О Корнелиј добинѓа свети дух

Ки Цезареја живинела сине јекх римско воено заповеднико со викинела пе сине Корнелиј. Иако на сине Евреи, о Евреија поштујнена ле сине. О Корнелиј бут поможинела сине е чороленге. Ов верујнела сине ко Јехова хем редовно молинела пе сине леске. Јекх диве, е Корнелијаске појавинѓа пе јекх ангели хем вакерѓа леске: „О Девел шунѓа тле молитве. Адалеске, бичхал манушен ки диз Јопа, коте сој о Петар, хем вакер леске те авел ки туте“. О Корнелиј одма бичхалѓа трине џенен ки Јопа, која сине околу 50 километрија јужно тари Цезареја.

Башо адава време, е Петаре сине визија. Ов дикхља животне со о Евреија на смејнена сине те хан лен, хем шунѓа гласо со вакерѓа леске те хал адала животне. О Петар вакерѓа: „Ама ме никогаш ко живото на хаљум животне со нане чиста“. О гласо вакерѓа леске: „Ма вакер кај акала животне нане чиста, соске о Девел керѓа лен чиста“. Исто аѓаар, е Петареске сине вакердо: „Англо тло удар иси трин мануша. Џа ленцар“. О Петар гело ко мануша хем пучља лен соске але. Ола одговоринѓе леске: „Бичхалѓа амен о Корнелиј, о римско воено заповеднико. Вакерѓа те аве аменцар ки Цезареја“. О Петар викинѓа е манушен адаја рат те ачховен ки лесте. О јавер диве, ов гело ленцар ки Цезареја, хем заедно ленцар геле несаве пхраља тари Јопа.

Кеда о Корнелиј дикхља е Петаре, пело англи лесте ко кочака. Ама, о Петар вакерѓа: „Ушти! Ме да сиум само мануш. О Девел вакерѓа манге те авав ко то кхер, иако о Евреија на џана ко мануша таро јавера нацие. Акана молинава тут, вакер манге соске викинѓан ман“.

О Корнелиј вакерѓа е Петареске: „Англедер штар диве молинѓум ман е Девлеске, хем тегани јекх ангели вакерѓа манге те бичхалав некас те викинен тут. Молинава тут сикав амен башо Јехова“. О Петар пхенѓа: „Акана халиљум кај о Девел на одвојнела е манушен. Ов прифатинела секоле мануше со мангела те служинел леске“. О Петар сикавѓа лен бут буќа башо Исус. Тегани о Корнелиј хем о мануша со сине леа добинѓе свети дух хем крстинѓе пе.