О Исус биринѓа дешудуј апостолија

Откеда о Исус проповединѓа околу јекх текваш берш, ало време те анел јекх важно одлука. Ов ваљанѓа те биринел ученикија кола со највише ка соработинен леа хем кола со ка предводинен ко христијанско собрание. Те шај те анел шукар одлука, е Исусеске ваљани сине помош таро Јехова. Ов гело ки јекх планина коте со шај сине те овел коркори, хем адари молинѓа пе цело рат. Тајсутно диве сабајле, о Исус викинѓа несавен таро пле ученикија хем лендар биринѓа 12 апостолија. Сетинеа тут ли сар сине ленгере анава? Ленгере анава сине Петар, Андреј, Јаков, Јован, Филип, Вартоломеј, Тома, Матеј, Јаков — о чхаво е Алфејескоро, Тадеј, Симон хем Јуда Искариот.

Акала 12 апостолија ваљани сине те патујнен е Исусеа. Откеда сикавѓа лен, ов бичхалѓа лен те проповединен. О Јехова денѓа лен моќ те палден е демонен хем те сасљарен насвален.

О Исус дикхела сине е апостолен сар амала хем сине ле доверба ки ленде. О фарисеија мислинѓе кај ола нане писмена хем кај тане проста мануша. Ама, о Исус ценинела лен сине хем сикавела лен сине сар те проповединен. Ола ваљани сине те ачховен леа ко најважна моментија таро лескоро живото, сар на пример англедер те мерел хем пало лескоро воскресение. Исто сар о Исус, повише таро апостолија сине тари Галилеја. Несаве лендар сине жениме.

О апостолија сине несовршена хем керена сине грешке. Понекогаш вакерена сине нешто бизо те размислинен хем анена сине несаве лошна одлуке. Освен адава, понекогаш сине бут нестрплива, па чак акошена пе сине кој лендар тано поважно. Ама, о апостолија сине шукар мануша со мангена сине е Јехова. Покасно, ола ваљани сине те овен о темели таро христијанско собрание.