. Ако вакереа ленге: „Ма секиринен тумен, коркори ка решинав ле“.
Со шај те шунен тле родителија?
Со ка овел пошукар те вакере?