5. Ка авел ли крајо е мукенге?

Соске тано важно о одговор

Ако иси амен надеж кај ка авел крајо е мукенге, адава ка поможинел аменге те овел амен позитивно стави спрема о живото хем чак ка поможинел амен те ова паше е Девлеа.

Размислин

Бут мануша мангена те чхивен крајо е мукенге, ама нашти целосно те успејнен ко адава. Размислин башо акала буќа:

Иако и медицина тани бут напредно...

• О насвалипе ко срце тано јекх таро главна причине соске мерена о мануша.

• Секова берш таро рако мерена милиоња мануша.

• Ко свето иси бут заразна насвалипа. Башо несаве лендар панда на аракхле иљачи, окола насвалипа со сине уништиме палем иранена пе, а појавинена пе неве да, вакерела о д-р Дејвид Блум ко списание Frontiers in Immunology.

Иако несаве пхувја тане бут барвале...

• Секова берш мерена милиоња чхаве. Акава посебно случинела пе ко тхана коте со о мануша тане чороле.

• Штар текваш милијарде мануша нане лен тоалети кхере.

• Бут милиоња мануша нане лен чисто пани пијбаске.

Иако о мануша авдиве џанена бут повише башо манушикане правија...

• Ко бут пхувја панда керела пе трговија манушенцар, а ко несаве пхувја окола со керена адава на одговоринена англо закони. И причина тани со о властија „нане свесна башо акава проблеми или нашти те икљовен леа ко крајо“, пишинела ко извештај таро Обединета нацие.

  ДОЗНАЈН ПОВИШЕ

  Дикх о видеоклипи Сој е Девлескоро Царство? ки jw.org.

Со вакерела и Библија

О Девел мангела амен хем грижинела пе аменге.

Нане леске са јекх кеда иси амен дукх хем туга.

„[О Девел] на пхандела пле јакхја кеда иси неволја е мучиме мануше. Пло муј на гаравѓа лестар хем шунѓа ле кеда родинѓа лестар помош“ (ПСАЛМ 22:24).

„Са тумаро пхарипе фрден леске, соске ов грижинела пе туменге“ (1. ПЕТРОВО 5:7).

О муке нане те постојнен засекогаш.

И Библија вакерела аменге кај е Девлескири намера е манушенцар ка исполнинел пе.

„[О Девел] ка косел секоја асвин таро ленгере јакхја, хем мерибе нане те овел више, ни жалибе, ни ројбе, ни дукха“ (ОТКРОВЕНИЕ 21:3, 4).

О Девел ка цидел са о причине кола со анена муке е манушенге.

Акава ка керел ле преку пло Царство, башо кова со дознајнаја тари Библија кај тано влада со ка владинел таро небо.

„О небесно Девел ка ваздел царство кова со никогаш нане те овел уништимо. Хем адава царство нане те дел пе јавере народоске... А коркори ов ка ачховел засекогаш“ (ДАНИЕЛ 2:44).